Amatiyu 22
22
Egŋe eshri oriabgo ba anwyeshe
1Eyesu a sa a lu odlo pa la moare a ta egŋe nganga. 2A lu mi le, Oreŋ Ongyeŋ, o wo eka ba areŋ a kpo abgo okyku ba anwye baŋ a kyu ashe. 3A hom moanwye-odne baŋ otum okyku o da mo a bzi moare ba moa a sheŋ a lu a da mo, okyku o da mo a ba oriabgo lo. Ambo moa pyeŋ, moa a tla o ba-ba. 4Okyku eka he aŋa a sa a hom moanwye-odnekyeŋ otum nganga a lu mi le, Agimi e yi e lu e da moare moa a sheŋ a bzi mo e lu mi le, Moa a dzu a bli gimi a mo, moa a sheŋ a bga andu la a gbrẽ rerereŋ bgu, nga moa a sa a kpo ekployaŋ a mbo a khwo. E lu e da mo a ba oriabgo a mo! 5Ambo moare ba moa a bzi mo, moa a sko lo a zga ekplokyeŋ mbo, okyku eka he areyaŋ a mbo a gre eŋa otum baŋ. Akyeŋ a gre agbi baŋ, ahwõ a gre eŋa akanti baŋ. 6Moakyeŋ nga moa a vu moanwye-odne he lo nga moa a pom mo andzu, nga a bga mo a ta okom. 7Esõ e tpi areŋ lo ayi nzenze, okyku eka he, a da moanwyeakyuŋ baŋ a gre nga a yi a bga mo a ta okom a khwo nga moa a ta osku mo la ovo. 8Ambla he nga aŋa a bzi moanwye-odne baŋ a lu mi le, Moa a nyuŋ ekployaŋ a mbo a kpo okyku oriabgo bgu, ambo moare ba ame e bzi okyku lo, moa a wo shasha okyku obzi mbo. 9Okyku eka he, agimi e yi anyuŋ-ezhẽ ohuhuhi nga e bzi areyaŋ a mbo bimi e hwiŋ, e daŋ a ba. 10Okyku eka he nga moanwye-odne moa a gre anyuŋ-ezhẽ eka he, nga moa a bzi moare ba moa a hwiŋ pyeŋ, moa la a wo la eda edzi, ta la eda ebi pyeŋ moa a bzi mo. Aku ba oriabgo nga a bli.
11Omba ba areŋ a gre o yi o ka moare ibu moa a ri abgo, a ka akyeŋ eshki mo la a ygi ariga ba oriabgo mbo. 12Okyku eka he aŋa a nyuŋ ŋa a lu mi le, Akyemeazba, o kpo anyu o gre o ba ahe la ariga ba oriabgo mbo? Ambo are lo a tno akplokyeŋ ku-ku mbo. 13Areŋ nga a nyuŋ moanwye-odne baŋ a lu mi le, Agimi e bʼbu ŋa endzi abgo, ta la adga, nga e shri ŋa e ndbi e ta evbu. Ahe lo nga, aŋa á wu okũ á taŋ azhga anyu. 14Eyesu nga a sa a lu a ta ma-ma a lu mi le, Moa a bzi moare nzenze, ambo eshki mo, moare fi sha moa á sla.
Ozhiozhĩ eshri ohre eivaŋ
15MoaEfarisi a klo ozhẽ okyku o da mo a kpyi Eyesu la ozhiozhĩ. 16Ambla he nga, moa a da moanwyeotum mo, pa la moa la a lu Ehirudu ma a gre okro Eyesu. Moa a zhĩ ŋa a lu mi le, Andakʼpo, agi e yi boŋ o wo are ba adlidzi angyiŋ, o la o nye moare adlidzi eshri odlo ba Ahogbrẽ. Nga aŋo o la o kpo eyli ayakplo ba moare a tne eshri lo mbo. 17O lu o da gi, aŋo o ka anyu? Odaŋ bi o bmi bi e hre ewaŋ e da Ekeza le, o bmi mbo? 18Eyesu a ka a bmye ba moa a ba okyku o kpyi ŋa okpyi angyiŋ. Okyku eka he aŋa a nyuŋ mo a lu mi le, Agimi abibli moarehwĩ! Okyku eshi agimi e klo e kpyi me? 19Agimi e shri eyiamgbaŋ ba ohre ewaŋ e da me e ka! Moa a shri eyiamgbaŋ a kom ŋa. 20Ambla he nga, a zhĩ mo a lu mi le, Eshri ayi, ta la eshko ayi e wo ma? Moa a tno ma a lu mi le, E wo ba Ekeza angyiŋ. 21Okyku eka he nga, Eyesu a tno mo ma a lu mi le, Agimi e shri ekplo la e wo ba Ekeza e shri e daŋ, nga ekplo la e wo ba Ahogbrẽ, e shri e da Ahogbrẽ. 22Ambla ba moa a gno edgu otnoma hi nga, moa a ka egbregbre a gre eshri. Moa a dzu ŋa a zga nga moa a zhiŋ ogbu a gre emo.
