Апостол Петрэ апэрэ тхылъэу ытхыгъэр 2
2
ЯТӀОНЭРЭШЪХЬ
Лъэпкъ лъапӀэр
1Арышъ, бзэджэгъэ пстэури, тхьагъэпцӀыгъэ пстэури, нэпитӀугъэри, шъугъони, цӀыфхэм ӀаекӀэ шъуатегущыӀэнри хэшъунэжьых. 2КъалъфыгъакӀэ сабыйхэр янэ ибыдзыщэ зэрэкӀэхъопсыхэрэм фэдэу, шъори Тхьэм игущыӀэхэу щэ къабзэм фэдэхэм шъуакӀэхъопс, ахэмкӀэ ины шъухъоу, шъумыкӀодэу Тхьэм шъукъыгъэнэжьыным пае. 3Сыда пӀомэ, Зиусхьаныр зэрэшӀур зэжъугъэшӀагъэ.
4Зиусхьаным пэгъунэгъу шъухъу. Ары щыӀэныгъэ зиӀэ мыжъоу, цӀыфхэм зэрамыпэсэу чӀадзыжьыгъэр, ау Тхьэм ар къыхихыгъ, ежьыркӀэ ащ осэшхо иӀ. #2:4 Е Зиусхьан Исус пэгъунэгъу шъухъу. Ар унэ зышӀыхэрэм зэрамыпэсыгъэ мыжъом фэд. Ау Тхьэу щыӀэныгъэ зиӀэ унэшхо зышӀырэм осэшхо иӀэу елъытэшъ, ар къыхихыгъ. 5Шъори щыӀэныгъэ зиӀэ мыжъохэм шъуафэдэу, Тхьэм ы Псэ ЛъапӀэ зыдэщыӀэ унэшхом щыщ шъухъу. Джаущтэу дин пэщэ лъапӀэ шъухъущт, Исус Христос Ӏофэу ышӀагъэм пае, къурмэныпхъэхэу Тхьэм ыгу зэӀухэрэри гурэ псэрэкӀэ Тхьэм ешъухьылӀэшъущтых. 6Сыда пӀомэ, Тхьэм къызэриӀуагъэр игущыӀэ тхыгъэхэм арыт#2:6 Тхьэм игущыӀэ тхыгъэхэм арыт – еплъ Пегъымбар Ешайа тхылъэу ытхыгъэм 28:16.:
«ШъукъэдаӀу, сэ къыхэсхыгъэу,
мыжъо лъапсэу осэшхо зиӀэр
Цион къалэм щысэгъэтӀылъы.
А мыжъомкӀэ шӀошъхъуныгъэ
зиӀэр кӀэгъожьыщтэп».
7Шъо, шӀошъхъуныгъэ зиӀэхэмкӀэ, а мыжъом#2:7 мыжъор – Христосыр ары. Яплъ Орэд ЛъапӀэхэм 117:22. осэшхо иӀ. Ау шӀошъхъуныгъэ зимыӀэхэмкӀэ
«Унэ зышӀыхэрэм чӀадзыжьыгъэ мыжъор
унэр зыӀыгъырэ лъэпсэ дэдэ хъугъэ»,
8ащ нэмыкӀэуи,
«ЦӀыфхэр зыгъэлъэпаорэ мыжъоуи,
цӀыфхэр чӀыгум тезгъэфэрэ мыжъошхоуи#2:8 Еплъ Пегъымбар Ешайа тхылъэу ытхыгъэм 8:14.» хъугъэ.
Тхьэм игущыӀэхэм зэрямыдэӀухэрэм пае, мэлъэпаох, Тхьэм ахэмэ зэрафигъэнэфагъэм фэдэу.
9Ау шъо Тхьэм къыхихыгъэ лӀакъоу, Тхьэу пачъыхьэм иӀорышӀэ дин пащэхэу, лъэпкъ лъапӀэу, Тхьэм ицӀыфхэу шъущыт. Аущтэу зыкӀэхъугъэр шӀункӀым шъукъыхэкӀыжьынышъ, нэфынэ гъэшӀэгъонышхом шъухэхьанэу къышъоджэгъэ Тхьэм иӀоф гъэшӀэгъонхэр жъугъэӀунхэр ары. 10Пасэм Тхьэм шъурилъэпкъыгъэп, джы Тхьэм шъурилъэпкъ. Пасэм Тхьэм гукӀэгъу къышъуфишӀыщтыгъэп, джы гукӀэгъу къышъуфешӀы.
