Romɨ 14

Neya'mweraavɨ majɨdavaanne'nesɨ.

1Kɨraazɨtɨyare pwara, yɨ sahwara lɨmwangevɨne yawɨsa' yune sɨdu'nakara mɨ'. Sareraavɨdaa'nyai Naangerɨ dɨragɨnna lɨmwada kɨrɨ' pɨburaavɨna yawɨta kwalaalya yɨvanɨkelyɨ. Yɨ sarerɨ kave maara'gɨzɨ Kɨraazɨtɨyareraayabanna Gotɨyarɨ yɨlaaya'na dɨmakulaama! Nabaai salyɨ gamɨre yawɨta sangɨna maanga nye'mwannadɨthɨka! 2A'mwe pwai lɨmwangevɨne yawɨsa' yune sɨdu'nakei yɨ sahwai yuya dala pɨnɨnnanya sa nadelyɨ. Kɨrɨ' pwai lɨmwangevɨne yawɨsa' sɨdu'nakai mɨ'. Sare'na sahwai dara yawɨ'delyɨ “Aawapaaya, sɨgya nɨma! Gotɨyai nɨmɨ mɨwɨta nya'neinyɨ kɨmaaka nyɨdakɨwakeinyɨ.” 3Yɨ a'mwei yuya nadei a'mwe mɨwɨta manyaderɨna sɨmunya kayaa'na nyawɨradɨka! Yɨ a'mwe mɨwɨta manyadei dara najɨdavadɨ'! “Sai wagɨla kayaa'na yɨwaka!” Sare' dare'nesɨ. Gotɨyai a'mwe nade sarɨjɨ mena maarakelyɨ. 4A'mweigɨ, pware wɨdaayaderɨ aaihwaigɨ dɨzɨda'deigɨna'! Yɨ gannya Naangei gamɨre wawɨnyavɨna wɨdɨna “Yo, tewaanna yɨwaa.” Nabaai wɨdɨna “Aawa, kayaa'na yɨwaa.” Gannya Naangeresɨra. Nabaai nade sahwai dɨragɨnna daavadelyɨ. Sare' dare'nesɨ. Naangei gamɨ sai sahwarɨ dɨragɨnya yɨvaimwagazai yɨ dɨragɨnna daavadelyɨ.

5A'mwe pwai Gotɨyarɨ yɨlaaya'ne yɨrɨka kɨrɨ'na yawɨ'manɨ' “Sa' naangesɨra. Yɨrɨka pɨrɨkaavɨ wavɨla'desɨra.” Nabaai sare' a'mwe pwai yawɨ'manɨ' “Yuya yɨrɨkerɨka avaainanyangɨra.” Sarebwina a'mwe gazaizai gannya sɨmunyavɨ nayaa pada'galayɨbwakɨda nayaa yɨwɨryɨnɨnana! 6A'mwei “Yɨrɨka pɨrɨ'na sarɨ' aaya mudɨ'na nawɨ'nyaangerɨkɨra,” yawɨ'manɨkei yɨ sai Naangerɨna yawɨ'da Gotɨyarɨ yɨlaaya sara yɨvanɨ'. Nabaai a'mwei yuya tɨka wapaaya sa nadei, yɨ sai Naangerɨna yawɨ'da sara nadelyɨ. Sare' dare'nesɨ. Sai Gotɨyarɨ “Su! Su!” wɨdadehaa' yɨ nadelyɨ. A'mwei yuya sa manyadei, yɨ sai Naangerɨna yawɨ'da tɨka wapaaya pɨnɨ kɨmaaka dakadelyɨ. Sai kwalyɨ wapaaya pɨnɨngɨna Gotɨyarɨ “Su! Su!” wɨdadelyɨ. 7Sare' dare'nesɨ. Nemɨnyɨdaa'nya aane pwai kwai gannya yawɨta gavevɨna mamwaalannelyɨ. Yɨ nabaai aane pwai kwai gannya yawɨta gavevɨna mabalannelyɨ. 8Aawa. Nemɨ gaala mwalaaja', sa' Naangere sɨmunyavɨ mwalaana! Nemɨ balaaja', sa' Naangere sɨmunyavɨ balaana! Sarevɨ gaala mwalaajavɨ, nabaai balaajavɨ yɨ nemɨ yuna Naangereinera. Yɨ gamɨre sɨmunya' mɨdɨnaana! 9Sare' dare'nesɨ. Kɨraazɨtɨyai balaka gaala ayahi mwaalake' dare'nesɨ. Kɨraazɨtɨyai “Nɨmɨnyɨ nyɨlɨmwadɨvɨsara mena bainɨka sahwaraavɨne Naangeinyɨ yɨma'nɨma! Nabaai a'mwe gaala kuna mwaaihata kwaraavɨjɨ Naangeinyɨ yɨma'nɨma!” daka balaka ayahi mwaalakelyɨ.

10Yɨ manyadɨnyaigɨ gɨnnya ja'mwerɨ berɨvɨ jɨda'manɨgɨnyaigɨnaka! Yɨ nadɨnyaigɨ gɨnnya ja'mwerɨna sɨmunya kayaa'na be'na yawɨ'manɨgɨnyaigɨnaka! Sare' dare'nesɨ. Nemɨ yuyaina Gotɨyare kotɨyavɨ davaadeinera. Yuyainaavɨ nemaryawɨbwaradeinera. 11Sare' dare'nesɨ. Gotɨyare bukuya' dara dɨnɨ'

“Naangei dara da' ‘Gaala mwaaihevɨ,

Yuyara kwadaai gidɨvɨ' “Naangeigɨ!” nyɨdɨpɨ'derera.

Yuyara yɨvanɨgasaburɨna Gotɨyainyɨ nyɨjalɨkurakɨpɨ'dere.’ ”

Sara dɨnɨ'. 12Yɨ sarevɨdaa'nyɨ nemɨnyɨdaa'nya gazaizai gamɨre yade aaya kaavɨla yuya saburana Gotɨyarɨ nayaa jalɨkurakadelyɨ.

13Jalɨkurakaadevɨdaa'nyɨ nemɨ neya'mwe pware sabwina kuna majɨdavaanna! Aawa. Nemɨ sɨmunyavɨ nayaa dara yawɨraana! Neya'mwei bwalaraawia'nei, kayaa'nanya yaamɨjɨ ya'nerɨna yɨ kayaa'na ya'ne pɨbura nyaadɨka! 14Naanga Jizaazai sahwarɨ wɨlamwaaihe'na nayaa dathavɨna yawɨ'manɨge. Yɨ aawa. Nya'ne aane pɨrɨ' kɨrɨ' gamɨ sa' kɨmaake' gave pɨrɨ' mɨ'. Kɨrɨ' a'mwei “Kɨmaake' kɨnɨnnakesɨ,” yawɨ'daasɨ yune gamɨre sɨmunyavɨ yɨ daza' kɨmaake' yɨma'nɨwakesɨ. 15Sare' dare'nesɨ. Gɨmɨ tɨka wapaaya pɨrɨ' nɨja' yɨ ja'mwei gɨmɨnyɨ gwanganojɨ sɨmunyavɨ “Sa' kɨmaakesɨra,” yawɨ'da kɨrɨ' najai gamɨre sɨmunyarɨ kayaaka jɨhaide'nanyɨ. Yɨ sara yɨma'naja' gɨmɨre ja'mwerɨna kale gyadevɨna myɨvanɨgɨ. Neya'mwe dazarɨneba Kɨraazɨtɨyai mena balaka a'mwerɨ gɨmɨre wapaayayaba kayaaka migaidɨnna! 16Sarevɨdaa'nyɨ gɨmɨ nadɨnyaigɨ dara yawɨ'dɨnya' “Sa' tewaanyasɨ,” yɨ savɨna ja'mwei kayaa'na yaja'na a'mwera bɨraiyagaala nadɨpɨdɨka! 17Sare' dare'nesɨ. Tɨka wapaaya nyabulyɨ aalya pɨnɨ nyabulyɨ dazabwi Gotɨyai a'mweraavɨ maremwaaidevwina mɨ'. Aawa. Davurananyɨ. Yɨ yɨda'maraangebulyɨ, kwaamu'nanyabulyɨ, yɨlaayabulyɨ sabwinanyɨ. Sabwina Kurya Tewaanyai neyade dazabulyɨ. 18Sare' dare'nesɨ. A'mwei dazaburɨna Kɨraazɨtɨyarɨ wɨdaayajarɨ gamɨre sabwina Gotɨyai yɨlaaya wigaladelyɨ. Nabaai a'mwerajɨ yawɨpɨ'delyɨ “Sahwai a'mwe tewaanyalyɨra.” 19Sarevɨdaa'nyɨ nemɨnyɨ kwaamu'nanyabwi neyade sangɨjɨ pwai gya'mwe pwarɨ pwai gya'mwe pwarɨ yɨvaimwannadɨvɨta sangɨjɨ yuya sabura nayaa pada'galamɨdɨnaana! 20Gɨmɨ wapaanna ja'mwerɨ myawɨri yaasɨwa'na nya'neigɨ Gotɨyare wawɨnya' lɨmwangebwi kayaaka nyɨgaidɨ'! Nebulya' daresɨ. Yuya sa tɨka tewaanya nya'nengɨ. Kɨrɨ' gave pɨnɨ kana'gɨzɨ yɨ a'mwe pwai gwanganojɨ sarevɨ “Kɨmaakesɨ,” yawɨ'da kɨrɨ' kayaa'na yaja' yɨ sabwina gɨmɨ kayaa'nanyabwi jɨtheigɨnyɨ. Sare' kayaa'nanyasɨ. 21Mɨwɨta manyasɨ waainɨya' manyasɨ ja'mwerɨ walamarakya'ne pɨbura kayaa'nanya ya'ne pɨbura myasɨ sare tewaanyangɨ. 22Gɨmɨ yuya tɨka wapaaya nya'nebwi lɨmwadɨ kɨmaakebwi maayaigɨ Gotɨyaryaba gɨmɨ saigɨ gaveigɨ nayaa ja! A'mwei “Sa' nawɨ'nyasɨ,” yawɨ'dei sara yajarɨ gya'mwei manyadei wanganaja' sɨmunyai kayaaka nyɨgaladɨkajɨ sɨnnawɨnyai gamɨ sai “We'! Kayaa'na yɨwa,” myawɨri yajai yɨ sahwai yɨlaaya yada tewaanaanga yɨnana! 23Nabaai a'mwei sɨmunya pɨrɨwaai yɨma'nojɨ tɨka najai sahwai yɨwetawakɨwa'. Gamɨ sarɨna jɨda'nɨwa'. Yɨ sai dɨragɨnna malɨmwagaryada tɨka sa' nɨwake'na gamɨ sarɨna jɨda'nɨwa'. Yuya sabura a'mwei dɨragɨnna malɨmwagaryada yade sa yɨ kayaa'nanyabulyɨ.

Currently Selected:

Romɨ 14: byr

Highlight

Compare

Copy