Romɨ 3

Gotɨyai nebulyabwi dɨragɨnna lɨmwadevurɨnesɨ.

1Sarevɨdaasɨ Juyara a'mwe pwaraavɨ gareburɨdaasɨ wavɨla'manɨgava? Kɨlaaka gurya daya sangɨ nawɨ'nya berɨ' yɨma'nadengaka? 2Akai! Nawɨ'nya dala pɨnɨnna pɨnɨnnanya warɨkengɨ. Aaya pɨrɨ'nanya' daresɨ. Juyara kumɨ sara maremwaalya'ne Gotɨyai gamɨre yagaalya wɨjayaakengɨ. 3Sare' gatha'darevɨnaka? Juya pwara malɨmwagyara yagaala dangɨ mamɨdɨnye'. Sasare'na kumɨre kayaa'nanya dazabwi Gotɨyare nebulya'nanya' dathɨwagathevwi daaka! Gotɨyai nebulya'nanya' dɨragɨnna kuna malɨmwagi yadei daaka! 4Arɨkewɨnyɨ. A'mwe gazaizai kwaasɨ dazai kɨrɨ' Gotɨyai nebulya'nanyalyɨ. Sabaaibɨ' gamɨnyɨna Gotɨyare bukuya' dara dɨnɨ'

“Gɨmɨ wɨda'gɨzɨyagaa' ‘Yɨda'maraangelyɨ,’

A'mwe yuya sara yawɨpɨ'de'nanyɨ.

Gɨmɨre yawɨbwasa'negaa'

Yɨnɨga davɨla'deigɨnyɨ.”

5Nemɨre kayaa'nanya sabwi Gotɨyare nawɨ'nya yɨda'maraanga saburɨ ku'maayaba marima'naabazabwine'na berɨ' gara daazɨwona! Nɨmɨ a'mweinaavɨre kunya nemɨre saburɨna mɨdɨdɨ dara dɨdeinyɨ daaka! Sare'na Gotɨyai nerɨvɨkɨrya'nei nemɨre kayaa'nanya sabwina sɨnna tɨka wɨdasa'ne daanga be'na nejaavadelaka? Sahwai yɨda'maraangei mɨka! 6Sasarebwi arɨkewɨnyɨ. Gotɨyai yɨda'maraangebwi mya yajɨ kwajɨ Kwaaka davakɨyaraavɨ sasara myai gara yawɨrannelaka! 7Sare' dare'nesɨ. Pwara dara dɨna “Nɨmɨre kwaasɨ yagaala sa' Gotɨyare yagaala nebulya'nanya' ku'maayaba marima'naabathesɨ. Yɨ daza' sara yojɨ gamɨnne yaya' munyaba makɨladesɨ. Sare'na ga'dareburɨ nyɨdɨvanɨ'? ‘Gɨmɨ waginakeigɨnyɨra.’ Sara jɨdavaka nɨmɨnyɨ daanga nyɨjaavanɨke' be'neka?” 8Sara dɨpɨja' sarevɨdaa'nyɨ kwaasɨ yawɨta dara dɨpɨ'de'nanyɨ “Yarala, nemɨ kayaa'nanya sabwi yaana! Yɨ savɨ tewaanya sabwi yɨma'nade'na kayaa'nanya sara yaana!” Nabaai sasare sabwi nawɨ'nya' daa! A'mwera pwara nemɨnyɨna bɨraiyagaala kwaasɨ dara nedɨvanɨga' “Yagaala Kɨraazɨtɨyareraavɨre' yɨ sasaresɨ.” Sasareraavɨ Gotɨyai daanga wɨjaavadelyɨ. Nabaai tɨvɨkɨta sa' yɨdasasɨ.

“Yuyagaa' a'mwe aane pwai kwai yɨda'maraangei mɨ',” dɨnɨke'nesɨ.

9Yɨ gatha'darevɨnaka! Nemɨ Juyaina a'mwe pwaraavɨ wavɨlavaanneina dɨngaka! Aawa nebulyasɨ. Sare' dare'nesɨ. Nemɨ jɨdasa'na tɨvi'na dɨwo “Yɨ yuyaina wagɨlyavɨ kwaakewɨ mwaaihoinera Juyainajɨ Anga Pimagɨnya (Gɨrikɨya) kwarajɨ.” 10Sabaaibɨ' dara dɨnɨkesɨ.

Gotɨyaryaba yɨda'maraanga aane pwai kwai mɨ'.

Arɨkewɨnyɨ. Aane pwai kwai mamwaalyɨ'.

11A'mwe pwai sɨmunya wɨwarɨkei mɨ'.

Gotɨyarɨna pwai bɨrɨbɨrya yɨvanɨkei mɨ'.

12Yɨ yuyara Gotɨyarɨ yagalya'ma'mwaasare.

Yuyara yɨrakureva waryaanyara yɨma'nɨwaasare.

Nawɨ'nyabwi yade aane pwai mɨ'.

Sasarei aane pwai kwai mamwaalyɨ'.

13Taalɨsavɨdaa'nyɨ gɨlebutɨrɨnya'bɨ' newinɨvanɨka wɨdadɨvɨsare.

Taalɨsasɨ kwaasɨ yagaala wɨdadɨvɨsare.

Naawɨnaanyare kwaamɨnya' a'mweraavɨ tamakadevaaibɨ'

Yagaala nabinabinya kayaaka yɨgalya'ne wɨdadɨvɨsare.

14A'mweraavɨ kayaaka dɨragɨnna yɨgalya'ne

Yagaala kayaa'nanyanna paasiyagaala wɨdadɨvɨsare.

15Yɨhukaannakera a'mwe tamya'nera

Yarai kaanyave'na yamaryadɨvɨsare.

16Kayaaka yɨgalakya'nera wɨna yadɨvɨ'

Taanginya kwalaalya wɨjaaya'nera wodɨvɨsare.

17Kwaamu'nanyaburɨne tusa' yawɨramaa'dɨvɨtara mɨ'.

Pwarajɨ avaaizɨmunyabwi ye'mwannamwaaidɨvɨtara mɨ'.

18“Gotɨyai Naangelyɨra,” myawɨri yadɨvɨ'

Kumɨre tɨnnyaraavɨ Gotɨyarɨne lɨkebwi mwarika.

Gotɨyare bukuyavɨ sara dɨnɨkengɨ.

19Nabaai sara dɨnɨkenna nemɨ yawɨ'mwo. Yuya Kɨwɨnya dɨnɨke nemɨ Juyaina saburɨ dalaangewɨ wɨla'nata yɨgoina sara ya'ne dɨnɨkengɨ. Sare' kɨrɨ' Juyainaavɨna dazabwi yɨhɨthɨwebwi yɨwetawakya warɨkesɨ. Sarevɨdaasɨ Gotɨyai yawɨbwata'negaa' nemɨrebwina “Juyarajɨ maanga bɨpaina yɨpɨka! Nabaai a'mwe yuyawɨnyara nɨmɨnyɨna yɨwetawakya sabwi kɨnɨnnakera mwaaibɨka!” daka Kɨwɨnya kɨnɨnnakeinaavɨ dalaangewɨ nemarulawakakeine. 20Sare'na darevɨnyɨ. Gotɨyare yawɨbwata'nebwina Kɨwɨnya sabwi mɨdɨnyavɨna “A'mwe yɨda'maraangeigɨnyɨ. Nɨmɨreigɨnyɨ,” Gotɨyai kɨlaa'naka aane pwarɨ kwarɨ wɨdathe' mɨ'. Aawa. Sare' dare'nanyɨ. Kɨwɨnya sabwi nemɨre wagɨla saburɨ yune'na neyɨbwarɨdaakuvanɨkesɨ sahɨrɨ'na.

A'mwei Kɨraazɨtɨyarɨ lɨmwagazai yɨda'maraangei yɨma'nade'nesɨ.

