1 Korintus 11
11
1 #
1Kor. 4:16; Fil. 3:17 An Kristus ebabut wokho taga legi ’gela’ge, his en e, an nebabut wokho togu lomup o.
Hwami onosum ena’gul pam erla’gulogo welat se’ban ogulom wene
2Wene di paget yu paget an nebam eberogulat, an mo’gulnegisema his mo’gulhentegis a’ge tenagat welegep ai en erlikhenebise legi o. 3Asogo a’geat de, wene mesigat yu nak e, henaluk om a’ge oluk epasu legi o. Nis ap nenebe lo’bok, nonue ’gain Onuk Logo a’ge Kristus edik oruakma re, eragam wolom o. Ye, hwami enebe lo’bok e, onogunlak ’gain edik oruakma re, eneragam wolom o. At Kristus ai re, aik ’gain Allah edik oruakma re, eragam welago yo. 4Ap enebe lo’bok ena’gul sum erla’gulogo aphwami lok odoktakma en se’ban ogulat, wene mo’gulhontogulat, togwi holuk e, nonue ’gain Onuk Logo a’ge e’gerli woru ’gela’ge de, togwi o.
5Ye, hwami enebe lo’bok e, onosum ena’gul pam erla’guktak erlak welat aphwami lok odoktakma se’ban ogulat, wene mo’gulontogulat, togwi holuk e, onu’gwarek en onogunlak lo’bok ene’gerli woru ’gela’geat togwi o. Asogo togwi ai re, enasu hapsogo ’belak en tu ’gela’ge de, togwi o. 6At hwe mesik en osum a’gul pam erla’golu ebit holuk e, asu ’balu o. Hwami enasu hapsogo ’balogulat, horoksogo ’balogulat, togwiam ene’gerli holuk e, onosum ena’gul pam erla’guk tumu re, op o. 7-8#Kej. 1:26-27; 2:18-23Edipmu en e, ap enebe edip e, hwami puk. Hwami edip e, ap ai en e, ap enebe re, Allah erliktogwi a’ge ebe ’gela’ge, arogun ’gela’ge, oluk e, ena’gul sum salugumu no yo. A’geat de, hwami re, onogunlak erligonobogwi a’ge enarogun ’gela’ge o. 9Allah en e, hwami enebaget, ap walhesi puk. Ap enebaget e, hwami walhesi o. 10Ai en e, is hwami is malaikat Allah en yo’go ’belagonobou wago a’ge ebano enil welat e, onogunlak lo’bok eniak hwelak welagai u ’gela’ge onosum ena’gul pam erla’gulogo wolom o.
11Asogo a’geat de, nonue ’gain Onuk Logo a’ge emin hwedik welat e, hwami re, ap erlak a’ge enematek nak welat, ap e, hwami erlak a’ge enematek nak welat, wolom mia o. 12Edipmu, Allah en e, hwami ap a’ge wokho walhesi ai ’gela’ge, ap enebe hwami en dagonobogwi o. A’geat de, di a’ge yu a’ge ’berlegat, edip Allah nak o. 13Narilak norokhwi. Wene yu honu’gwarek honogola eberip o. Hwami sum ena’gul pam erla’guktak erlak welat, aphwami enebe lok odoktakma en se’ban u no? 14-15Ap e, enasu yat oruakma re, ene’gerli ago a’geat de, is hwami re, ena’gul sebelogo welemagoluk Allah en enasu yat a’ge wogentesimu oruakma re,
“Enasu obat o,” oluk aphwami en erligonobogwi ani, oluk e, honu’gwarek honogola en opogu legep erlak no? 16A’ge re, is pema en e, ai paget wene ’balu a’ge oruak holuk e, nis emin, Allah eiyagai o di owi yu owi odoktogwi a’ge emin, mu a’ge tu erlakma en e, asogoat togu lege o.
“Nonue ’gain Onuk Logo a’ge ebam eberak wolomogoluk a’bosu yogunat no pukmu en e, disogo no’gulom o,” oluk mo’gulentesi wene
17An en, wene yu henesa’go weriselat e, erlikhonobu puk a’ge mesik oruak o. His henebe odoktugu legep ai, op ago puk. Wiak nak ago yo. 18His wene naduk-naduk mo’gulhentaik epegi re, yuat. Aphwami en e,
“Is Allah eiyagai a’ge Allah owi werikmu odoktak poluk, is-is enebe pologwi o,” oluk mo’gulnegisema wene ai nesa’go hwelegitik, ado pema demat togwi oluk epegi o. 19Asogo togu legep ai re, at Allah en,
“Is ai an neiyagai o,” oluk epasu a’ge, enagat emagoluk, henebe pulomat o. 20-21A’geat de, his nonue ’gain Onuk Logo a’ge ebam eberak welat, a’bosu nouwogoluk mesikmu odoktak poluk e, honso’boru lo’bok, henegeik lo’bok, horloluk,
“An naduk naik o,” oluk nil lagaimu re, is pema erlak a’ge nele pamat mo ogulat, is nin pema a’bosu a’bigat noluk enede ’balagalat, togu legep ai re, nonue ’gain Onuk Logo a’ge oso’boru no’gulat, egeik ne’gak no’gulat, no’gu legep puk. 22His asogo togu legep ai nopaget. So’boru no’gulat, ik no’gulat, tu re, honowi werik erlak a? Ye, Allah eiyagai a’ge enemin odoktugu legep a’ge honogola en mi-miarak pogulat, ene’gikmu erlak a’ge ene’gerli emagoluk togulat, togu legep ai o. An wene no a’ge mo’gulhentaik. Erlikhenebik a? Erlak o. An wene yu paget erlikhenebik erlak o.
23Wene asogo togulom a’ge paget, nonue ’gain Onuk Logo a’ge en mo’gulnesimu re, an en his mo’gulhentegis ai o. 24Nonue ’gain Onuk Logo a’ge Yesus ap enebabut wiak a’ge en woruagoluk, ap mesik huba’go yo’go laga ai erlige, at Yesus en e, so’boru roti a’ge e’gikmu wesirik e, Allah hau wusogo e’gik en ’gusogo poluk e, disogo mo’gulentesi,
“So’boru yu an nebeat o. An his henebagerat watnobua ai, nebam eberak wolorogup en e, disogoat togu lomup o,” oluk osi wogentesi. 25#Kel. 24:6-8; Yer. 31:31-34Asogo wogentesimu arat ne’gesema re, ik e’be a’bosu ne’gak a’ge asogoat e’gikmu wesirik e, disogo mo’gulentesi,
“Nemep enamogo wareik ai pam Allah en wene ’get a’ge wusogo wokhenebigoluk egei ai, nemep ne’gak a’ge ebe yuat o. Holuk e, disogo no’gulat e, pobuk an nebam eberak wolorogup en, disogoat no’gu lomup o. 26So’boru roti a’ge disogo no’gulat, a’bosu ne’gak a’ge disogoat no’gulat, togulat e, his en e,
“Nonue ’gain Onuk Logo a’ge asogo werigisa o, oluk wene ai is logon mo’gulonto ’gela’ge re, disogoat no’gu lomup o. Asogo no’gwi oruakma, hwerli, an weik ai hwerli en de, erlak ema o,” oluk mo’gulentesi.
27Hat mesik en nonue ’gain Onuk Logo a’ge ebam eberak welat, oso’boru nasulat, egeik ne’gak nasulat, no puk a’ge welarat de, nagun holuk e, nonue ’gain Onuk Logo a’ge ebe paget, emep paget, wene hebam pouwa a’ge oruak o. 28-29Is nin logon en, at Ebe pobirak erlak, so’boru ai a’ge no’gulat, a’bosu ai a’ge no’gulat, no’gulat e, onu’gwarek en wene enebam pagathorlogwi ai en e, his henebe lo’bok e, honu’gwarek en henebabut ’balip o. Asogo ’belakpoluk en, so’boru ai a’ge no’gulat, anggur e’gen a’bosu ai a’ge no’gulat, tu o. 30Asogo enebabut ’belak erlak welat no’gwi ai en, enebe a’bigat ou wogulat, enanni erlak agalat, togukhwe re, is pema waragai ai o. 31A’geat de, nonu’gwarek en nenebabut ’balogo no’gwi holuk e, Allah en wene nenebam pouwa erlak o. 32Asogo a’geat de, at Allah en e,
“Is ai aphwami o’borl o’gwe a’ge enemin la’bulogo wene enebam poluk wiagabonobo ai wiak o,” oluk, at en nenebabut ’balogo en, nenesa’go weriso yo.
33Ai enat, narilak norokhwi. A’bosu asogo nouwogoluk holuk e, aphwami his a’ge logon enebe owan wom erlak oruak holuk e, yerentarok wolomup o. 34His henebe odoktak oruakma, wene henebam ema no oluk e, his logon so’boru nele holuk e, honowi pam en noluk en de, wom o. Ye, wene mesik e, an nebe weiktik en de, hegirap paik o.
اکنون انتخاب شده:
1 Korintus 11: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید