Romɨ 11

Yɨzɨrelɨya pimagɨnya maalɨka pɨvaakɨyaraavɨnesɨ.

1Sarevɨdaa'nyɨ dara dɨvanɨge. Gotɨyai gannyaraavɨ gewɨ mena marakakei dɨngaka! Arɨkewɨnyɨ. Sare' dare'nesɨ. Nɨmɨ kwainyɨ Kɨraazɨtɨyarɨ lɨmwadɨnyainyɨ a'mwe Yɨzɨrelɨyainyɨra. Nɨmɨ Evɨraamɨmɨre yɨsiwiainyɨ avaaitawejɨ'nyɨ. Bejaminɨmɨre yɨsavaa'nyɨ. 2Gotɨyai sɨnnawɨ a'mwe sahwaraavɨ mena yawɨranganakeraavɨ gewɨ mena marakakera mɨ'. Yagaala Yɨlaajare' Gotɨyare bukuyavɨ dɨnɨke' sarɨmɨ myawɨryadɨvɨ' daa! Yɨlaajai Gotɨyarɨ Yɨzɨrelɨya sahwaraavɨna kotɨya ja'neraavɨ wɨdakelyɨ. Dara dɨnɨ' 3“Naangeigɨ, pɨropetɨya gɨmɨnyɨ gu'neva wɨjɨwaakadɨvɨsaraavɨ sahwara mena tamake'. Gɨmɨre kwaraanya kayaa'nanyanna bulɨmakaawoyaraavɨ dɨka nasɨ'nya'nengɨ kayaaka mena lɨkayɨgalasɨ'ne'. Sarevɨ gɨmɨreinyɨ gaveinyɨ kuna mwaaihe. Nabaai nɨmɨnyɨna ‘Tamakaana!’ dadɨvɨ' bɨrɨbɨrya' kuna yɨvanɨga'.” 4Sara wɨdaka kɨrɨ' Gotɨyai be yagaala ja'nawɨdakavaka! Sai dara da' “Nɨmɨ nɨnnyara pwarana pwarana a'mwe sevenɨ taawɨzanɨyaraavɨ (7,000) yɨvaineinyɨ nyɨlɨmwadɨvɨsare. Sahwara gotɨya kwaasɨya Baa'aalɨyarɨ kwadaai gɨlɨna myeva mɨdɨdɨvɨtara mɨ'. Pwara kwalaalya kwalaalyara sara mi.” 5Sarevɨdaa'nyɨ nabaai dahaakɨgaasɨ Juya yɨta pimagɨnya maalɨkevaa' lɨmwadɨvɨ' mwaaiha'. Sahwaraavɨ Gotɨyai gannya yanga gaimwangeburɨ dahɨlakakera mena yɨma'nesare. 6Gannya yanga gaimwangeburɨna Jizaazarɨ lɨmwangeburɨna sahwaraavɨ dahɨlaka'. “Sahwara wawɨnya yadɨvɨsanna,” kunya myawɨryaka dahɨlaka'. Yɨ kumɨ wawɨnya yadɨvɨ' yadaapi Gotɨyai sahwaraavɨ dahɨlakajɨ kwajɨ yɨ yanga gaimwange' wana yuna yanga gaimwanga nebulya' mima'nyɨ kyadɨka!

7Sarevɨdaa'nyɨ yɨ nabaai nemɨ gara daazɨwo? Yɨzɨrelɨya kwalaalyara dɨragɨnna bɨrɨbɨrya yɨvanɨgata sa', yɨ sa' mamaaryesasɨ. Kɨrɨ' Gotɨyai a'mwe pwaraavɨ dahɨlakaka sarera maaresasɨ. Yuya pwara Gotɨyai kumɨre sɨmunyavɨ tihɨralɨmwagarakere. 8Gotɨyare bukuya' dara dɨnɨkabaaibɨsasɨ.

