Апостол Петрэ апэрэ тхылъэу ытхыгъэр 1
1
АПЭРЭШЪХЬ
ШӀуфэс
1Сэ сы Петр, Исус Христос сыриапостол. Шъо Тхьэм ицӀыф лъапӀэхэу зэбгырыкӀыгъэхэу хэкухэу Понт, Галатие, Каппадокие, Асие, Битиние ащыпсэухэрэм мы тхылъыр къышъуфэсэтхы. 2Тхьэу Ты лъапӀэм ыпэкӀэ зэриухэсыгъэм тетэу, ибынхэм ащыщ шъухъунэу шъукъыхихыгъ, ежь ы Псэ ЛъапӀи шъугухэр егъэкъэбзэ зэпыт, Исус Христос нахьыбэрэ шъуедэӀуным паий, ащ ылъэу къащым щыкӀэкӀыгъэмкӀэ къабзэ шъухъуным паий. Тхьэм ынэшӀу инэу къышъущерэфэ зэпыт, гупсэфышхуи къышъуерэт зэпыт.
МыкӀодыжьын гугъапӀ
3Тхьэу, ти Зиусхьан Исус Христос я Тэ щытхъушхор ий! Исус лӀагъэхэм къызэрахигъэтэджыкӀыжьыгъэмкӀэ Тхьэм игукӀэгъушхокӀэ икӀэрыкӀэу тыкъалъфыжьыгъэу тигъэхъугъ. Аущтэу мыкӀодыжьын гугъапӀэ тиӀэ хъугъэ, 4ӀахьышӀоу Тхьэм ицӀыфхэм афигъэхьазырыгъэри къытлъыӀэсыщт. А мыкӀодыжьын ӀахьышӀоу щыкӀагъэ зимыӀэу, зэрэщытэу къанэрэр Тхьэм уашъом къыщышъуфеухъумэ. 5ШӀошъхъуныгъэ зэрэшъуиӀэм пае, Тхьэм илъэкӀыкӀэ шъукъеухъумэ, шъумыкӀодэу шъукъызэригъэнэжьыгъэр дунаим иаужырэ мафэхэм нафэу къэхъуным пае. 6Арышъ, зы тӀэкӀурэ къин зэфэшъхьаф зэрэшъущэчырэм пае, джы шъугу къеон фаеми, шъугушӀу. 7А къинхэр зыфэшъущэчыхэрэр шъуишӀошъхъуныгъэ загъэунэфыхэкӀэ, ащ ишъыпкъагъэ нафэ хъуныр ары. Дышъэм ишъыпкъагъэ машӀомкӀэ агъэунэфыми, а дышъэр кӀодыжьыщт. ШъуишӀошъхъуныгъэ а дышъэм нахьи нахь лъапӀ. Аущтэу Исус Христос къызыкӀожьыщт мафэм шъуишӀошъхъуныгъэ ишъыпкъагъэ пае, Тхьэм шъхьэкӀафи, щытхъуи, лъытэныгъи къышъуфишӀыщт. 8Исус Христос шъумылъэгъугъэми, шӀу шъолъэгъу. Джы дэдэми шъумылъэгъуми, ежьыркӀэ шӀошъхъуныгъэ шъуиӀ, гущыӀэкӀэ къэпӀон умылъэкӀынэу, щытхъушхо зыхэлъ гушӀогъошхуи шъугухэм арылъ. 9Сыда пӀомэ, аужыпкъэм шъуишӀошъхъуныгъэкӀэ шъумыкӀодэу Тхьэм шъукъызэригъэнэжьыщтым шъунэсы.
10Тхьэм ынэшӀу къызэрэшъущифэщтым икъэбар зыгъэӀугъэ пегъымбархэм цӀыфхэр мыкӀодхэу Тхьэм къызэригъэнэжьыщтхэм ехьылӀэгъэ къэбар пстэури ауплъэкӀущтыгъэх, ахэри агъэунэфыщтыгъэх. 11Христос къинхэр ыщэчынхэшъ, ащ нэужым щытхъушхо иӀэ зэрэхъущтыр пегъымбархэм агухэм арылъ Христос ы Псэ ЛъапӀэ къызеӀом, уахътэу зигугъу ышӀыгъэри Христос къызэрэкӀожьыщт шӀыкӀэри пегъымбархэм зэрагъэшӀэнэу ыуж итыгъэх. 12Пегъымбархэм Ӏофхэу зигугъу ашӀыщтыгъэхэр ежьхэм ялъэхъан къэмыхъузэ, шъо шъуилъэхъан къызэрэхъущтыр Тхьэм къагуригъэӀогъагъ. Тхьэм ежь ы Псэ ЛъапӀэу уашъом къафыригъэхыгъэм илъэкӀыкӀэ КъэбарышӀур къышъозгъэӀугъэхэм мы Ӏофхэм якъэбар къышъуаӀотагъ. МэлэӀичхэри мы Ӏофхэм ахэплъыхьанхэу фаех.
