Amatiyu 21
21
Eyesu a gre Orushalima la esesla
1Moa a gbu anwye oskukyeŋ moa a bzi lo ma Ebefagi. Alo o wo osusku ta la Orushalima. Anwye osku lo a wo Akũ ba Olivi. Eyesu a hom moanwyeotum baŋ aha otum ahe lo, okyku o da mo a bre a yi. 2A nyuŋ mo a lu mi le, Agimi e yi anwye osku la a wo egi ayi bimi, agimi é ka ashrishri moa a dze lo. Anwye baŋ a wo ka la ŋa. Agimi e ngla mo e shri e kom me. 3Nga o wo ba arekyeŋ a zhĩ akplokyeŋ le, agimi e lu e daŋ e lu mi le, Adigi a klo lo. Nga á shri lo á ba. 4Ekplo he lo e kpo okyku o bli ekplo ba arehwĩ ba Ahogbrẽ a hom otum a lu. A lu mi le,
5Aŋo o lu o da osku ba Ezayoŋ,
Ohuhuhi, Anyuŋ-areŋ boŋ a la a ba okro boŋ.
Aŋa a wo la esõ ble, nga a vre ashrishri.
Aŋa a vre anwye ashrishri.
6Moanwyeotum a bre a gre nga, moa a yi a kpo eka ba Eyesu a lu a da mo. 7Moa a shri ashrishri lo ta la anwye baŋ a shri a ba, moa a ngla aknye mo a shri a shki ashrishri lo, nga Eyesu a vre lo. 8Moare nzenze a shri aknye mo a ngla ozhẽ. Moakyeŋ nga a kplu embgu akiki a ngla ozhẽ. 9Moare la a wo egi ayi Eyesu, pa la moare la a wo egi ambla baŋ, moa a lu odlo angyangyeŋ a lu mi le, E hlu Anwye Adawuda eshko. Ahogbrẽ a kpo a ghwo la ŋa la a ba eshko Adigi-odne! E hlu Ahogbrẽ eshko!
10Omba ba Eyesu a gbu Orushalima nga moare ba okro-yaŋ a mbo, moa a yga akhi. Moare a zhĩ a lu mi le, Aŋa a wo ayi angyiŋ? 11Eshki e tno ma e lu mi le, Aŋa a wo Eyesu arehwĩ ba Ahogbrẽ a hom otum angyiŋ. A zgi Anazarata ba Egalili.
Eyesu a gre Anyuŋ-akulu
12Eyesu a gre Anyuŋ-akulu nga, a se moare la a shri anzho a gbmo ma. A mu eteblo moa la a nyiŋ amgbaŋ, ta la emgba-kyiŋ moa la a shri aklungu a gbmo a ta obiŋ, 13nga a nyuŋ mo a lu mi le, Moa a ta Akpa ba Ahogbrẽ a lu mi ma Ahogbrẽ a lu mi le, Moa a bzi odne me ma odne olu. Ambo agimi e da lo a zhiŋ a dzu emvygi moasi!
14Moavgayi pa la moa la a buŋ adga, moa a ba okro baŋ Anyuŋ-akulu nga, a shaŋ mo. 15Moandakʼpo olu ba Aho-gbrẽ, pa la moa la a nye odaŋ, esõ e tpi mo ayi, okyku moa a ka ayakplo egbregbre baŋ a la a kpo nga, moanwye la a wo Anyuŋ-akulu, a ta enzi a lu angyangyeŋ a lu mi le, E hlu Anwye Adawuda eshko! 16Nga moa a nyuŋ Eyesu a lu mi le, Aŋo o gno ekplo moa a la a lu ma? Eyesu a tno mo ma a lu mi le, Ame e gno e gre eshri. Agimi e tsi Akpa Ahogbrẽ la a lu mi le, Agimi e nye moanwye afifi, pa la moanwye able zhezheŋ okyku o da mo a la a hlu Ahogbrẽ eshko adzadzi e ka ku-ku mbo? 17Ambla he nga, Eyesu a zgi a dzu mo a zga nga a gre anwye osku ba Ebetanya, nga a kpo okyukyku baŋ ahe lo.
Eyesu a ta anyuabi a ygi esĩ ebro
18Endigiŋ onda oha nga, omba ba Eyesu a bla a yi osku lo nga, embyle e kpo ŋa. 19A ka esĩ ebro akaŋ ozhẽ. Nga a gre okũ lo, a klo agbro ma, ambo a hwiŋ emakyeŋ mbo, o wo le ayeya sha. Okyku eka he nga a nyuŋ esĩ ebro lo a lu mi le, Aŋo ó fu agbro ondakyeŋ ku-ku nga mbo! Ebuebu nga, esĩ ebro lo e kpu. 20Moanwyeotum a ka eka he nga moa a ka egbregbre. Nga moa a zhĩ a lu mi le, Esĩ ebro he e kpo anyu e mom shoshoŋ eka he? 21Eyesu a nyuŋ mo a lu mi le, Agimi e tne e ka! O wo bimi e bmi ba adlidzi nga e fu eha esõ bimi ku-ku mbo, agimi a mbo é kpo é gbu ba gimi é kpo edgu ekplo ba ame e kpo ta la esĩ ebro he. Nga agimi é kpo ekplo la e gre ehi a mbo. O wo bimi e bmi ba adlidzi le, agimi é kpo é gbu bimi e nyuŋ akũ e lu mi le, Akũ o gʼbu o yi o gre anyuŋ-ondzu, ó dzu eka he lo. 22O wo bimi e bmi ba adlidzi le, ekployaŋ a mbo bimi e vẽ omba bimi e fa olu le, agimi é hwiŋ lo.
Moa a shĩ Eyesu eshri ekʼpo baŋ
23Eyesu a sa a bla a ba Anyuŋ-akulu. Omba baŋ a la a nye moare nga, moandakʼpo olu ba Ahogbrẽ, pa la moandakʼpo moaEyahuda, moa a ba a zhĩ ŋa a lu mi le, La ekʼpo ayi aŋo o kpo ayakplo egbregbre eka he? Ayi a shri ekʼpo he lo a shri a doŋ? 24Eyesu a tno mo ma a lu mi le, Ame é zhĩ gimi ekplo ekyekyeŋ sha. O wo bimi e tno me ma bgu le, ame a mbo é lu é da gimi, eka ba ame e hwiŋ ekʼpo e la e kpo ayakplo he lo. 25E lu e da me, la ekʼpo ayi Eyohana a la a kpo abaptisma? La ekʼpo ba Ahogbrẽ le, la ekʼpo ba arehwĩ? Ambla he nga moa a sla emo a kla ta la emo a lu mi le, Agi é tno ŋa ma é lu la eshi? O ka, o wo bi e tno ŋa ma e lu mi ma Eyohana a hwiŋ ekʼpo baŋ okro Ahogbrẽ le, Eyesu á lu mi le, O wo eka he le, okyku eshi agimi e bmi ba adlidzi ta la Eyohana mbo? 26Ambo o wo bi e lu mi le, Aŋa a hwiŋ lo okro arehwĩ angyiŋ, agi é dzu pyaŋ pa la moare mbo, okyku eshi moa a bmi adlidzi ba Eyohana a wo arehwĩ ba Ahogbrẽ a hom otum angyiŋ. 27Okyku eka he nga moa a tno Eyesu ma a lu mi le, Agi e yi mbo. Eyesu a mbo a tno mo ma a lu mi le, Ame a mbo é lu ekplokyeŋ eshri ekʼpo ba ame e la e kpo ayakplo he, é da gimi mbo.
Egŋe eshri moanwye aha
28Agimi e ka, alomakyeŋ a wo ma, a wo moanwye aha ma. A gre okro ba andakʼpo eshki mo nga a nyuŋ ŋa a lu mi le, Anwye me, o yi o kpo otum agbi anye. 29Anwye lo a tno ŋa ma a lu mi le, Ame e tla. Ambo ambla fi nga a nyiŋ aga baŋ nga a gre agbi lo. 30Ambla he nga adimo a gre okro anwye ahwõ nga a nyuŋ ŋa eka baŋ a nyuŋ ahwõ. Anwye lo a bmi, ambo a gre mbo ku-ku. 31Ayaŋ eshki moanwye aha he lo, a kpo ekplo ba adimo a klo? Moa a tno ma a lu mi le, Anwye andakʼpo angyiŋ a kpo ekplo ba Adimo a klo. Eyesu a nyuŋ mo a lu mi le, Ame e lu e da gimi, moa la a yga ewaŋ, pa la moashe la a la a ri eshra, moa á yi Oreŋ Ahogbrẽ á sku gimi. 32Okyku eshi Eyohana la a kpo abaptisma a ba okro bimi, nga a tsa gimi ozhẽ la o raŋ o gre, ambo agimi e bmi ba adlidzi ka la ŋa mbo. Ambo moa la a yga ewaŋ, pa la moashe la a ri eshra, moa a bmi ba adlidzi ka la ŋa. Omba bimi e ka eka he a mbo, agimi e ka e nyiŋ aga bimi ambla nga e bmi ba adlidzi ka la ŋa mbo.
Egŋe eshri areagbi
33Eyesu a lu mi le, Agimi e ngli atuŋ e gno egŋe ekyeŋ nganga. Areagbikyeŋ a wo ma. Aŋa a hom oso a ta agbi a kpaŋ. Nga a kpo ohwĩ esheshyẽ ba agbi lo, nga a ta atandla, moa a la a dzu ma a la a kʼpu agbi lo. A shri agbi baŋ a ghwo abgo moarekyeŋ, nga a gre odzi. 34Omba moa a yla algo agbi nga, areagbi lo a hom moawaghrẽ baŋ otum okro moa la a la a kpaŋ agbi okyku o da mo a yga ogʼba baŋ a shri a kom ŋa. 35Moa la a kpaŋ agbi, a vu moawaghrẽ baŋ lo nga, moa a taŋ akyeŋ andzu, nga moa a bga akyeŋ a ta okom, nga moa a tra akyeŋ ézhim. 36Ambla he nga, areagbi lo a sa a da moawaghrẽ la a gre moa a baŋ a da mo a gre oriori. Moa la a la a kpaŋ agbi lo, moa a kpo mo eka ba moa a kpo moa-waghrẽ ba oriori lo. 37Amom-abgo ekpyemgbyeŋ a mo nga, aŋa a da anwye baŋ a ba. A lu mi le, Adlidzi moa á fa olbi a daŋ. 38Ambo omba ba moa la a la a kpaŋ agbi a ka anwye lo a la a ba nga, moa a lu ta la emo a lu mi le, Anwye areagbi lo a ba a mi. Agimi e da gi e bga ŋa, okyku o da gi e ri ogu! 39Ambla he nga, moa a vu ŋa, moa a se ŋa a sku agbi lo nga, moa a bga ŋa.
40Eyesu a zhĩ moare a lu mi le, Omba ba areagbi lo a ba le, aŋa á kpo eshi pa la moa la a kpaŋ agbi baŋ? 41Moare a tno ma a lu mi le, Ekplokyeŋ ba ofuoha e wo ma mbo, areagbi á bga abi moare la a kpaŋ agbi lo, nga á ngʼga agbi lo á ghwo moahwõ abgo. Aŋa á shri lo á da moare la á ba a kpo á gbu ba moa a shri ogʼba baŋ a shri a daŋ omba ba omba lo o bli. 42Eyesu a sa a zhĩ mo a lu mi le, Agimi e tsi Akpa Ahogbrẽ e ka mbo? Alo a lu mi le,
Ezhim moa la a mbdzi a tla lo a ta eka ba alo e wo la ekplokyeŋ mbo,
E zhiŋ e dzu ezhim la e wo la owlama e gre pyeŋ.
Ohe lo Adigi-odne angyiŋ a kpo.
O wo ekplo egbregbre angyiŋ eyayi bi!
43Eyesu a ta ma a lu mi le, Okyku eka he ame e lu e da gimi, moa á sko Oreŋ ba Ahogbrẽ á sku gimi, nga moa á shri lo á shri á da moa la á ba a kpo á gbu moa á ba a fu agbro nzenze la a wo adzadzi. [ 44Areyaŋ a mbo la a tsu a gbu ezhim hi lo, á gom okyukyukyku. Nga o wo ba ezhim lo e gbu arekyeŋ le, é sha ŋa rerereŋ.]
45Moandakʼpo olu ba Ahogbrẽ, pa la moaEfarisi moa a ka lo a tspi baŋ a ta egŋe eshri mo angyiŋ. 46Okyku eka he nga, moa a klo ozhẽ okyku o vu ŋa. Ambo moa a kpo eyli ba eshki, okyku eshi moa a lu mi ma Eyesu a wo arehwĩ ba Ahogbrẽ a hom otum angyiŋ.
اکنون انتخاب شده:
Amatiyu 21: EGONT74
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Eggon New Testament © United Bible Societies, 1974. Bible Society of Nigeria
