Wɨjalangasakyaꞌ 3

Anga Saathɨzɨ mwaalyaraavɨna yagaalya' yɨda'nɨke'nesɨ.

1Kɨraazɨtɨyainyɨre kusɨlaanyavɨya Anga Saathɨzɨ mwaalyaraavɨne ejelɨyai mwaalɨkerɨne pɨkarya nayaa dara jɨtha'!

Sahwai ata purɨdaa'nyɨ pwaraala Kurya Gotɨyarerajɨ sɨlɨngaamɨnya ata purɨdaa'nyɨ pwaraala dazajɨ kɨnɨnnakei yagaala datha gɨmaryasɨvanaabɨ'. Gɨmɨ yɨvanɨgɨnya yuya saburana mena gyawɨ'manɨge. A'mwera gɨmɨnyɨne yaya' dara dadɨvɨsare “Kɨraazɨtɨyarera angeba mwaalya dazara gaalya' kɨnɨnnakera mwaaiha'.” Kɨrɨ' aawa. Mena Gotɨyarɨna bainɨkeigɨnyɨ. 2Naangevaa'gɨ se warya' yagalya'mava'gɨzɨ tɨnna nayaa baihanarya'neigɨ dɨthɨkaaka! Gɨmɨre yuya sabwi kuna maalɨ'na warɨke yuna nabaladɨka! Yuya sabwi baimanɨkebwi nayaa dɨragɨnya jɨvaimwa! Sare' dare'nanyɨ. Gɨmɨ yadɨnya yuya sabwi pɨrɨvɨ sa' yuya yɨda'nanya' nɨmɨre Gotɨyare tɨnnyarɨ nɨmɨ tɨnna mwanganabɨrivanɨge. 3Sarevɨdaa'nyɨ yagaala tewaanya dazavɨ kadɨka mena wɨ'nagɨnyagaa' gɨmɨ lɨmwagasabwi maaragɨnyabaaibɨsa' gɨnnya sɨmunyavɨ nayaa ayɨna jawɨ'! Daza'na ya'gɨzɨ sabwi nayaa mɨdɨdɨ sɨmunya mudɨkebwi jawɨramaa'! Savɨdaa'nyɨ se' myagalya'mayɨja' tɨnna nayaa baihanarya'neigɨ madɨkaayɨ yɨja' a'mwe kukei bi'ma'devaaibɨ' nɨmɨ gɨmɨnyawɨnna bi'mavɨdeinyɨ. Nabaai gɨmɨnyawɨnna bi'ma'mujahaa'na gɨmɨ jawɨ'deigɨ mɨ'. Arɨkewɨnyɨ. 4Kɨrɨ' maalɨkevaa'gɨ yaya pɨnɨjɨyara Saathɨzɨ mwaaihata pwai pwai kɨnɨnnakeigɨnyɨ. Sahwara kumɨre baazɨ'ma'nya gɨrɨka yɨgalakadɨvɨsara mɨ'. Kumɨ dazara yɨ nɨmɨre baazɨ'ma'nya yaake' baazɨ'ma'napi yɨ nɨmɨjɨ ye'mwannayamaryaadere. Sahwara sahɨrɨvɨ yɨnɨga wi'nannere. 5Nabaai a'mwei mala daza' sara wavɨlavajai sahwarɨ nɨmɨ avaainanya baazɨ'ma'nya yaaka dathavaaibɨsa' wakɨdelyɨ. Yɨ nabaai nɨmɨ bukuya gaala'ne sɨrɨ gamɨnne yaya' yɨwaipɨwagɨdeinyɨ mɨ'. Arɨkewɨ. Yɨ nabaai Nɨmaamaangeryaba gamɨre ejelɨyaraayabajɨ nɨmɨ a'mwe dazarɨne yaya' jalɨkurakɨdeinyɨ. “Nɨmɨrelyɨ,” wɨdɨdelyɨ. 6A'mwei kadɨ'nakei sai yagaalya' kadɨka nayaa wɨ'nana! Yɨ yagaala daza' Kurya Tewaanyai Kɨraazɨtɨyainyɨre kusɨlaanyangɨya anga geva gevanyaraavɨ wɨjɨwaakɨvanɨkesɨ.

Anga Pilathelɨpɨya mwaalyaraavɨna yagaalya' yɨda'nɨke'nesɨ.

7Kɨraazɨtɨyainyɨre kusɨlaanyavɨya Anga Pilathelɨpɨya mwaalyaraavɨne ejelɨyai mwaalɨkerɨne pɨkarya nayaa dara jɨtha'!

Sai nawɨ'nya nebulya'nanyai, yɨ nebulya'nanya sabwina aaya kaavɨlyalyɨ. Sahwai Kingɨya Devitɨmɨne kiya' kɨnɨnnakei kaadihɨta naange' baasadelyɨ. Basadaa'nyɨ gamɨre wawɨnya' naanna jɨthe'nanyɨ. Yɨ a'mwe aane pwai kwai kaanya sa' ayahi tihɨradei mɨ'. Yɨ kaanya' tihɨ'delyɨ. Yɨ a'mwe aane pwai kwai ayahi baasadei mɨ'. Sarei yagaala datha gɨmaryasɨvanaabɨ'. 8Gɨmɨ wawɨnya yadɨnya yuya sabwina nɨmɨ mena gyawɨ'manɨge. Yɨthaa, gɨmɨre sɨnnyɨkɨ kaadihɨsa' basɨnadaavɨke' wakɨwesɨ. Yɨ a'mwe kaanya tihɨradei aane pwai kwai mɨ'. Nɨmɨ dara yawɨ'manɨge. Gɨmɨ dɨragɨnya maalɨke' kɨnɨnnakeigɨ kɨrɨ' nɨmɨre yagaalya' mɨdɨdɨ yɨ nɨmɨnne yaya' lɨka yulyakadɨnyaigɨ mɨ'. “Sahwareinyɨra,” wɨdadɨnyaigɨnyɨ. 9Yɨthaa, nɨmɨ Saataanɨmɨre a'mwe yɨta dathavaa' gɨmɨnyɨna gɨmwangɨdeigɨnyɨ. Sahwara dara dadɨvɨsare “Nemɨ Juyaraavɨdaasɨ yɨsavaa'nyɨ.” Kɨrɨ' sahwara Gotɨyarera mɨ'. Aawa. A'mwe kwaasɨ dadɨvɨsare. Yɨthaa! Yɨ nɨmɨ a'mwe dazara gɨmɨre sɨvɨlyɨraaryawɨ kwaakewɨ bulawɨla'napɨ'de'na yɨdeigɨnyɨ. Yɨ sahwara yawɨpɨ'de'na “Gotɨyai sahwaraavɨna tewaanya nebulya'na mena wɨvu'nɨvanɨ'.” 10Nɨmɨ dɨragɨnna daavebaaibɨ' nɨmɨre yagaalya' nyɨmɨdɨdɨ yuya taanginya gima'nade sangɨ gɨmɨ dɨragɨnna daa'dɨnyaigɨnyɨ. Yɨ sare'na yɨjɨwaala daza' “Kwaaka yuyawɨ yɨma'nɨma!” dozɨ yajahaa' a'mwe yuyara Kwaaka yuyawɨnyaraavɨ yɨjɨwaalya'negaa' sa' yɨ gɨmɨnyɨ nagima'nadɨ'! Yɨ yadevɨ nayaa gɨmaremwaalɨdeinyɨ. 11Yɨ gɨmɨnyawɨnna yɨme'nya'bɨ' walaabɨdeinyɨ. Yɨ aane pwai kwai kingɨmwaaihɨ'nya' gɨmɨre tɨvɨkɨsa' nagɨmarasɨ'nadɨ'! Gɨmɨ dazabwi lɨmwaga'manɨgɨnya sa kuna nayaa dɨragɨnna dɨlɨmwaga'! 12Nabaai a'mwei mala daza' sara wavɨlavajai, yɨ sarɨ dɨhɨbya anga nawɨ'nya nɨmɨre Gotɨyarevɨ dɨragɨnya yɨwagya'nerɨ nɨmɨ marɨdaakudelyɨ. Yɨ nabaai sai anga nawɨ'nya savɨ myagalya'mayɨ yojɨ ayahi mwasɨlaanna walyawodei mɨ'. Arɨkewɨnyɨ. Yɨ sarɨ nɨmɨ nɨmɨre Gotɨyarɨne yaya' yɨdavɨdelyɨ. Yɨ nɨmɨre Gotɨyare anga naangebanne yaya' yɨdavɨdelyɨ. Anga naanga daza' yɨ Jeruzaalemɨ mudɨkesɨ. Sa' yɨ nɨmɨre Gotɨyaryabadaasɨ walaabathesɨ. Yɨ Sɨgunyavɨ yagalya'mavojɨ walaabathesɨ. Yɨ nɨmɨnne yaya mudɨke' sa' kɨrɨsɨ yɨ sarɨ pɨkarya yɨdavɨdelyɨ. 13A'mwei kadɨ'nakei yagaalya' kadɨka nayaa wɨ'nana! Yɨ yagaala daza' Kurya Tewaanyai Kɨraazɨtɨyainyɨre kusɨlaanyangɨya anga geva gevanyaraavɨ wɨjɨwaakɨvanɨkesɨ.

Anga Layothɨzɨya mwaalyaraavɨna yagaalya' yɨda'nɨke'nesɨ.

14Kɨraazɨtɨyainyɨre kusɨlaanyavɨya Anga Layothɨzɨya mwaalyaraavɨne ejelɨyai mwaalɨkerɨne pɨkarya nayaa dara jɨtha'!

Sahwai Nebula Naangei, nebulya'ne aaya kaavɨlyai, Gotɨyare yawɨta yuya nayaa lɨmwada nebulya'na yɨda'na jalɨkurakadelyɨ. Yuya Gotɨyai wakyaakengɨna aaya kaavɨlyalyɨ. Sarei yagaala datha gɨmaryasɨvanaabɨ'. 15Gɨmɨ yɨvanɨgɨnya yuya sabwina nɨmɨ mena gyawɨ'manɨge. Gɨmɨ yɨrɨla majɨvanɨgɨ. Yɨ nɨmɨnyɨna “Aala!” majɨvanɨgɨnyaigɨnyɨ. Nabaai gɨmɨ dɨka magimanɨ'. Yɨ nɨmɨnyɨna dɨragɨnna myɨvanɨgɨnyaigɨnyɨ. We'! Dara gɨthɨvanɨge. Gɨmɨ dɨ'nakeigɨ mwaaidɨzɨ kwajɨ wikɨra. Gɨmɨ yɨrijaigɨ mwaaidɨzɨ kwajɨ wikɨra. 16Kɨrɨ' aawa. Gɨmɨ dɨ'naka maalɨ'na gimanɨkeigɨnyɨ. Gɨmɨ dɨ'naka nebulya'na maginyɨvanɨ'. Yɨ gɨmɨ yɨrija nebulya'na maginyɨvanɨ'. Sarevɨdaa'nyɨ aalya dɨ'mudɨnya maalɨka kɨnɨnnake'bɨ' sareigɨnyɨne'na nɨmɨre maangevɨdaa'nyɨ wɨrya gɨmudakɨdeigɨnyɨ. 17Sare' dare'nanyɨ. Gɨmɨ dara dadɨnyaigɨnyɨ “Nɨmɨ kwalaalya kɨnɨnnakeinyɨ. Yɨ nɨmɨre gɨlyɨvɨta kwalaalya warɨ'. Pɨnɨnna manyɨgainyɨvanɨ'.” Kɨrɨ' gɨmɨnyɨna aawa. Gɨmɨ wana kayaa'na mwaaihɨ. Yɨnɨga wi'na gɨmɨnyɨna kale nyadeigɨnyɨ. Gɨmɨ wana gɨlyɨvɨ'maaya yɨnahune nebulya'nanyaigɨ mwaaihɨ. Yɨ gɨmɨ tɨnna tɨbɨnyaigɨnyɨ. Yɨ gɨmɨ kɨlaakejɨ'nanyaigɨ mwaaihɨ. Yɨ nabaai gɨmɨ saigɨ dazavɨ myawɨranganyɨvanɨgɨ. 18Sarevɨdaa'nyɨ nɨmɨ sɨmunya datha' gɨzaawa. Nɨmɨre golɨya', sa' nawɨ'nya tɨrɨmaaya yɨma'nyavɨna dɨke' nake' dɨragɨnyasɨ. Yɨ gɨmɨ golɨya daza' dɨmubɨ! “Gotɨyarɨne kwalaalya kɨnɨnnakeinyɨ yɨma'nɨma!” da'gɨzɨ sara dɨmubɨ! Yɨ gɨmɨre kɨlaakejɨkɨ baazɨ'ma'nya'ne' nɨmɨre baazɨ'ma'nya yaake' dɨmubɨ! “Yɨ baazɨ'ma'nya yaaka sa' yewaa'bwa'nɨma! Yɨ nabaai kɨlaakejɨ'nanyainyɨ kuna mamwaalyɨ yadɨ wagɨla nanyɨvwa'nadɨka! A'mwera a'mwemɨlɨka tɨnna nanyangabɨthɨka! Yɨda'maraanga sabwi baazɨ'ma'nɨma!” da'gɨzɨ sara dɨmubɨ! Yɨ gɨmɨ nɨmɨre mɨnarɨwelivananya' gɨmɨre tɨnnyaraarɨ pu'nya'ne' dɨmubɨ! “Yɨ sareinyɨ tɨnna yɨnɨga wi'na wanganɨma!” da'gɨzɨ sara dɨmubɨ! 19Nabaai nɨmɨ a'mwe nyɨvu'nadaasɨya yuya saraavɨ maanga wɨdadɨ sahwaraavɨ kumɨre yadɨvɨsabwi yavada'gaidɨnyainyɨ. Sarevɨdaa'nyɨ yɨ gɨmɨre sabwina sɨmunya mudɨkebwi jawɨramaa'! Nabaai sɨmunya nawɨ'nya' dɨke'bɨ' kuna jawɨrɨbaina! 20Yɨthaa! Nɨmɨ kaadihɨsavɨ daake. Yɨ nɨmɨ mala tamɨda'nɨvanaabɨhe. Nabaai a'mwe pwai nɨmɨre maangikɨ nyu'nojɨ yɨ kaanya sa' nyɨbasamaraabazai yɨ nabaai gamɨnyɨ kusawɨ wɨla'mujɨ salyɨ wɨlye'mwannamwaalɨdelyɨ. Salyɨ tɨka ye'mwannanɨdelyɨ. Yɨ sai nɨmɨjɨ tɨka ye'mwannanadelyɨ. 21Nabaai a'mwei mala daza' wavɨlavajai, sahwarɨ nɨmɨ “Ya,” wɨdɨdelyɨ. Sai namwaalyɨta kingɨyavɨ nawɨ'nyaba nɨmɨjɨ nye'mwannamwaalade'na wɨdɨdelyɨ. Sɨnnawɨ nɨmɨ kwainyɨ malya' wavɨlavebaaibɨ', yɨ nɨmɨ Nɨmwalyɨ gamɨre namwaalyɨta kingɨyavɨ ye'mwannemwaalebaaibɨ' nye'mwannamwaaladelyɨ. 22A'mwei kadɨ'nakei, sai yagaalya' kadɨka nayaa wɨ'nana! Yɨ yagaala daza' Kurya Tewaanyai Kɨraazɨtɨyainyɨre kusɨlaanyangɨya anga geva gevanyaraavɨ wɨjɨwaakɨvanɨkesɨ.

Currently Selected:

Wɨjalangasakyaꞌ 3: byr

Highlight

Copy

Compare