Romɨ 5

Kwaamu'nanya'nesɨ yɨlaaya'nesɨ sawaarɨnesɨ.

1Kɨraazɨtɨyarɨ mena lɨmwagovɨ Gotɨyai nemɨnyɨna “Yɨda'maraangeihɨrɨ nɨmɨreihɨrɨ yɨhɨmwaaihɨwa,” nedakevɨdaa'nyɨ Gotɨyare kwaamu'nanyavɨ avaaizɨmunya Gotɨyalyɨ ye'mwannamwaaiho. Yɨ nemɨre Naangei Jizaazai Kɨraazɨtɨyai nayaa yakevɨ avaaizɨmunya Gotɨyarɨjɨ neye'mwamanɨ'. 2Kɨraazɨtɨyarɨ lɨmwagovɨ sahwai yange'na gaimwanga sɨhumalevɨ nemɨ daako savɨ gave pwainanyai nemɨre tusa' basamakulakelyɨ. Nabaai Gotɨyare byaanna dɨragɨnyavɨ nayaa pada'galaye'mwannamwaala yaade'na yɨlaaya yadaa Gotɨyarɨna dɨragɨnna yemwaaimanɨgo. Sarevɨ nemɨnyɨ yɨlaaya neyɨgaimanɨ'. 3Nabaai nemɨ yune savɨnanna yɨlaaya myɨ yaanneinera. Aawa. Nemɨnyɨ taanga neyɨma'nɨvanɨka sabwi kɨbwinajɨ yaanne'na nemɨ yɨlaaya yɨna. Nemɨ yawɨ'manɨgo. Taanga maa'manɨgo daza nemɨnyɨ dɨragɨnya yɨvaimwanga neyɨvanɨkengɨ. 4Yɨ nabaai nemɨ dɨragɨnya dara mwalaaja' yɨ nabaai Gotɨyai dara wanganannelyɨ “Yaamɨjɨya saburɨ yɨnɨga wi'nanyara midaaka!” Yɨ nabaai Gotɨyai “Yaamɨjɨya saburɨ yɨnɨga wi'nanyarera,” dɨna yaja' yɨ Gotɨyaibɨsaina yɨma'nya'neina yemwaala yadaanyɨ. 5Nabaai nemɨ yemwalaaja' yɨ nemɨre sɨmunya savɨna wagɨla nevwa'nadeina mɨ'. Kurya Tewaanyai, Gotɨyai yanga nejaavadei dara neyɨbwarɨdaakuvanɨ' “Gotɨyai gamɨre kale nawɨ'nyabwi nemɨre sɨmunyavɨ neyekuramwaaihɨvanɨ'.” Sare'na yemwalaaja sɨmunya sa' wagɨla nevwa'nade' mɨ'. Sara yɨma'nadesɨ.

6Nemɨ tewaanya ya'neina dɨragɨnya maayaina kuna mwaaidori Gotɨyai sara dahɨlakaka dazahɨgaasagaa' nemɨ Gotɨyarɨ bule'na wɨjavadaanyainaavɨna ayahi nemaarya'nei nemɨnyɨneba Kɨraazɨtɨyai balakelyɨ. 7Sare' dare'nesɨ. Pwai kwai a'mwe Kɨwɨnya mɨdɨderɨneba baladei dɨngaka! Naangaangesɨ. Dare'nesɨ. A'mwe pwaina pwainanyai a'mwe nawɨ'nyarɨna pwaraavɨ yɨnɨga wɨgaimwaderɨna sai sɨmunya dɨragɨnna yojɨ padaihasamaarya'nei sahwarɨneba baladei dɨngaka? 8Sare' kɨrɨ' Gotɨyai gamɨre kale wia'nebwi nemɨnyɨnebwina dara neyɨbwarɨdaakuvanɨkesɨ. Sahwara kayaa'nanyanna yadɨvɨsara kuna mwaaidapi yɨ Kɨraazɨtɨyai kumɨnyɨneba balakelyɨ. 9Yɨ Kɨraazɨtɨyare tawe' dɨma'nakevɨ Gotɨyai nemɨnyɨna “Yɨda'maraangera nɨmɨreraavɨ wɨmwaaihɨwa,” dakevɨdaa'nyɨ yɨ dɨragɨnna nebulya'na yawɨ'manɨgo. Gotɨyare sɨnna tɨke' yawɨbwata'nerɨkɨ Kɨraazɨtɨyai nevadaihasamaarade'nanyɨ. 10Sare' dare'nesɨ. Sɨnnawɨ nemɨ Gotɨyarɨ yɨkamaanga mwaaidori gamɨre Gawaalɨvaangei balakevɨ, yɨkamaanga sabwi aaya wo'dalasɨ'na yaka yɨ nemɨnyɨ Gotɨyalyɨ avaaizɨmunya' ye'mwagakya neya'. Avaaizɨmunya' ye'mwagakya neyakevɨdaa'nyɨ dɨragɨnna nebulya'na yawɨ'manɨgo. Kɨraazɨtɨyai gaalyai mwaalɨkevɨ Gotɨyare sɨnna tɨkevɨna kuna nevadaihasamaaradelyɨ. 11Nabaai yune sahɨrɨ'nanna mɨ'. Aawa. Nemɨre Naangei Jizaazai Kɨraazɨtɨyai nemɨnyɨ Gotɨyarɨjɨ avaaizɨmunya mena neye'mwagaka sarevɨ dahaa' nemɨ a'mweraayaba Gotɨyarɨ yɨlaaya yɨvanɨgo.

Aataamɨ balyabwi kyɨmavadaakwa' Kɨraazɨtɨyai gaalyabwi yɨmavadaakwake'nesɨ.

12Sarevɨ nemɨ yawɨ'manɨgo. A'mwe pwai kayaa'nanyabwi yaaka sasare saburɨna Kwaakevakɨyainaavɨre sɨmunyavɨ kayaa'nanyabwi yɨma'nakesɨ. Nabaai kayaa'nanyabwi balyaburɨ makabakesɨ. Sabaaibɨ' a'mwe yuyara kayaa'nanya yadɨvɨsavɨ balyabwi a'mwe yuyaraavɨ maa'desɨ. 13Sare' dare'nesɨ. Gotɨyai Kɨwɨnya' mujaayadɨ'nyɨyagaa'na yɨ dazagaa' Kwaakevakɨ kayaa'nanyabwi waryaakesɨ. Kɨrɨ' Gotɨyare Kɨwɨnya' maayavɨ, yɨ kumɨ kayaa'nanya yadɨvɨsanna Kɨwɨnya' jɨda'da mɨ'. 14Aawa. Sare' kɨrɨ' balyabwi Aataamɨmɨregaa'daa'nyɨ waraka Mozɨzaregaa'na kuna bwarakesɨ. Yɨ balyabwi a'mwe yuyaraavɨ galavɨla'nɨkesɨ. Yuyaraavɨ maremwaainɨkesɨ. Aataamɨ Gotɨyai dɨragɨnna wɨja' pari'mavakabaaibɨsavɨ ne sɨnnawɨnya kutabanya mavari'mayɨ yaata sara kwaraavɨjɨ balyabwi galavɨla'na yaakere. Aataamɨ sahwai a'mwe dazai dɨvidaasɨ yɨma'naabyarɨna Kɨraazɨtɨyarɨna ke'ba'nanya'bɨsalyɨ.

15Kɨrɨ' yɨ Aataamɨmɨ yaaka yɨwetata sasɨ yɨ Gotɨyai gaimwanga yade sɨhumale sa' yange' Gotɨyai “Yɨda'maraangeihi nɨmɨreihɨrɨ yɨhɨmwaaihɨwa,” nedadesɨ avaainanyawaai mɨ'. Aawa nebulyasɨ. Sare' dare'nesɨ. A'mwe gave sare wagɨlyavɨ yɨ a'mwe kwalaalyara baidɨvɨkɨ. Gotɨyare yanga gaimwanga tewaanyasɨ sɨhumale' yanga wɨjaayasɨ balya saburɨ naanna wavɨlavɨkewaalyɨ. Yada a'mwe kwalaalyaraavɨ naangaanga yɨma'nɨgodesɨ. Gaimwanga yada sɨhumale' yanga wɨjaaya sa' a'mwe gave pwainanya Jizaazai Kɨraazɨtɨyai sahwarevɨ maa'manɨgo. 16Nabaai a'mwe gave sare wagɨlya' yaake'bɨ' sɨhumale' wɨjaaya sa' avaainanya' mɨ'. Aawa nebulyasɨ. Sare' dare'newaalyɨ. Pɨrɨ' daresɨ. A'mwe dazai yɨwetata pɨrɨ'na yaakevɨ yawɨbwasa'na Gotɨyai jɨdata dakɨna. Pɨrɨ' daresɨ. A'mwera yɨwetata kwalaalya yadaapiyangɨ Gotɨyai gaimwanga yade sɨhumale'na marasɨ'nada “A'mwe yɨda'maraangeihɨlyɨ,” wɨdɨvanɨ'. 17Sare' dare'nesɨ. A'mwe gave sare yɨwetasavɨ yɨ gave sarɨna balyabwi yɨma'naabaka gaai maremwaaida yɨ a'mwe yuyaraavɨ galavɨlawakɨvanɨ'. Kɨrɨ' nemɨ dɨragɨnna nebulya'na yawɨ'manɨgo. Yanga gaimwanga tewaanya naangaangevɨjɨ sɨhumale' savɨ Gotɨyai “Yɨda'maraangeihɨlyɨ,” nedɨvanɨkevɨjɨ a'mwera maapɨjara gaala mwaaidɨvɨsavɨ a'mwe gave pwainanyai Jizaazai Kɨraazɨtɨyarɨna kingɨya mwaaibɨ'dere. Yɨ daza' balyaburɨ wavɨla'da yɨ naangaangesɨ.

18Yɨ sarevɨdaasɨ yɨwetata gave sa' yaakevɨ a'mwe yuyaraavɨ Gotɨyai jɨdata dakɨna. Sarebaaibɨ' yɨda'maraanga gave sa' yakevɨ a'mwe yuyaraavɨ Gotɨyai “Yɨda'maraangeihi nɨmɨreihɨlyɨ,” dakɨna yada gaala mwaaihasare. 19Sare' dare'nesɨ. A'mwe gave sai yagaalya' galazekɨvalyaakevɨ a'mwe kwalaalyara kayaa'nanyaraavɨ wɨmwaaihake'nanyɨ. Sarebaaibɨ' a'mwe pwai Gotɨyarɨ mɨdɨnakevɨ a'mwe kwalaalyara yɨda'maraangeraavɨ wɨmwaaihade'nanyɨ. 20A'mwera kumɨre kayaa'nanyanna “Yɨwetata naangaanga naanna yadaanyaine. We'!” dɨnya'ne'na Gotɨyai Kɨwɨnyabwi dakɨna. Sara dakɨna kyaa' kayaa'nanya naangaanga yɨma'nakevɨ yɨ Gotɨyare yanga gaimwanga tewaanyabwi sasarengɨ naanna wavɨlavɨkebulyɨ. 21Kayaa'nanyabwi balyaburɨ marima'naabada yɨ dazavɨ a'mweraavɨ maremwaaidevaaibɨ' Gotɨyare yanga gaimwanga tewaanya sa' Gotɨyai “Yɨda'maraangeihɨlyɨ,” yawɨsa' marima'naabada yɨ dazavɨ sa' maremwaalannesɨ. 'mɨre Naangei Jizaazai Kɨraazɨtɨyarɨ nemɨ gaalyabwi ma'daa yuyagaa' yuyagaa' mwalaade'na yanga gaimwanga sa' maremwaala'nesɨ. Sara ya'ne' yanga gaimwanga tewaanya sabwi sasarengɨ wavɨlavɨkebulyɨ.

Currently Selected:

Romɨ 5: byr

Highlight

Compare

Copy