1 Korintus 8
8
Dogwi asua uam worogwi wene
1His en e,
“Dogwi asua uam warogwi ai re, wene edip e, disogo oluk nenaluk nak o,” ogu legep ai re, nis pobi tige o. A’ge re, wene asogo enaluk welat e, onu’gwarek en erlikhorlogwi a’geat de, aphwami enebe enede hwedik welat togwi ai nak e, enede hurleabonobogwi ai o. 2At mesik ogola en epasulat e,
“An wene arat naluk o,” oluk epasu a’geat de, at dokhumsogo aluk om a’ge re, owan eperlak welarat de, oso yo. 3Asogo a’geat de, at mesik en, Allah ebe ede hwedik holuk e, Allah en at ai ebe aluk o.
4Dogwi asua uam worogwi ai re, dogwi asua ’gwiangma a’ge yema ebe erlak a’geat, oluk nenaluk o. Nenaik Allah ebe mesigarat. ’Biren erlak o. 5Is aphwami yema en ogulat e,
“Nis e, nenaik ebam he’berik welege a’ge nenasua yuat o,” oluk e, ’bogorl pam a’ge paget emin, ’gwiangma a’ge paget emin, ogwi ai o. Asogo ogwi ai, enasua a’ge a’bigat oruakma re, onuk oruak e, a’bigat oruak o. 6Asogo a’geat de, nis nenaik Allah ebe mesigarat o. ’Biren erlak o. Di a’ge yu a’ge ’berlegat at en walhesimu re, nenebe at ebagerat welege o. Asogoat, nonue ’gain Onuk Logo a’ge Yesus Kristus ebe mesigarat o. Di a’ge yu a’ge ’berlegat Allah en walhesi ai, ebe at Yesus en walhesirik, nenebe at enat delnenebegeimu nenelaluk welege.
7A’geat de, wene ai aphwami ’berlegat enaluk puk. Is logon naduk e, enede dogwi asua pam he’berik welat erliktogu legesarikmu no oluk e, pobuk wam dogwi asua uam werak a’ge ’gwerik no’gulat, ebam eberogwi o. Enede owan welat, no’gwiam e, onogola wiak ago ai o. 8Di a’ge yu a’ge no’gwi a’ge ai en Allah e’bek woknonoboluk louwa erlak o. Nis no erlakma en mo ul holuk e, nal omul erlak o. Ye, nul holuk e, agaikhen sabuthorlul erlagat o. 9His yogunat no a’geat de, no’gwiam en, is aphwami logon enede owan a’ge wiak ema no oluk e, henebabut heberlogo welemis o. 10Hat mesik en e, wene ai haluk welat o wam dogwi asua uam worogumu ’goluk hebe hurotluk nagun holuk e, at agaikhen ede owan a’ge en il hioluk ogola en e,
“An mesik naigat o,” oluk ogola ’gagalua erlak no? ’Gagalotluk nouwayat o. 11Hat en e,
“An wene naluk o,” oluk asogo tua ai pam, hare mesik ede owan a’ge paget Kristus waraga a’geat de, hat en wiagap pagun ai o. 12Henarilak honorokhwi enede owan a’ge enil salogo wiagabonobogulat, enede daintak pogulat, togu legep ai re, Kristus ebeat il salogo togu legep o. 13Holuk e, no’gwi a’ge ai pam en an nare ebe wiagap paikno oluk e, at ebaget e, an wam dogwi asua uam werak a’ge ’gwerik no erlakma en modok ukpasu leik ani o.
اکنون انتخاب شده:
1 Korintus 8: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید