ROM 12
12
Khristian Atum Kopuson A-ot Adur Donangji
1Tangte lahelo, kortemarli atum, Arnam ilitum aphan ekangjinso apot neli nanglitum aphan choningrilo: kereng-et a-Arnam akam aphan kepanongtang lapen Arnam aningkedok athok asonthak thak-le nanglitum Arnam aphan chehodainon. Nanglitum ahokpet kangduk akardom ke lahelo. 2Nanglitum labangso apirthe amonit atum ason ke cheplangdunri; bonta nanglitum aning kechepami pen nanglitum chekirlanon. Anke Arnam aning kehang ason, atheke, kopisi akeme ma. Arnam aning kedok kopima, lapen kopisi akechok pamema, la nanglitum chini unpo.
3Lapen Arnam neliphan nekepi akangjinso adan pen apot neli nangli-tum abangphutin aphan nang pulang: nanglitum methang a-ot pen apar ke nanglitum the-o pu chemathari, bonta Arnam nanglitum aphan kepi akekroi atengle nanglitum methang chemathanon. 4Ilitum abangphutin abang arpum aro-arim do-o, lapen la aro-arim tinta akam prekjam.#1 Kor 12.12 5Lason thak-thaksi ilitum abangphu ke do-o setta Khristo pen kechelangpet pen ajok ilitum abang arpum ke isipet-lo, lapen isi abang arpum along hala aro arim hei hei kecherap-het asonthak-thaksi ilitumta lahin lahin cherap-het-lo.#1 Kor 12.12 6Lasi Arnam akangjinso ateng pen ilitum aphan ekepi akaprek kaprek adan pensi ilitum klem nangji; Ilitum jongsi Arnam alam kemontri adan do tangte, ilitum methang akekroi ateng pen la than nangji.#1 Kor 12.4-11 7Ilitum jongsi keru-kethai adan do tangte, ilitum ru-thai nangji, kethan adanle do tangte, ili la than nangji.#1 Kor 12.4-11 8Jongsi bang atum aphan aning kepathethek adan do tangte, aning pathenangji. Dan kepi abang aning keme pensi pi nangji. Jongsi keja abang tangte alangli kematha-e pensi klem nangji. Jongsi anut kaprek atum aphan kangjinso kepaklang abang tangte aning arong pensi la klem nangji.#1 Kor 12.4-11
9Kanghon ke ning aklong pen nangji. Kehingno hijimra keme otthipnon. 10Khristo pen kechelangpet pen ajok nanglitum akorte hijan angbong kechinghon asonthot-le lahin lahin chinghon seroinon. Nangmethang aphan apar lahin lahin aphan aman pimunon. 11Selet-ledet-ra klem chepa-duknon. Hemphu aban asonthak thak-le ning aklong pen Hemphu akam klempinon. 12Ningkethe kedo apot-le chehoknon, keduk-kesung ahut ning chepadingnon, lapen kaike ahutta Arnam ardomnon. 13Kedo an amar pen kangthir atum akedorde ason rapdunnon, lapen nanglitum ahem alohi chaknon.
14Nanglitum aphan kechenek atum aphan Arnam ahirjume hangpinon; ahok-lo, halatum aphan ahirjuno kepiji aphan kali, bonta ahirjume kepiji aphanle Arnam angno choningrinon.#Mat 5.44; Luk 6.28 15Ning arong atum along ning chepa-rongdun non, kechiru atum along chirudunnon. 16Nanglitum ning isipet penle donon. Thedung thedung akam riredet-ra bihek akam hei hei keklemjile ninghangnon. Nanglitum ane chepathiri. Nanglitum methang giani pu chemathari.#Sar 3.7
17Komane abang nanglitum aphan kehingno klem setta nanglitum alangliphan kehingno pen alar huiri. kadokave angno akeme alingle klemnon. 18Nanglitum methang ke, unte kadokave atum pen ning kang-sam pen kedojile kadokave asonta klem non. 19Neli kechinghon atum, nanglitum alar chehuiri, bonta Arnam aning kethi aphan dim peknon. Pima hastro along tok-lo, “Hemphu pulo, alar kehui ke nekam, nesi alar huiji.”#Keth 32.35 20Bonta hastro kepu asonthak thak-le, “Nangli hotur an kangchir ahut, nangli alangliphan an pinon; alangli lang kang-it ahut alangliphan lang pinon. Pima nangli lapuson keklem pen ajok nangli alangli phuthak me akri batpo.”#Sar 25.21-22 21Kehingno nangliphan nangparem longri, bonta keme klemra kehingno aphan haivernon.
Currently Selected:
ROM 12: KARBIBSI
Highlight
Copy
Compare
Share
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
