ROM 11
11
Israel Atum Aphuthak Arnam Akangjinso
1Tangte neli arjulang: Arnam amethang amonit atum aphan obup-loma? Lapu kali! Neli methangta Israel amonit, Abraham asu lapen Benjamin akur amonit-lo.#Phili 3.5 2Arnam aphrang pen kangvaitang, amethang amonit atum aphan obup-lo, lapu kali. Hastro along ketok, Elija Arnam angno Israel atum apharman kechoningri alam nanglitum chinilo, kalima? 3Atheke Elija pulo, “Hemphu, halatum nang montri atum aphan pathikoilo, lapen nangdovan hei hei phri-et-lo; non kedo ke ne inutpet-lo, lapen halatum nephanta kepathijisi bor-ibomlo.”#1 Rec 19.10,14 4Bonta Arnam alangliphan kopisi thakdunloma? Arnam thakdunsi pulo, “Kechobei arnam, Baal aphan kangdukde pinso amonit bang suri throksi aphan ne nemethang akam aphan chebilo.”#1 Rec 19.18 5Lasonthak thaksi non ahutta Arnam amethang akangjinso pen kangvaitang penang an amonit dolang. 6Arnam halatum aphan amethang akangjinso pensi ingvailo, halatum keklem akam apot kali. Pima jongsi monit atum amethang akam apotsi Arnam halatum aphan ingvailo tangte, alangli akangjinso ke ahok akangjinso kalilo.
7Tangte kopilo? Israel atum ke amethang keri ason longledet-lo. Arnam kangvaitang, ake-ong-e asong atumsi la long-lo; akaprek atum an aphan ke aning pangtangrak-lo. 8Atheke hastro along tok-lo, “Arnam halatum aning angthin pabuikluihak-lo; pini arni anta halatum amek pen thek-longle, ano pen arjulonglelo.”#Keth 29.4; Isa 29.10 9Lapen David pulo,
“Halatum Achojun a-Mei ke halatum aphan ketot apham lapen alan lapen halatum aphan kepajang ahilik lapen aduk kanghoi-i ason paplang nang!#Lun 69.22-23
10Halatum kethek-longledetji aphan halatum amek pangtingthip nang,
lapen halatum aphan kaike ahutta kesung anghor pen pamoikukjuknang.”#Lun 69.22-23
11Tangte neli arjulang: Jihudi atum kepatekung ahut halatum chingkoisi virdet khangjang-loma? Lapu kali! Bonta Jihudi atum apap pen apotsi Jihudi kalidet atum aphan kepalang un-ejisi Jihudi kalidet atum along kejok vang-lo. 12Jihudi atum apap pen apotsi pirthe athak hirjume vang-olo, lapen Jihudi atum karjong anat akedukdet pen apotsi Jihudi kalidet atum along hirjume vang-olo. Anke mo Jihudi atum anta kejok long lote, ko-an ahirjume ongpo!
Jihudi Kalidet Atum Akejok
13Nonke neli nanglitum, Jihudi kalidet atum aphan nangpulang: Neli Jihudi kalidet atum angbong ketoitang abang keplanglong apot chepindakpo. 14Neli methang akhei amonit atum nangpalangdun un-esi latum angbong pen penang atum aphan pajok unji tahai pusi neli mathalo. 15Pima Arnam halatum aphan kekoirok pen ajok pirthe amonit Arnam pen chepajirpo long-lo. Tangte mo halatum aphan dengdet-lote kopi cheplangpo! Lake kethitang atum kerengthu asonthak thakpo.
16Lapen Arnam aphan kepanong, aphrangsi ahim achet jongsi ingthir-et-lo tangte, ahim kangthimta ingthirlo, lapen erong athengpi angkur hei hei jongsi ingthir-et-lo tangte, aro hei hei anta ingthirlo. 17Ke-e ajit athengpi arong penang aro ing-lokpettang-lo, lapen nampi ajit athengpi aro ladak pa-ok duntang-lo. Nanglitum, Jihudi kalidet atum ke nampi ajit athengpi asonthak thak-lo, lapen hala ke-e ajit arong along nampi ajit athengpi aro ale kelongdun asonthotsi nonke nanglitum Jihudi atum along karjong achethe longdunlo. 18Tangte nanglitum hala kang-loktang aro atum aphan langrop-ri. Nanglitum kopusi chepindak unjima? Nanglita arochot; nanglile angkur aphan kepareng kali, angkursi nanglitum aphan parengtang-lo.
19Bonta nanglitum puji tahai, “Lake ahok-lo, bonta arong along neliphan kepa-okdunji aphansi halabangso aro hei hei inglok-ettang-lo.” 20Lake ahok tema. Halatum akekroikre apotsi halatum aphan ing-lokpet lo, bonta nanglitum ke akekroi kedo apotsi nanglitum hadak dothip-lo. Bonta labangso pen apot ke nanglitum chepindakri, bonta pherenon. 21Arnam jongsi hala thengpi aro asonthakthak a-Jihudi atum aphan rairedet-lo tangte, alangli nanglitum aphanta rairedet binongji. 22Tangte Arnam ke ko-an akechingkime lapen ko-an aning kesedeng abang-loma, lake ilitum thek-long-lo. Alangli hala pap keklem atum aphan amethang aning kesedeng paklang-lo, bonta nanglitum jongsi alangli akangjinso angkangsi dobom tangte, alangli nanglitum aphan ingjinsobomji, bonta nanglitum jongsi alangli akangjinso angkang dobombe tangte, nanglitum aphan jokta ing-lokpetji. 23Lapen hala Jihudi atum amethang methang akekroikre che-olote, halatum aphan hala aphrang adim pa-okdunthudetji. Pima Arnam halatum aphan aphrang adim kepa-okdunthuji ajakong do. 24Pima nanglitum aphan jongsi nampi ajit athengpi arong along pen ing-lokpetsi ke-e a-Jit athengpi arong along, aron kalidet setta pa-okdunlo tangte, hala aro binong aphan arong binong along pa-okdun-thuthedet jima!
Kadokave Aphuthak Arnam Akangjinso Do
25Kortemarli atum, nanglitum ane kechepathethedetji aphan, nanglitum labangso akepatu ahok alam kechinijisi neli ning hang-lo. Alam ke lahelo, Israel atum aning kangtang kedoverji kali: bonta Jihudi kalidet atum Arnam adung kevang nangji aphai chokchetik ke halatum lapusonsi dobomjilang. 26Lapen lapusonsi Arnam kadokave a-Israel atum aphan pajokji. Atheke hastro pulo,
“Zaion pensi Kepajok abang vangji,
alangli Jakob aso asu atum apap hei hei pakak-etji.#Isa 59.20
27Lapen ne halatum apap hei hei kepakak ahut,
ne halatum pen labangso akechechak chebiji.”#Jer 31.33-34
28Jihudi atum Birta Keme dengdedet-lo apotsi nanglitum Jihudi kalidet atum pen apot halatum Arnam ahotur plang-lo. Bonta Arnamsi halatum aphan ingvailo apotsi, halatum aphusar atum pen apot Arnam halatum aphan inghonbomlo. 29Pima Arnam ke amethang kepi ahirjume lapen akepha chelarle. 30Nanglitum, Jihudi kalidet atum aphrangke Arnam aphan kroikrelo; bonta nonke hala Jihudi atum akekroikre apotsi nanglitum Arnam akangjinso long-lo. 31Lasonthotsi nanglitum kelong akangjinso pen ajok Jihudi atumta Arnam akangjinso kelongji aphansi halatum non Arnam aphan kroikrelo. 32Kadokave amonit atum Arnam aphan akekroikre apotsi Arnam halatum aphan koidi asonthak thak paplang-lo. Halatum kadokave aphan kangjinso kepaklangthekji aphansi alangli la klemlo.
Arnam Aphan Kero-Karcho
33Arnam akangjinso ko-an akethe lapen agian lapen akechini ko-an akarsik! Alangli keparai alam hei hei matsi than pachinidak unjima? Alangli keklem athe matsi chini-unma?#Isa 55.8 34Atheke hastro pulo,
“Hemphu aning matsi chini un ma?
Alangliphan matsi than pare thekjima?#Isa 40.13
35Alangli kechetu nangji, lason aphan,
komatsi alangliphan paramloma?”#Job 41.11
36Pima alanglisi kadokave amar pinchong-lo, lapen alangli pen ajoksi lapen amethang aphansi kadokave amar padolo.#1 Kor 8.6 Arnam adak atur kaiketa padonang! Amen
Currently Selected:
ROM 11: KARBIBSI
Highlight
Copy
Compare
Share
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