Гу къабзэкӀэ шъузекӀу
13Арышъ, шъуицыякӀэхэр дэупкӀагъэхэу, шъугухэмкӀэ шъухьазырэу шъущыт. ЩэӀагъэ зижъугъаӀ. Исус Христос къызыкӀожьыщт мафэм Тхьэм ынэшӀу къызэрэшъущифэщтым шъуишъыпкъэу шъущыгугъэу шъупаплъ. 14Шъыпкъэр зыфэдэр шъумышӀэу, шъуихъопсэ Ӏаехэм шъукъызэрэращэкӀыщтыгъэм фэдэу, джы сабый ӀорышӀэхэм афэдэу зыкъыряшъумыгъэщэкӀ. 15Ау Тхьэу зибынхэм ащыщ шъухъунэу къышъоджагъэр зэрэлъапӀэм фэдэу, шъори шъугу лъапӀэу, шъугу къабзэу шъушӀэрэ пстэури шъушӀэ. 16Сыда пӀомэ, Тхьэм къызэриӀорэр игущыӀэ тхыгъэхэм арыт#1:16 Тхьэм игущыӀэ тхыгъэхэм арыт – еплъ Пегъымбар Мусэ ящэнэрэ тхылъэу ытхыгъэм 19:2.: «Сэ сызэрэлъапӀэм пае, шъори шъулъэпӀэн фае».
17ЦӀыфхэм ятеплъэ емыплъэу, цӀыф пстэури зизэфэдэу, хэти ышӀагъэм тетэу шъыпкъагъэкӀэ хьыкум тезышӀыхьэрэ Тхьэм шъузелъэӀукӀэ, «О, Ты лъапӀ», – ешъоӀо. Арышъ, шъухымэу мы дунаим щыжъугъакӀорэ уахътэр Тхьэм шӀолӀыкӀ фышъуиӀэу щыжъугъакӀу. 18Сыда пӀомэ, зэрэшъушӀэрэм фэдэу, шъуятэжъхэм къакӀэныжьыгъэ псэукӀэу пкӀэ зимыӀэм шъухищыжьынэу Христос шъушъхьэ ыщэфыжьыгъ. Шъушъхьэ зэрищэфыжьыгъэр кӀодыжьын тыжьыныр е дышъэр арэп, 19Ежь ылъэу уасэ зыфэпшӀын умылъэкӀыщтыр ары нахь. Ежьыр щыкӀагъэ зимыӀэу, бжьыгъэ зытемылъ шъынэм фэд. 20Дунаир къыгъэхъуным ыпэкӀэ, Тхьэм Христос къыхихыгъ, ау джы дунаим икӀэухым шӀугъэ къыжъудигъэхъунэу Христос къэлъэгъуагъ. 21Христос ТхьэмкӀэ шӀошъхъуныгъэ шъуиӀэ ыгъэхъугъ. Тхьэр ары Христос лӀагъэхэм къахэзгъэтэджыкӀыжьыгъэр, щытхъушхори къезытыгъэр. Ащ пае ТхьэмкӀэ шӀошъхъуныгъэ шъуиӀэ хъугъэ, Тхьэми шъущэгугъы.
22Шъыпкъэм шъузэредэӀугъэм пае, шъугухэр къабзэ хъугъэх. Джаущтэу шъушыхэр пцӀы хэмылъэу шӀу шъулъэгъух. Арышъ, гу къабзэкӀэ шӀу шъузэрэлъэгъу зэпыт, 23сыда пӀомэ, икӀэрыкӀэу шъукъалъфыжьыгъэшъ ары. ИкӀэрыкӀэу шъукъызэралъфыжьыгъэр кӀодыжьын чылапхъэп, мыкӀодыжьын чылапхъ нахь. А чылапхъэу щыӀэныгъэ къызхэкӀэу, Тхьэм игущыӀэу егъашӀэм зытетым тетэу къэнэжьыщтыр ары. 24Сыда пӀомэ, Тхьэм игущыӀэ тхыгъэхэм зэрарытэу#1:24 Тхьэм игущыӀэ тхыгъэхэм зэрарытэу – еплъ Пегъымбар Ешайа тхылъэу ытхыгъэм 40:6-8.,
«ЦӀыф пстэури уцым фэд,
зэкӀэ ящытхъуи уцым икъэгъагъэ фэд.
Уцыр мэгъужьы, къэгъагъэри мэкӀодыжьы.
25Ау Тхьэм игущыӀэхэр мыкӀодыжьхэу егъашӀэм къэнэх».
А гущыӀэхэр ары Тхьэм иӀорышӀэхэм къышъуагъэӀугъэхэр.
اکنون انتخاب شده:
Апостол Петрэ апэрэ тхылъэу ытхыгъэр 1: AdgNT14
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Институт перевода Библии, 1991, 1992, 2014. Стокгольм