Gotɨyai kumɨre sɨmunyavɨ kɨrɨbɨbɨnya wakakelyɨ.

Kumɨre tɨnnyarɨ myawɨranganya'na wiakelyɨ.

Kumɨre kadɨka mu'nya'na wiakelyɨ.

Sɨnnawɨjɨ dahaasɨ avaaina mwaaihasare.

9Yɨ Devitɨ kwalyɨ Gotɨyarɨ sahɨrɨ'na dara wɨdakelyɨ

“Kumɨre tɨka munne mwa'dainaanya'bɨ' yɨma'nana!

Kumɨre tɨlɨnnyangɨ naanya sa' lɨvapana!

Nabaai kumɨre sɨvɨlya dahe paakupɨka!

Sare' kumɨre kayaa'nanyaburɨ tɨvɨkɨta maapɨka!

10Kumɨre tɨnnyarɨ jɨhɨnya' dɨvwaakya!

Sahwara tɨnna mwanganyɨ yɨpɨka!

Sahwaraavɨre bule' lɨngwɨla'nata yana!

Yawɨta kwalaalya taange'na winarana!”

Gotɨyai ajɨmya yuyangɨyaraavɨ padaihasamaarake'nesɨ.

11Sarevɨdaa'nyɨ nɨmɨ dɨvanɨge. Gotɨyai “Sahwara yɨnahu walayɨdɨhwakɨ'naraawɨpɨka!” kada' mudavesara daaka! Kɨraazɨtɨyarɨ “Aala,” dɨvanɨgasara yunegaa'nannera daaka! Arɨkewɨnyɨ. Aawa. Sahwara tuta tewaanyavɨ kyagalya'mave' yɨ dazahɨrɨvɨ Gotɨyai ajɨmya yuyangɨya pwaraavɨ padaihasamaa'manɨkelyɨ. “Yɨzɨrelɨyara tewaanya davwi wangabɨka! A'mwe ajɨmya yuyangɨyaraavɨna wabarɨnna yapɨjɨ Kɨraazɨtɨyarɨ lɨmwabɨka!” yawɨraka sara ya'. 12Sahwara tusa' yagalya'maveta sahɨrɨvɨ Gotɨyai Kwaakevakɨya pwaraavɨ yuna kuna naanga naanga wɨgaimwadelyɨ. Yɨ Yɨzɨrelɨyara Kɨraazɨtɨyarɨ malɨmwagyeta sahɨrɨvɨ Gotɨyai ajɨmya yuyangɨyaraavɨ yuna kuna naanga naanga wɨgaimwadelyɨ. Sare' naangesɨ. Yɨ sara yajai Yɨzɨrelɨya yuyabanyara Gotɨyaryawɨnna ayɨna kabapi Kɨraazɨtɨyare yuyara tewaanna nawɨ'nyaanga mwaaibɨnere. Yɨ sare' naanga wavɨlavadesɨ.

13A'mwe ajɨmya yuyangɨyarajɨyaihi, dahaa' sarɨmɨnyɨ yɨhɨthɨvanɨge. Sarɨmɨ ajɨmya yuyangɨya pwaihɨrɨne wawɨnya ya'neinyɨ Apozelɨyainyɨ Gotɨyai nyɨmaryasaabakeinyɨ. Sarevɨ yadɨnya davɨne yaya' munyaba makidɨ yɨvanɨge. 14Wawɨnya dazavɨ nɨmɨre avaaikwaa'nakera Yɨzɨrelɨyaraavɨ dɨhaa'bwarɨde'na sarɨmɨnyɨ wabarɨnna yamaarya'nevɨna tewaanya nyɨvu'nɨvanɨ'. Sarevɨ Gotɨyalyɨ tewaanya ye'mwannamwaaihata savɨ Yɨzɨrelɨyaraavɨdaa'nya pwara Naangerɨ lɨmwabɨzara sahwaraavɨ padaihasamaarade'na wawɨnya daza' munyaba makidɨnyainyɨ. 15Sare' dare'nesɨ. Gotɨyai Yɨzɨrelɨyaraavɨ marasɨ'naka, yɨ dazavɨ sahwai a'mwe Kwaaka yuyawɨ pɨvakaavɨyaraavɨdaa'nyara gamɨjɨ avaaizɨmunya'na ye'mwannayɨma'ne'. Yɨ nabaai Gotɨyai Yɨzɨrelɨyaraavɨ ayahi maaraja' yɨ daza' kwalaalyara baryara ayɨna dɨkaasa'bɨsa' daaka!

