Romɨ 10

1Nya'mweihi, nɨmɨre sɨmunya' tewaanya nyɨvu'nɨvanɨke', Gotɨyarɨ wɨdadɨnya' yɨ daresɨ. Gotɨyaigɨ Yɨzɨrelɨyara lɨmwabɨza' dɨvadaihasamaaka! 2Malɨmwagivanɨgata sare' dare'nesɨ. Kumɨnyɨna dara jalɨkurakɨvanɨge. “Gotɨyarɨ yɨlaaya yaana! Sare'na Gotɨyare saburɨ yaamɨjɨ dɨragɨnna mɨdɨnaana!” dadɨvɨsarera. Kɨrɨ' sare kɨrɨvɨ kumɨ sɨmunya yawɨta maayara yɨvanɨga'. 3Sare' dare'nesɨ. Gotɨyai yɨvanɨka sabwi “Yɨda'maraangerera,” neja'nevɨ navɨ'navɨka yadɨvɨ' kunnya yɨda'maraanga saburana kwaasɨya'bɨ' yɨvanɨga'. Yadɨvɨ' Gotɨyai “A'mwe yɨda'maraangeihɨlyɨra,” wɨdannevɨ dalaangewɨ wɨla'nadɨvɨtara mɨ'. 4Sare' dare'nesɨ. Kɨwɨnya' yɨda'maraangeburɨne' Kɨraazɨtɨyarɨna mena yɨwɨnɨkesɨ. Yɨ a'mwe yuyara Kɨraazɨtɨyarɨ lɨmwabɨza'na sahwaraavɨ Gotɨyai “Yɨda'maraangeihɨlyɨ,” wɨdathelyɨ.

5Sare' dare'nesɨ. Ne Mozɨzai Kɨwɨnya' mɨdɨnya'ne' “Yɨda'maraangerera,” ja'nevɨna dara yɨdavakesɨ. A'mwei yuya dathavura yajai nabaai gaalyabwi maaradelyɨra. 6Sare' kɨrɨ' a'mwera yuya myadɨvɨsa'na a'mwei Naangerɨ lɨmwada dazarɨna Gotɨyai “Yɨda'maraangelyɨra,” dathelyɨ. Sasare sabwina dara dɨnɨ' “Gɨnnya sɨmunyavɨna dara madɨnna! ‘Sɨgunyavɨna aai yɨlaawadevaka?’ Yagaala sa' daresɨ. Kɨnaraazɨtɨyarɨ makwalaabya'nesɨ. 7Nabaai pɨrɨ' dara madɨnna! ‘Kewewɨnɨ bainɨkeraavɨrebanna aai walaawadevaka?’ Yagaala sa' daresɨ. Kɨraazɨtnnaɨyarɨ bainɨkeraayawɨ ayɨna makɨlaabya'nesɨ. 8Sare' madɨnna! Aawa. Dare' midaaka! Yagaalya' gɨmɨnyaba gidɨkuta nebulya' warɨ'. Gɨmɨre maangikɨ wɨlaraka gɨmɨre sɨmunyavɨ wɨlarɨkesɨ.” Yɨ yagaala daza' nemɨ wɨdadaanya' Naangerɨ lɨmwangebwine yagaalyasɨ. 9Gɨmɨre maangisɨ ku'maayaba “Jizaazai sai Naangelyɨ,” jalɨkurakya yɨja'najɨ nabaai gɨmɨre sɨmunyavɨ dara lɨmwadɨza'najɨ “Gotɨyai sahwarɨ bainɨkeraayawɨ ayɨna yɨdɨkaavakelyɨ,” Gotɨyai gɨvadaihasamaaradeigɨnyɨ. 10Sare' dare'nesɨ. Gazaizai gannya sɨmunyasɨ kalɨmwagozɨ Gotɨyai “Yɨda'maraangeigɨ nɨmɨreigɨnyɨ gɨmwaaihɨwa,” wɨdathelyɨ. Yɨ gannya maangisɨ kajalɨkurakojɨ Gotɨyai wɨvadaihasamaaradelyɨ. 11Sare' dare'nesɨ. Gotɨyare bukuya' dɨnɨ' “Gazaizai sahwarɨ lɨmwagozɨya dahwai yɨ savɨna sɨmunyavɨ jɨkurɨtɨnna yannei mɨ'.” 12Sare' dare'nesɨ. Sarevɨ padaihasamaata'nebwi Juya kwaraavɨne pɨbwi mwari'. Sarevɨ Anga Pimagɨnya (Gɨrikɨya) kwaraavɨne pɨbwi mwari'. Sare' dare'nesɨ. Yuyaraavɨre Naangei gave pwainanyai mwaalɨkei gamɨnyɨ jaka wɨdɨpɨja yuyaraavɨ tewaanaanga wiadelyɨ. 13Sare' dare'nesɨ. Gotɨyare bukuya' dara dɨnɨkesɨ. Gazaizai Naangerɨ jaka wɨdazai yɨ sahwarɨ wɨvadaihasamaaradelyɨ.

