1 Korintus 7
7
Ap en hwami wogonobogulat, hwami en ap wogonobogulat, welagai wene
1His en wene pelal wogo a’ge ne’bek perakpou wegep a’ge ano, o’go mo’gulhentaik o. Ap en e, hwami wogonobu erlakma en dedik weat wolom o. 2A’geat de, ’babi tenontogu lema no oluk e, ap onugwami lo’bok wogo welat, hwami onogunlak lo’bok wogo welat, togulom o. 3Onogunlak en e, onugwami lo’bok, ye, onugwami en e, onogunlak lo’bok, enemin nogo ogulom ’gela’geat nogogu lemak o. 4Ye, hwami enebe re, onu’gwarek eiye puk. Onogunlagat eiye o. Ye, ap enebe asogoat e, onu’gwarek eiye puk. Onugwamiat eiye o. 5Holuk e, ogun ugwe emin nogo ogulom o. Hektak wolorogup o. Se’ban ogu lomogoluk holuk e, disogo ogulom,
“Lodu paget weat wolomok o,” oluk wene hemin oluk en, se’ban ogu loroguptik e, pobuk hemin la’bulogo wolomup o. Henede sebelu mia ai en e, Iblis en henede ’gagalisoma no oluk e, henemin la’bulogo wolom ai o. 6Wene mo’gulhentegis ai re, wene harosogo mo’gulhentegis puk. We, henesa’go weregis o. 7Aphwami ’berlegat, an hwami erlak a’ge weat welegi ’gela’ge wolomma re, op, oluk epasu legi a’geat de, at Allah en e, nenebabut lo’bok, at mesik ebabut muat, at mesik ebabut muat, hundomok-han domok woknentesi ai en e, asogo mia o.
8His ap logon, honugwami erlak a’ge emin, his hwelani salisik a’ge emin, hwami sugwe a’ge emin, an welegi ’gela’geat wolomma re, op, oluk mo’gulhentegis ai o. 9Henede sebelu mia ago holuk e, honogunlak lo’bok, honugwami lo’bok, wogonobogu lomup o. Henebam aganhan agoam yogunat tenontoma re, wiak o. Honugwami lo’bok, honogunlak lo’bok, wogo wolomma re, op o.
10 #
Mat. 5:32; 19:9; Mrk. 10:11,12; Luk. 16:18 Ye, his ap logon, honugwami oruak a’ge emin, his hwami logon honogunlak oruak a’ge emin, an en henesa’go werik o. A’ge re, an en puk. Nonue ’gain Onuk Logo a’ge en henesa’go worua o. His hwami honogunlak ugonoboluk e, wing lagup o. 11Hat hwe mesik hogun ukpoluk loboroguntik holuk e, ap mesik wo erlakma en we wolomup o. Weat wolom mia ago holuk e, hogun naduk a’ge anoat womup o. Ye, his ap ogo re, honugwami ugenebagup o.
12His ado pema henebaget e, wene nonue ’gain Onuk Logo a’ge en u erlak a’ge, an enat mo’gulhentaik o. Hat ap Allah eiyagai a’ge en, hugwe ede Kristus ebam he’berik pasu erlak a’ge wogo welegen a’ge, at en e,
“Nogun ne’birek hwedik wollo e,” oluk epasu holuk e, op o. Hat en, hugwe ai ukpo modok mia o. 13Ye, hat hwe Allah eiyagai a’ge en, hogun ede Kristus ebam he’berik pasu erlak a’ge wogo welegen a’ge, at ap ai en e,
“Nugwe ne’birek la’bulogo wollo e,” oluk epasu holuk e, hogun ai ukpoluk libom modok erlak o. 14At hwe Allah eiyagai a’ge en, ogun ede Kristus ebam he’berik pasu erlak a’ge, wogo welat e’birek op la’buksogo welagai ai en e, ugwe en ogun ebe ano Allah eiyagai takpasu o. Ye, ai ’gela’ge at ap Allah eiyagai a’ge en, ugwe ede Kristus ebam he’berik pasu erlak a’ge wogo welat e’birek obat la’buksogo welagai ai en, ogun en ugwe ebe ano Allah eiyagai takpasu o. Asogo enebe Allah eiyagai takpogwi erlak wellepma re, henemalik enebe Allah en a’geat de, o’borl o’gwe a’geat wellep o.