Ozhiozhĩ eshri oksoeku
23Onda he lo nga, moaEsaduki a ba okro Eyesu. MoaEsaduki, moa a bmi ba adlidzi ba moare á ba a kso eku mbo. 24Moa a zhĩ Eyesu a lu mi le, Andakʼpo, Omusa a nye a lu mi le, O wo ba are a wo anwye ma mbo nga baŋ a kpu le, o dzu omgbybi ba anáŋ a sko ashe-eshaku baŋ a kyu okyku o daŋ a mbre moanwye okyku ŋa. 25O ka, moanáŋ afoha a wo ma. Andakʼpo ekpyemgbyeŋ a kyu ashe. A kpu omba baŋ a ka a wo la anwye ma mbo. Nga a dzu ashe-eshaku a zga anáŋ. 26Ekakahelo e kpo ta la anáŋ ba oha, pa la ba otra ma-me ta la moa afoha a mvye. 27Amom-abgo pyeŋ nga, ashe lo a kpu. 28Onda ba moare á ba a kso eku le, ashe lo á dzu ashe ba ayi? O ka, moa pyeŋ angyiŋ a kyu ŋa!
29Ambo Eyesu a tno mo ma a lu mi le, Agimi e lu odlo ototno e gre eshri! Agimi e lu eka he okyku bimi e ka Odlo Ahogbrẽ, ta la ekʼpo ba Ahogbrẽ e bmye mbo angyiŋ. 30Okyku eshi omba ba moare la a kpu á ba a kso eku, moa á zhiŋ á dzu eka moanwyeadga ba Ahogbrẽ angyiŋ Ongyeŋ. Nga moarealom pa la moashe, moa á kyu eble nga mbo. 31Nga eshri oksoeku, agimi e tsi akpa e ka eka ba Ahogbrẽ a lu a da gimi mbo? Aŋa a lu mi le, 32Ame angyiŋ e wo Ahogbrẽ ba Ebrahim ta la a ba Eshaku, ta la a ba Eyakubu. Ohe lo o tsa baŋ a wo Ahogbrẽ moa la a wo la esõ ma, a wo Ahogbrẽ moa la a kpu mbo. 33Omba ba moare a gno eka he nga, moa a ka egbregbre nzenze ta la edgu onyenye ba Eyesu.
Anyuŋ Odaŋ
34Omba ba moaEyahuda a gno ba Eyesu a lu odlo a so moaEsaduki ayi nga, moa a pla emo a shki. 35Akyeŋ eshki mo, aŋa angyiŋ a wo are la a nye odaŋ, a klo okyku o kpyi ŋa la ozhiozhĩ. 36A zhĩ ŋa a lu mi le, Andakʼpo, odaŋ-oyaŋ angyiŋ o wo anyuanyuŋ o gre pyeŋ? 37Eyesu a tno ŋa ma a lu mi le, O dzu omgbybi boŋ o klo Adigi-odne Ahogbrẽ boŋ la esõ boŋ pyeŋ, la oshye boŋ pyeŋ, la aga boŋ pyeŋ. 38Odaŋ he lo angyiŋ o wo anyuanyuŋ o gre pyeŋ. 39Odaŋ ba oha la o wo anyuanyuŋ nzenze eka ba odaŋ ba ori nga, o lu mi le, O klo are la a lom osusku ka la ŋo eka boŋ o klo eshri boŋ. 40Odaŋ ba oha he lo angyiŋ o wo esĩ ba odaŋ ba Omusa, ta la onyenye moarehwĩ ba Ahogbrẽ a hom mo otum.
Ozhiozhi eshri ba Emisiya
41Omba moaEfarisi a kŋe eshri mo a bga okro okyekyeŋ nga, Eyesu a zhĩ mo a lu mi le, 42Agimi e tne aga anyu eshri ba Emisiya? A wo a ba ogu ba ayi angyiŋ? Moa a tno ma a lu mi le, Aŋa a wo a ba ogu ba Adawuda angyiŋ. 43Eyesu a zhĩ a lu mi le, O wo ba alo o wo eka he angyiŋ le, okyku eshi Ogbgaodzi o tsa Adawuda o daŋ a bzi ŋa ma Adaŋ-odne? O ka, Adawuda a lu mi le,
44Ahogbrẽ a nyuŋ Adime-odne a lu mi le,
O dzu obgori me,
O tsa ba ame e da moafpu ŋo a tsi a gbu egi ayi boŋ.
45O wo ba Adawuda a mbo a bzi ŋa ma Adaŋ-odne le, Emisiya a kpo anyu a dzu a ba ogu ba Adawuda? 46Arekyeŋ a kpo a gbu baŋ a tno Eyesu akplokyeŋ mbo ku-ku. A zgi onda he lo nga moa a zhĩ ŋa ekplokyeŋ ku-ku nga mbo.
اکنون انتخاب شده:
Amatiyu 22: EGONT74
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Eggon New Testament © United Bible Societies, 1974. Bible Society of Nigeria
