1 Korintus 6
6
“Allah eiyagai a’ge logon wene enebam oruak holuk, aphwami Allah iak eneperlak a’ge yo’go enebagup o,” oluk mo’gulentesi wene
1His Allah eiyagai a’ge, his-his nak en, hat mesik en at mesik wene ebam pagun holuk e, Allah eiyagai a’ge en ’belingholuk wene ai ebam pogulat, no’gorlogulat, tuagoluk yo’go onobo erlakma re, is aphwami wiak togwi a’ge yo’go onobogu legep ai nopaget. Hene’gerli erlak a? 2Pobuk Allah eiyagai en aphwami ’gwiangma a’ge yema wene enebam pogulat, no’gorlogulat, tua ai heneperlak no? Asogo togup holuk, wene weiyat a’geat de, his en ’belingholuk en de, wene enebam pogulat, no’gorlogulat, togulom erlak no? 3Nis enat, is malaikat Allah en yo’go ’belagonobou wago a’ge ebano, wene enebam pogulat, no’gorlogulat, tul ai heneperlak no? Holuk e, nis ’gwiangma yema welat, aphwami wene di paget yu paget enebam agoam, nis en ’belingholuk wene enebam pogulat, no’gorlogulat, togulom erlak no? Asogoat togulom o. 4Wene asogo a’ge henebam ago holuk e, ’belingholuk wene henebam pogulat, no’gorlogulat, tuagoluk salak yo’go onobogu legep. Nis Allah eiyagai en e,
“Is ai enebabut wiak o,” oluk ogu lege a’ge ai yo’go onobogu legep a? 5Hene’gerli werise legi o. His henarilak honorokhwi enemin, hat mesik en at mesik wene ebam pagun holuk e, ap Allah omlogo ede modok ’gagalak welat wene ’beli’gogo erlagap po a’ge ap mesik erlak no? Oruagat epasu legi o. 6A’geat de, hat ap mesik en e, hare mesik wene ebam poluk e, aphwami enede Allah pam he’berik pogwi erlak a’ge en ’beli’gogo wene ebam pogulat, no’gorlogulat, tuagoluk yo’go enebasu legen ai o.
7His-his nak henarilak honorokhwi enemin a’geat de, henemin wene ’bal-’bal modok welegep ai en mabenat aga legep ai o. His e, wiagaphonobogwiam en de, henepe mosogo wolomma re, wiak a? Almerak honobogwi holuk ukpegep ho re, mia ya? Obat o. 8His e, henarilak honorokhwi enemin a’geat de, wiagabonobogulat, almerak onobogulat, togu legep ai o.
9Aphwami wiak togwi a’ge Allah eragam enebasumu eba eiye ema erlak o, oluk e, heneperlak no? Honu’gwarek en lalogup no yo. ’Babi tenontogwi a’ge emin, dogwi asua pam he’berik welat togwi a’ge emin, ap onugwami a’ge ’babi tenontogwi a’ge emin, ap en hwami tenontogwi ’gela’ge is ap-ap togwi a’ge emin, 10yogorlia wogwi a’ge emin, enemikmik wiak togwi a’ge emin, a’bosu honuk-honuk ’baluogoluk no’gwi a’ge ano no’gwi modok welagai a’ge emin, eniak orlouk wiak wene yagontogwi a’ge emin, ene’gik abusak wogwi a’ge emin, is aphwami asogo togwi a’ge ai ’berlegat Allah eragam enebasumu eba eiye modok ema erlak o. 11Nadugat his logon asogo togu legep a’geat de, yogodak e, Allah en honogola op emesogo henebesirik, henebe at u’gwarek paget pagathwerlesimu welegep o. Wene henebam welaga a’ge ai, nenaik Allah Arogun en nonue ’gain Onuk Logo a’ge Yesus Kristus onuk pam, no’gorlogo wokhesirik Allah emin la’bolik henebesimu welegep o.
“Henebe Allah paget poluk op togulom o,”
oluk mo’gulentesi wene
12 #
1Kor. 10:23
His a’ge mesik en eselat e,
“An di a’ge yu a’ge yogunat tiselom nak o,” oluk oso a’geat de, an nogola en e, di a’ge yu a’ge ’berlek ai en obabonobu nak puk. Di a’ge yu a’ge ai anni agalat e, ai a’ge en an nebe eragam nobo re, nebit o. 13Is logon en e, disogo ogwi,
“No’gwi a’ge ai nonogum paget o. Ye, nonogum ai no’gwi a’ge paget o,” oluk ogwi. Asogo ogwi a’geat de, ’birenerat, at Allah en pobuk erlagap pouwa a’ge oruak o. Allah en, nenebe yu re, ’babi tenontogu lemagoluk walnentesi puk. At e, nonue ’gain Onuk Logo a’ge pagerat walnentesi ai o. Nenebe yu eiye re, nonue ’gain Onuk Logo a’ge oruak o. 14Allah en e, nonue ’gain Onuk Logo a’ge waragarikmu en elalugaptegei ’gela’ge, at anni pam, nis nenelalugapnonobuayat o. 15Nis nenebe yu re, Kristus e’gik oyuk ’gela’ge welege o, oluk heneperlak no? Holuk e, nenebe Kristus e’gik oyuk welege ai a’ge wokho, hwami enebabut danian a’ge ai enemin hwedigaptu no? Modok erlak o. 16#Kej. 2:24Is aphwami enebabut danian a’ge ai enemin hwedigap poluk e, enebe mesigarat agai o, oluk e, heneperlak no? Allah en eselat e,
“Is enebe ’biren a’geat de, pobuk mesigat emarik welema o,”
oluk egeimu pelal wokho pegesema oruak ai o. 17Nis nenebe paget asogo togu lege a’geat de, nonue ’gain Onuk Logo a’ge emin hwedigap poluk e, at emin nenede mesigat aga lege ai o.
18’Babi tenontogwi ai a’ge tenontouwano oluk, hweiye ’bogologu lomup o. Di wiak yu wiak togwi ai re, enebe o’borl o’gwe yuat togwi. A’geat de, ’babi tenontogwi ai nak e, onu’gwarek enebeat wiagap pagathorlogwi ai o. 19#1Kor. 3:16; 2Kor. 6:16His en e,
“Allah en, Arogun woknentesimu, nenebe at owi werik welege o,” oluk e, heneperlak no? Henebe honu’gwarek eiye puk. At eiyeat o. 20At Allah en e, henebe arat o’go daksogo ’balogo wokhenebegeimu welegep ai en e, aphwami en Allah erliktuagoluk e, henebe at ebaget opsogo togu lomup o.
اکنون انتخاب شده:
1 Korintus 6: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید