Romɨ 13

Nemɨ ga'maanɨyaraavɨ kwaakewɨ nayaa wɨla'naraade'nesɨ.

1Gazaizai ga'maanɨyaraavɨ kwaakewɨ nayaa wɨla'narana! Sare' dare'nesɨ. Ga'maanɨyai saba sana yaasɨwa' yɨma'nyɨna yɨkai mɨ'. Aawa. Yuya wawɨnya ga'maanɨyare sa Gotɨyare sɨmunyavɨ yɨma'nadengɨ. Nabaai yuya ga'maanɨyara mwaaihata sahwaraavɨ Gotɨyai gamɨ sai wɨmwaaihakera sarera mwaaiha'. 2Sarevɨ yɨ a'mwe ga'maanɨyare yagaalya' galazekɨvalajai, sai Gotɨyare kɨbulyɨ galazekɨvaimwa'. Yɨ a'mwera dazavɨ galazekɨvaibɨzara kumɨre yɨpɨja saburɨ tɨvɨkɨta kayaa'nanya maapɨ'dere. 3Sare' dare'nesɨ. A'mwe nawɨ'nyabwi yadaapiyaraavɨ ga'maanɨyara lɨka yɨrɨ'galya'nera mamwaalyɨga'. Aawa. A'mwera kayaa'na yadaapiyaraavɨ lɨka yɨrɨ'galya'nera mwaaiha'. Gɨmɨ “Ga'maanɨyarɨna lɨka myɨ yɨdeinyɨ,” jawɨ'manɨgɨ! Yɨ sarevɨ yune nayaa nawɨ'nyabwina kya'gɨzɨ yɨ gamɨ gɨmɨnne yaya' munyaba gɨmakɨladelyɨ. 4Sare' dare'nesɨ. Gɨmɨnyɨ tewaanyavɨ gɨhaimwagya'nei Gotɨyare wɨdaayadei mwaalɨ'. Kɨrɨ' gɨmɨ kayaa'nanyabwi yɨja' yɨ lɨka nayaa jɨ! Sare' dare'nesɨ. Ga'maanɨya sahwai kwaari'masɨramɨnya' tɨvɨkɨrya'ne' gazare lɨmwagɨkei mɨ'. Sare' dare'nesɨ. Nabaai sai a'mwe kayaa'na yaderɨ Gotɨyare sɨnna tɨke'ne tɨvɨkɨrya'ne' wɨjaaya'nei Gotɨyare wɨdaayadei mwaalɨ'. 5Sarevɨ sahwarɨ kwaakewɨ nayaa dɨmwaala! Gotɨyare sɨnna tɨke' tɨvɨkɨsa'na kwaakewɨ nayaa dɨmwaaide gave'na mɨ'. Aawa. Gɨmɨre sɨmunyai padaihɨrakyai sara gɨthathe'na kwaakewɨ dɨmwaala! 6Sahɨrɨvɨne'na taakɨzɨya kɨrɨsɨ dakya! Sare' dare'nesɨ. Gotɨyare wɨdaayadɨvɨsara yune wawɨnya dazavɨna dɨragɨnna maremwaaidɨvɨsa'na dakya! 7Gɨmɨ a'mwe saraavɨna dala pɨnɨnna pɨnɨnna wɨjaavɨja kɨnɨnnakeigɨnyɨ. Sareigɨ sahwaraavɨna gɨmɨ nayaa duzaama! A'mwe taakɨzɨya maa'derɨna yɨ sahwarɨna taakɨzɨya' nayaa duzaama! Taakɨzɨya pɨnɨngɨne maa'derɨna nayaa duzaama! A'mwe pwarɨ “Gɨmɨ a'mwe naangeigɨnyɨ,” wɨdɨzaigɨ mwaala'gɨzɨ yɨ “A'mwe naangeigɨnyɨ,” nayaa duthana! A'mwe pwarɨne yaya' munyabanna makidɨzaigɨ mwaala'gɨzɨ yɨ sahwarɨne yaya' munyabanna nayaa dɨmakɨla!

A'mweraavɨna kale neyaja'nesɨ.

8A'mwe aane pwai kwarɨna gɨlyɨvɨta tɨvɨkɨrya'ne aane pɨrɨ' kɨrɨ' wɨjaavɨja' malɨmwaga'dɨnna! Wɨjaavɨja' tɨvɨkɨta gave dahɨrɨ'na warɨbainagothesɨ. Yɨ daresɨ. Kɨraazɨtɨyare gazaizarɨna kale gyana! Sare' dare'nesɨ. A'mwei a'mwe pwarɨna kale wiajai yɨ Gotɨyare Kɨwɨnyavɨ yunebanna nayaa mɨdɨmwakelyɨ. 9Sare' dare'nesɨ. Gotɨyare Kɨwɨnya' dara dɨnɨ' “Gɨmɨ pware a'mwevɨ ata malɨmwadɨnna! A'mwe pwaraavɨ maramakɨnna! Kuka mamaa'dɨnna! Tɨganaarya myɨnna!” Kɨwɨnya daza, yɨ kɨwɨnya yuya pɨnɨjɨ yuya sanna yɨ kɨwɨnya gave pɨrɨ'nanya' avaaina dara dɨnɨkesɨ. Gɨmɨ saigɨnyɨna tewaanya gima'nadevaaibɨ' yɨ a'mwe pwaraavɨna tewaanya nayaa gima'nana! 10A'mwe pwaraavɨna kale tewaanya wiadei sai sahwaraavɨ kayaa'nanyabwi yadei mɨ'. Sarevɨdaa'nyɨ a'mwei pwaraavɨna kale tewaanya wiadei, sahwai yune Kɨwɨnya' pada'galamɨdɨdelyɨ.

11Dathahaasagaa' dahaa' mwaaihoya da'na mena yawɨ'manɨgasa'na yɨhɨthɨwe yɨhɨvu'nade sasarebwi nayaa jɨla! Dahaa' sarɨmɨregaa' se waryabwi yagalya'ma'dɨvɨ' jathɨkaavɨnyidehaakɨ. Sare' dare'nesɨ. Sɨnnawɨ nemɨ Naangerɨ lɨmwagohaa' yɨ sagaa'daasɨ yune nevadaihasamaaradehaa' saamɨnyagaakɨ. Yɨ dahaa', maalɨkegaakɨ. 12Sawɨsa' mena yɨwawojɨ mena yɨrɨke purya'negaa' kɨbawegaa' yɨma'nɨwa'. Sarevɨdaa'nyɨ yuya sawɨtavɨya sa yagalya'mavaana! Yɨrɨkevɨya sabwina lɨmwagaraana! Sare'na Kayaa'nanyalyɨ mala bwa'nya'ne sɨramɨnyasɨ kɨlɨkesɨ pɨnɨjɨ maraana! 13A'mwera nyɨlyavɨ yamaryadɨvɨtabaaibɨ' nemɨ kaanya nayaa yɨda'na yamaryaana! Yaasɨwa'na kayaa'na myamaryɨ yadaa yɨmaka kayaa'na mulaanna! A'mwe pɨnɨngɨ kayaa'nanya dathɨwangebwi myaanna! Yɨ gɨrɨkita'nanya saburɨjɨ yaasɨwa' avaanna mulamaryaanna! Yaasɨwa' yagaaikɨwɨnyanna jarinadaata myaanna! A'mwe pwaraavɨre gɨlyɨvɨsangɨ tɨganaarya myaanna! 14Aawa. Naangei Jizaazai Kɨraazɨtɨyarɨ dɨvaazɨ'ma'na! Kɨlaakejɨkɨya sɨmunya kayaa'nanya sangɨna dɨka yɨdade sangɨna mɨdɨnya'na sɨmunya myawɨ'dɨnna!

Currently Selected:

Romɨ 13: byr

Highlight

Compare

Copy