2 Korintus 10
10
Paulus en, “An Allah iabuk disogo taga legi o,” oluk mo’gulentesi wene
1-2An Paulus Kristus ebabut op enago a’ge ano ebabut wik-wok, nu’gwarek en wene mesik henesa’go werik o. Is logon en e,
“At Paulus ebe horoksogo nenemin welat e, ebabut sakhosogo wene mo’gulnentasu. A’geat de, ebe walegat welat e, ebabut ogorlok erlaksogoat ningsogo mo’gulnentasu o,” oluk ogwi a’ge ano pobuk hene’bek weiktik nebabut nogorlok erlak welat niak ningsogo mo’gulhentaikno oluk, pobi togup en e, niak sakhosogo mo’gulhentegis o. Is ai en e,
“Paulus lak ai re, aphwami enebabut onotogat welat enebabut wokho togwi o,” oluk nonobok wiak ’balogwi a’ge ai, nebabut nogorlok erlaksogoat niak ningsogo wene yagentau weigoluk wenemennei eberise legi o. 3Nis nenebe ’gwiangma welat aphwami segen wa’gun pam weim obogwi ’gela’ge obogu lege erlak o. 4-5Nis weim obogu lege ai ebe re, aphwami enesegen onuwa’gun pam obogu lege puk. We, Allah anni a’bik welago a’ge ano esegen uwa’gun pam, o weim e’gat pam ningsogo werik a’ge ai, elit moluktu ebelerak ai en obogu lege o. Is aphwami logon enede en e,
“Allah ai ebe nenebit o. Is aphwami muon en nak e, at ebe enaluk om erlagat o,” oluk onu’gwarek en erlikhorlogwi a’ge ai, nis en segen wa’gun ai pam e, elirat mabenabonobo yo. Ye, aphwami enede we a’ge pam eberogwi a’ge ai, nis en segen wa’gun ai pam Kristus iak hologo tuagoluk eragam elirat onobou wom o. 6Nis en e, his Allah iak ’garoksogo hologo modok togu legep a’ge holuk e, degelogo honobogulat is pema at iak enesa’go hologwi erlak a’ge holuk e, wene enebam pouwogolugat welege ai o.
7An en wene selakma a’ge ik yu re, pobi tip o. At ap mesik ogola en e,
“An nebe re, Kristus en a’ge welegi o,” oluk pobi tiso holuk e, u’gwarek en ebabut ’baliselat,
“An nebe Kristus a’ge ’gela’ge re, is Paulus lak ogo asogoat o,” oluk pobi tuak o. 8Nonue ’gain Onuk Logo a’ge en e, an en wiagaphonobuagoluk eiye taknebesimu puk. We, henede hurleaphonobuagoluk, eiye taknebesimu welegi ai paget a’bigat nu’gwarek en erlikhwerlasu leik holuk e, ne’gerli eik erlak o. 9-10Aphwami his a’ge logon en e,
“Paulus ai ebe walekma welat pelal wokho perakpou wagoam e, iak ’balu mia o. Ningsogo mo’gulnentasu. A’geat de, ebe wemarik nenemin welat e, ebe uo a’ge ’gela’ge o. Ye, iak osoam en e, enesa’go holu enebit ’gela’ge o,” oluk ogwi ai en e, wene pelal wokho hene’bek perakpou waga legi ai re, his honogola en,
“Nonogorlok modok emagoluk perakpou wago yo,” oluk epagupno oluk mo’gulhentegis ai o. 11Nis pobuk womultik e, is asogo ogwi a’ge ai, nenebe walekma welat wene pelal wokho perakpou wege a’ge ai hegitsogoat tumul ai en e, pobirak poluk welemak o.
12Nis en e, is logon onu’gwarek en,
“An op o,” oluk enede en logo pagathorlogwi a’ge ai, nenemin wenaknonobu re, nogorlok o. An nu’gwarek nebabut ’balogo en de, nebe is enemin hegit oluk, u re, nogorlogat o. Ai re, is en e,
“Enebabut op a’ge ’gela’ge wo re, nis nagat o,” oluk ogulat, aphwami enasu is a’ge modok is-is enebabut ’balogulat, togwi ai re, enebe uo enat togwi o. 13Nis nenebabut ai ’gela’ge re, erlak o. Nis nenebabut neniabuk Allah en hwerli ’balogo woknentesi ai pam togulat, o’borl o’gwe a’ge paget erliktu erlakma en, hwerli ’balogo woknentesi a’ge pagerat erliktogu lege o. His henebe ogo re, neniabuk hwerli ’balogo woknentesi ai a’geat welegep o. 14His henebe Allah en yabuk hwerli ’balogo woknentesimu welegep ai en e, op wene Kristus en tegei a’ge ano woluk e, mo’gulentil-entil hwerli his hene’bek wege ai, hwerli ’belak a’ge sebelholuk wege erlak o. 15Allah en asogo neniabuk hwerli ’balogo woknentesi a’ge ano sebelogo emingholuk loluk, is pema tigisa a’ge, an en tegis oluk erlikhorlogu lege erlak o. His henede Allah pam he’berik pogu legep a’ge ai logon eminsogo hurle agoam e, o his oruak o’gwe Allah en hwerli ’balogo nis woknentesi ai pam enat, yabuk loksogo togu lomul opogu lege o. 16Asogo togu lomultik e, Allah en is logon eniabuk hwerli ’balogo wogentesimu tigisa a’geat de, nis en tige oluk erlikhorlogumu no oluk e, his honowi abel etli akhit o’gwe, eba wene op wene mo’gulentil no’gu lomul opogu lege o. 17#Yer. 9:24Allah iak pelal disogo oluk wogo oruak,
“Aphwami en di paget yu paget
erlikhorlouwogoluk holuk e,
nonue ’gain Onuk Logo a’ge tegei ano paget nak erliktu o,”
oluk egei. 18Aphwami onu’gwarek en erlikhorlogwi a’ge ai Allah en op oluk wogenebiso puk. We, at nonue ’gain Onuk Logo a’ge en erligenebiso a’ge nak e, op oluk wogenebiso yo.
اکنون انتخاب شده:
2 Korintus 10: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید