Ibrani 11
11
Naduk aphwami logon enede Allah pam he’berik welat, togu legesa wene
1Enede Allah pam he’berik welagai ai ebe re, disogo.
“Op ema,” oluk demat opogulat,
“Di a’ge yu a’ge nenil hogwi erlak a’geat de, demat oruak nak o,” oluk pobi togulat, ogwi aiat o. 2Is aphwami nadugat enede asogo Allah pam he’berik welegesa ai pam, Allah en,
“Is op,” oluk enebe ebam lioksogo welaga. 3#Kej. 1:1; Mzm. 33:6,9; Yoh. 1:3Allah iak pam en ’bogorl ’gwiang di a’ge yu a’ge ’berlegat nenil hogu lege yema re, nis en e,
“Nenil hogu lege erlak a’ge pam walhesimu oruak o,” oluk, nenede at ebam he’berik poluk pobitu o.
4 #
Kej. 4:3-10
At ap onuk Kain en, we a’ge nak Allah wogosi a’geat de, at Habel ai nak e, ede Allah pam he’berik poluk op a’ge Allah wogesimu, at en e,
“Habel nak e, ebabut hegit op hegi,” oluk egei. Asogo egeimu en, at Habel ebe waraga a’geat de, ede Allah pam he’berik welat tegei ai, at en,
“An disogo tegis,” oluk mo’gulnentasu ’gela’ge modok oruak o.
5 #
Kej. 5:21-24
At ap Henokh ede Allah pam he’berik welaga ai pam, ebe warom erlak. We, Allah en elaluk ’ga’go wesimu, is aphwami logon en ebe palo tigisa a’geat de, enil ho erlak. At ebe asogo owan wo erlakhwe,
“At Henokh Allah ogola opsogo nak taga laga,”
oluk egesema Allah iak pam pelal wogo oruak. 6Aphwami enede Allah pam he’berik pogwi erlak holuk e, at ogola opsogo tu modok mia o. Ye, at e’bek womogoluk holuk e, is en e,
“Allah demat oruak o,” oluk opogulat,
“At ebe enaluk omogoluk tua holuk, at en o’go demat a’ge wogentasuat o,” oluk opogulat, tu ai o.
7 #
Kej. 6:13-22
At ap Nuh ogo re, ede Allah pam he’berik poluk, di wene yu wene pobuk om a’ge Allah en hwese’bi mo’gulesimu ebe il ho erlak a’geat de,
“Demat ema a’ge mo’gulnesi hegi,” oluk Allah iak hologo welat, ik so mesik at eiyagai enemin delonobu a’ge paget weregei. Asogo weregeimu, Allah en aphwami wene enebam poluk enebe warenebegei a’geat de, at Nuh omu nak e, ede Allah pam he’berik pesi ai pam, Allah en,
“At op,” oluk agap delegei o.
8 #
Kej. 12:1-5
At Abraham ogo re, Allah en yo’go poluk,
“Hat o mesik eiye welerinogoluk wokheik en e, lak o,” oluk obok mo’gulesimu, at en e,
“Wene ai demat,” oluk ede Allah pam he’berik poluk o ’geba laik hwe, oluk eperlak welarat de, waga. 9-10#Kej. 35:27At Abraham wagarik, o obok mo’gulesi a’ge ano arat wagarik welarat de,
“O yu erlak o. O muat mesik Allah en elit a’ge walholuk ningtak a’ge pam weregei a’ge mesik oruak o,” oluk, yetharok modok welat, o sum a’ge ya werik da werik nogwil denagalat, ap ’bok a’ge ’gela’ge nese laga. Ai ’gela’geat, ap Ishak emin, Yakub emin, onogola en e,
“Allah en,
Disogo wokhentaik, oluk obok egei ai, nis neneminat mo’gulnentesimu eiye omul,” oluk asogoat no’gu legesa.
11 #
Kej. 18:11-14; 21:2 Ye, at Abraham ebe sebal agarik ugwe Sara abeli welaga a’geat de, at Abraham ede en e,
“Allah en obok mo’gulnentesi ano demat woknontouwayat o,” oluk ede Allah pam he’berik poluk welaga ano pam, hwe Sara omlogo doru hegit agama deregei. 12#Kej. 15:5; 22:17; 32:12Asogo deregei ai en, ogun Abraham ebe sebal agarik warom ’gela’ge welaga a’geat de, at ebe mesigat a’ge en dogo’gwe a’ge enebe hwesagal ’bogorl pam a’bik welago ai ’gela’ge emin, ik ’berlik ik laut ye’gelak esa’go’gwe welago ai ’gela’ge emin, a’bik ene’gik wenaru modok mia ai ’gela’ge wiyalegesa ai o.
