Wɨjalangasakyaꞌ 5

Jonɨ bukuya pɨrɨ' mena pɨgɨ'mwagakesavɨ tɨnna wanganake'nesɨ.

1Yɨ kingɨnamwaalyɨsavɨ mwaaidɨ'nyɨyare aangasɨrɨ nɨmɨ bukuya pwi tɨnna wangamwa. Si pɨkarya kɨnɨnnake' kusawɨjɨ mwasɨmagɨjɨ. Yɨ murɨtavayɨ'bwa'nɨka ata purɨdaa'nyɨ pwaraalya kɨnɨnnaki. Yɨ yaasɨwa'nanyai marɨlaaya'na sara murɨtavayɨ'bwa'nɨkilyɨ. 2Nɨmɨ ejelɨya dɨragɨnnaka pwarɨ tɨnna wangamwa. Sai gannya maangwɨraayavɨ jaka naangave'na dara dɨwa' “A'mwe tewaanyai bukuya dɨrɨ yɨnɨga wi'na tɨlaaya'nebwi kɨnɨnnakei aaihwalaka? Tewaanyai dɨragɨnnakei bukuya dɨrɨ pwɨyɨnɨka dɨrɨ yesɨvalasɨsa' ya'na aaihwalaka?” 3Kɨrɨ' sasarei aane pwai kwai mɨ'. Sɨgunyavɨ mwaalɨkei aane pwai kwai mɨ'. Kwaakevakɨ mwaalɨkei aane pwai kwai mɨ'. Kwaakevɨ amwihi wɨlarɨkei aane pwai kwai mɨ'. Yɨnɨga wi'na tɨlaayojɨ bukuya sɨrɨ kusawɨ ja'na tɨnna wanganannei aane pwai kwai mɨ'. Arɨkewɨ. 4Sarajɨya a'mwe pwarɨ mabɨramaari. Bukuya si tɨlaayojɨ kusawɨ tɨnna wanganannei tewaanyarɨ mabɨramariwaasa'na yɨ nɨmɨ kɨnna kwalaalya dɨwa. 5Kɨnna dadaazɨ a'mwe naangerajɨya pwai nyɨdɨwa' “Gɨmɨ kɨnna kuna madɨnnera! Yɨthaa! Laayonɨyai Juthare yɨta savaakɨyai Ne Devitɨmɨre yɨta savaakɨdaasai, yɨsare pwipulyavɨ kwaraka yɨdevaaibɨ' sara yɨma'nakei sai malya' wavɨlavakelyɨ. Sarevɨ yɨ sai bukuya si tɨlaaya'nei murɨtavayɨ'bwata ata purɨdaa'nyɨ saraala marapyasɨbwarakya'na yɨnɨga wi'na yannelyɨ.” 6Sara kanyɨdɨwa' nɨmɨ Sipɨzipɨya Dɨwɨnyarɨ tɨnna wangamwa. Sahwai kingɨnamwaalyɨsavɨ gaala kɨnɨnnaka daraai daraala dazaraayabajɨ a'mwe naanga dazaraayabajɨ tɨnnyaba daavɨna. Saba sai mena tamakesai ayɨna dɨkaa'nɨkabaai daa'dɨ'nyɨ wangamwa. Gamɨre mɨnyagɨnyavɨ a'ba saanya dɨragɨnnaka ata purɨdaa'nyɨ pwaraalya kɨnɨnnakei. Nabaai tɨnna ata purɨdaa'nyɨ pwaraalyara kɨnɨnnakei. Yɨ tɨnna dazara yɨ Gotɨyare Kurya ata purɨdaa'nyɨ pwaraalyarera. Gotɨyai kwaaka yuyawɨ yunewɨnna maryaasakere. Sipɨzipɨya sasarerɨ tɨnna wangamwa.

7Sipɨzipɨya Dɨwɨnya dazai wawaka kingɨnamwaalyɨsavɨ mwaalɨkere aangasɨrɨ bukuya daza' ma'mwaawɨ'. 8Bukuya mi'na kama'mwaawɨ' sagaa' gaala kɨnɨnnaka daraai daraala dazarajɨ a'mwe naanga tɨwedipoya dazarajɨ Sipɨzipɨya Dɨwɨnyaryaba gidɨkusaba kwaakewɨ wala'na. Sahwarajɨya gazaizai pɨradazabɨsasɨ dɨzɨya golɨya pɨrɨsɨ kɨnɨnnakelyɨ. Yɨ dɨzɨya dazangɨ jɨtɨrɨnya yɨravayɨhwia'ne' yunebanna wɨlarɨkengɨ. Wabatɨrɨnya daza' Gotɨyare a'mwe tewaanyara Gotɨyarɨ wɨdadɨvɨsangɨra. 9Yɨ sahwara daata mudɨka pɨrɨ' dara dɨwaa':

“Bukuya daza' gɨmɨ maarya'neigɨ

Savɨre murɨtavayɨ'bwasa marapyasɨbwarakya'neigɨ

Yɨ yɨnɨga wi'na nebulya'nanyaigɨnyɨ.

Sare' dare'nanyɨ. A'mwera gɨramesaigɨnyɨ.

Sasareigɨre tawevɨ a'mweraavɨ mubahɨ.

Sahwara Gotɨyarɨna wɨjaaya'neraavɨ gɨmɨ.

Yɨta gazavaasavaakɨyaraavɨjɨ yagaala ge gejɨyaraavɨjɨ

A'mwe kɨlaaka dala nabinabinyajɨyaraavɨjɨ

Ajɨmya yuyangɨya gazasavɨyaraavɨjɨ mubamaaragɨ.

10Nemɨre Gotɨyarɨna maremwaaidɨsaraavɨ wɨmwaaihadɨ

Wɨdaaya'nera Gotɨyarɨna yɨra'dɨvɨsaraavɨ wɨmwaaihagɨ.

Sahwara Kwaaka yuyavakɨyaraavɨ maremwaaibɨ'derera.”

11Nabaai nɨmɨ wangadɨ ejelɨya kwalaalyaraavɨre maangwɨraaya' kadɨka wɨ'nɨwa. Sahwara kingɨnamwaalyɨsavɨjɨ gaala kɨnɨnnakeraayabajɨ a'mwe naangeraayabajɨ gɨhɨpaledaa'na. Sahwara kwalaalya kwalaalyara mwaaiha'. Yɨ milɨyonɨ milɨyonɨyarajɨ taawɨzanɨ taawɨzanɨyarajɨ kwalaalya naanga naangera mwaaihasare. 12Sahwara jaka dɨragɨnna dara dɨwaa':

“Sipɨzipɨya Dɨwɨnya dazarɨ tamakesalyɨ.

Sai nawɨ'nya maarya'nei yɨnɨga wi'nanyalyɨ.

Yɨ dazangɨ yɨlaaya maarannei yɨda'nanyalyɨ.

Dɨragɨnna maremwaalya'nebulyɨ gɨlyɨvɨkɨravɨnakebulyɨ

Sɨdu'nakebulyɨ dɨragɨnya naangebulyɨ gamɨrengɨ.

Gamɨnne yaya' munyaba makɨlya'najɨ

Byaanna dɨragɨnya' yɨlaaya' wɨjaaya'najɨ

‘Su! Su!’ wɨja'najɨ tewaanya'nelyɨ.

Yɨ sahwai gavei yɨnɨga nebulya'nanyalyɨ.”

13Yɨ nɨmɨ Gotɨyai yuya wakyaaka kwaraavɨ kadɨka wɨ'nɨwe'. Yɨ Sɨgunyavɨ mwaaihasaraavɨjɨ yɨ Kwaakevakɨ mwaaihasaraavɨjɨ yɨ kwaakevɨ amwihi wɨlakasaraavɨjɨ yɨ saalaalyavɨ wɨlamwaaihasaraavɨjɨ, yo, yuya sabanyaavɨ wɨlamwaaihata kwaraavɨ wɨ'nɨwe'. Sahwara dara dɨwaa':

“Kingɨnamwaalyɨta savɨ mwaalɨkelyɨ

Sipɨzipɨya Dɨwɨnya kwalyɨ

Saraai nawɨ'nya yuyabwi maarika!

Yɨ su suyajɨ yaya makɨlyabulyɨ

Byaanna dɨragɨnyabulyɨ dɨragɨnnakebulyɨ

Saraarɨ nawɨ'nya dazabwi kuna warana!

Yuyagaa' yuyagaa' kuna warɨbainana!”

14Sara kadɨwaa' gaala kɨnɨnnaka daraai daraala dazara yɨ dara dɨwaa' “Yɨ sahɨrɨsɨ. Nebula naangesɨ.” Yɨ a'mwe naangera kwaakewɨ walaruta'neva yɨ lotuya yɨvanɨga'. Yɨlaaya wivanɨga'.

Currently Selected:

Wɨjalangasakyaꞌ 5: byr

Highlight

Copy

Compare