15At ap ede Kristus ebam he’berik pasu erlak a’ge ai ugwe ukpasu holuk e, ukpou wagat o. Ye, at hwe ede Kristus ebam he’berik erlak a’ge ai ogun ukpoluk libago holuk e, lebemagat o. Allah en e, nenede ha’buksogo op welemagoluk yo’go nenebesi ai en e, asogo togup holuk e, wene henebam erlak o. 16Hat hwe yu, hogola en e,
“Pobuk nogun delu mia ema o,” oluk epasu legen a? No’gosogo haluk. Hat ap yu, hogola en e,
“Pobuk nugwe delu mia ema o,” oluk epasu legen a? No’gosogo haluk.
“Allah en nenebe lo’bok yo’go nenebesi hegitsogo togulom o,” oluk mo’gulentesi wene
17His e, Allah en henebe lo’bok yo’go henebasuam nonue ’gain Onuk Logo en e,
“Hat mesik disogo wolomup. Ye, hat agaikhen disogo wolomup o,” oluk mo’gulhentesi hegitsogoat wolomup o. Asogo welemagoluk, an en Allah eiyagai o da ya odoktogwi a’ge ’berlegat enesa’go werise legi o. 18At ap mesik agap e’gerlimu a’ge arat ’belak oruakma, Allah en yo’go pesirikmu en, pobuk agap ’belak erlak a’ge ’gela’ge eigoluk mesik tu mia o. Ye, at ap mesik e, agap e’gerlimu a’ge ’belak erlak oruakma Allah en yo’go pesirikmu en, pobuk agap asogo ’balogup erlagat o. 19Enagap ene’gerlimu a’ge asogo ’belak wolom a’ge emin, ’belak erlak wolom a’ge emin, ai logo puk. Erlak o. Ebe logo re, Allah iak hwelak poluk togulom aiat o. 20Aphwami enebe lo’bok Allah en yo’go enebasuam welegesa ’gela’geat welemak o. 21Hat mesik, aphwami eneragam a’ge oruakma Allah en yo’go hebasu holuk e,
“An disogo welegi a’ge o,” oluk, ai paget wenemennei eberogun. Pobuk e, hematekma hobogwi holuk e,
“Nebit,” ogun o.
“Ai op o,” oluk hematekmayat omup o. 22At mesik aphwami eneragam a’ge oruakma re, nonue ’gain Onuk Logo a’ge en yo’go hebesimu emin hwedik welat e, at ot ematekmayat agarik oruak o. Ye, at mesik e, ematekma oruakma yo’go hebesimu, nonue ’gain Onuk Logo a’ge eragam a’geat agarik oruak o. 23His henebe Allah en modok daksogo o’go ’balogo wokhenebegei ai en e, aphwami eneragam a’ge orogup no yo. 24Holuk e, narilak norokhwi. His henebe lo’bok Allah en yo’go henebesimu welegep ’gela’geat, Allah emin hwedik welat asogoat wolomup o.
Ap onugwami erlak a’ge emin, hwami onogunlak erlak a’ge emin, enebaget egei wene
25Wene hwelani salisik a’ge enebaget e,
“Disogo togu lomup o,” oluk nonue ’gain Onuk Logo a’ge en nenesa’go woru erlak a’geat de, wene an nede epasu legi a’ge yu mo’gulhentaik. Niak mo’gulhentaik yu re, his honogola en e,
“Allah en Paulus ebe ede en wesimu ebabut he’berik a’ge en mo’gulnesi ai demat o,” oluk henede opomup o. 26Nis o yogodak wiak welege ya pam welat e, nenebe lo’bok welege hegitsogoat wolom o, oluk epasu legi. 27His ap logon honugwami oruak a’ge holuk e, lologo ugonobuogoluk togup o. Ye, his logon honugwami erlak a’ge holuk e, hwami wogonobuogoluk heraonobogup no yo. 28A’ge re, his ap en honugwami hwerlagup holuk e, ai wiak tigep oluk ogup no yo. Ye, his hwelani salisik a’ge en honogunlak hwerlagup holuk e, ai wiak tigep oluk ogup no yo. A’geat de, wogonobogulat, di e’gin yu e’gin hagup ai en e, asogo houwano oluk egi o.
