Romɨ 4

Evɨraamɨ Gotɨyarɨ lɨmwagyaakerɨ Gotɨyai “Yɨda'maraangeigɨnyɨra,” wɨjaake'nesɨ.

1Sarevɨdaa'nyɨ kɨlaa'naka Juyainaavɨre Ne sɨnnawɨnyai Evɨraamɨmɨ “Yɨda'maraangeigɨnyɨ. Nɨmɨreigɨnyɨ,” wɨjaakebwina gara daazɨwona? 2Sare' dare'nesɨ. Ne Evɨraamɨ tewaanya yaakenna Gotɨyai “Yɨda'maraangeigɨnyɨra,” dazɨ kwajɨ Evɨraamɨ gannya yaya' munyaba kamakɨladɨka! Sare' mɨka! Aawa. Yɨ Gotɨyarɨna aawa. 3Sare' Gotɨyare bukuya' gara dɨnɨkavaka? Sa' dara dɨnɨ' “Evɨraamɨ Gotɨyarɨ wɨ'nalɨmwanna kya' yɨ Gotɨyai gamɨnyɨna yawɨrakelyɨ ‘Sare'na sahwai yɨda'maraangerɨ wɨmwaaihɨwa.’ ” 4Nemɨ yawɨ'daanyɨ “A'mwei pware wawɨnya yada nɨgwia maa'de tɨvɨkɨta sa'na nemɨ ‘Sɨhumalesɨra,’ yawɨ'daa mɨ'. Aawa. ‘Sa' wawɨnya yadɨvɨsabanna wɨjaavadɨvɨkɨ,’ yawɨ'daanyɨ.” 5Yɨ nabaai a'mwei Gotɨyai yɨlaaya wia'nei yɨda'maraangei yɨma'nya'nei kɨwɨnyaburɨna wawɨnya mi yajai sai, gamɨ Gotɨyarɨ yawɨralɨmwanna “Kɨwɨnyaburɨna yuna navɨkerɨna Gotɨyai ‘Yɨda'maraangeigɨnyɨ gɨmwaaihɨma!’ dannelyɨ.” Sahwai sara yawɨralɨmwagaza'na Gotɨyai yawɨ'delyɨ “Yawɨralɨmwamwake'na sahwai yɨda'maraangerɨ wɨmwaaihɨwana.” (Sare' sɨhumalesɨra.) 6Nabaai Ne Devitɨ kwalyɨ a'mwei wawɨnya yakenna myawɨryarɨna Gotɨyai “A'mwe yɨda'maraangerɨ wɨmwaaihɨwa,” yawɨ'derɨna “A'mwe sai yɨlaaya yada tewaanaanga yɨnɨkelyɨra,” jaakabaaibɨsasɨ. 7Dara dɨnɨ'

“A'mwe datha'darera yɨlaaya yɨvanɨgasare.

‘Gotɨyai kumɨre yɨwetawakya marasɨ'nakere.

Kumɨre wagɨlyangɨ duimwagasɨ'na yakere.’

8Naangei ‘Wagɨlyabwi kɨnɨnnakelyɨ,’ dɨragɨnna myawɨryajai

Yɨ sare'na a'mwe dazai yɨlaaya yada tewaanaanga yɨnɨkelyɨ.”

Sara dɨnɨkesɨ.

9Sarevɨdaasɨ yɨlaaya sasarebwi a'mwe kɨlaaka gurya da'nadɨvɨta gaveraavɨne' daaka! Nabaai kɨlaaka gurya madayɨnɨka sara kwaraavɨne' midaaka! Sare' dare'nesɨ. Nemɨ dara dadaanyɨ “Evɨraamɨ lɨmwagaryaake'na Gotɨyai jaakelyɨ ‘Yawɨralɨmwamwake'na yɨda'maraangerɨ wɨmwaaihɨwana.’ ” 10Gotɨyai sara jaakegaa' Evɨraamɨ ga'dara mwalyaakelaka? Kɨlaakejɨ' gurya mena da'nɨkerɨ dɨngaka? Kɨlaakejɨ' gurya madayarɨ dɨngaka? Yɨ kɨlaakejɨ' gurya da'nɨkerɨ mɨ'. Aawa. Kɨlaakejɨ' gurya madayarɨnyɨra. 11Kɨlaakejɨ' gurya madayavɨ Evɨraamɨ Gotɨyarɨ yawɨralɨmwagake'na “Yɨda'maraangerɨ wɨmwaaihɨwa,” jaakevɨne dakya'ne', yɨ dɨvidaa'nyɨ a'mweraavɨ wɨjɨwaainya'ne' sahwai kɨlaaka gurya daya'nebwi maryaake'nanyɨ. Yɨ sarevɨdaa'nyɨ a'mwe yuyara, lɨmwabɨzara kɨlaaka gurya mada'nyaraavɨne aaya mudɨ'nanyai aatalyɨ. Sahwara Evɨraamɨ yaakabaaibɨ' Gotɨyarɨ lɨmwabɨzara Gotɨyai “Yɨda'maraangeihɨrɨ yɨhɨmwaaihɨma!” wɨdatherera. 12Nabaai a'mwe kɨlaaka gurya da'nadɨvɨsaraavɨ pwaraavɨ kwɨyakwalaangelyɨ. Yɨ kumɨ kɨlaaka gurya yaasɨwa'na da'nadɨvɨtaraavɨna mɨ'. Aawa. Gurya da'nɨkera Evɨraamɨmɨre sɨvikwajɨkevɨ mɨdɨdɨvɨ' yɨ neyakwalaanga sahwai gurya madayavɨ Gotɨyarɨ lɨmwagyaakabaaibɨ' yɨ sahwara dɨragɨnna lɨmwamanɨgasaraavɨnanyɨ.

13Sare' dare'nesɨ. Kɨwɨnyaburɨna mɨ'. Gotɨyai yune naanga nebulya'na Evɨraamɨmɨjɨ gamɨre yɨsiwiaraavɨjɨ dara wɨdɨna “Kwaaka yuyava' yɨhɨzaavɨdeinyɨ.” Yune naanga nebulya'na wɨja' kɨwɨnyabwi mɨdɨnyavɨna mɨ'. Aawa. Gotɨyarɨ yawɨralɨmwanna yada Gotɨyai “A'mwe yɨda'maraangelyɨ. Nɨmɨrelyɨ,” dake'na yune naanga nebulya'na wɨjaake'nanyɨ. 14Yɨ sare' dare'nesɨ. Kɨwɨnyabwi mɨdɨdɨvɨsara dazahwarana yuya sa Gotɨyai yune naanga nebulya wɨja maapɨjɨ kwajɨ lɨmwange'ne' yaasɨwa' warɨna yadesɨ. Nabaai yune naanga nebulya'nanya daza' kayaaka kyɨgaladɨka! 15Sare' dare'nesɨ. Gotɨyare Kɨwɨnya' galazekɨvaibɨzaraavɨna Gotɨyarɨ sɨnna tɨke' wɨda'da daanga wɨjaaya'ne' Kɨwɨnyasɨ. Nabaai kɨwɨnya pɨnɨ maaya savɨ yɨ nabaai kɨwɨnya galazekɨvalyabwi mwarika.

16Sarevɨdaa'nyɨ a'mwera Gotɨyarɨ yawɨralɨmwangebwi yune naanga nebulya'na wɨdadelyɨ. Gotɨyai “Yange'na gaimwanna yɨma!” daka Evɨraamɨmɨ gyakwalaanga yuyaraavɨna sɨhumale' wɨjaaya'ne'na yune naanga nebulya'na wɨja' dɨragɨnna wa'de'nanyɨ. Sahwara lɨmwabɨzara maapɨ'dere. Daza' Evɨraamɨmɨre yɨsiwiara Kɨwɨnyabwi kɨnɨnnaka gaveraavɨne'na mɨ'. Aawa. Evɨraamɨ sara yaakabaaibɨ' yuyara lɨmwabɨza'na Evɨraamɨmɨrera yɨma'nɨgata kumɨ sara kwarajɨ maapɨ'dere. Evɨraamɨ sai aaya mudɨ'nanyai lɨmwagaazaina yuyainaavɨ aatalyɨ. 17Gotɨyare bukuya' dɨnɨkabaaibɨsasɨ. Gɨmɨnyɨ anga naanga pimagɨnya kwalaalyangɨna kwɨyakwalaanga'neigɨnyɨ gɨthakɨwa. Sare' Gotɨyai dara yawɨrakelyɨ “Lɨmwabɨzaraavɨne kwɨyakwalaangelyɨra.” Gotɨya sarɨ Evɨraamɨ yawɨralɨmwagakelyɨ. Dɨragɨnya sahwai a'mwe bainɨkeraavɨ gaala sabwi wɨjaavadelyɨ. Nabaai sahwai dɨviya'nengɨna dahaa' tɨvi'na yɨma'nɨwakabaaibɨsangɨna dɨragɨnna dadelyɨ. Yɨ sasarerɨ Evɨraamɨ yawɨralɨmwagakelyɨ. 18Evɨraamɨ Gotɨyarɨ wɨ'naka sare' a'mwe gazarazara myemwaalyadapi kɨrɨ' sahwai yemwaaida yawɨralɨmwagakevɨdaa'nyɨ a'mwe anga naanga pimagɨnya kwalaalyangɨyaraavɨre kwɨyakwalaangei yɨma'nyɨna. Yɨ sarevɨ Gotɨyai sɨlɨngaamɨnyangɨna mena dakesɨ. Sabɨ' gɨmɨre jakwarava kumɨ sara yɨma'nɨpɨ'derera. Sara dɨnɨkevɨna sara yɨma'nyɨna yakesɨ. 19Evɨraamɨ gamɨre kwarame waanɨ aadɨretɨya aya kɨgaa'na gamɨre kɨlaakejɨ' bwaranya yawakɨnya'ne buwikɨ'nɨkejɨ' yawɨ'na. Yɨ Seraavɨre kɨlaakajɨ' kaimɨraaya mamaari yannejɨ' yawɨ'na yaka kɨrɨ' lɨmwanga sabwina makwaasa myakelyɨ. 20Lɨmwangebwi yagalya'mavakei mɨka. Sarevɨ Gotɨyai yune naanga nebulya'na wɨja' sahɨrɨ'na yawɨraka sɨmunya pɨrɨwaai yawɨrakai mɨ'. Aawa. Dɨragɨnna lɨmwagakelyɨ. Sarevɨ dɨragɨnya yɨvaimwannyai mwaalaka “Gotɨyai byaannakelyɨ,” dakelyɨ. 21Yɨ dara dɨragɨnna mena yawɨrakelyɨ “Gotɨyai yune naanga nebulya'na nyɨdɨwake' yɨnɨga yannelyɨ. (Sare'na kaimɨraayarɨ yawakɨna'mujɨ kwalaalyaraavɨre kwɨyakwalaangeinyɨ yɨma'nɨdeinyɨ.)” 22Nabaai dɨragɨnna lɨmwagakevɨdaasɨ Gotɨyai dakelyɨ “Yɨda'maraangei nɨmɨrerɨ wɨmwaaihɨwa.” 23Yagaala daza' “Yɨda'maraangei nɨmɨrerɨ wɨmwaaihɨwa,” gamɨ gaverɨne'na yɨda'nɨka'na mɨ'. 24Aawa. Gamɨ kwarɨnajɨ nemɨ kwainaavɨnajɨ yɨda'nɨke'nanyɨ. Nemɨ saina Gotɨyai Jizaazarɨ nemɨre Naangerɨ mena baryarɨ ayahi yɨdɨkaavakerɨ lɨmwagaazainaavɨna Gotɨyai dannelyɨra “Yɨda'maraangeraavɨ nɨmɨreraavɨ wɨmwaaihɨwa.” 25Jizaazai sahwai nemɨre wagɨla sa marasɨ'nya'nerɨ balya'nerɨ maryasaabakei bwalabalakelyɨ. Yaka Gotɨyai nemɨnyɨ “Yɨda'maraangeihi nɨmɨreihɨlyɨra,” neja'nerɨ ayahi yɨdɨkaavakelyɨ.

Currently Selected:

Romɨ 4: byr

Highlight

Compare

Copy