Тхьэм иӀорышӀэхэм яфэшъуашэу шъузекӀу
11СилъапӀэхэр, шъо, хымэхэу мы дунаим хымэхэсхэу щыпсэухэрэм, хъопсэ Ӏаехэу шъупсэ къыпэуцухэрэм защышъудзыенэу сышъолъэӀу. 12Тхьэр зымышӀэхэрэм апашъхьэ дахэу шъущызекӀу. Сыда пӀомэ, «Мы цӀыфхэр бзэджашӀэх» аӀозэ, ӀаекӀэ шъуигугъу ашӀыми, шъуишӀушӀагъэхэр алъэгъунхэшъ, Тхьэр ахэмэ зяплъыщт мафэм ахэми Тхьэм щытхъу фашӀыщт.
13Зиусхьаным игъогу шъузэрэрыкӀорэм пае, тетыгъо зиӀэ цӀыф пстэуми шъуафэӀорышӀ: зэкӀэмкӀи, тетыгъо зиӀэ пачъыхьэр арыми, ащ шъуфэӀорышӀ, 14бзэджашӀэхэм къин атезылъхьанэуи, шӀу зышӀэхэрэм ащытхъунхэуи пачъыхьэм къыгъэкӀогъэ Ӏэшъхьэтетхэр арыми, ахэмэ шъуафэӀорышӀ. 15Сыда пӀомэ, шӀу зэрэтшӀэрэмкӀэ гулъытэ зимыӀэ цӀыфхэу зи зымышӀэхэрэм ажэ ядгъэубытыныр ары Тхьэр зыфаер. 16ШъхьафитыныгъэкӀэ шъузекӀу, ау бзэджэшӀэнымкӀэ шъхьафитыныгъэр ушъхьагъу шъумышӀы, ау Тхьэм иӀорышӀэхэм яфэшъуашэу шъузекӀу. 17ЦӀыф пстэуми лъытэныгъэ афэшъушӀ, шъушыхэри шӀу шъулъэгъух, Тхьэми шъущыщын, пачъыхьэми лъытэныгъэ фэшъушӀ.
Христос илъэужхэм шъуарыкӀу
18Шъо, унэӀутхэр, лъытэныгъэ пстэумкӀи шъуитхьэматэхэм шъуафэӀорышӀ, тхьэмэтэ шъабэу, шэнышӀом изакъоп, тхьэмэтэ пхъашэри ары. 19Сыда пӀомэ, лажьэ имыӀэми, къин зырагъэщэчкӀэ, Тхьэм егупшысэу ыгукӀэ щэӀагъэ зиӀэр ары Тхьэм ыгу зэӀурэр. 20Ау мыхъун шъушӀагъэу къызышъуаохэкӀэ, шъугухэмкӀэ щэӀагъэ зижъугъаӀэмэ, шъоркӀэ сыд фэдэ щытхъуа ащ хэлъыр? Ау шӀу шъушӀэ пэтми, къин зышъуагъэщэчкӀэ, шъугухэмкӀэ щэӀагъэ зижъугъэӀэныр ары Тхьэм ыгу зэӀурэр. 21Аущтэу шъузекӀонэу Тхьэр къышъоджагъ, сыда пӀомэ, Христоси шъощ пае къин ыщэчыгъ, илъэужхэм шъуарыкӀонэу шъушӀапхъэхэри шъуигъэлъэгъугъ. 22«Ежь псэкӀод зи ышӀагъэп, узгъэпцӀэн гущыӀи ыжэ къыдэкӀыгъэп». #2:22 Еплъ Пегъымбар Ешайа тхылъэу ытхыгъэм 53:9. 23Къехъоныщтыгъэхэми, яхъоныжьыщтыгъэп. Къин езгъэщэчыщтыгъэ цӀыфхэми, «Сэ къин шъозгъэщэчыжьыщт» ариӀуагъэп, ау а Ӏофыр цӀыфхэм хьыкум зэфагъэкӀэ атезышӀыхьэрэ Тхьэм фигъэзагъ. 24Къащым зытыраӀулӀэм, типсэкӀодхэр ттырихызэ, ахэмэ яфэшъошэ къиныр ежь ыпкъ тырилъхьагъ, псэкӀодым лъэкӀ къытфыримыӀэным ыкӀи шъыпкъэм тыфэпсэуным апае. Ежь иуӀагъэхэмкӀэ шъуигъэхъужьыгъ. 25Сыда пӀомэ, шъо мэл гъощагъэхэм шъуафэдагъ, ау шъупсэхэм яухъумакӀоу, шъуимэлахъо дэжь джы шъукъэкӀожьыгъ.
اکنون انتخاب شده:
Апостол Петрэ апэрэ тхылъэу ытхыгъэр 2: AdgNT14
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Институт перевода Библии, 1991, 1992, 2014. Стокгольм