1 Korintus 9
9
Allah en aphwami yo’go enebesi a’ge lo’bok togulom wene
1An nematek welegi erlak no? At Allah en yo’go noboluk peraknobou waga erlak no? Nonue ’gain Onuk Logo a’ge Yesus ebe an nil ho erlak no? Nonue ’gain Onuk Logo a’ge ne’birek hwedik welat tegis a’ge, henebe welegep ai erlak no? 2Is aphwami pema en an nebaget ogulat e,
“At Paulus Kristus en yo’go po erlak,” oluk ogwi holuk e, his e, asogo u puk o. An yo’go noboluk peraknobou wagama wegi oluk e, his henebe nonue ’gain Onuk Logo a’ge emin hwedik welegep ai pam enagat pobirak nobo yo. 3Aphwami en nobok wiak ogukhwe, an en disogo mo’gulentasu legi,
4“An Allah iabuk taga legi ai paget, ne’gik o’go so’boru woknogulat, ik woknogulat, togukhwe, horlo erlak no? Horloat o. 5Ye, is ap logon Allah en yo’go onoboluk peragonobou waga a’ge emin, nonue ’gain Onuk Logo a’ge osi e’berlik a’ge emin, at Kefas emin, onugwami wogonoboluk no’gwi ai ’gela’ge, an nak e, nugwe Allah eiyagai a’ge woluk neselom erlak no? 6Ye, at e, is ai yabuk wogwi erlak weat oruakhwe, an Barnabas ne’birek nenematek nak en di a’ge yu a’ge nene’gik o’go meno’gogulat set hoposogo palo tu epegep? 7Ap tentara onuelak ’gaindek en onosi weim obouwagoluk yo’go onobogwiam e, is onu’gwarek en ene’gik o’go meni’gogo no epegep? Erlak o. Ye, is pema en anggur owi yogo poluk e, e’gen egesisoam logon onu’gwarek no’gwi erlak no? Ye, at e, is pema onuam domba wam a’bigat tenak welat e, agamu a’bosu logon onu’gwarek no’gwi erlak no? No’gwiat o,” oluk mo’gulentasu legi.
8An wene egi ai re, nis aphwami en togu lege a’ge ebam elitsogo egi a’geat de, ebe Allah en wene nenesa’go weregei wene ano pam ai emin hegitsogo u erlak no? Egeimu enat egi o. 9#Ula. 25:4; 1Tim. 5:18Wene Allah en nenesa’go weregei wene ano pam, at Musa en disogo mo’gulentesi,
“Aphwami en wam sapi wam oyuk en gandum agap lul wusogo e’gen wouwagoluk poluk e,
e’gen logon at nouwano oluk, emde herle dopnosogo hettogup no yo. Logon nouwagoluk ukpogu lomup o,”
oluk mo’gulentesi ai, at Allah en wam sapi wam ai ede hwedik en egei no? Erlak o. 10Nis aphwami en yabuk wogulat, e’gen ’balogulat, togulat e,
“An logon naik o,” oluk nonogola nenagai hogulat yabuk wogulat, e’gen ’balogulat, togu lege ai en, wene ai nis nenebaget egeimu pelal wogo oruak o. 11#Rom. 15:27Owi yorogwi ’gela’ge re, wene henedemu yerige ai o. Ye, ebe doru ’gela’ge re, his en di a’ge yu a’ge ’gwiangma a’ge woknonto ai re, lok no? Erlak o. Elitsogo woknonto a’geat o. 12His en, is mu a’ge asogo wogonto hegirat holuk e, nis ebe eiye a’ge logon woknonto erlak no?
“Woknonto hegirat o,” oluk mo’gulhentasu legi.
Asogo a’geat de, nis logon woknontouwagoluk ogu lege erlak o. Op wene Kristus tegei wene ai, nis en mo’gulentil no’gumu e’gebela ’gwe ’baluano oluk e, di a’ge yu a’ge logon woknonto a’ge oluk u erlakma en nenepe mosogo ukpogu lege o. 13#Ula. 18:1Is ap Allah owi werik eiye welat yabuk eba togulat, onso’boru re, Allah owi ogola a’ge no’gwi oluk e, heneperlak no? Ye, Allah uam warotluk narlik pogumu ebano odouk narlik pogulat asogoat pema ’balogo is no’gwi oluk e, heneperlak no? 14#Mat. 10:10; Luk. 10:7Ai ’gela’ge re, at nonue ’gain Onuk Logo a’ge en nenesa’go weriselat e,
“Is aphwami en op wene mo’gulentil lagaimu re, is logon en op wene ai pegilsogo onso’boru wogontoat o,” oluk egei ai o. 15Asogo egei a’geat de, an e, op wene pegilsogo asogo wo erlakma en welegi o. An nebaget asogo woknemagoluk wene yu pelal wokho perakpou wegi puk. An asogo woknemagoluk tiso erlak welegi oluk e, erlikhwerlasu legi a’ge yu re, at mesik en niak erlagap po re, nebit o. An nebe waromma en de, op o. 16Op wene mo’gulentil neselegi ai re, mo’gulonto a’geat mo’gulentil neselegi ai en e, erlikhorlo modok mia o. Mo’gulonto erlakma en mo umu re, eige. Nu’gwarek nebe alemat om ebeletak o. 17An asogo mo’gulentil neselegi ai, an nogola en ’gagalogo mo’gulentil denagallema, ne’gik o’go woknogwiam, wasulle o. A’ge re, an nede ’gagalu erlak oruakma, Allah en yo’go noboluk eiye taknebesi ai en o’go erlak a’ge mo’gulentil denaga legi ai o. 18Holuk e, an ne’gik o’go no’gwe woknum. Ai re, ebe yu. O’go woknum ’gela’ge, op wene ai o’go erlak weat mo’gulentil denagalat nogola op welegi ai o. Asogo mo’gulentasuam e, o’go woknum hegit a’geat de, asogo mesik woknogwiam wo erlak welegi ai nak e, op o.
19An e, aphwami eneragam a’ge welegi puk. Nemategat welegi a’geat de, aphwami enebe a’bigat Kristus ebaget wogenebigoluk e, aphwami ’berlegat eneragam a’ge ’gela’ge egirik denaga legi o. 20Aphwami Yahudi a’ge Kristus ebaget wogenebigoluk e, an nebabut Yahudi a’ge enebabut wokho taga legi o. Ye, aphwami wene Allah en nenesa’go weregei wene at Musa en mo’gulentesi wene ano, an hologo tagalom erlak a’geat de, is logon hologo welagai a’ge Kristus paget wogenebigoluk e, an nebabut wene ai nesa’go hologo welago a’ge ’gela’ge taga legi o. 21Ye, is logon wene Allah en nenesa’go weregei wene at Musa en mo’gulentesi wene ai, enesa’go hologwi erlak a’ge logon Kristus ebaget wogenebigoluk e, an nebabut wene ai hweliso erlak a’ge ’gela’ge welegiat o. Ai re, an wene Kristus en nenesa’go weregei wene ai hologo modok welat e, wene Allah en nenesa’go weregei wene ai an hwelak erlak welegi puk. Hologo welegiat o. 22Is aphwami enede owan a’ge Kristus paget wogenebigoluk e, an nebabut e, nede owan a’ge ’gela’ge welegi o. Is aphwami ’berlegat enebabut togwi a’ge lo’bok taga legi ai re, is a’ge pema delenebigoluk en de, asogo taga legi o. 23An is aphwami ’berlegat enebabut asogo wik-wok taga legi ai re, is enemin op a’ge eiye omogoluk op wene ai pagerat taga legi o.
24Sa omut oruak. Sa omut oruak, oluk louwogoluk e, enebe lo a’ge eriano, enebe ’berlegat lagai a’geat de, mesigat a’ge naduk lolukmu o’go op a’ge wogogwi ano heneperlak no? Ai ’gela’geat, o’go op a’ge wokhontouwagoluk e, pungtak henannisogoat laga lomup o. 25Onomut erlak ema no oluk, di a’ge yu a’ge ukpoluk onu’gwarek en degelhorlogwi ai o. Is e, ’gare-’gare perlene wiak om a’ge pagerat wogontouwagoluk degelogwi ai o. A’geat de, nis e, wiak ema erlak a’ge woknontouwagoluk di paget yu paget degelogu lege ai o. 26Ai enat, an lasu legi ai re, ’ga laik hwe, oluk yogunat lasu legi puk. Norogole dokhumat lasu legi o. Ai ’gela’ge re, aphwami ene’gik e’gerlik poluk at mesik en mesik weriselat, at mesik en mesik weriselat, togulat almasogo wema waronobogwi erlak ai ’gela’ge, an we yogunat taga legi puk. 27Is aphwami logon op emagoluk op wene mo’gulentil neselegi a’geat de, nu’gwarek uknoboma naleikno oluk, nu’gwarek en nebe wathorlo ’gela’ge, nede ningsogo sebeliselat, aphwami eneragam welat eniak hologo welagai ’gela’ge, an nebe niak eragam weleigoluk nesa’go weriselat, taga legi o.
اکنون انتخاب شده:
1 Korintus 9: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید