ROM 6
6
Khristo Pen Ajok Kerengthu
1Tangte ilitum kopisi pu apot-loma? Arnam akangjinso kepa-ongmuchot bomji aphan ili pap klemthubom nangjima? 2Lapu kali! Ilitum pap anat ke kethitang-lotle kopusi pap keklemthu bomjilangma? 3Ilitum Jisu Khristo pen kechelangpetji aphan baptisom ke-en ahut ilitum alangli long thidunlottang-lo, lake nanglitum chinilo. 4Lahelo Po adak atur ajakong pen Khristo aphan kethi angbong pen keparengthu asonthotsi ilitumta e-ot kemi pen kedo thekji aphansi ilitum abaptisom pen ajok ilitum aphan alangli long pipdundet tang-lo, lapen ilitum alangli long thidunlottang-lo.#Kela 2.12
5Pima ilitum jongsi alangli kethi asonthot thisi alangli pen isipet plang-lo tangte, alangli phan kethi pen keparengthu asonthotsi ilitum aphanta parengthusi ilitum alangli pen isipet plangji. 6Pima ilitum chinilo: ilitum pap aban keplangthuthedetji aphan pap keklemji ning kehang ajakong kepavirdetjisi ilitum aphrang a-ot adur, aphanta Khristo aphan thengparpan athak kepathi along pathidun tang-lo. 7Pima inut amonit thilot-lote alangli ke pap ajakong pen joktang-lo. 8Ilitum jongsi Khristo along thiduntang-lo tangte, ilitum alangli long rengta rengdunji pu ili kroilo. 9Pima ilitum chinilo, Khristo aphan kethi angbong pen pathurtang-lo, alangli kaita thithuthelo. Hala pen apara kethi alangli phuthak ajakong avelo. 10Pap anat alangli eboipetsi kaike aphan thilo; la apotsi kaiketa pap alangli phuthak ajakong avelo; lapen nonke alangli rengthusi Arnam pen do rap rap-lo. 11Lasonthotsi nanglitumta pap anat ke akethitang-lo, bonta Khristo Jisu pen ajok nonke nanglitum Arnam aphansi rengpilo pule chemathanon.
12Lahelo nanglitum akehingno aning kehang ateng keklemkledetjile la nanglitum kethidetji abang arpum aphuthak pap parecho longrinon. 13Lapen nanglitum a-ok athan hei hei kehingno keklem-i arisim keplang-bombe detjile nanglitum la pap aphan hodaithubomrinon. Bonta nanglitum ke kethi angbong pen kethurtang atum asonthak thak-le Arnam aphan nangmethang methang chehodainon, lapen dhoromi akam keklem-iji aphanle nanglitum a-ok athan anta Arnam arideng hodainon. 14Nanglitum aphuthak pap parecho longledet nangji: nanglitum ke aron angbongle kedo kali, bonta Arnam akangjinso angbongsi dolo.
Dhoromi Akam Aban
15Tangte kopilo? Ilitumke Aron angbongle kedo kalidet apot ilitum pap klembom tamema? Lapu kali! 16Nanglitum jongsi komane abang aban keplangjisi halabangso abang arideng chehodailo, lapen lasonsi alangli hukum kroilo tangte nanglitum ke chenamsi halabangso abang abanlo. Lasi nanglitum pap aphan kroilote nanglitum pap aban cheplangsi kethi nangji a-ot dolo, kalite Arnam aphan kroilote, la pen ajok nanglitum aphan dhoromi pu lakhapo, lake nanglitum chinibinong-lo, kalima? 17Bonta ilitum Arnam aphan choro nangji! Pima aphrangke nanglitum pap aban atumlo, setta nonke nanglitum aphan nangkethan ahok alam nanglitum aning aklong pen kroilo. 18Nanglitum aphan pap ajakong pen pajokphlotsi nanglitum dhoromi akam aban plang-lo. 19Nanglitum kechinithek ajakong doparpedet apotsi neli la monit atum kepu pu asonsi pulo. Pima aphrangke nanglitum kehingno muchot muchot akam keklem-ijisi nanglitum methang methang abang a-ok athan hei hei chehodailo, lapen lasonsi kangthirthe lapen kehingno akam aban paplang-lo. Lasonthak thaksi nonke nanglitum kangthir akam keklem-iji aphanle nanglitum methang methang abang a-ok athan hei hei chehodaira dhoromi akam aban paplangnon.
20Nanglitum pap aban keplang ahut ke nanglitum dhoromi akam aber dodelo. 21Halabangso ahut nanglitum keklem akam pen nanglitum kopi ale long-loma? Halabangso akam pen apot nonke nanglitum therak nanghur anhelo. Hala hei hei akam ale ke kethi helo. 22Bonta nonke nanglitum aphan pap pen pajokphlot-tang-lo, lapen nonke nanglitum Arnam aban atumlo. Labangso pen nanglitum ale kelong ke kangthir helo, lapen labangso pen apot kelongthu ke kejut un-e achethe helo. 23Pima pap anam ke kethi, bonta Arnam kepi akejoi adan ke e-Hemphu Jisu Khristo pen kechelangpet pen ajok kejut un-e achethe helo.
Currently Selected:
ROM 6: KARBIBSI
Highlight
Copy
Compare
Share
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