21Nabaai dahaa' Gotɨyai a'mweraavɨ gamɨre yɨda'maraanga sabwi gamɨnyɨ yɨda'maraangeraavɨ wɨmwaaihya'nebwi mi'na neyɨbwarɨdaakwakebulyɨ. Sa' kɨwɨnyabura mɨdɨnya'nevɨdaa'nyɨ mima'nyakesɨ. Aawa. Sa' pɨrɨvɨ yɨma'nakesɨ. Kɨrɨ' pɨkarya Kɨwɨnyasɨ Wɨ'nawɨjɨwakyaasaraavɨre dɨnɨkesɨ nawɨ'nya yɨda'maraanga dazabwina jalɨkurakɨnɨkesɨ. 22Yɨ Jizaazai Kɨraazɨtɨyarɨ lɨmwabɨzaraavɨna Gotɨyai “Yɨda'maraangeraavɨ nɨmɨreraavɨ wɨmwaaihɨma!” dathelyɨ. Yɨ lɨmwabɨza yuyaraavɨnesɨ. Sare' padaihasamaasabwi dare'nesɨ. A'mwe Juyarebwi nabinyabwi mɨ'. Anga naanga pimagɨnya pwai kwarebwi nabinyabwi mɨ'. 23Sare' dare'nesɨ. Yuya a'mwera Juyarajɨ ajɨmya yuyangɨyarajɨ wagɨlya'nebwi yadɨvɨsare. Gotɨyai byaanna dɨragɨnyasɨyaryaba menyaba mwaaihasare. 24Sasareraavɨ Gotɨyai yange'na tewaanna wɨgaimwada Kɨraazɨtɨyai Jizaazarɨ kamaryasaaba' sahwai ayahi mubya yamaarya'nei sara kya' Gotɨyai “A'mwe yɨda'maraangeihɨlyɨra. Nɨmɨreihɨlyɨra,” wɨdɨna. Sa'na sahwara mamubyadɨvɨsare. Sa'na Kɨraazɨtɨyarɨ sɨhumalesɨ. 25Sɨnnawɨ Gotɨyai Kɨraazɨtɨyarɨ dahɨlakakei balaka gamɨre tawe' a'mweraavɨre wagɨla sa' mubya'ne' walaabakesɨ. Gotɨyarɨ a'mweraavɨre wagɨlyabwina sɨnna tɨka wɨda'devulyɨ. Kɨraazɨtɨyarɨ lɨmwabɨzaraavɨna sɨnna tɨka sabwi mubamarasɨ'nya'nei balakelyɨ. Yɨ nabaai sasare saburɨ Gotɨyai “Nɨmɨ yɨda'maraangeinyɨ yɨda'na yadɨnyainyɨ,” neyɨbwarɨdaakwakebulyɨ. Sare' darevɨnyɨ. Kɨgaa' Gotɨyai kwaamu' kave yemwaaida a'mweraavɨre kayaa'nanyanna yeta sabwina wanganakɨna. 26Kɨrɨ' “ ‘Gotɨyai yɨda'maraangei mɨka!’ nadɨpɨdɨka!” daka dathahaasagaa' Gotɨyai “Nɨmɨ yɨda'maraangeinyɨ yɨda'na yadɨnyainyɨ,” daka sara neyɨbwarɨdaakwia'nei Kɨraazɨtɨyarɨ maryasaabakelyɨ. Sasare saburɨ Gotɨyai gamɨ sai yɨda'maraangerɨna neyɨbwarɨdaakwada yɨ a'mwe yuyara, Jizaazarɨ lɨmwagazarɨna “A'mwe yɨda'maraangelyɨ. Nɨmɨrelyɨra,” dadelyɨ.

27Sarevɨdaasɨ Gotɨyai “Yɨda'maraangeihɨlyɨ,” nedake'na yɨ tusa' a'mweraavɨne yaya' makɨlya'nebwi gava warɨka! Yɨ wana aawaawa. Tuta sarɨ' kaanya mena tihɨ'nɨkesɨ. Tuta dazarɨkɨ berɨ' daharihɨ'narɨ'? Gotɨyare Kɨwɨnyabwi mɨdɨnya savɨ dɨngaka? Aawa, savɨna mɨ'. Aawa. Kɨraazɨtɨyarɨ lɨmwanga saburɨ sahɨrɨ' tuta sarɨkɨ galalɨmwamanɨ'. 28Sare' dare'nesɨ. Nemɨ dɨragɨnna dara dadaanyɨ “Gotɨyai a'mwei Kɨraazɨtɨyarɨ lɨmwagazarɨ dɨvanɨkelyɨ ‘A'mwe sai yɨda'maraangelyɨ. Nɨmɨrelyɨra.’ ” A'mwe Kɨwɨnyaburɨna yaamɨjɨ yune mɨdɨnajarɨna Gotɨyai sara majadelyɨ. 29A'mweraavɨne yaya mamakɨlya'ne' pɨbwi darɨka? Dare' jawɨrila! Gotɨyai sai Gotɨyai Juyaraavɨnannei daaka! Ajɨmya yuyangɨyarajɨyaraavɨne Gotɨyai midaaka! Yayo! Gotɨyai sai ajɨmya yuyangɨya pwara kwaraavɨjɨnelyɨra. 30Gotɨyai gave pwaina naangelyɨ. Sarevɨ Juyara kɨlaakejɨ' gurya da'dɨvɨsara Kɨraazɨtɨyarɨ lɨmwabɨzaraavɨna “Yɨda'maraangerera,” dada nabaai ajɨmya yuyangɨyara kɨlaakejɨ' gurya madayadɨvɨsara Kɨraazɨtɨyarɨ lɨmwabɨzaraavɨnajɨ avaaina dɨvanɨkelyɨ. 31Sarevɨdaasɨ lɨmwanga dazavɨ yɨda'maraangeina yɨma'nadaanya'na Kɨwɨnya sabwi dathathɨvaimanɨgona? Arɨkewɨnyɨra. Aawa. Kɨwɨnyabwi nebulya'na yɨda'na marɨdaakwia yɨvanɨgo.

Currently Selected:

Romɨ 3: byr

Highlight

Compare

Copy