ROM 13
13
Det Keja Atum Alam Kroi Masi
1Abangphutinta det keja atum alam kroi masi. Pima Arnam aning kehang kalite baduta keja abang plang un-e, lapen non kedobom det keja atum aphan Arnamsi bat-lo. 2Lasi keja abang ahukum kekroikre abang ke Arnam kepathiktang alamsi kekroikrelo, lapen lapuson keklem abang aling ke amethang aphuthak kangsai chevanpo. 3Pima akeme keklem atum ke det kepangri atum aphan kephere nangji ason ave, bonta kehingno keklem atum ke halatum aphan phere nangji. Nangli Keja abang aphan kephere nangnedetji aphan ning hangma? Tangte akemele klemnon, anke nangli alangli pen akero longpo. 4Pima alangli ke nanglitum aphan kepameji aphan Arnam aban kecheplang abang-lo. Bonta nangli jongsi kehingno klemlo tangte, nangli pherenon, pima alangli akejoijepi ke nokjir en-e. Alangli ke Arnam abanlo, kehingno keklem atum aphan Arnam aning kethi ateng kepasung abang-lo. 5Lasi Arnam nangpasungdet-na pu aphanchot kali, bonta lake nanglitum keklem nangji akamlo pusi nanglitum aning-angthinta pulo apotsi nanglitum det keja atum alam kroi nangji.
6Labangso apotsi nanglitumta midu pibomlo, pima det keja atum ke Arnam aban atumlo, labangso akam aphansi halatum chehodailo.#Mat 22.21; Mar 12.17; Luk 20.25 7Tangte nanglitum halatum aphan kepi nangji ason an pinon: Jongsi midu kepi nangji do tangte, midu pinon, khajona kepi nangji do tangte, khajona pinon, kephere nangji abang aphan pherenon, man kepi nangji abang aphan man pinon.#Mat 22.21; Mar 12.17; Luk 20.25
Lahin Lahin Chinghonseroi Masi
8Kanghon apreng apar ke badu alongta nanglitum apreng pado longri. Anut kaprek aphan kanghon abang ke Aron kroipet-lo. 9Pima beisa klemri, bang apran enri, chonghuri, bang amar konri pu ahukum hei hei, lapen la apar akaprek ahukumta isipet ahukum along, atheke, “Nangmethang aphan kechinghon asonthot-le tebok abang aphan chinghonnon,” pu ahukum angbongsi dopet-lo.#Keba 20.13-15; Keth 5.17-19,21; Levi 19.18 10Anut kaprek aphan kanghon abang ke alangli halatum aphan kehingno klemkle. Lasi kanghon helo Aron kekroi binong-lo.
11Nanglitum la klemvek nangji, pima nonke kopi ahut-loma, lake nanglitum chinilo: nanglitum mek keprang nangji ahut nangle tang-lo. Pima Arnam ilitum aphan kepajokji arni ke, aphrang ilitum kekroicheng arni pen apar non tebok muchot-lo. 12Ajo jutji dokdok-lo, non the-angji dokdok-lo. Tangte ilitum kangting angbong keklem akam che-olonang lapen kethe-ang angbong ron kechedanji aphan erisim che-en lonang. 13Akejoijepi akecho kejun, kalite, hor kangri pen kali; beisa lapen ketherakmeme akam pen kali, kechebohong lapen kechelang un-e pen kali, bonta anerlo akethe-ang angbong kedo atum asonthak thak-le ilitum e-ot keme pen dolonang. 14Bonta nanglitum Hemphu Jisu Khristole chepindengnon, lapen ok aning kehang kepaplengji aphan ke adim pek-rinon.
Currently Selected:
ROM 13: KARBIBSI
Highlight
Copy
Compare
Share
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
