2 Korintus 11
11
“Is logon Kristus en yo’go onoboluk peragenebasu a’ge ’gela’ge takpoluk wagai ai o,” oluk mo’gulentesi wene
1An en wene weisogo aphwami uo a’ge en ogwi ’gela’ge ik a’ge yu re, wene yaknum erlakma en, henesa’go hologo welemagoluk mo’gulhentegis o. Henesa’go hologo welemis o. 2Hwelani enebabut ap enemin nogogwi erlak a’ge, onogunlak enemin lo’boktak onobogwi ’gela’ge, an en e, his Kristus ebam lo’boktak henebegi a’geat de, his en ap mu a’ge mesik emin la’bologup holuk e, Allah olot het om ’gela’ge, an nolot het omat o. 3#Kej. 3:1-5,13Asogo a’geat de, his henede mesigat Kristus ebam he’berik poluk at ebaget degelak welegep a’ge ai, nadugat at ’Gosu ano ebabut eden-pedentakma no oluk e, hwe Hawa lalegei ’gela’ge, is aphwami logon en lalhonobuano oluk e, nogorlok ago yo. 4Is muon hene’bek wagalat e, nis en op wene Yesus tegei a’ge mo’gulhentigema wegep ’gela’ge, is en mo’gulhontogwi erlak o. We, mu a’ge mo’gulhontogwiam e, Allah Arogun wegeptigat de, pobuk mu a’ge arogun wogulat, op wene wegeptigat de, pobuk wene mu a’ge wogulat, honogola henagaisogo nak wogukhwe hentasu legi o. 5Is mu a’ge ai, Yesus en yo’go onoboluk peragonobou waga a’ge ’gela’ge takpoluk wagaiam, his en e,
“Is ai nak e, logo ’gela’ge o,” oluk wogonobogukhweat de, an nede en e,
“Is logo, ye, an e, mia o,” oluk epasu legi modok erlak o. 6An wene osokhwe enebam lasu erlak a’geat de, wene ebe neperlak puk o. Nalugat o. An en nin hwedik nan hwedik di paget yu paget osokhwe re, his en,
“At wene aluk o,” oluk enagat pobirak nobogu legep o. 7An en Allah iak op wene ai mo’gulhentasulat e,
“O’go mesik woknemis o,” oluk u erlagat o. His logo henebaigoluk an nu’gwarek nebe uo a’ge ’gela’ge takpoluk, asogo taga legi ai, his wiagap henebasu legi oluk u no? Modok erlak o. 8An en his lethentasu legi ai paget, ne’gik o’go ’gela’ge re, is Allah eiyagai o akhenma en woknogwiam wasu legi o. Asogo wasu legi ai paget is aphwami pema en e,
“At Paulus en is aphwami o Korintus a’ge lerentaigoluk e, o’go is mu a’ge ena’ge e’gik abusak ’gela’ge wasu o,” oluk mo’gulnumat o. 9#Fil. 4:15-18An his henemin welat uang erlak en, his en mesik woknemagoluk henebam ’gonu tagalat derlelhenebise legi erlak o. We, asogo oruakma, is ap narilak o Makedonia a’ge wegesarik elirat woknosu egesa ai en, di paget yu paget his henebam e’ginap paikno oluk, epegirik e, ’gonu mo’gulhonto erlakma en welegirik pobuk modok asogoat taga leik o. 10Asogo taga leik oluk, nogola nagai hasulat erliktaga legi a’ge ai, aphwami o Akhaya eba a’ge logon en niak ’balu mia, oluk Kristus iak dem wene nogola welat demat egi o. 11Nopaget an asogo egi epegep. His henebe nede erlak en egi epegep? Erlak o. An his henebe nede welegi ai, Allah aluk o.
12Is muon Kristus en yo’go onoboluk peragonobou waga a’ge ’gela’ge wegesarik togwi a’ge ai en e,
“Nis Paulus emin hegit o,” oluk ogulat erlikhorlogwi a’ge ai, is eniak erlak emagoluk an yogodak taga legi a’ge yu re, tago modogat weleik o. 13Is ai re, Kristus en yo’go onoboluk peragonobou waga a’ge puk. We, at en peragonobou waga a’ge ’gela’ge takpoluk wegesarik aphwami lalonobogwi a’geat o. 14Is togwi ai re, elalinat togwi puk. Enaik Iblis u’gwarek epenenat e, malaikat o dakharak a’ge wene woluk wagai ’gela’ge takpoluk wago ’gela’ge togwi o. 15At Iblis eragam welat, at ebaget togwi a’geat de, at Allah eragam welat hegitsogo togwi a’ge ’gela’ge takpoluk wagai ai enebabut onotogat o. Asogo togwi ai en, o ologun pam, Allah en o’go is di paget yu paget togwi hegitsogoat tagonobouwa o.
