1 Korintus 10
10
“Henede dogwi asua pam he’berik wolorogup o,” oluk mo’gulentesi wene
1 #
Kel. 13:21-22; 14:22-29 Narilak norokhwi. Wene yu re, heneperlak wolom ai nebit o. Nene’balak ’berlek e, at Musa en wogonoboluk o hena ai ogola ’goluk, ik laut lok ye’gelak ai ebagase ’balogo liplau wegesa. 2Is en e, Musa e’berlik no’gu lomul o, oluk ik olomu ’bu ’gela’ge re, o hena ai ogola ’gogulat, ik laut ye’gelak ai ebagase ’balogo libagalat, tigisa ai o. 3#Kel. 16:35Asogo tigisarik, so’boru no’gwi ’gela’ge, at Allah en mesigat a’ge ’gela’ge elalinat wogentasukhwe, enebe ’berlek no’gulat, 4#Kel. 17:6; Bil. 20:11ik no’gwi ’gela’ge, mesigat a’ge ’gela’ge elalinat wogentasukhwe, enebe ’berlegat no’gulat, togu legesa. Ik ai re, helep Allah en pesi a’ge, emin modok denagalat, ogola en libagoam no’gu legesa ai. Helep ai ebe re, Kristus at o. 5#Bil. 14:29,30Asogo a’geat de, is logon enebe a’bigat Allah ebam lioksogo welegesa erlak ai en e, o leimu aphwami erlakma eba warenebegeimu werak da ’gaboktak ya ’gaboktak laga ai.
6-7 #
Bil. 11:4
#
Kel. 32:6
Asogo aga ai re, is wiak a’ge enagaisogo togulat e, ap is a’ge logon enede dogwi asua ebam he’berik poluk erliktogulat, togu legesa ai en aga ai. Is asogo togu legesa ai ’gela’ge, nis asogo togu lomulno oluk, pobi togulat nenesa’go werise lemagoluk wene ’berlegat asogo aga ai o. Is asogo togu legesa oluk, Allah iak pelal disogo wogo oruak,
“Is aphwami ena’gul onuk ai a’ge en,
seni nouwogoluk huregesarik,
pobuk weni worogulat, hwami ’babi tenontogulat, tuogoluk inegesa o,”
oluk pelal wokho pegesa. 8#Bil. 25:1-18Ye, aphwami is a’ge logon ’babi tenontogu legesema, enebe 23.000 modok a’bigat mesik erlige perlengsogoat waretil legesa ai ’gela’ge, nis asogo watnonobuano oluk, asogo togulom modok mia o. 9#Bil. 21:5,6Ye, aphwami is a’ge logon en e,
“Nenaik ’gain Onuk Logo a’ge olot het oruak no?” oluk ede walsogo togu legesema, herlegetie iak en lebilenebegeimu re, waretil legesa ai ’gela’ge, nis watnonobuano oluk asogo tu modok mia o. 10#Bil. 16:41-49Ye, aphwami is a’ge logon en nenebit-nenabit ogu legesema re, malaikat ’bogorl pam a’ge warenebiso a’ge Allah en perakpou wagama, aphwami enebe a’bigat warenebegei ai ’gela’ge, nis watnonobuano oluk, nenebit-nenabit u modok erlak o.
11Is asogo tagenebesimu enebam aga a’ge ano ’berlegat e, is aphwami logon pobi togu lemagolugat aga ai o. Asogo tagenebesi o, oluk pelal wokho pegesa ai, nis yogodak o ologun pam lau wege a’ge yu, nenesa’go worogu lemagolugat pelal wokho pegesa. 12Ai en e, hat mesik hogola en,
“An nede hurle o, edik welegi o,” oluk epasu legen holuk e, ’bule ’bogunno oluk hebabut heberlogo wolomup o. 13His wiak tuagoluk honogola ’gagaliogoluk wagoam ebabut hogu legep ai re, nis aphwami ’berlegat nonogola ’gagaliogoluk wagoma hogwi ’gela’geat hogu legep o. A’geat de, Allah en obok mo’gulnentesi hegitsogoat tagoma re, wiak tuagoluk honogola ’gagaliogoluk wagoam e, his en henede sebelu mia a’geat de, Allah en ukhonobo erlakma en tenhentarok welema o. Honogola asogo ’gagalisokhwe, henede sebeluagoluk, Allah en wene hegitsogo mo’gulhontouwa a’ge oruak o.
14Ai en e, narilak norokhwi. Henebe nede o. Dogwi asua ai wusogo enede ebam he’berik poluk erliktogwi ai a’ge, ukpoluk hweiye liplau manis o. 15Wene egi ai re, his henede oruak a’ge oluk mo’gulhentasu legi. Holuk e, an wene ik a’ge yu re, honu’gwarek honogola en pobi tit o. 16#Mat. 26:26-28; Mrk. 14:22-24; Luk. 22:19,20A’bosu no’gulat e, Allah hau wusogo no’gu lege ai, Kristus emep enamogo werigisa a’ge ai emin hwedik welege oluk no’gu lege erlak no? Ye, so’boru ’gusogo no’gu lege ai, Kristus ebe emin hwedik welat nenebe mesigat welege o, oluk, ’gusogo no’gu lege erlak no? 17Nis nenebe ’berlek en e, so’boru mesigat a’ge ’gusogo no’gu lege ai ’gela’ge nenebe a’bik a’geat de, mesigat o.
18 #
Ima. 7:6
His en e, is aphwami ena’gul onuk Yahudi a’ge en togwi a’ge, pobi tit o. Is en e, Allah uam warotluk heberik pema is no’gulat, heberik pema odouk narlogumu ebalema narlogulat, Allah emin hwedik welagai ani oluk, heneperlak no? 19Holuk e, no ik. Dogwi asua ai demat a’ge ik? At uam warogwi a’ge ’gwerik ai demat a’ge ik? Erlak o. 20#Ula. 32:17Wene ai re, ebe yu paget egi. Is ai Allah paget warogwi puk. We, mu’gat ebabut wiak a’ge paget warogwi o. Holuk e, his mu’gat ebabut wiak a’ge ai emin hwedik wolom e, an nebit. 21His e, nonue ’gain Onuk Logo a’ge egeik a’bosu ne’gak no’gulat, mu’gat ebabut wiak a’ge egeik ne’gak no’gulat, tu modok mia o. Ye, nonue ’gain Onuk Logo a’ge oso’boru no’gumu eba en no’gulat, mu’gat ebabut wiak a’ge oso’boru no’gumu eba en no’gulat, tu modok miayat o. 22#Ula. 32:21Nonue ’gain Onuk Logo a’ge olot het emagoluk togu lege ai nogorlok. At emin walhoma re, nis nenanni re, oruak no? Mia o.
“His di bele yu bele togulat, at Allah erliktuagoluk togu lomup o,” oluk mo’gulentesi wene
23 #
1Kor. 6:12
His logon en e,
“Di a’ge yu a’ge ’berlek asua re, erlak. Op nak o,” oluk egep ai, demat a’geat de, di a’ge yu a’ge ’berlek ai pam en, nenebe op omul erlak o.
“Di a’ge yu a’ge ’berlek e, asua erlak. Op nak o,” oluk elirat u a’geat de, ’berlek ai en e, nenede hurle ema puk. 24Di a’ge yu a’ge honu’gwarek henebaget logo pogu lorogup o. At e, is aphwami muon enebaget nak e, logo onobogu lomup o. 25-26#Mzm. 24:1Allah iak pelal wokho pogulat e,
“’Gwiang yu emin,
di a’ge yu a’ge ’gwiangma welago a’ge emin,
eiye re, nonue ’gain Onuk Logo a’geat o,”
oluk pelal wokho pegesa ai en e, di wam yu wam ’gwerik o’go ’balogumu eba oruakma,
’Gesogo tigisa a’ge, oluk hin wokholuk e, henede e’gin ema no oluk e, we, o’go ’balogo no yo.
27Ye, is aphwami logon enede Allah ebam he’berik po erlak a’ge en so’boru sakho nouwogoluk yo’go honobogwiam, his henede en lolo e, oluk lagup holuk e, di a’ge yu a’ge sakho pouwa a’ge wokhontogwi holuk, henede e’gin ema no oluk e,
“Yu an no a’ge a? No puk a’ge a,” oluk, hin enebam wokho erlakma en noat o. 28Asogo a’geat de, is logon e,
“Yu dogwi asua uam werigisa a’ge ’gwerik o,” oluk mo’gulhentasu holuk e, at mo’gulhentasu a’ge ai ebe paget, ede paget, nagup o. 29Asogo egi ai re, his honu’gwarek henede e’gin om a’ge paget egi puk. At mesik mo’gulhontouwa a’ge ai ede e’gin om a’ge paget egi o. A’ge re, his logon en e,
“An yogunat no a’ge oruakhweat de, at ai ede e’gin ema no oluk e, an no erlakma en mo u ai nopaget. 30An Allah hau wusogo nasuam e, ai paget nobok nopaget ’balu no,” oluk ogu legep ai paget, 31an disogo mo’gulhentaik. So’boru emin, ik emin, no’gulat, di bele yu bele togulat, asogo ’berlegat togulat e, aphwami en Allah erliktuagolugat togu lomup o. 32Aphwami Allah eiyagai a’ge emin, ye, is Yahudi a’ge ogo, Yunani a’ge ogo, enede Yesus ebam he’berik erlak a’ge emin, wiak ema no oluk henebabut hegitsogo togu lomup o. 33His henebabut e, an taga legi ’gela’ge togu lomup o. An e, di bele yu bele tagalat e, nu’gwarek obap pagathwerlaigoluk tago erlak. We, aphwami enebe a’bigat Allah en delenebisoam op emagolugat tago yo.
اکنون انتخاب شده:
1 Korintus 10: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید