ROM 4
4
Abraham Akekroi
1Tangte Jihudi atum aphusar, Abraham alamjir ilitum kopisi pu apot-loma? 2Amethang keklem akam apotsi Arnam Abraham aphan dhoromi pu lakhalo asonte alangli kechepindakji athe doji apot-lo, bonta Arnam angno ke kali. 3Hastro pulo, “Abraham Arnam aphan kroilo, lapen labangso apotsi Arnam alangliphan dhoromi pu lakhalo.”#Kech 15.6; Gal 3.6 4Kam keklem abang anam long; alangli kelong anam ke dan kali, lake alangli keklem apot kelong nangji anamlo. 5Bonta ame-thang akam aphan chikikesi Arnam aphan kechiki amonit, atheke ado kedo abang aphan ado ave pu kehok a-Arnam aphan kekroi amonit amethang akekroi apotsi Arnam alangliphan dhoromi pu lakhalo. 6Amethang akam pen apot kalidet pen Arnam angno dhoromi keplang abang rengme pu David kepu alamta labangso alam aphansi pudamlo: Atheke David pulo,
7“Amethang akechokche hei hei Arnam pen diya kelongtang,
lapen apap hei hei Arnam kediptang abang rengme!#Lun 32.1-2
8Apap hei hei Hemphu lakhakhedetji,
lason abang rengme!”#Lun 32.1-2
9Tangte la David kepudam akerengme ke reng-rot ke-en atum aphanchotma? Lapu kali. Lake reng-rot ke-en-e aphantalo. Pima ilitum hastro alam paklangsi pulo, “Abraham Arnam aphan kroilo, lapen alangli methang akekroi apotsi Arnam alangli-phan dhoromi pu lakhalo. 10Tangte la komantusi plang-loma? Abraham reng-rot ke-en aphrangma, mate aphima? Lake Abraham reng-rot ke-en aphrang-lo, aphi kali. 11Aphisi alangli reng-rot enlo, lapen labangso areng-rot alangli akekroi kedo apotsi alangli reng-rot ke-en-e ako Arnam alangliphan dhoromi pu lakhalo pu angthek-lo. Lasi karjong anat penke Abraham ke areng-rot-redet setta Arnam aphan kekroi pen ajok Arnam angno dhoromi keplang atum an apolo.#Kech 17.10 12Alangli ke reng-rot ke-en atum aphanta apolo. Lake halatum reng-rot ke-en apotchot kali, bonta Abraham reng-rot en-e ako Arnam aphan kekroi pen kedo kethak asonthotsi halatumta Arnam aphan kekroi pen do-thak-lo apotsi lason plang-lo.
Arnam A-Kechak Ke Kekroi Pen Ajoksi Longchot
13Abraham lapen aso asu atum pirthe chepahemphu longji pu Arnam Abraham aphan kechak ke Abraham Aron ateng keklem apot kali, bonta alangli Arnam aphan kekroi apot Arnam alangliphan dhoromi pu lakhalo apotsi Arnam alangliphan la chak-lo.#Kech 17.4-6; 22.17,18; Gal 3.29 14Pima jongsi Aron kekroi atum aphan ansi Arnam kechaktang ason pichotji pulote kekroi ke thangta kalidet-lo, lapen Arnam akechakta thang ale avedet-lo.#Gal 3.18 15Aronsi Arnam aning kethi vanlo; bonta Aron avedette Aron akekroikreta avelo.
16Tangte Abraham aso asu atum an aphan, atheke, Aron kekroi atum aphan chot kali, bonta Abraham kekroi asonthot Arnam aphan kekroi atum an aphan Arnam labangso akechak akejoi adan ason kepithekjisi, labangso akechak ke kekroi pensi vang-lo. Pima Abraham ke karjong anat ilitum kadokave apolo.#Gal 3.18 17Lake hastro ketok asonthot-lo, “Neli nangliphan ake-ongpi akhei apo nangpaplangtang-lo.” Lasi Abraham kekroi a-Arnam, atheke, kethitang aphan kepareng thek, lapen hukum pisi kavedet amarta kepadothek a-Arnam angno ke labangso akechak mesenlo.#Kech 17.5 18Abraham aning kechethedamji ason avedet setta alangli kroilo lapen aning thelo. Lasi hastro along ketok, “Nangso nangsu chan-oji” pu asonthotsi alangli “ake-ongpi akhei apo plang-lo.”#Kech 15.5 19Alangli arta ningkan pharo isi anbak dolo apotsi, alangli bang arpum ke kethitang asonthak thak-lo, lapen Sarahta aso kechopatheji arta littang-lo pu alangli chechini pamelo setta alangli kai ateng kroibomlo.#Kech 17.17 20Alangli kekroi che-o-edet-lo, lapen Arnam kechak alam aning bibedet-lo, bonta amethang akekroi pen ajok jakong longsi Arnam aphan ingduk-ardombomlo. 21Arnam amethang kechaktang ason pachekok un pu alangli kroipamelo. 22Abraham labangso akekroi kedo apotsi Arnam alangliphan dhoromi pu lakhalo. 23“Alangliphan dhoromi pu lakhalo,” pu ketok alam ke alangliphanchot kali, 24bonta lake ilitum aphantalo. Pima ilitum aphan, atheke e-Hemphu Jisu aphan kethitang atum angbong pen kepathur abang aphan kekroi atum an aphanta dhoromi pu lakhadetji. 25Ilitum apap hei hei apot alangli thi nangji pusi Arnam pathikdet-lo, lapen ilitum aphan dhoromi atum ekepaplangji aphansi alangliphan parengthulo.#Kech 17.17
Currently Selected:
ROM 4: KARBIBSI
Highlight
Copy
Compare
Share
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