16Bɨretɨya naanga yavɨkaryeva gɨrɨkula maalɨkejɨ' Gotɨyarɨ wɨjaave'. Yɨ gɨrɨkula maalɨka sajɨ' Gotɨyarejɨ' warajazɨ' yɨ gɨrɨkula naanga kɨrɨsɨ Gotɨyaresɨ. Nabaai yɨsare pwipula sa Gotɨyare waraja yɨ yɨtaanya kɨnɨjɨ sa avaala Gotɨyarengɨ. (Yɨ sare' daresɨ. Juyaraavɨre Ne sɨnnawɨnyara Gotɨyarera mwalyaasavɨ, yɨ sahwaraavɨna dɨvi kwɨyakwalaangera Gotɨyarera mwaaibɨnerera.) 17Gotɨyai wawɨnyavɨya yɨta wolivɨyare yɨtaanya pɨnɨ Yɨzɨrelɨyarabɨsangɨ lɨvɨ'mwagaka yɨ marasɨ'naka gɨmɨnyɨ pɨvaakɨyaigɨnyɨ yɨ'daryawɨnya wolivɨya yɨtaanya'gɨnyɨ gɨmaaraka yɨtaanya pɨnɨngɨ tɨnnyawɨ gɨmɨnyɨ kagye'mwagaka' dahaa' gɨmɨ tewaanya mwaaihɨ. Sarevɨ wolivɨya mɨnarya' wolivɨyare yɨpwipulyavɨre' maa'manɨgɨ. 18Sarevɨ yɨtaanya nebulya'nanyangɨna gɨmɨre yaya' munyaba mamakɨlyadɨ bɨraiyagaala madangadɨnna! Yɨ gɨmɨ bɨrala dangadɨza' nayaa pada'galayawɨ'na ja! Gɨmɨ yɨpwipulyavɨ mɨnarya' wɨjaavadɨnya' mɨ'. Aawa. Pwipula sahɨrɨ' gɨmɨnyɨ gɨzaavadeigɨnyɨ. 19Sarevɨdaa'nyɨ gɨmɨ dara dɨthathe' “Yɨtaanya daza Gotɨyai lɨvɨ'mwagakengɨ. Nabaai sahwai ‘Kumɨreba pɨvaakɨyarɨ ye'mwagakɨma!’ daka nɨmɨnyɨna lɨvɨ'mwaga'.” 20Yo, nawɨ'nyasɨ. Sare kɨrɨvɨ Yɨzɨrelɨya sahwara Naangerɨ lɨmwadɨvɨtara mɨ'. Yɨ da sahɨrɨsavɨ mena lɨvɨ'mwagasɨ'nadengɨ. Yɨ gɨmɨ Naangerɨ lɨmwadɨnya'na sare'na nayaa daa'manɨgɨnyaigɨnyɨ. Sare kɨrɨvɨ mala nayaa jɨwannana! Gɨmɨ pihadɨka minna! Aawa. Gɨmɨ lɨka nayaa jɨ! 21Sare' dare'nesɨ. Gotɨyai yɨtaanya nebulya'nanya kunnya kaavɨlyavɨ mɨwɨ'nɨkengɨ yɨvainyɨna yakai mɨ'. Yɨ sasare sahɨbaaibɨ' gɨmɨ kwaigɨnyɨjɨ yɨvainadei mɨ'. 22Yɨthaa! Sarevɨdaa'nyɨ Gotɨyai tewaanna bwiwanga gyazavɨjɨ gamɨre sɨnna tɨka saburɨjɨ nayaa dɨvada'galangana! Pwaraavɨne' daresɨ. Gamɨrebwi mena yagalya'mavesaraavɨ sahwai sɨnna tɨka wɨda'delyɨ. Gɨmɨnyɨne' daresɨ. Gɨmɨ gamɨre tewaanna bwiwanna gyazavɨ kuna mwaaidɨzaigɨ, Gotɨyai tewaanna gɨvwiwamanɨ'. Gamɨre tewaanna bwiwanga gyazavɨ mamwaalyɨ yɨja' gɨmɨ kwaigɨnyɨjɨ gɨthawaasadelyɨ. 23Nabaai yɨtaanya sɨnnawɨnya pɨnɨ daza, yɨ kumɨ malɨmwagyaburɨ kuna mamwaalyɨ yɨpɨja' yɨ Gotɨyai wawɨnyavɨya yɨsavɨ ayɨna marye'mwagathengɨ. Sare' dare'nesɨ. Gotɨyai dɨragɨnnakei sahwaraavɨ yɨnɨga wi'na ayɨna marye'mwagannelyɨ. 24Sare' dare'nesɨ. Gɨmɨ kwaigɨ yɨ'daryawɨnyare wolivɨya yɨtaanyaigɨ mwaalagɨnyaigɨnyɨ. Yɨ Gotɨyai gɨthawaasaka wawɨnyavɨya wolivɨya nawɨ'nyɨkɨ gɨmarye'mwaga'. Yɨta sɨ' yune gɨmɨri'na mɨ'. Sare' nebulya'nanya' warɨke' yɨ nabaai pɨbwi naanga nebulya'nanya' waradesɨ. Wolivɨya nawɨ'nyɨkɨre yɨtaanya daza ayɨna maarɨna yajai kunnya yɨta sɨkɨ ayɨna marye'mwagakannelyɨ.

Yɨzɨrelɨya yuyaraavɨ padaihasamaarade'nesɨ.

25Nya'mweihi ajɨmya pɨnɨngɨyaihi, sare' dare'nesɨ. “Gotɨyai nebulya' yoimavajalɨkurakya davɨ sarɨmɨ sɨmumaayaihi kuna mamwaaibɨnera!” yawɨrena yɨhɨthɨvanɨge. Sarɨmɨnyɨna yawɨ'nadɨvɨ' dara nadɨpɨka! “Nemɨ sɨmunya kɨnɨnnakeinera. Juyara sɨmumaayarera.” Gotɨyai nebulya' yoimavajalɨkurakya daza' yɨ daresɨ. Yɨzɨrelɨyaraavɨ yunegaa' sɨmunya' tihɨralɨmwagata yadera mɨ'. Yunegaa' “Naangerɨ malɨmwagaanna!” dɨpɨ'dera mɨ'. Yɨ a'mwe ajɨmya yuyangɨyara Naangeryawɨnna mena wɨlaabapɨjɨ wɨlaabɨpɨjara yuyaraavɨ Gotɨyai yawɨrakera kalɨmwagapɨjɨ 26yɨ sare saburɨ dazagaa' Gotɨyai Yɨzɨrelɨya yuyaraavɨ padaihasamaaradere. Gotɨyare bukuya' dɨnɨkabaaibɨ'

“Saayonɨ Yɨzɨrelɨyaraavɨdaa'nyai

Padaihasamaa'dei walaabathelyɨ.

Sahwai Jaikopɨmɨreraavɨ galazekɨvalyabwi marasɨ'nadelyɨ.

27Sara kyojɨ nayaa Gotɨyainyɨ yɨdeinyɨ.

Sahwaraavɨ yagaala wɨlɨmwagarɨkebwi ye'mwannawɨdɨdeinyɨ.

Kumɨre kayaa'nanya marasɨ'na'mujɨ yɨdeinyɨ.”

Sara dɨnɨkabaaibɨsasɨ. 28Yagaala tewaanya' bule wɨjaavanɨgasavɨna sahwaraavɨna Gotɨyai yawɨ'na “Nɨmɨre yɨkamaangera mwaaiha'.” Sare' sarɨmɨnyɨ mena yɨhɨgaimwagake'nanyɨ. Kɨrɨ' Gotɨyai dahɨlakakevɨna sɨnnawɨnya kwɨyakwalaangeraavɨna yawɨrake'na Gotɨyarɨ sahwaraavɨna kale wivanɨkerera. 29Sare' dare'nesɨ. Gotɨyai gamɨre wɨgaimwanga yanga wɨjaayangɨnajɨ gamɨre jaka wɨjɨvwaramaasavɨnajɨ sɨmunya mudɨkebwi yawɨramaaradei mɨ'. 30Sare' dare'nesɨ. Sɨnnawɨ sarɨmɨ Gotɨyarɨ galazekɨvaleva nabaai dahaa' Yɨzɨrelɨyara galazekɨvaimanɨgasavɨ sarɨmɨ kale'na gaimwanga tewaanya' ma'mwaatabaaibɨ' 31sarɨmɨ kale'na gaimwanga tewaanya' maa'manɨgasavɨ nabaai dahaa' kumɨ kale'na gaimwanga tewaanya' maarya'nera sahwarajɨ mena galazekɨvalesare. 32Sare' dare'nesɨ. Galazekɨvala saburɨ kalavuza' Gotɨyai a'mwe yuyaraavɨ Juyarajɨ ajɨmya yuyangɨyarajɨ saraavɨ yɨrakere. Gamɨre kale'na gaimwanga tewaanya' wɨjaaya'ne yuya kwaraavɨ sara yakere.

Gotɨyarɨne yaya' munyaba makɨlaade'nesɨ.

33Ai! Gotɨyai yuyaraavɨ yange'na wiadele! Gotɨyai sɨmunya naangaanga kɨnɨnnakele! Yuyangɨne yunebanna yawɨrakadele! Yɨ saalaalyavɨ kewewɨnɨ yɨnɨgwalaawɨkebɨsalyɨ. Gamɨ yawɨbwasaburɨ kaavɨlya' a'mweina mabɨramaari yaanneine. Gamɨre ya saburaavɨ kaavɨlya' myawɨranganyɨ yaanneine. Wana yuna aawa nebulyasɨ. 34Sare' dare'nesɨ. Gotɨyare bukuya' dara dɨnɨ'

“Naangere sɨmunyavɨ aaihwai yawɨramaa'nɨkelaka!

Sahwarɨ sɨmunya' aaihwai wɨjaavadelaka!”

35“A'mwerɨ gɨlyɨvɨsa ayahi wɨrɨvɨkɨrya'nenna

Gotɨyarɨ gɨlyɨvɨta yuyangɨne gyakwarɨna

Gotɨyarɨ gɨlyɨvɨsa aaihwaidaasɨ wɨjaavakalaka!”

36Aawa. Sai yuyangɨne'na aaya kaavɨlyalyɨ. Yɨ sahwai yuyangɨ wakyaakengɨ. Gamɨre dɨragɨnyavɨ yuya yɨnɨkengɨ. Gamɨnyɨ yɨlaaya ya'ne yuya yɨma'nakengɨ. Nemɨ yuyagaa' yuyagaa' gamɨnne yaya' munyaba naanga nayaa makɨlaana! “Byaannakeigɨ!” wɨdaana! Naanga sahɨrɨsɨra.

Currently Selected:

Romɨ 11: byr

Highlight

Compare

Copy