Amatiyu 23
23
Eyesu a shĩ moa la a nye odaŋ pa la moaEfarisi
1Ambla he nga Eyesu a lu odlo pa la moare, pa la moanwyeotum baŋ. 2A lu mi le, Moa la a nye odaŋ pa la moaEfarisi, moahi lo angyiŋ moa a wo la ekʼpo ba o wre odaŋ ba Omusa. 3Okyku eka he o dzu omgbybi ba agimi e bmi pa la mo, nga e kpo ekployaŋ a mbo ba moa a klo bimi e kpo. Ambo agimi e mbili mo mbo, okyku eshi moa a kpo ayakplo ba moa a lu angyiŋ mbo. 4Moa a la a bʼbi oshri la o lbi a zga moare eshri, ambo mo ababgo mo moa a bmi a shri obgo mo o tka lo mbo. 5Moa a kpo ekployaŋ a mbo okyku o da moare a ka mo sha angyiŋ. Moa a la a dze ashye ama ba moa a ta odlo ba Ahogbrẽ ma, ondaŋ mo, ta la avye abgo mo. Ashye ama he lo a wo agagre. Nga moa a la a shri ashye aknye la a dzõ a la a sum akaŋ ariga mo! 6Moa a la a klo ekro ba odzuma ba moandakʼpo angyiŋ ekro moa a la a ri abgo, pa la ekro moa a la a shki eshki. 7Moa a la a klo moare a shko mo la ekekʼpo ekyku, nga moa a la a klo moare a bzi mo a lu mi le, Andakʼpo. 8Agimi e da mo a la a bzi gimi ma are la a nye mbo, okyku eshi, agimi mvye e wo moanáŋ angyiŋ, nga agimi e wo are la a nye akyekyeŋ sha e ma. 9Agimi e bzi arekyeŋ obiŋ hi ma Ada mbo ku-ku, okyku eshi agimi e wo la Ada akyekyeŋ sha, la a wo Ongyeŋ. 10Agimi e da mo a la a bzi gimi ma Andakʼpo mbo, okyku eshi Andakʼpo boŋ akyekyeŋ sha a wo ma. Aŋa a mi a wo Emisiya. 11Are la a wo la ekʼpo a gre ekpyemgbyeŋ eshki bimi, o dzu omgbybi baŋ a dzu anwye-odne bimi. 12Are-yaŋ a mbo la a la a ka eshri baŋ la ekekʼpo le, moa á sko ŋa á zga ekplokyeŋ mbo, areyaŋ a mbo la a sko eshri baŋ a la a zga ekplokyeŋ mbo le, moa á sko ŋa á zga la ekekʼpo.
Eyesu a shraŋ abibli moa a la a kpo
13A ba eshri bimi la e nye odaŋ ta la agimi Efarisi! Agimi la e bile moare! Agimi e la e so moare ayi ozhẽ la o yi Oreŋ Ongyeŋ. Agimi a mbo e klo e yi mbo. Moa la a klo a yi a mbo, agimi e nyom mo o gre o yi.
[ 14A ba eshri bimi la e nye odaŋ, ta la agimi Efarisi. Agimi la e bile moare! Agimi e la e ngʼga moashe-eshaku anzho adne mo. Ambla he nga agimi e fa olu odzodzõ egi ayi moarehwĩ. Okyku eka he, egbre bimi é vu olo ngre é gre!]
15A ba eshri bimi la e nye odaŋ, ta la agimi Efarisi! Agimi la e bile moare! Agimi e la e dzi okyku o nyum oshpa nzenze ebiŋ endandandim, ambo are akyekyeŋ sha agimi e hwiŋ. Nga agimi e zhiŋ are he lo a zga are la á yi enzheovo ma-me a gre gimi engyi eha.
16Ekplo ayiekŋe ta la agimi la e la e shri moavgayi opi! Agimi e la e nye e lu mi le, O wo ba are a kʼpi ashum la Anyuŋ-akulu le, o dzu omgbybi baŋ a bli ekplo lo mbo. Ambo o wo baŋ a kʼpi ashum la ezinariya la e wo Anyuŋ-akulu lo le, o dzu omgbybi angyiŋ baŋ a bli ekplo lo. 17Agimi adro la e vga ayi! Oyaŋ o wo esesla o gre? Ezinariya angyiŋ le, Anyuŋ-akulu la a da ezinariya lo e wo la esesla? 18Nga agimi e sa e nye e lu mi le, O wo ba are a kʼpi ashum la ambgu le, o dzu omgbybi angyiŋ baŋ a bli ekplo lo mbo. Ambo o wo baŋ a kʼpi ashum ta la ekplo moa á ba a shri á ndba angyiŋ le, o dzu omgbybi angyiŋ baŋ a bli ekplo lo! 19Agimi e vga ayi e gre eshri! Oyaŋ o wo la esesla o gre? Ekplo moa á ba a shri á ndba le, ambgu la a da ekplo he lo e wo la esesla? 20Okyku eka he, ombayaŋ a mbo ba are a kʼpi ashum la ambgu, aŋa a la a kʼpi ashum la ambgu lo, ta la ekployaŋ a mbo la e wo ma angyiŋ. 21Okyku eka he nga, ombayaŋ a mbo ba are a kʼpi ashum ta la Anyuŋ-akulu, aŋa a kʼpi ashum ta la alo, ta la Ahogbrẽ a mbo angyiŋ, okyku eshi aŋa angyiŋ a la a dzu ma. 22Nga o wo ba are a kʼpi ashum la Ongyeŋ le, aŋa a la a kʼpi ashum la emgbakyiŋ-oreŋ ba Ahogbrẽ, ta la Ahogbrẽ la a dzu ma.
