آیات محبوب کتاب مقدس از John 15

به اشتراک گذاشتن

Niistówa ánni omii miistsísi. Kiistóaawa ánni annístsi sáoʼkaniksiistsi. Omáa ikkámohpipaitapiisi niistóyi, kii ikkámohpipaitapiiniki ostóyi iikákakawoi otánisttsissistsi iihtohkóíkioʼpistsi. Kiistóaawa ikkámsawattohpokaʼpaissiimokiinoainiki mátaakattónoaohtaohkoyikioʼpi kiistóaawa.

Óóki. Omiiya saoʼkániksi, manistsípoʼtsstsiihpi amíi mistsísi, niʼtóí kitáksstsinaaʼnistsakiohpipaitapiiyihpoaawa niistówa. Ki nitáksaakiohpipaitapii kiistóaawa. Omííya saoʼkániksi ikkámsawattsitsipoʼtsstsisi omiia miistsísi ákitsawattáyiinaʼsiwa. Kii niʼtóí niitsiiwa: kiistóaawa ikkámsawattohpipaitapiiyinoainiki niistówa, kipáítapiʼssoawaistsi mátakattohpanioʼpa.

Óóki. Ikkámohpipaitapiiyinoaainiki niistówa, kii ikkámsawaatstoominoainiki nítssksinimaatstohkihpistsi, kitáksotamanikkihpoaawa kitáyaakanikkihpoaawayi, ki ánniai ki tákitanisttotomoohpoaawa.

Kiistóaawa, kimátssiikoʼtookihpoaawa. Niistówa kítssiikoʼtoohpoaawa. Kanistsípoʼtoohpoaawa kááhkohkanawániitoohsoayi. Kipáítapiʼssoaawayi ákitohtoʼtsistapitsstsiiwa iihtohkóíkioʼpi. Kii áámohka iihtohkóíkioʼpihka mátakssikihtsííwaatsiksi. Ki ánnimayii aokámanistainoainiki nínna ikkámohtokamanistainoainiki kitámssoayi amííksiska itomáíʼtakiiksi niistóyi kitákítohkanaohkokkoaawa kitsííkamanistahpoaawayi.

Kitákanistohpoaawa manistsííhpi istohkanáíʼtaʼpakomimmihtaani: Omáa iimátskaohsiwa mááhkohtahtsawaiʼnssi otákkaaiksi, ánnahkaoʼka istohkanáíʼtaʼpakomimmiiwaiski.

Óóki. Omáa matápiiwa, áótoitsikatooma soyikapínniihpists, áakssaʼtsimiaawa. Ikkamítsstsiihki otsiníʼpi saoʼkaníksi mátohtohkoikioʼpi otsítsawayíínaʼsspi, áksotámsaoʼtsima. Kii omíístsi otsítayiinaʼsspi, áíksiʼkkaahkaanistotsimaistsi. Ki ánniai ákitsistapakayiinaʼsiyaawa. Niʼtóí niitsiiwa nínna ki niistówa.

Óóki. Áwakomimmotsiiyika. Ánniai kanistókakohtomoohpoaawa. Kanistákomimmohpoaawayi, istotóísapakomimmotsiiyika.

Kiistóaawa iikákakawo iihtohkóíkioʼpistsi kitánisttsissiistsi, ki ánnihkayi nínna ákohtsitsspimmawa. Ki ákstaminako kiistóaawa kitámssoayi omiiksiska itomáíʼtakiiksi niistói.

Óóki. Jesus sotámitotoisapsskanistsiiwa omónikapiimiksi, “Niistówa ánnaoʼka annaahka niitáʼpamiwahka ánni óómistska otsítaisaisskiihpi soyikapínniihpi. Ki nínna ánni áótoitsikatoomi amostsiska.

Omííksi kátaʼohpipaitapiiksi niistóyi, niʼtói ákanistotoayi ánni kátaʼohpanioʼpists saoʼkániksiistsi. Amíístsi saoʼkániksistsi áksistapaapiksiihpi. Ki aihkitsíksiisoyisaawa ákitomoipohtoohpiaawa. Ákitsóyaapiksiihpiaawaa amiia pakóyittsi. Ákohpitohpakoyittsiiyaawa. Ánnia ákanistotoayaawa omííksikátaʼohpipaitapiiksi niistóyi.

Óóki. Áámostsi nómohtanistoohpi kááhkitaikakitaiʼtaamiʼtakssoayi. Nitááhsiʼtakssini kitákohtoʼtsiiʼtaamsspoaawa, ki ánnihkayii nómohtanistoohpa amóstska kitáánistohpoaawaistska.

Óóki. Ikkamánistaiʼtsiminoainiki, nitokákihtsimaanistsi, kitákohtitsayipoʼtsiihpoaawa kitákomimmohsoaayi. Niiʼtói nanistánistaiʼtsiihpiaawa nínna otokákihtsimaanistsi ki ánnihkayii nómohtsayipoʼtsiihpa nitákomimmíyisi.

Áwaakomimmotsiiyika. Ánniayi kanistókakohtomoohpoaawa.

Kitsítoʼtsspoaawopi kátaʼyaomaiʼtakiiksi kitákitakomimmokoaayaawa. Áwattakomimmotsiiyaawa. Ki kiistóaawa kómohtssikahksipoʼtoohpoaawa kááhksawattsitoʼtssoaayi kátaʼyaomaiʼtakiiksi, ki ánnimayii kitákohtsíkaimmokoaayaawa.