Romɨ 12

Nemɨre kɨlaakejɨ' Gotɨyarɨ nayaa wɨjaaya'nesɨ.

1Nya'mweihi, yuya sarevɨdaa'nyɨ Gotɨyare kale naange'na yawɨ'dɨvɨsavɨ kavena dɨragɨnna nayaa dara yɨhɨthɨvanɨge. Juyara Gotɨyarɨna sipɨzipɨyaraavɨ tamira'dɨvɨtabaaibɨ' sarɨmɨre kɨlaakejɨ' gaalyajɨ' Gotɨyarɨ nayaa duzaavɨnyɨla! Yɨ sarɨmɨ saihi Gotɨyarɨneihi sahwarɨ yɨlaaya ya'neihi tewaanna duzaavɨnyɨla! Yɨ sarɨmɨ sara wɨjaavɨdɨvɨsavɨ Gotɨyarɨna yɨlaaya nebulya'nanya' nayaa jideihɨlyɨ. 2Yɨ dahaasara sara ya'ne kumɨrebwi sarɨmɨre sɨmunyavɨ nayɨhwɨlakɨpɨdɨka! Aawa. Gotɨyai sarɨmɨre sɨmunyangɨ mudɨke yɨhwakajavɨ yɨ sarɨmɨre kɨbwi mudɨkebwi yɨhyɨma'nade'nanyɨ. Yɨ sarevɨ Gotɨyai sɨmunya' yawɨ'devwi yɨnɨga nebulya'na yawɨramaapɨneihɨlyɨ. Yɨ Gotɨyarɨne tewaanya nawɨ'nyabulyɨ Gotɨyarɨ yɨlaaya wigalya'ne sabulyɨ Gotɨyai nemɨ ya'ne yawɨ'de tewaanya naanga yune nebulya'nanyabulyɨ jawɨranganyideihɨlyɨ.

3Sare' dare'nesɨ. Gotɨyai nɨmɨnyɨ yanga gaimwanga nyɨjaavakeburɨ, sarɨmɨjɨya gazaigɨzaigɨnyɨ dara gɨthɨma! Gɨmɨ saigɨnyɨna nayaa yawɨ'dɨza' yɨ sara jawɨka! Yɨ gɨmɨ kwaasɨ dara nyawɨ'dɨ'! “Nɨmɨ sainyɨ naanga nebulya'nanyainyɨ.” Aawa. Gɨmɨ Naangerɨ lɨmwagahɨnya'na Gotɨyare wawɨnyangɨne dɨragɨnya' sara gɨzaavakabaaibɨ' yune sabanna gɨmɨ saigɨnyɨna nayaa sara dɨvada'galayawɨka! 4Sare' dare'nesɨ. Nemɨre kɨlaakejɨkɨya kwalaalya warɨkejɨkɨra. Sare kɨrɨvɨ yuya sa wawɨnya' avaaina mivanɨ'. 5Sasarebaaibɨ' nemɨ a'mwe kwalaalyaina Kɨraazɨtɨyarɨ wɨlamwaidaanyaina gaimwannya'neina gamɨre kɨlaaka pɨjɨkɨyainera. Kɨlaakejɨkɨya gazaizai kɨlaakejɨkɨya pwaraavɨnelyɨ. 6Sareina nemɨnyɨ Gotɨyai yanga gaimwanga sabwi nejaavakevɨna gamɨre yanga sɨhumale dala pɨnɨnna dala pɨnɨnnanya kɨnɨnnakeinera. Nemɨnyɨdaa'nya gazaizai gamɨre yanga sɨhumale' pwaraavɨna yana! Sarevɨ Gotɨyarɨ wɨ'nanejɨwaakadɨvɨsaraavɨne sɨhumale' a'mwe pwarɨ wɨjaavada yɨ Naangerɨ lɨmwadevɨne yune sabanna sara wɨdana! 7Nabaai pwai kwɨya'mweraavɨ wɨdaaya'ne sɨhumale' kɨnɨnnakei yɨ nayaa sara wɨdaayana! Nabaai pwai wɨjɨwaakya'ne sɨhumale' kɨnɨnnakei yɨ nayaa sara wɨjɨwaakana! 8Nabaai Kɨraazɨtɨyareraavɨre kunya yawɨsangɨ maradɨhaa'bwarya'ne sɨhumale' kɨnɨnnakei yɨ nayaa sara maradɨhaa'bwarana! Gya'mwerɨ gɨlyɨvɨsa wɨjaaya'ne sɨhumale' kɨnɨnnakei yɨ yange'na nayaa wɨjaavana! Wawɨnya pɨrɨvɨ maremwaalya'ne sɨhumale' kɨnɨnnakei yɨ yɨnɨga sara yana! Taangesɨya pwaraavɨna wɨgaimwanga kale ya'ne sɨhumale' kɨnɨnnakei yɨ yɨlaaya yada sara yana!

Pwaraavɨna tewaanya wɨvu'nadevwinesɨ.

9Yɨ yuyangɨ ya'ne gɨmɨ pwaraavɨna kale kwaasɨ gyadeigɨ mɨ'. Kale naanga nebulya'na gyana! Nabaai kayaa'nanya saburɨna sɨmɨlɨka gulana! Tewaanyabwi nayaa nebulya'na dɨlɨmwagaka! 10Gazaigɨzaigɨ ja'mwe pwaina pwainanyaraavɨna gathaakaangei gahwaalaangeraavɨna kale wiajavaaibɨ' kale tewaanya gyana! Gɨmɨdaa'nyɨ gazarɨzarɨne yaya' munyaba nayaa dɨmakɨla! 11Naangere wawɨnya' ya'na maa'na maginanna! Aawa. Yuyagaa' dɨragɨnna nayaa ja! Gotɨyare Kuryai gɨmɨre kuryarɨ kagithɨkaavojɨ dɨ'nakeigɨ gɨmɨre sɨmunyasɨ ja! 12Naangerɨ lɨmwadɨ sahwarɨna yemwaaimanɨgɨnyavɨ, yɨ yɨlaaya nayaa jɨ! Gɨmɨnyɨ taanginya pɨrɨ' kagima'nojɨ yɨ savɨ dɨragɨnna dɨthaaka! Yuyagaa' Gotɨyarɨ nayaa jɨthaangana! 13Gotɨyare a'mwe pwara gɨlyɨvɨsanna kugainojɨ yɨ gɨmɨ nayaa ye'mwannawɨjaavɨna jɨ! A'mwe anga pɨwɨnyara gɨmɨnyabanna kabi'mavapɨri yɨ sahwaraavɨ nayaa pada'galamaremwaaina jɨ!

14Gɨmɨnyɨ a'mwera kayaa'na kagyapi Gotɨyai sahwaraavɨ tewaanna wiade'na sahwarɨ nayaa duthana! Sahwaraavɨ kayaaka yɨgalya'nenna mudɨnna! Aawa. Sahwaraavɨ nawɨ'nya wiade'na Gotɨyarɨ nayaa duthana! 15A'mwera yɨlaaya yadaapi gɨmɨ sahwaraavɨjɨ yɨlaaya nayaa je'mwannayɨ! Sahwara kɨnna kadapɨjɨ nabaai sahwarajɨ kɨnna nayaa je'mwannadana! 16Pwaigɨ ja'mwe pwarɨna pwaigɨ ja'mwe pwarɨna avaaizɨmunya jawɨ'nyɨla! Gɨmɨ saigɨnyɨne'na yawɨ'nadɨnyabaaibɨ' jawɨka! Gɨmɨ “Naangeinyɨ a'mwe naanga gaverajɨ mwaalɨma!” kunya myawɨ'dɨnna! Aawa. A'mwe yaasɨwakerajɨ nayaa je'mwannayamarya! Gɨmɨ gɨmɨnyɨne'na nadɨthɨka! “Nɨmɨ sainyɨ sɨmunya' kɨnɨnnakeinyɨra.” 17Gɨmɨnyɨ a'mwe gazaizai kayaa'nanya kagyozɨ yɨ sahwarɨ kayaa'nanya mɨnya maarya nyɨdɨ'! “A'mwe yuyaraavɨre tɨnnyaryaba nayaa nawɨ'nyabwina yɨma!” dadɨ jɨ! 18Gɨmɨ saigɨ malyabwina sɨmunya myawɨ'dɨnna! Nabaai gɨmɨnyɨne tusa' yɨdori yɨ gɨmɨ yuya a'mwerajɨ avaaimunyɨ'na yadɨ nayaa pada'galaye'mwannemwaaina jɨ! 19Nya'mwe nebulya'nanyaigɨ a'mwei kayaa'na givanɨke ayahi tɨvɨkɨta nyɨdɨ'! Aawa. Gotɨyare sɨnna tɨke' sahwarɨ yadaawori gɨmɨ kave baihana'na jɨ! Sare' dare'nesɨ. Gotɨyare bukuyavɨ dara dɨnɨkabaaibɨsasɨ. “Kayaa'nanyaburɨ ayahi dɨlarɨvɨkɨta sabwi yɨ sa' wawɨnya' nɨmɨresɨra. Nɨmɨ sainyɨ sahwaraavɨ kayaa'nanya' tɨvɨkɨrɨdeinyɨ,” Naangei sara dɨvanɨ'. 20Tɨvɨkɨta minna! Aawa. Gɨmɨre yɨkamaangei mɨjɨka yajai, yɨ sarɨ wapaaya nayaa duzaama! Gamɨre kulalya' yaalɨka wihɨrajai yɨ sarɨ aalya' nayaa duzaama! Sare' dare'nesɨ. Gɨmɨ sara yɨja' yɨ gamɨre yade sabwina wagɨla nebulya'na duzaadelyɨ. 21Gɨmɨ tɨvɨkɨrya'neigɨ gɨmɨre kayaa'nanya sabwi mwanganakɨnna! Kayaa'nanyabwi gɨmɨnyɨ nagwavɨlavadɨ'! Aawa. Gɨmɨ tewaanyabwina nayaa pada'galayadɨ yɨ kayaa'nanyabwi dɨthathɨwadeigɨnyɨ.

Currently Selected:

Romɨ 12: byr

Highlight

Compare

Copy