23Ekplo ayiekŋe ta la agimi la e nye odaŋ, ta la agimi Efarisi! Agimi la e bile moare! Agimi e la e zgi ogʼba okyeŋ egʼba okʼpo ba ekployaŋ a mbo ba agimi e la e hwiŋ agbi bimi ombamba. Agimi e la e zgi lo enyiŋ-emgbo, ta la afre, ta la elʼma. Ambo agimi e dzu onyenye ba adlidzi ba odaŋ e zga. Onyenye ba odaŋ o wo adlidzi, ta la okayie-kŋe, ta la oshasha. O raŋ o gre ba agimi e kpaŋ ayakplo atra he lo, nga e dzu ayakplo ahwõ e zga mbo. 24Agimi avgayi la e shri moavgayi opi! Agimi e la e sko edzu e sku ami ba owa-wa, ambo agimi e la e mbgi arakumi!
25Ekplo ayiekŋe ta la agimi la e nye odaŋ, ta la agimi Efarisi! Agimi la e bile moare! Agimi e la e ndza etku owami, ta la atku ba orialgo egi edzi sha, nga egi eshyẽ e bli la ayakplo ba agimi e dzu e zga, ozhẽ okpgo moare ta la ozhẽ ba okloeshri. 26Agimi Efarisi la e vga ayi! O raŋ o gre ba agimi e ndza ekplo la e wo etku owami lo eshyẽ ayga, ambla he nga egi edzi a mbo é wo pyapyaŋ!
27Ekplo ayiekŋe ta la agimi la e nye odaŋ, ta la agimi Efarisi! Agimi la e bile moare! Agimi e wo eka engybi ba moa a khwa lo la obiŋ okyle. Alo a shka ayi adzadzi egi edzi, ambo e bli la akukʼpu ba ekom moarehwĩ, ta la anzho la a vrẽ. 28Ekakahelo egi edzi, agimi e zgi e dzu moare ayi eka bimi e wo la odlodzi, ambo ésõ bimi, akpro, ta la odlobi sha o wo ma.
Eyesu a lu odlo eshri ewu mo
29Ekplo ayiekŋe ta la agimi la e nye odaŋ, ta la agimi Efarisi! Agimi la e bile moare! Agimi e la e kpo engybi la e wo adzadzi okyku moarehwĩ ba Ahogbrẽ a hom mo otum, nga agimi e ta ama ba ozba okyku o da moare a tne aga moare odlodzi la a kpu. 30Nga agimi e lu mi le, O wo ba agi e wo ma omba ba moadigi a wo ma e mbi, agi é kpo ayakplo moa a kpo mbo, nga é bga moarehwĩ ba Ahogbrẽ a hom mo otum mbo. 31Agimi e bmi ba agimi angyiŋ e wo moare ba ogu moa la a bga moare ba Ahogbrẽ a hom mo otum lo! 32Agimi e kpo ekployaŋ a mbo e mu-mu, nga e bli ayakplo moadigimi a zga esĩ. 33Amabi, pa la moanwye ba amabi! Agimi é kpo anyu e la e ka ayi ozhẽ okyku o gro ombgu ba enzheovo? 34Okyku eka he ame e lu e da gimi, ame e da moarehwĩ ba Ahogbrẽ a hom mo otum, pa la moare la a wo la okaobmye ma, pa la moa la a nye a ba, agimi nga é bga moakyeŋ eshki mo, nga é kũ moabze ekusa egŋe aki, nga agimi é taŋ moa-kyeŋ andzu anwyeakulu bimi, nga agimi é dzi esku é la é klo mo. 35Okyku eka he nga, ewu ba moa la a bga moare la a gbu ombgu mbo é dzu eshri bimi, a zga omba moa a bga Ahabila la a wo odlodzi, a ba omba ba moa a bga Azakariya, anwye Ebrakiya. Moa a bga ahe lo agʼbaha ba Anyuŋ-akulu ta la ambgu. 36Ame e lu e da gimi, adlidzi angyiŋ, ewu ba ayakplo he lo pyeŋ, é dzu eshri moare ba ekplu he lo!
Eyesu a klo Orushalima
37Aŋo Orushalima, Orushalima! Aŋo o bga moarehwĩ ba Ahogbrẽ a hom mo otum, nga o tra moanwyeadga ba Ahogbrẽ a hom mo otum okro bimi ézhim. Engyi ehrẽ ame e klo e ngla abgo me e kpaŋ moarehwĩ boŋ eka ba enu e la e ngla angʼbo e la e shki moanwye baŋ? Ambo agimi e tla! 38E ka, ohuhuhi, moa á dzu odne bimi á zga ekpyemgbyeŋ a mo. 39Ame e lu e da gimi a zga omba he a yi osu nga, agimi é ka me nga mbo ku-ku, o wo le omba bimi e lu mi le, Ahogbrẽ a shri owlama a daŋ la á ba eshko ba Adigi-odne, ayga dne.
اکنون انتخاب شده:
Amatiyu 23: EGONT74
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Eggon New Testament © United Bible Societies, 1974. Bible Society of Nigeria
