2 Korintus 12
12
Allah en di wene yu wene Paulus il houwagoluk abi ’gela’ge pam mo’gulesi wene
1An nu’gwarek erlikhwerlil waga legi a’ge ai re, u mia a’geat de, pobuk erlikhwerlaigat o. Nonue ’gain Onuk Logo a’ge en an nil houwagoluk mo’gulnesimu nabi ’gela’ge pam hasulat, noborogwi pam hasulat, hegi a’ge ik o. 2An 14 tahun pageat nil hegi a’ge is logon enebam elitsogo ik o. Ap mesik Kristus emin hwedik welaga a’ge Allah en ’bogorl hwerli ’biren hwerlirak a’ge ukpoluk hwerli mesik pam erabu woluk ligaga ai nalugat o. At ai demat woluk ligaga de a? Arogun woluk ligaga de a. An neperlak o. Naik Allah at aluk o. 3-4Ap ai Allah en ’bogorl pam opma eba woluk ligagama wene aphwami en ogwi erlagat, ye, u miayat, a’ge esa’go hwelegei naluk o. Asogo a’geat de, demat woluk ligaga ya? Arogun de a. An neperlak a’ge re, Allah at aluk egi ai o. 5Ap ai paget nak e, erliktagalat, an nu’gwarek nebaget erlikhorlo erlakma en, we, nebe maben ai paget nak e, erlikhwerlaigat o. 6An nu’gwarek en nabi ’gela’ge pam hegi a’geat de, ap mesik ebam elitsogo egi ai a’ge paget mesik emin erlikhwerlaik holuk e, niak demat ik ai en e, aphwami uo a’ge en ogwi ’gela’ge ik erlak o. Asogo a’geat de, aphwami logon en an hasu legi ai a’ge paget erliknobuano oluk, nebe enil niogulat, niak enesa’go holugulat, togwi ai pam pobirak nobuagoluk e, mesik ai a’ge u erlakma en mo ik ai o. 7-8An en,
“Nabi ’gela’ge pam elalinat nil hegi ai nogorlok o,” oluk nu’gwarek en erlikhwerlaikno oluk e, aphwami enebetne orlok ’gwisoam nonouk togwi ’gela’ge, ou nebam agoam nonouk taga lemagoluk, nebam pesimu, Iblis en yo’go pesi a’ge ’gela’ge nebam oruakma, nonue ’gain Onuk Logo a’ge en henokho lebikpou wagoluk ne’gik henaganam yo’go pegi a’geat de, 9at en e,
“Hat maben holuk e, an nanni a’bigatma hebe nedeaphebise legi ano pam, elirat op wolorogun o,” oluk mo’gulnesi. Asogo mo’gulnesi ai en, at Kristus anni an nogola pesi a’ge aiat welemagoluk e, an di paget yu paget mabenat welat, nogola nagaisogo erlikhwerlasu leik o. 10Ai en e, an Kristus paget, nebe maben eik holuk, aphwami en nobok wiak ’balogwi holuk, wik-wiak taknobogwi holuk, e’gin-pe’gin taknobogwi holuk, weim obogulat waronobuogoluk wale’gik onobogwi ano ’gela’ge taknobogwi holuk, an maben oruakma, ai pam en nanni ago oluk, nogola nenagai hasu legi o.
Paulus en Allah eiyagai o Korintus a’ge enebaget ede perik welaga wene
11Is ap Kristus en yo’go onoboluk peragonobou waga a’ge ’gela’ge takpoluk wagalat,
“At Paulus onuk erlak o,” oluk ogwi ai, an demat nonuk erlak. Is nak e, logo ’gela’ge ononuk oruak hegi! Asogo erlak o. His en pobirak noboluk nomot wokho mo’gulnom a’geat de, asogo ogu legep erlak ai en e, demat ap uo a’ge en ogwi ’gela’ge, mo’gulhentegis ai o. 12His en e,
“Paulus e, Kristus en yo’go poluk perakpou wagama o,” oluk enak a’ge pobi nobuagoluk, an nemin welat di paget yu paget nepe mosogo tago oruakma, aphwami en pobi tuagoluk, Allah en annisogo di a’ge yu a’ge elalinat taga laga. 13His henebaget taga legi ai, is Allah eiyagai di owi yu owi odoktogwi a’ge paget taga legi a’ge ai e’birek walhoma re, no a’ge on ukhenebegimu en ogu legep. We, an yabuk taga legi a’ge paget,
“An ne’gik o’go mesik woknemis o,” oluk derlelhonobu erlak welegi ano paget ukhenebegimu en de, ogu legep a? Holuk e, wiagap henebegis ai paget erlagapsogo ukpoluk henede op emit o!