At Paulus Allah iak mo’gulentil denagokhwe
di obotut yu obotut ebam aga laga wene
16Aphwami his a’ge logon en e,
“At Paulus ebe uo ’gela’ge o,” oluk opou wano oluk, pobuk niak lagaksogo togolik mo’gulhentegis ai o. Asogo a’geat de, his en asogoat opogu legep holuk e, an nebe uo ’gela’ge welat wei logon erlikhwerlaik a’ge yu re, henesa’go hwelit o. 17An en erlikhwerlaik yu re, nonue ’gain Onuk Logo a’ge en,
“Hat asogo in o,” oluk mo’gulnesimu erlikhwerlaik puk. We, aphwami uo a’ge en erlikhorlogulat ogwi ’gela’ge ik o. 18Is aphwami enebe esan en di a’ge yu a’ge ’gwiangma a’ge paget erlikhorlogwi ai, an weiyat logon erlikhwerlaigat o. 19His henede ’gagalak a’ge ’gela’ge yema re! Is logon uo a’ge eniak ogumu, his honogola henagaisogo hologu legep ai o. 20Asogo togu legep ai pam, his henebe is en eneragam honoboluk, honso’boru modok perlengsogo no’gulat, hena’ge yogorlia horlogulat,
“His mia a’ge re, nis nak e, elit o,” oluk onu’gwarek en logo pogulat, honorogole la’buksogo wathonobogulat, togukhwe henepe mosogo welegep yema re! 21Nis ogo asogo tu re, nenebabut nonogorloktak en mo ege o, oluk u re, ne’gerli a’bik ho no? Erlak o.
Is aphwami uo a’ge en ogwi ’gela’ge mesik mo’gulhentaik. At mesik e’gerli erlak erlikhwerlasu holuk e, an ogo re, ne’gerli erlaksogoat erlikhorlo yo. 22Is ai enebe Yahudi a’ge ’gela’ge an ogo re, nebe Yahudi a’geat o. Is enebe Israel a’ge ’gela’ge re, an ogo re, nebe Israel a’geat o. Is enebe enaik Abraham en dogo’gwe ’gela’ge re, an ogo re, nebe naik Abraham en dogo’gwe a’geat o. 23#Per. 16:23Is ai Kristus eragam a’ge welat, at ebaget weiyat togwi a’geat de, an nak e, loksogoat tago yo, oluk, aphwami enede ’belak a’ge en ogwi ’gela’ge mesik mo’gulhentegis ai o. Is e, seget weisogo ’gela’ge togwi a’geat de, an nak e, seget a’bik hasu legi o. Is e, mesik erlige ’gela’ge ene’gik herle worogulat, ’go’bu waronobogulat, enebe modok warom ’gela’ge waronobogulat togwi a’geat de, an nak e, nin hwedik nan hwedik ne’gik herle worogulat, ’go’bu watnobogulat, nebe warom ’gela’ge modok watnobogulat, togwi o. 24#Ula. 25:3Is aphwami Yahudi a’ge en ’go’bu lagal’bisok ’go’bu mesik erlige ene’gik 39 pam watnobogu legesa a’ge ne’gik wenakho re, agauwa huabenamat watnebigisa o. 25#Per. 14:19; 16:22Ye, aphwami o Roma a’ge en ’go’bu pam agauwa henaganam watnebigisayat o. Ye, helep pam puk-paksogo watnebigisayat. Ye, ik laut ye’gelakma eba en so wusogo lebagaimu, agauwa henaganam so wiak agarik lebaksogo ’begeiyat. Ye, agauwa mesik erlige re, ik laut ye’gelakma eba ik ogum pam sasogo nogogistigat o. 26#Per. 9:23; 14:5Nin hwedik nan hwedigat yuk o’gwe lasu legi ai re, ik ebe wagalat sebelnobu ’gela’ge agalat, aphwami enebabut wiak welat yogorlia wogwi a’ge en watnobuogoluk togukhwe yuk weriselat, is aphwami an na’gul a’ge en watnobuogoluk togukhwe yuk weriselat, is o’borl o’gwe a’ge en ogo watnobuogoluk togukhwe yuk weriselat, o kota seli lok werikmu en watnobuogoluk togukhwe yuk weriselat, o kota o’borl akhit a’ge en ogo watnobuogoluk togukhwe yuk weriselat, ik laut ye’gelakma en watnobuogoluk togukhwe yuk weriselat, aphwami mu a’geat de, Allah eiyagai narilak a’ge ’gela’ge welat watnobuogoluk togukhwe yuk weriselat, taga legirigat o. 27Di paget yu page set wik-wiaksogo tagalat, nin hwedik nan hwedik nogo nelaluk nogo eselat, so’boru emin, ik emin, erlak en nele welat, nin hwedik nan hwedik so’boru ’bonuk a’ge mo eselat, nosum erlak en sogwei watnebiselat, o ’geba nogou ’gela’ge agalat, taga legirigat o. 28Asogo taknobogukhweat de, Allah eiyagai di owi yu owi odoktogwi a’ge ’berlek enebaget e, nin hwedik nan hwedik modogat nebam e’gin welat mennei eberiso yo. 29At mesik maben ago holuk e, an maben om ’gela’ge, nede wiak agoat o. Ye, at mesik wiak a’ge en ede ’gagalisoam wiak ago holuk e, an ogo nolot het agoat o.
30A’ge re, erlikhorlo holuk e, an nebe maben oluk erlikhorlo yo. 31An wene egi ai re, niak eseiyat egi erlak o. At nonue ’gain Onuk Logo a’ge Yesus aik Allah orogole wokho erliktogwi modok wolomul a’ge ano aluk o. 32#Per. 9:23-25An o Damsyik oruakma re, onue ’gain onuk logo a’ge Aretas eragam a’ge gubernur ai en osi leget ’godukmu ’gagalak oruakma an tenak nobouwagoluk yo’go enebesi. 33Asogo a’geat de, ling-long is logon en an nebe mul egeik a’ge ogola yagarak noboluk e, leget pakleget ele delak o’gwe lebiknoboluk herle erlilogo ’belebak nebegesema re, ’bok lebegi ani o.
اکنون انتخاب شده:
2 Korintus 11: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید