Wɨjalangasakyaꞌ 6

Sipɨzipɨya Dɨwɨnyai bukuyavɨre murɨtavayɨ'bwarake marapyasɨbwarakake'nesɨ.

1Sipɨzipɨya Dɨwɨnyai bukuyavɨre murɨtavayɨ'bwaraka ata purɨdaa'nyɨ pwaraalyangɨ aaya mudɨ'nanya' marapyasɨbwarakɨna yadaa'nyɨ yɨ nɨmɨ tɨnna wangamwa. Sipɨzipɨya Dɨwɨnyai marapyasɨbwarakɨna kyɨwa' gaala kɨnɨnnaka daraai daraalyaraavɨdaa'nyɨ pwai yɨ sɨgunyavɨ yɨ'munya pidevaaibɨ' gamɨre maangwɨraaya' jaka naanga dɨna “Kaaja!” 2Yɨ nɨmɨ tɨnna ayahi wanganna. Yɨthaanyi, ozɨya yaaka pwarɨ tɨnna wangamwa. Yɨ a'mwei yɨlamwaaidɨ'nyɨ mwaryagɨnyɨsɨ lɨmwamwakei. Sahwarɨna kingɨmwaaihɨ'nya pɨrɨ' wɨjawaasa' malyavɨ wavɨlaya'ne'. Yɨ sai mala kwalaalya wavɨlaya'nei wawoka “Mala'na wavɨlavɨma!” daka wɨna yɨwa'.

3Dɨwɨnyai wɨla ata purɨdaa'nyɨ pwaraalya ayawɨdaasɨ bukuyavɨ pwɨyɨnɨke' pyaasɨbwa'na kyɨwa' nɨmɨ kadɨka wɨ'nyɨna. Yɨ gaala kɨnɨnnaka ayawɨdaasai dɨna “Kaaja!” 4Yɨ ozɨya pwai yɨ'mavaabɨna. Sai wayaakei. A'mwei ozɨya dazarɨ yɨlamwaaidɨ'nyɨyarɨna dɨragɨnyabwi wɨjawaasai. Sahwai dɨragɨnya sabwi maaraka tewaanyagaa' yɨ naryagaa' yɨnɨga marasɨ'nya'nelyɨ. “A'mwe Kwaakevakɨyara tamakɨnɨpɨka!” daka sara yɨwa'. Sarevɨ yɨ sarɨna kwaari'masɨramɨnya naanga pɨrɨ' wɨjawaasa' wawɨnya dazahɨrɨ' ya'ne'.

5Dɨwɨnyai wɨla ayawɨdaasa' bukuyavɨ pwɨyɨnɨke' pyaasɨbwa'na kyɨwa' yɨ nɨmɨ kadɨka wɨ'nyɨna. Gaala kɨnɨnnaka ayawɨdaasai dɨna “Kaaja!” Yɨthaanyi, nɨmɨ ozɨya dɨkwaagɨla pwarɨ tɨnna wanganna. Yɨ a'mwe yɨlamwaalakei gamɨre asɨrɨ sɨkelɨya pɨrɨ' tɨka nya'ne maraya'ne' lɨmwamwa'. 6Yɨ gaala kɨnɨnnaka daraai daraalyara mwaaihata saraavɨ tɨnnyaba maangwɨraaya'bɨ' nɨmɨ kadɨka wɨ'nyɨna. Yɨ maangwɨraaya daza' dara dɨna “Mɨjɨkegaakɨra. Maalɨtaaya witɨmaa'gula pwarɨ nɨgwia yune paaivɨ kinaayavɨne'na (yɨrɨka gavevɨ wawɨnya ya'ne nɨgwia') gɨmɨ sɨkelɨya dɨmarayɨ! Yɨ maa'gula maalɨka daraai dalyangɨ baaliya (witɨyabɨ') nɨgwia yune paaivɨ kinaayavɨne'na sɨkelɨya dɨmarayɨ! Aawapaaya wɨgainajahaa' kɨrɨ' welivananya yɨdɨke'nesɨ waainɨyasɨ kayaaka migalakɨnna!”

7Yɨ Dɨwɨnyai wɨla bukuyavɨ pwɨyɨnɨke' dawaai dawaalya' pyaasɨbwa'na kyɨwa' yɨ nɨmɨ kadɨka wɨ'nyɨna. Yɨ gaala kɨnɨnnaka daraai daraalyai aayai sare maangwɨraaya' dɨna “Kaaja!” 8Sara kyɨwa' nɨmɨ ayahi tɨnna wanganna. Yɨthaanyi, ozɨya nabalɨkɨlaa'naka pwarɨ wanganna. Yɨ, sarɨ yɨlamwaalɨkerɨ gamɨnne yaya' “Baryabulyɨyala.” Yɨ sahwarɨ Bainɨkeraayabanya' mɨjamaridɨ'nyɨyasɨ. A'mwe yuyavakaavɨ Gotɨyai marajaapaina yaka dɨna “Dɨragɨnya dare' yɨhɨzaawa. Yuyawɨ a'mwe daraai dalyaraavɨ tamyɨvainyɨna yakɨri a'mwe gave pwarɨ dɨramakyi! Gazawɨzawɨ a'mwe daraai dalyaraavɨ tamyɨvainyɨna, gave pwarɨ tamakɨna. Sana sana jidewaaihɨlyɨ. Yɨ sare'ne dɨragɨnya' kihɨzaava'mujɨ yɨ pwaraavɨ kwaari'masɨramɨnyasɨ tamakɨna, yɨ pwaraavɨ mɨjɨka naangesɨ tamakɨna, yɨ pwaraavɨ nalaaya nabinabinyajɨ tamakɨna, yɨ pwaraavɨ laayonɨyarajɨ sɨgyaaryarajɨ dawakɨna jidewaaihɨlyɨ.”

9Yɨ Dɨwɨnyai atɨlya' wɨla bukuyavɨ pwɨyɨnɨke' pyaasɨbwa'na kyɨwa' yɨ nɨmɨ tɨnna wanganna. A'mwe bainɨka pwaraavɨre kuryara Gotɨyare kwaraanyaba kwaakewɨ mwaaidapiyaraavɨ wanganna. Sɨnnawɨ a'mwe dazara Gotɨyare yagaalya' dɨragɨnna lɨmwagaresare. Yɨ sara yadɨvɨ' yagaala daza' jalɨkurakesare. Sare'na sahwaraavɨ Gotɨyare yɨkamaangera tamakɨna yesare. 10Kurya dazara maangwɨraaya jaka dɨragɨnna dara dɨwaa' “Kingɨya Naangeigɨ yuyangɨneigɨ gɨmɨ nawɨ'nya mwaaihɨ. Gɨrɨka maayaigɨ. Yɨ gɨmɨre sabwi yɨ nebulya'na yunewɨnnanyasɨ. Sareigɨ, mena gatha'daregaa' kyɨwawojɨ gɨmɨ kotɨya' a'mwe Kwaakevakɨ mwaaihasaraavɨ jɨtheigɨna'? Yɨ sahwaraavɨ nemɨre tawenna gathɨngaa' dɨrɨvɨkɨ'deigɨna'?” 11Sara dɨna kyɨwaa' Gotɨyai gazarɨnazarɨna baazɨ'ma'nya yaake' saamɨnya' wɨjaavɨna. Yɨ wɨjaavɨna yaka sahwaraavɨ wɨdɨna “Sarɨmɨ maalɨkegaa' kave kwaamu' dɨmwaalyi! Dɨvi yɨkamaangera sarɨmɨre avaaiyaasɨwa'wawɨnyaraavɨ, sɨrya'mweraavɨ tamakɨpɨ'dere. Yɨ yɨhɨramaketabaaibɨ' tamakɨpɨ'dehaa'nanyɨ. Yɨ nɨmɨ yawɨ'na yage yunegaa'nera yɨnɨga sara baibɨ'dehaa' yɨ nabaai sarɨmɨre tawejɨ'na tɨvɨkɨrɨdeinyɨ.”

12Dɨwɨnyai wɨla ata purɨdaa'nyɨ dalya' bukuyavɨ pwɨyɨnɨke' pyasɨbwa'daa'nyɨ nɨmɨ tɨnna ayahi wanganna. Kwaakevakɨ wɨnɨnya naange' kyɨma'nɨwa' tɨnna wanganna. Yɨ nyɨlyai tɨnga naange' yɨma'nyɨna. Sai yɨrɨka mavuri. Yɨ lawei yuya wayaaka tawe'bɨsa' yɨma'nyɨna. 13Sɨgunyavɨya sɨlɨngaamɨnya sa kwaakebanna bwala'na. Yɨsɨla yɨta pihɨyare mya milyadɨ'nyɨ yɨhuta naange' purakɨ'daa'nyɨ bwala'daawadevaaibɨ' kwaakebanna bwala'na. 14Sɨgunya kɨrɨsɨ sa' mena wɨna. Yɨ lamulyɨ' pwalagɨ'mwadɨvɨ' wakadɨvɨtabaaibɨ' sɨgunya' gɨ'mwannɨwake' yɨmaanyɨna. Yɨ yuya mugunyajɨ ahu'mannyajɨ kumɨre wa'dɨvɨsaba yagalya'ma'na, yɨ sangina gɨnyɨmwaaina yɨwaa'. 15Yɨ kingɨya Kwaakevakɨyarajɨ yɨ maremwaaidɨvɨsarajɨ yɨ mala aawɨlasaraavɨ maremwaala naangerajɨ yɨ a'mwe nɨgwɨhɨravɨnakerajɨ yɨ a'mwe dɨragɨnaangerajɨ yɨ yaasɨwa'wawɨnya wɨdaayadɨvɨta gazarazarajɨ yɨ pwara kumɨre wawɨnya yadɨvɨta gazarazarajɨ yuya sahwara Kwaakevakɨya situsangɨ lɨka yulyaramaripɨ'dere. Yɨ sɨla mugunya naangengɨ kusawɨ lɨka wɨlapɨ'dere. 16Yɨ sahwara yuya mugunyajɨ sɨlaangejɨ jaka dara dɨwaasare “We'! Sarɨmɨ nɨmɨnyɨ a'badaa'nyɨ jɨlanyɨlabwaraama! Gotɨyare sɨnnyɨkɨ, kingɨnamwaalyɨsavɨ mwaalɨkerɨjɨ yɨ Dɨwɨnyare sɨnna tɨkevɨjɨ lɨka dɨmaraneyulakya! 17Sare' dare'nanyɨ. Yɨrɨka naanga dazaraare dazagaa' yɨ sɨmɨlɨka wɨladehaakɨ. Kayaa'nanya' tɨvɨkɨrya'ne' dahaa' sa' mena yɨma'nɨwa'. Sarevɨdaa'nyɨ yɨnɨga aaihwai daavojɨ yɨ daza' wavɨlavadelaka! Aawa.”

Currently Selected:

Wɨjalangasakyaꞌ 6: byr

Highlight

Copy

Compare