14Sarevɨdaa'nyɨ sahwarɨ malɨmwagyesarɨ jake' ga'dara wɨdɨpɨneraavaka? Nabaai gamɨnyɨna kadɨka mu'nyesarɨ ga'dara lɨmwabɨneraavaka? Nabaai pwai yagaala sa' wɨdaawadei maayara ga'dara wɨ'namaapɨneraavaka? 15Nabaai Gotɨyai a'mwe yagaala wɨja'neraavɨ mamaryasaabya yaja' ga'dara wɨdaawɨpɨneraavaka? Wɨdaawadɨvɨsaraavɨna dara dɨnɨkabaaibɨsasɨ. A'mwera yagaala tewaanya' makabɨvanɨgasaraavɨre sɨvɨla tewaanya nawɨ'nyaraave! 16Sare' kɨrɨ' Juyara yagaala tewaanya sa' kadɨka wɨ'neta kwalaalyara mɨdɨneta' mɨ'. Sare' dare'nesɨ. Aazaayai dara dakesɨ. Naangeigɨ, newɨ'nɨvanɨgata davɨ aai lɨmwamanɨka! 17Sarevɨ “Yagaala tewaanya' wɨ'nadɨvɨsavɨdaa'nyɨ Kɨraazɨtɨyarɨ lɨmwadɨvɨkɨ. Nabaai Kɨraazɨtɨyare yagaalya' wɨdadɨvɨsavɨ kadɨka wɨ'nadɨvɨkɨ.”

18Sare' kɨrɨ' dara dɨwa. Sahwara yagaala tewaanya da' kadɨka mu'nyɨjɨhyeva! Kɨrɨ' dare' warɨkesɨ. Mena wɨ'nesare. Nabaai Gotɨyare bukuya' dara dɨnɨkabaaibɨsasɨ.

Kwaaka yuyawɨnna kumɨre yagaaikunya' mena wɨdaawakesɨ.

Anga yuyawɨ yunebanna kumɨre yagaalya' wɨdaawakesɨ.

19Pɨgasaai dara dɨwa. Yɨzɨrelɨyara yagaala tewaanya da' myawɨranganyetara daaka! Aayagaa' wɨrɨvɨkɨrya'nei Mozɨzare yagaala Gotɨyarɨna dara dɨnɨ'

“Anga naanga pimagɨnyara mamwaalyɨgasaraavɨ ya'mujɨ

Sarɨmɨ sahwaraavɨna tɨmakɨrɨkɨrya jideihɨlyɨ.

Sɨmagɨnyara sɨmunya maayavaakɨyaraavɨ ya'mujɨ

Sahwaraavɨna sɨnna tɨkesɨyaihɨrɨ yɨhɨmwaaihɨdeinyɨ.”

20Nabaai Gotɨyarɨ wɨ'nawɨjɨwaakadei Aazaayai yagaala jalɨkurakya'na lɨka yakai mɨ'. Sai Gotɨyarɨneba dara dakelyɨ

“A'mwera nɨmɨnyɨna bɨrɨbɨrya manyadɨvɨtara

Sahwara nɨmɨnyɨ mena nyɨbɨrama'mwaasare.

A'mwera nɨmɨnyɨ yɨdaanganya manyadɨvɨtara

Sahwaraavɨ nɨmɨ ku'maayaba yɨma'naabɨweinyɨ.”

21Kɨrɨ' Yɨzɨrelɨya sahwaraavɨna Gotɨyarɨneba dara dakelyɨ “Yuna saamɨnya naangegaa' nɨmɨ a'mwe sahwaraavɨ jaka wɨdadaazɨ nɨmɨre yagaalya' galazekɨvaidɨvɨ' yɨ yagaala kayaa'nanya ja'nanyɨdadɨvɨsara nɨmɨnyawɨnna mabyɨwaasare.”

Currently Selected:

Romɨ 10: byr

Highlight

Compare

Copy