Wɨjalangasakyaꞌ 4
4
Gotɨya Sɨgunyavɨyarɨna yɨlaaya ya'nerɨnesɨ.
1Sa' mena kya' sagaa', yɨthaanyi, Sɨgunyavɨ kaadihɨta pɨrɨ' basɨnadaata yadɨsɨ nɨmɨ tɨnna wangamwe'. Yɨ maangwɨraaya daza' sɨnnawɨ nɨmɨ kadɨka wɨ'ne sa' pihulɨya'bɨ' jaka dɨwa'. Dahaa' sa' dara nyɨdɨvanɨ' “Munya davanna jɨlaama! Gɨmɨnyɨ yuya dɨvidaa'nyɨ yɨma'nadenna givwarɨdaakudeinyɨ.” 2Yɨ yɨme'nya'bɨ' nɨmɨnyɨ Kurya Tewaanyai dɨragɨnna bulamwaaina nyɨwa'. Yɨthaanyi, Sɨgunyavɨ saba kingɨnamwaalyɨta pɨrɨ' daa'dɨ'nyɨya' tɨnna wanganna. Nabaai pwai yuyaraavɨ maremwaalya'nei namwaalyɨta dazavɨ yɨlamwaaidɨ'nyɨ wanganna. 3Sahwai sɨla nawɨ'nyai baake' yɨdada sɨla nawɨ'nya wayaakei baaka yɨdadaa'nyɨyabaaibɨsalyɨ. Kingɨnamwaalyɨsavɨ byaawɨla pɨrɨ' yagɨ'ma'nɨkerɨ sɨla nawɨ'nya yɨjuzai baaka yɨdadei tɨnna wanganna yɨwelyɨ. 4Kingɨnamwaalyɨta dazayaba kingɨnamwaalyɨta pɨnɨ yagɨ'ma'nata yadɨ'nyɨ wanganna. Namwaalyɨta tɨwedipoya sangɨ a'mwe naanga tɨwedipoyara mwaalɨna. Sahwara baazɨ'ma'nya yaake baazɨ'ma'nevera. Yɨ kingɨmwaaihɨ'nya golɨya kumɨre mɨnyagɨnyangɨ kɨnɨnnakera. 5Yɨ kingɨnamwaalyɨsavɨdaa'nyɨ yɨnamɨraasavɨre dɨ'baake mwasabɨ' lɨvapɨna yaka purinya yɨnnyɨna, yɨ pa'da yɨnnyɨna, yɨ yɨ'munya pilɨna. Nabaai kingɨnamwaalyɨta dazavɨ sɨnnyɨkɨ dɨ'baaka ata purɨdaa'nyɨ pwaraalya dɨka yɨda'nyɨna. Dɨ'baaka daza sa Gotɨyare Kurya ata purɨdaa'nyɨ pwaraalyarera. 6Yɨ kingɨnamwaalyɨsavɨre kusɨmagɨ naanga saalaalya'bɨsa' warɨ'. Daza' yɨ sɨnɨmwavanakurɨka naangebɨsa', yɨ wana gɨrɨ'maaya nebulya'nanya' sɨgujaaka sɨrɨmya'bɨsasɨ.
Yɨ tɨnnyaba namwaalyɨsavɨ daraai daraala gaala kɨnɨnnakera daavɨna. Yɨ sahwara kingɨnamwaalyɨta dazavɨ dakwagɨ'maveva yɨ daavɨna. Daraai daraala dazara gaala mwaaleva kumɨre tɨnna kwalaalya kɨnɨnnakeraavɨ kusɨmagɨnyavɨjɨ dusɨmagɨnyavɨjɨ yunewɨnna bwakuke. 7Gaala kɨnɨnnaka aaya mudɨ'nanyai yɨ sai laayonɨyaibɨsai. Yɨ sahwarɨ ayawɨdaasɨ gaala kɨnɨnnakei yɨ sai bulɨmakaawoya kwalyaibɨsai. Yɨ sahwarɨ ayawɨdaasɨ gaala kɨnɨnnakei sai a'mwere sɨnnya'bɨsa' kɨnɨnnakei. Yɨ sahwarɨ ayawɨdaasɨ gaala kɨnɨnnakei yɨ sai bwaangya pwai pɨlavamaryadaa'nyɨyaibɨsai. 8Daraai daraala gaala kɨnɨnnaka dazarajɨya gazaizai pɨya ata purɨdaa'nyɨ pwainanya kɨnɨnnakelyɨ. Yɨ tɨnna kwalaalya yunewɨnna mwasɨmagɨjɨ kuta kimagɨjɨ bwamwaihukera. Yɨ yɨrɨkevɨjɨ sawɨsavɨjɨ sahwara daata dara dadɨvɨsare:
“Naangei, Gotɨya Dɨragɨnya Yuya Kɨnɨnnakei
Gɨrɨ'maayalyɨ. Gɨrɨ'maayalyɨ. Gɨrɨ'maayalyɨ.
Tewaanyalyɨ. Tewaanyalyɨ. Tewaanyalyɨ.
Gamɨnyɨ jaanna marinawaadelyɨ.
‘Gɨmɨ gaveigɨnyɨ. Nemɨbɨtaigɨ mɨ'.’
Sɨnnawɨ kɨgaa' sai mwalyaakelyɨ.
Yɨ dahaa' sai mwaalɨ'.
Yɨ nabaai sai yɨma'naabathelyɨ.”
Sahwara yagaala daza' ja'na kwadɨka mudɨvɨtara mɨ'. 9Gaala kɨnɨnnaka dazara yɨlaaya yadɨvɨsare. Gotɨyare kingɨnamwaalyɨsavɨ mwaaida yɨ yuyagaa' yuyagaa' gaala mwaaiderɨ yɨlaaya yadɨvɨsare. Yɨ sahwara sahwarɨ byaanna dɨragɨnya' wiadɨvɨ' sahwarɨne yaya' munyaba makidɨvɨ' yɨ “Su! Su!” wɨdɨpɨ'dere. Yɨ yuyagaa' gaala kɨnɨnnaka dazara sara kyapɨjɨ 10yɨ a'mwe naanga (24) tɨwedipoyara dazara Gotɨyaryaba kingɨnamwaalyɨsavɨ mwaalɨkere sɨnnyɨkɨ kwaakewɨ walamwaaibɨ'dere. Yɨ sahwai yuyagaa' yuyagaa' gaala mwaaiderɨna sahwara lotuya yadɨvɨsare. Sahwara yawɨ'na “Nemɨre maremwaalya'nebwi gamɨresɨra,” kumɨre kingɨmwaaihɨ'nya golɨya lɨvaradɨvɨ' kingɨnamwaalyɨsavɨre gidɨkusaba wala'dengɨ. Sara yapɨjɨ yɨ daata dara dɨpɨ'dere:
11“Nemɨre Naangeigɨ, nemɨre Gotɨyaigɨ!
A'mwe yuyara gɨmɨnyɨna yɨlaaya gya'neigɨ
Gɨmɨ saigɨ yɨnɨga wi'na nebulya'nanyaigɨnyɨ.
Yɨ byaanna dɨragɨnyabwi gɨzaaya'na nawɨ'nyasɨ.
Yɨ gɨmɨnne yaya' munyaba makɨlya'najɨ
Yɨ gɨmɨ dɨragɨnyabwi lɨmwaga'dɨnne'najɨ nawɨ'nyasɨ.
Sa' darevɨnyɨ. Gɨmɨ yuya wakyeigɨnyɨ.
Yune gɨmɨre sɨmunyaburɨna kwakye yɨma'nyaakeigɨ.
Gɨmɨre sɨmunyavɨdaa'nyɨ yuya daza warɨkengɨ. Mwaaihasangɨ.”
Currently Selected:
Wɨjalangasakyaꞌ 4: byr
Highlight
Copy
Compare
Share
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