29Narilak norokhwi. Yogodak e, o ologun pam lai legerik welege o. Yogodak ya pam welat e, ap onugwami wogo a’ge ai, wogo erlak a’ge ’gela’ge welemak, oluk epegirik en de, mo’gulhentegis o. 30Aphwami logon nge togwi a’ge holuk e, nge togwi erlak a’ge ’gela’ge welemak o. Ye, is logon onogola enagai hogwi a’ge holuk e, enagai hogwi erlak a’ge ’gela’ge welemak o. Ye, is logon di a’ge yu a’ge o’go ’balogo horlogwi a’ge ai, eiye agai erlak a’ge ’gela’ge welemak o. 31Ye, is logon ’gwiangma di a’ge yu a’ge horlogwi a’ge ai, horlogwi erlak a’ge ’gela’ge welemak o. Asogo egi ai re, di a’ge yu a’ge ’gwiangma welago a’ge ’berlek arat erlak ago ai en egi o.
32His e, hwami enebaget, ap enebaget, honogola wenemennei eberak erlak welemagoluk mo’gulhentegis o. Asogo egi ai re, ap onugwami erlak a’ge en e, nonue ’gain Onuk Logo a’ge ede op emagoluk, at ebaget logo poluk enede eberogwi o. 33Asogo a’geat de, ap onugwami wogo a’ge ai re, onugwami enede op emagoluk, di a’ge yu a’ge ’gwiangma a’ge logo poluk enede eberogwi o. 34Asogo eberogulat e, enede ’biren agai ai o. Hwelani salisik onogunlak erlak a’ge ai re, enebe emin, enede emin, nonue ’gain Onuk Logo a’ge paget wolomogoluk e, at ebaget logo poluk enede eberogwi ai o. A’ge re, is hwami onogunlak oruak a’ge ai re, onogunlak enede op emagoluk, is enebaget di a’ge yu a’ge ’gwiangma a’ge logo poluk enede eberogwi ai o. 35Wene asogo mo’gulhentegis ai re, wam ’go’bi erlilogo pogwi ’gela’ge,
“Di togup. Yu togup,” oluk wene ’balegis puk. We, his op emagoluk mo’gulhentegis o. Holuk, his e, henede we a’ge pam eberu erlakma en, nonue ’gain Onuk Logo a’ge paget hegitsogo togulat, opsogo togulat, togwi modok welemagoluk egi o.
36Ap mesik en hwele salisik iak tago a’ge welat, ogola en e,
“An disogo wiak welegi. Hwele ai ebe waik o,” oluk ebam aganhan ago holuk e, at ogola asogo epasumu re, hwele ebe woat o. Asogo wouwa ai wiak puk. Op o. 37A’ge re, at mesik, aphwami logon en ede ’gagalogwiam e, u’gwarek ede hurle agalat e, ede u’gwarek en sebelogo re,
“Erlak o. An hwele niak taga legi a’ge ai, asogoat we welemak o,” oluk ogola epasu holuk e, ai obat o. 38Ap ano en hwele iak tiso a’ge ano wasu holuk e, ai op a’geat de, wo erlakma en mo oso holuk e, ai op modogat o.
39Is hwami re, onogunlak enebe enelaluk oruakhwe, ap mu a’ge mesik wogonobu mia o. We, onogunlak enebe waragai holugat, onogola enagai opogwi a’geat wogonobu o. A’ge re, yogunat wogonobu mia o. We, nonue ’gain Onuk Logo a’ge emin hwedik a’ge holuk wogonobu o. 40Asogo wogonobua’geat de, wogonobu erlakma en weat wolomma re, enede opsogo wolom epasu legi o. Asogo epasu legi ai re, Allah Arogun nogola welat epasu legi o.
اکنون انتخاب شده:
1 Korintus 7: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید