ROM 5
5
Kekroi Pen Ajok Dhoromi Keplang
1Lasi ilitum akekroi pen apot nonke ilitum aphan dhoromi pu lakhalo apotsi e-Hemphu Jisu Khristo pen ajok ilitum Arnam pen ning kechingsam dolo. 2Ilitum Khristo aphan kroilo apotsi alangli pen ajok ilitum Arnam akangjinso longdunlo, lapen ilitum Arnam adak-atur longdunji pu ening kechethedam pen apot ili ning arong-lo. 3Lapen kesung ahutta ilitum aning arong do, pima kesung kepho pen ajok kechechak un muchot ajakong long, 4kechechak-un ajakong pen ajok e-ot-edur me-i, e-ot-edur keme pen ajok ning ketheta do-i pu ilitum chini. 5Labangso aning kethe ilitum aphan ning epabibe, pima Karjong Kangthir pen ajok Arnam amethang akanghon ilitum aning arlo dungtang-lo. La Karjong Kangthir ke Arnam ekepi adanlo.
6Pima ilitum ajakong kavedet ahutsi ilitum aphan ajok, atheke dhoromime atum aphan ajok Khristo athikpet apor ahut thi-lo. 7Inut dhoromi amonit aphan ajok amethang apran kechepi abang penang penung ave, bonta inut akeme amonit aphan ajok ke komane abang amethang apran chepi haidet tahai. 8Bonta Arnam ilitum aphan ko-an e-inghonloma, lake alangli ilitum aphan epaklangtang-lo; atheke, ilitum papibomlang ahutsi Khristo ilitum aphan ajok thilo. 9Alangli vi pen ajok Arnam ilitum aphan nonke dhoromi pu elakhalo; la aparta alangli ilitum aphan Arnam aning kethi pen epajokji. 10Aphrangke ilitum Arnam ahotur atumlo, bonta alangli Sopo apran kechepi pen ajok nonke ilitum aphan Arnam pen epajalangthulo. Nonke ilitum aphan Arnam pen epajalangthu-tang-lo; tangte la aparta Khristo achethe pen ajok ilitum aphan ko-an pajokpoma! 11Bonta la anchot kali; ilitum aphan Arnam pen kepajalangthu abang e-Hemphu Jisu Khristo pen ajok Arnam keklemtang akam pen apot ilitum chehok-lo.
Khristo Lapen Adam
12Inut amonit pen apotsi pirthe athak pap vang-lo, lapen alangli papsi kethi vanlo. Labangso apot kadokave amonitta kethi nangji a-ot dolo, pima kadokave amonitta pap klemlo.#Kech 3.6 13Moses pen ajok Arnam Aron bibe ako penta pirthe athak pap dolo, bonta aron kavedet adim ke pap alakha bibedet-lo. 14Tebonta Adam arni ahut pen ha Moses arni ahut anta monit atum thi nangkok-lo, lapen Adam Arnam ahukum kroikresi keklem apap asonthot apap keklemkle atumta thi nangkok-lo.
Adam helo hala kevangji abang a-arjanlo. 15Bonta Arnam kepi akejoi adan ke Adam apap asonthak thak kali. Hala inut amonit apap pen apotsi monit atum thi-lo, lake ahok-lo. Bonta inut amonit, atheke Jisu Khristo pen ajok Arnam monit atum aphan kepi akejoi, akangjinso adan ke la apar ajakong themulo. 16Lapen Arnam adan ke hala inut amonit apap pen akeprek do. Hala ephong apap pen aphi kangsai vangsi ado padolo, bonta pap do-o aphi kangjinso adan vangsi dhoromi paplang-lo. 17Inut amonit apap pen ajok, atheke halabangso abang pen apot pap parechodet-lo, bonta la apar inut amonit, atheke Jisu Khristo akam ajakong themulo. Arnam ake-ongpi akangjinso longsi akejoisi dhoromi keplanglong atum anke Khristo pen ajok rengsi parechoji.
18Tangte lahelo, inut amonit apap pen apotsi kadokave amonit atum aphan ado padolo asonthotsi inut amonit dhoromipet akam pen apot kadokave amonit aphan adai pen pajoksi chethe pilo. 19Lapen inut amonit Arnam ahukum akekroikre ajoksi kadokave amonit atum papi plang-lo asonthotsi inut amonit Arnam ahukum akekroi pen apot Arnam monit atum aphan dhoromi pu lakhaponji.
20Pap kepa-ongmuchotji aphansi Aron bilo; bonta pap ke-ongbom ahut Arnam akangjinso ansose ongmuchot bomlo. 21Tangte lahelo, kethi pen ajok pap keparechodet asonthotsi, Arnam akangjinsota e-Hemphu Jisu Khristo pen ajok ilitum aphan dhoromi epaplangsi lapen kejut un-e achethe episi parecholo.
Currently Selected:
ROM 5: KARBIBSI
Highlight
Copy
Compare
Share
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