13 #
Kej. 23:4; 1Taw. 29:15; Mzm. 39:12 Is aphwami ononuk il waga legi a’ge ai ’berlegat en,
“At Allah demat,” oluk enede at ebam he’berik poluk welegesa ai pam, Allah en obok mo’gulentesi ai ebe wo erlak a’geat de, aphwami en di a’ge yu a’ge walegat oruakma enil yetholuk, onogola enagai hogwi ai ’gela’ge, is enede pam en,
“Demat wul a’ge oruak o, oluk opogu lege ai en, ’gwiangma yema is ap mu a’ge onowi lo’gwe ’bogulogo lagalat ap ’bok ’gela’ge welege o,” oluk ’baksogo ogulat enebe waretil legesa. 14Asogo togu legesa ai pam, nis nenede en e,
“Is onowi ebe op a’ge heratogu legesa,” oluk enak a’ge hogu lege ai o. 15Is onowi naduk welegesema ukpoluk libegesema ebano paget ebam eberogullepma re, togolik elirat wetlip ai en e, o is welegesema ai paget ebam eberogu legesa erlak o. 16We, is eberogu legesa ai re, onowi ebe op modok ’bogorl pam a’ge paget enagai opogu legesa ai en e, Allah en is enebaget onowi arat degelogo enebesirikmu no oluk e, at en e,
“An is enaik,” oluk, e’gerli erlagat oso ai o. 17-19#Kej. 22:1-14#Kej. 21:12Nadugat Allah en Abraham mo’guleselat,
“Hat en dogo’gwe a’ge wiyalema oluk mo’gulhegis ano ebe re,
homlogo Ishak yu en dogo’gwe a’ge en wiyalema ebele paget mo’gulhegis o,
oluk, mo’gulesi a’geat de, pobuk ebabut ’baligoluk,
“Homlogo ebe yu an nebaget watnemin o,” oluk mo’gulesi.
“Watnemin o,” oluk mo’gulesimu, at Abraham ede Allah pam he’berik poluk welaga ai pam,
“Ishak waromma Allah en pobuk elirat elalugaptua,” oluk, ebe wusogo Allah wogeigoluk tegei ai en e, eniak agamsogo ogulat e, Ishak werak a’ge elaluk aga Abraham en wesi, oluk uat o.
20 #
Kej. 27:27-29,39-40 Ye, at Ishak ai re, ede Allah pam he’berik poluk welaga ai pam, eiyagai Yakub emin, Esau emin, mo’gulentasulat, aphwami en is logon mu’gat wusogo enebam pogwi ai ’gela’ge,
“Pobuk Allah en obaphenebise lemak o,” oluk mo’gulentesi.
21 #
Kej. 47:31–48:20
At Yakub ede Allah pam he’berik poluk welaga ai pam, wareigoluk tagalat, ebe o’bouwa’gun ologun pam he’berik poluk Allah hau weriselat, aphwami en is logon mu’gat wusogo enebam pogwi ai ’gela’ge, is enebe ’biren Yusuf eiyagai mo’gulentasulat e,
“Allah en obaphenebise lemak o,” oluk mo’gulentesiat.
22 #
Kej. 50:24-25; Kel. 13:19 At Yusuf ogo re, ede Allah pam he’berik poluk welaga ai pam, ebe ’gerat wareriogoluk tagalat, eiyagai Israel a’ge o Mesir en libom a’ge paget mo’gulentasulat, ye,
“An nuak orluktak ai re, disogo tip o,” oluk mo’gulentasulat, tegei.
23 #
Kel. 1:22; 2:2 At Musa ogo re, aik ia enede Allah pam he’berik poluk welegesa ai pam, Musa ebe derigisarik ’gwelakhegesa ’gal e, malik ebe modok op en, at ap ’gain eba a’ge en wene lebegei a’ge onogorlok erlaksogoat malik dogo ai hisogo poluk oruakhwe, dugwi henagan hebarligen egei.
24 #
Kel. 2:10-12
Ye, at Musa ai ebe arat souwe agarik en, ede Allah pam he’berik poluk, disogo epesi,
“An ap ’gain Firaun agalogo emalik ’gela’ge wolom e, modok nebit o. 25An nebe op welat, we lodu paget a’geat de, nagaisogo wiak tagalom ai nebit o. We, is Allah eiyagai enemin di obotut yu obotut taknobogulom op o,” oluk, ogola epesirik e,
26“Pobuk Allah en o’go woknema a’ge oruak o,” oluk epesirik e,
“Di a’ge yu a’ge op a’ge aphwami o Mesir ene’gikmu a’ge yu logo puk o,” oluk, ukpoluk e,
“Kristus paget nenebe mi-miarak nonobogulom aiat logo yo,” oluk epesi. 27Asogo opoluk libagarik e, ede Allah pam he’berik poluk,
“Ap ’gain Firaun ai olot het om ai nogorlok o,” oluk ede opo erlakma enat, Allah ebe nenil hogwi erlak a’ge ai il hasulat ’gela’ge,
“Nede at ebam pegirikmu re, lebigat o,” oluk o Mesir ukpoluk liplau waga ai o. 28#Kel. 12:21-30Liplau wagarik, ede asogoat Allah pam he’berik welat, at malaikat mesik aphwami enebe warenebiso a’ge en, aphwami o Mesir a’ge eneiyagai naduk dogo a’ge warenebiselat, aphwami Israel a’ge warenebisoma no oluk e, wam domba wusogo onuk Paskah no’gulat, emep o ’goduk petne lo’bok wetil louwagoluk mo’gulentesi.
29 #
Kel. 14:21-31
Aphwami Israel a’ge enede asogoat Allah pam he’berik welat, aphwami ’gwiang do’bon o’gwe lagai ai ’gela’ge, ik ye’gelak onuk Laut Merah ai hielak o’gwe liplau wegesa ai o. Asogo liplau wegesema, is aphwami Mesir a’ge en,
“Nis ogo asogoat libomok o,” oluk egesarik liplau wagaimu, ik en sebelenebegei ai o.
30 #
Yos. 6:12-21
Is aphwami Israel a’ge enede Allah pam asogo he’berik welat, o Yerikho seli agauwa hebarligenam walo’gogu legesarik, agauwa agaikhen walo’gogumu re, leget pakleget werik a’ge moluk-melak egei.
31 #
Yos. 2:1-21; 6:22-25 Asogo moluk-melak osoam, at hwe Rahab danian nese laga a’ge ano ogo re, ede Allah pam he’berik poluk, is ap Israel a’ge enil en wogu legesa a’ge enebe opsogo wogenebegei ai en e, is aphwami logon Allah iak wo enebit a’ge enebe modok waronobogulat, at hwe ai nak e, woru erlak ukpegesa ai o.
32 #
Hak. 4:6–5:31; 6:11–8:32; 11:1–12:7; 13:2–16:31; 1Sam. 1–1Raj. 2:11 An en ap Gideon emin, Barak emin, Simson emin, Yefta emin, Daud emin, Samuel emin, is ap Allah iak mo’gulontogu legesa a’ge emin, enede Allah pam he’berik welat togu legesa a’ge ’beli’gogo mo’gulhonto a’geat de, o agauwa arat horok agarikmu re, mia o. 33#Dan. 6:1-27Is ai ’berlegat enede Allah pam he’berik welegesa ai en e, is o eli’go mesik emin weim obogulat, onuelak ’gain ononuk logo a’ge mabenabonoboluk onowi sebelogu legesa. Enebabut hegitsogo togu legesema, Allah en e,
“His pobuk op a’ge wokhentaik,” oluk obok mo’gulentesi a’ge ano, ebe wogu legesayat. Orlomene ’gela’ge singa ebabut wiak a’ge ai emde dopno togulat, 34#Dan. 3:1-30odouk magale onogorlok a’ge ’gela’ge nekhisogo pogulat, ’garok pam waronobu a’ge onu’gwarek en enebe delogulat, enanni erlak a’geat de, enanni agalat, weim obogulat enanni agalat e, selei a’ge esan a’bigat mugontogulat, 35#1Raj. 17:17-24; 2Raj. 4:25-37is hwami logon enemalik werak a’ge pobuk enelalugabenebisoam wogonobogulat, til waga legesa. Asogo til wagaihwe, is pema re, enebe pobuk op welema a’ge paget, Allah en enelalugabonobuagoluk, aphwami logon en enebe wik-wiaksogo tagonobogukhwe, enagap erlele horlo erlakma en welegesa. 36#1Raj. 22:26,27; 2Taw. 18:25,26; Yer. 20:2; 37:15; 38:6Ye, pema re, aphwami eniak elitnu ding-dungsogo tagonobogulat, ’go’bu waronobogulat, ene’gik herle wusogo ’gwelagonobogulat, 37#2Taw. 24:21helep pam damuksogo ’be’gi waronobogulat, ’ge’gik pam enebagase derlep togulat, ’garok pam waronobogulat, di obotut yu obotut hogulat, sum e, wam domba emin, kambing emin, agap no’gorlogo ’buktogulat, di a’ge yu a’ge erlak en enerlagaigat welat, is aphwami logon en wik-wiaksogo tagonobogulat, togu legesa. 38Is ai ’berlegat enebabut op asogo op togu legesa ai en, aphwami enemin ’gwiangma yema wolom e, mia o. Is ai onowi werik ’gela’ge erlakma re, ’bogulogo o leimu aphwami erlakma emin, dom o’gwe emin, no’gulat, owik o’gwe emin, ’gwiang ele delak o’gwe emin, welegesa.
39-40Allah en e,
“Obaphenebik,” oluk obok mo’gulnentesi a’ge ai, is enebe ’berlegat ai ebe wo erlak a’geat de, enede Allah pam he’berik welat op til waga legesa ai en, at Allah en,
“Is op,” oluk enebe ebam liok egei. Asogo ebe wo erlak ai re, Allah en pageat nis nenebaget wene op a’ge hwalogo nenebasulat, nis erlak oruakhwe is onomu nak e, ede ’garoksogo obabonobo erlak. We, nis nenebaget,
“Is enemin mesik erlige ’garoksogo op tagenebaik,” oluk obok egeitikmu no oluk e, is en ebe wo erlak welegesa ai o.
اکنون انتخاب شده:
Ibrani 11: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید