آیات محبوب کتاب مقدس از John 14

به اشتراک گذاشتن

Óóki. Ánnohka kitáyaaksskitohpoaawa. Kitákohpsskitohpoaawa iʼtáámipaitapiʼssini. Mátanistapiiwaatsi manistsíʼtaamistotootsiiyihpiaawa kátaʼyaomaiʼtakiiksi matápiiksi. Noohkíítsiwa amóo kómohpsskitohpoaawayihka iʼtáámipaitapiʼssini. Ki ánnihkayii kómohtanistohpoaawa, piníkihkíniʼtakika. Pinikóʼpoka.

Itanííwa Jesusa “Niistówa ánnahkaoʼka annaahka kitákohtohkoitoʼtoohpoaawahka. Niistówa ánnahkaoʼka mokámoʼtaʼpssi. Niistówa ánnahkaoʼka ómohtsiistapitsstsiihpi manipáítapiʼssini. Omáa matápiiwa ikkámsaohtohkoyikisi niistói mátakohkoitoʼtóowaatsi ninni.

Jesus itanístsiiwa ománikapiimiksi, “Óóki. Piníkihkíniʼtakika; amáíʼtooka Áʼpistotookiiyi. Noohkáttomaiʼtookik.

Ki omáahka kitákáísspommokoaawahka omááhka natowóttakahka, kitákssksinimáatsookoaawa kanáʼpaisistsi. Kitáksspommookoaawa kááhksskssksinissoaayi kanáʼpaisistsi kitáánistohpoaawaistsi. Omáa Natowóttaka, ánniskaoʼkinai otákoʼtsskoai nínna. Niistóyi ákohtoʼtsskoyiiwayi.

Omáa maʼtsíma nitokákihtsimaanistsi, ki niitáíʼtsimaistsi, ki ánnahkaoʼka nitákomimmokahka. Ki omáa nitákomimmoka, otákitakomimmoka nínni, ki niistówa nitákakomimmawa. Nitakitaistamáatsoohsatawa.”

Ki nitákanistawa nínna mááhkitapipoʼtoahsi noohkíítssimmi kááhksspommóyissoaayi, ki omíiska noohkíítssimmiska kimátakónoayiistapáakkoawaatsinai. Omááhka noohkíítssimmahka ánnahkaóʼka annaahka kitákohkokkoaawahka mokámoʼtaʼpi. Ánnahkaoʼka annaahka Natowóttakahka. Kátaʼyaomaiʼtakiiksi mátakohkottoʼtoyiiwaiksi Natowóttaki. Mátakohkottsinapimmíwaiksaawayi. Mátakohkottonoyiiwaiksaawayi. Kiistówaawa kítssksinoaawaawa. Kítohpokaʼpaissiimokoaawa, kii kitáksistomatawaawa.

Kiistóaawa ánnikskaoʼkiaawa annííksiska itomáíʼtakiiksi niistóyi, ki ánnihkayii kitákohtohkottsinihkatsimakkihpoaawa. Kitákitanistsiʼtoohpoaawa. Nínna ákohtsitsspimmawa niistóyi nitákitanisttsiihpi. Niistóakaoʼka ohkóyi. Ikkamókamanikkiinoainiki kítsstatoohpoaayi, kitakohtokamanikkihpoaawa kitamssoaayi amiiksiska itomáíʼtakiiksi niistói ki kitákitanisttotomoohpoaawa.

Kii ikkamákomimmokiinoainiki kitákitanistaiʼtsiihpoaawa nitokákihtsimaanistsi.

Omíím Nínna Áʼpistotookiwa otsítaopiihpim itakáwoyaawa omiistsi itáípstópáoʼpistsi. Ámohka kátaaʼnistsiiopi kimátakanistohpoaawa. Niistówa tákohtsitapoo kááhkohtaʼpistotomoohsoayi kááhkitaopihpoaawa.

Kii aotóíʼksistaʼpistotsiminikiaawa tákítsskaistoo. Kitákitohpoʼkiípioohpoaawa, kii ánnimayii kitákitaʼpaisspoaawa omiima nitsítakaʼpaisspi.

Óóki. Omáa Thomas itanííwa, “Óóki, nitsínaaimi. Nimátssksiniihpinnaan kitákitapoohpi. Tsááhtaa nááhkanistohkottssksiniihpinnáánahta nááhkanistohkoitoʼtoohpinnaani.”