14An naduk agauwa ’birenam hene’bek wegirik, pobuk mesik weigoluk degelogo pegirik welegi o. An hene’bek weik ai re, di a’ge yu a’ge enemalik en enialak enaiklak en herasogo wogontogwi puk. Erlak o. We, enialak enaiklak en e, enemalik enebaget herasogo wogontogwi ai en e, his ena’ge di a’ge yu a’ge ’gonu tagalat henebam derlelhonobou weik puk. Erlak o. We, henebeat herahenebil weik o. 15Ai ’gela’ge re, his henebe henebaget e, na’ge di a’ge yu a’ge henebasulat, nebe ogo henebasulat, nedemu en nogola nagai hasulat tu welegi o. An his henebe nede hwedik oruakhweat de, his nak e, an nebe henede hwedik erlak ’gela’ge wolom no? 16An en e, his henebam e’ginap paigoluk his en a’ge ’gonu mo’gulhonto erlak ai re, enagat oruak ai o. A’ge re, his logon en ogulat e,
“At Paulus ede ’gagalak ano en e, di a’ge yu a’ge sabuthwerlaiogoluk, iak lalogo mo’gulnentasu o,” oluk ogu legep ai, 17an nosi his hene’bek peragonobou wegi a’ge ebano en, his en a’ge mesik sabusogo an woknosu egesa no? Modok erlak o. 18At Titus hene’bek wemagoluk ede ’gagalegistik e, nenare Allah eiyagai a’ge mesik at emin peragonobou wegimu wegesa a’ge ano, wegesarik e, at Titus en his pagathwerlegep a’ge mesik me’gisogo logon hwerlesi no? Modok erlak o. An Titus emin e, nenebabut mesigat togu lege erlak no? Is logon naduk onoyuk pil lagaimu re, is logon pobuk ebam louksogo onoyuk pil lagai ai ’gela’ge, at Titus an nemin yabuk hegitsogo togu lege erlak no?
19His honogola en e,
“At Paulus wene u’gwarek ebam a’ge no’gorlogo oso yo,” oluk page enat ogu legep a’geat de, an asogo epasu legi erlak o. Narilak norokhwi. Henebe nede o. At Allah il pam, an Kristus emin hwedik welarat eselegi ai. Di a’ge yu a’ge taga legi ai re, his henede hurle emagolugat taga legi o. 20An pobuk hene’bek weik ai weiktik e, an en,
“Is enebabut op oruakma laik o,” oluk epasu legi ’gela’ge, erlak. We, wiak oruakma hentau wagalat, ye, his en e,
“At Paulus ebabut op o,” oluk ogu legep ’gela’ge, erlak o. We, wiak welat hentau wagalat, tikno oluk, nede periso yo. His-his henemin wiak welat, ’bou togulat, honolot het agalat, honu’gwarek paget nak togulat, onobok wiak selakma ’balogulat, hisakho ’balogulat, honu’gwarek en erlikhorlogulat, yogunat togulat, togumu an wom ai re, nogorlok o. 21Asogo togumu, an wagoam e, naik Allah en his henebabut togu legep ai paget his henil pam ne’gerli wusogo nebe sebelak nobo ai nogorlok o. Is aphwami his a’ge logon esan en hwami onogunlak oruak a’ge, ap onugwami oruak a’ge en ’babi tenontogulat, hwelani salisik ap dedik a’ge en ’babi tenontogulat, ene’gerli erlaksogo wiak modok togulat, naduk togu legesa a’ge ukpoluk enebabut heberlom erlakma en modok welagai ai paget, nge tuma no oluk nede perik welegi o.
اکنون انتخاب شده:
2 Korintus 12: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید