Wɨjalangasakyaꞌ 2

Anga Epazaazɨna yagaalya' yɨda'nɨke'nesɨ.

1Kɨraazɨtɨyainyɨre kusɨlaanyavɨya Anga Epazaazɨ mwaalyaraavɨne ejelɨyai mwaalɨkerɨne pɨkarya nayaa dara jɨtha'!

Sɨlɨngaamɨnya ata purɨdaa'nyɨ pwaraalya gamɨre aangasɨrɨ lɨmwaga'dei sahwai laamɨvananya' yɨlakya'ne golɨnaka ata purɨdaa'nyɨ pwaraalyangɨ tɨnnyaba kaanya yamaryade sahwai yagaala datha gɨthasɨvanaabɨ'. 2Gɨmɨ wawɨnya yadɨnya yuya sabwina mena gyawɨrangamanɨge. Yɨ gɨmɨre yagɨyagɨwawɨnyannajɨ taangegaa' gɨmɨ dɨragɨnna daaya'nebwinajɨ mena gyawɨ'manɨge. Yɨ gɨmɨ a'mwe kayaa'nanyaraavɨna “Aala!” nebulya'na dɨwaa. A'mwe dazara gɨmɨnyɨ dara gɨthadɨvɨsare “Nemɨ Apozelɨya Nedaasade kwainera.” Kɨrɨ' aawa! Sahwara Wɨdaasadera mɨ'. Yɨ kumɨre yagaalya' mena yawɨbwarangamwaa. Yɨ kumɨ yadɨvɨta saburɨ kaavɨlya' mena bɨrama'mwaa “Yɨ sahwara a'mwe yune kwaasɨyare.” 3A'mwera tɨnna gwangadaapi, gɨmɨ nɨmɨnne yaya' kuna lɨmwamanɨgɨ. Yɨ sahwara wana kayaa'na gyadaapi kɨrɨ' gɨmɨ dɨragɨnna daa'dɨ taanga daza' maa'dɨnyɨ. Yagɨyagɨ wawɨnya daza'na maa'na ginnadeigɨ mɨ'. 4Kɨrɨ' gɨmɨnyɨna nɨmɨ yagaalya' kɨnɨnnaka dareinyɨ. Sɨnnawɨ gɨmɨ mudɨ'na dɨragɨnna lɨmwagahɨnyagaa' yɨ dazagaa' nɨmɨnyɨnajɨ nebulya'na gɨvu'nakeigɨnyɨ. Kɨrɨ' dahaa' aawa. 5Sɨnnawɨ nawɨ'nya tewaanyabwi yagɨnyaigɨnyɨ. Kɨrɨ' gɨmɨ daza' yagalya'mavagɨnegaa' yɨ gɨmɨ mena wala'mwaawɨnyaigɨnyɨ. Sarevɨdaa'nyɨ ayahi sɨnnawɨ gɨmɨ yagɨnya dazabwina nayaa jawɨ'! Yɨ gɨmɨre sɨmunyabwi mudɨkebwi nayaa jawɨramaa'! Yɨ gɨmɨ aaya mudɨ'nanyagaa' yagɨnyabaaibɨsabwi jɨ! Nabaai aawana, yɨ nabaai gɨmɨ sɨmunya mudɨkebwi ayɨna yawɨramaata mija', yɨ nabaai nɨmɨ gɨmɨnyawɨnna bi'mava'mujɨ yɨ gɨmɨre laamɨvananya' yɨlakya'ne' warɨkebadaa'nyɨ marasɨ'nɨdesɨ. Sɨmunya mudɨkebwi myawɨramaari nyɨdɨka! 6Kɨrɨ' dasare dathavwi kuna gwarɨ'. Gɨmɨ Nikolaazare mɨdɨdɨvɨsaraavɨre saburɨ yɨkamaanga wiadɨnyaigɨnyɨ. Nɨmɨ kwainyɨjɨ sahwaraavɨre saburɨ yɨkamaanga wima'nadeinyɨ. 7A'mwei kadɨ'nakei, sai yagaalya' kadɨka nayaa wɨ'nana! Yɨ yagaala daza' Kurya Tewaanyai Kɨraazɨtɨyainyɨre kusɨlaanyangɨya anga geva gevanyaraavɨ wɨjɨwaakɨvanɨkesɨ. Nabaai a'mwei mala daza' wavɨlavajai, sahwarɨ yɨ nɨmɨ “Ya,” wɨdɨdelyɨ. Yɨ sahwai a'mweraavɨna gaala wɨjaaya'ne yɨta dazarɨ tɨka munne maaradelyɨ. Yɨta dazai Gotɨyare wawɨnyavɨ Parathaazɨ waayɨ'.

Anga Sɨmenaa mwaalyaraavɨna yagaalya' yɨda'nɨke'nesɨ.

8Kɨraazɨtɨyainyɨre kusɨlaanyavɨya Anga Sɨmenaa mwaalyaraavɨne ejelɨyai mwaalɨkerɨne pɨkarya nayaa dara jɨtha'!

Sahwai aaya sɨnnawɨnya nebulya'nanyai nabaai aaya dɨvidaa'nya nebulya'nanyai aayaangei kɨgaa' mena balakei kɨrɨ' gaalyai ayɨna yɨma'naabakei yɨ sarei yagaala datha gɨthasɨvanaabɨ'. 9Taanginya gima'nɨvanɨkennajɨ nebulya'na gɨlyɨvɨta wana kuneigɨ mwaidaa'giyabulyɨ gyawɨrangamanɨge. Gɨlyɨvɨta kuneigɨ kɨrɨ' gɨmɨ pɨnɨ kwalaalya kɨnɨnnakeigɨnyɨ. Nabaai yagaaibɨraizɨka daza'na a'mwe pwara sahwara gɨmɨnyɨ givanɨgasa'na gyawɨrangamanɨge. A'mwe dazara sahwara dɨna “Nemɨ sahwaina Juyaraavɨdaasaine.” Kɨrɨ' sahwara nebulya'na Juyaraavɨdaasarana mɨ'. Aawa. Juya kwara kɨrɨ' sahwara yune Saataanɨmɨrevaasɨyaraavɨna. 10Dɨvi maalɨkegaa' gɨmɨ daange dɨmaa'dengɨna lɨka minnera! Yɨthaa! Saataanɨ sai Yuyaraavɨ Kotɨya Maryadei jɨda'daa'nyɨ sarɨmɨjɨya pwaraavɨ kalavuza wɨmwaaihɨpɨ'dere. Sarɨmɨnyɨ yaamɨjɨ yɨjɨwaala'ne' sara yɨhyɨpɨ'deihɨlyɨ. Yɨ yɨrɨka ata yuyɨraalya yɨnɨgehaa' sarɨmɨ Kɨraazɨtɨyareihɨrɨ taanginya yɨhɨzaavɨpɨ'deihɨlyɨ. Kɨrɨ' nɨmɨnyɨna nayaa dɨlɨmwaga'! Kuna kuna yɨwo'gɨzɨ yune gɨmɨ baidɨzagaa'na yɨ nabaai gaalya' yɨvarula nawɨ'nyai gɨvwatavɨdeinyɨ. (Kingɨmwaaihɨ'nya' gwakɨdeinyɨ.) 11A'mwei kadɨ'nakei sai yagaalya' kadɨka nayaa wɨ'nana! Yɨ yagaala daza' Kurya Tewaanyai Kɨraazɨtɨyainyɨre kusɨlaanyangɨya anga geva gevanyaraavɨ wɨjɨwaakɨvanɨkesɨ. A'mwei mala daza' wavɨlavajai sahwarɨ yɨ ayahi barya sa' kayaaka yɨgalakadei mɨ'. Aawa nebulyasɨ.

Anga Pehamaamɨ mwaalyaraavɨna yagaalya' yɨda'nɨke'nesɨ.

12Kɨraazɨtɨyainyɨre kusɨlaanyavɨya Anga Pehamaamɨ mwaalyaraavɨne ejelɨyai mwaalɨkerɨne pɨkarya nayaa dara jɨtha'!

Kwaari'masɨramɨnya pɨrɨ' gurɨmaanga yuyɨmagɨnyaai yɨnɨke' kɨnɨnnakei yagaala datha gɨthasɨvanaabɨ'. 13Angeba mwaaihɨnyaba anga dazaba Saataanɨ kingɨyai maremwaalɨkebanna nɨmɨ yawɨrangamanɨge. Maremwaalɨka kɨrɨ' gɨmɨ nɨmɨnne yaya' dɨragɨnna lɨmwaga'dɨnyaigɨnyɨ. Yadɨ gɨmɨ nɨmɨnyɨna dɨragɨnna lɨmwadɨ yɨ dɨragɨnna lɨmwanga daza' lɨka yulyakadɨnyaigɨ mɨ'. Nabaai kɨgaa' a'mwe Adipaazai nɨmɨnyɨna nayaa nebulya'na jalɨkurakadei sarɨmɨjɨ ye'mwannayɨhɨmwaalaka sahwarɨ sarɨmɨnyaba tamakesagaa'na nɨmɨnyɨ kuna dɨragɨnna lɨmwagakɨnyaigɨ. Nɨmɨnyɨna “Aala!” majahɨnyaigɨ. Anga dazaba Saataanɨ mwaaida gannya wawɨnya' yɨvanɨkeba kɨrɨ' sara yadɨnyaigɨ. 14Kɨrɨ' nɨmɨ gɨmɨnyɨna yagaala pɨrɨ' pɨrɨ' kɨnɨnnakeinyɨ. Yɨ sarɨmɨjɨya pwara kwaasɨwɨ'nawɨjɨwaakya Belaamɨmɨrebwina lɨmwaga'dɨvɨsara kɨnɨnnakeigɨnyɨ. Belaamɨmɨrebwi yɨ daresɨ. Sɨnnawɨ kɨgaa' Ne Mozɨzaregaa' sai maremwaaide Belaakɨmɨ dara yɨbwarɨdaakwa'. A'mwe Yɨzɨrelɨyaraavɨ kwaasɨ yɨjɨwaalyabwi dahe'bɨsabwi kya' a'mwe sara wagɨlyavɨ walaraawe'. Yɨ Belaakɨjɨya Yɨzɨrelɨyaraavɨ yɨdɨkaave'. Yɨ sahɨnɨ kwaasɨgotɨyaraavɨ yɨdɨka yesa tɨka nya'na sahwaraavɨ yɨna yeva yaasɨwa' pamarinyabwi ya'na yɨdɨkaavesare. 15Sasarebaaibɨ' gɨmɨjɨya pwara Nikolaazare wɨjɨwaakya' lɨmwaga'dɨvɨsarajɨ kɨnɨnnakeigɨnyɨ. Baa'nana! 16Sarevɨdaa'nyɨ yɨ gɨmɨjɨya pwara “Sɨmunyabwi mudɨkebwi nayaa jawɨramaa'!” Nabaai aawana, sara myɨjaigɨnyawɨnna yarai bi'mavɨdeinyɨ. Yɨ nɨmɨ a'mwe dazarajɨ kwaari'masɨramɨnya nɨmɨre maangevɨ nyarɨka dazasɨ mala barannaadeinyɨ. Kɨrɨ' gɨmɨre tewaanyabwina gyawɨrangamanɨge. 17A'mwei kadɨ'nakei sai yagaalya' kadɨka nayaa wɨ'nana! Yɨ yagaala daza' Kurya Tewaanyai Kɨraazɨtɨyainyɨre kusɨlaanyangɨya anga geva gevanyaraavɨ wɨjɨwaakɨvanɨkesɨ. A'mwei mala daza' wavɨlavajai, sahwarɨ tɨka wapaa manaaya Sɨgunyabanya pɨnɨ dahaa' kɨma'nyawɨ lɨka yulyarɨke wɨjaavɨdelyɨ. Nabaai nɨmɨ sitɨhwawɨnya yaaka pɨmɨlɨ' wɨjaavɨdelyɨ. Yɨ tɨhwawɨnya dazamɨlɨkɨ yaya mudɨke' yɨda'nɨkemɨlɨ' wɨjaavɨdelyɨ. Yɨ aawa, a'mwe pwai yaya daza' yawɨranganadei mɨ'. A'mwe tɨhwawɨnyamɨlɨ' maarajai yɨ yune sahwaina yawɨranganadelyɨ.

Anga Taayataaira mwaalyaraavɨna yagaalya' yɨda'nɨke'nesɨ.

18Kɨraazɨtɨyainyɨre kusɨlaanyavɨya Anga Taayataaira mwaalyaraavɨne ejelɨyai mwaalɨkerɨne pɨkarya nayaa dara jɨtha'!

Gotɨyare Gawaalɨvaangei sai tɨnna dɨtaalɨsa' naanga yɨdamakida yɨdaderaai kɨnɨnnakei sɨvɨlyi wana nebulya'na dɨ'baaka mwadadaasɨ kwaari'mata bɨraazɨya' dɨka naangevɨ yɨra'dɨvɨtabaaibɨsi kɨnɨnnakei yagaala datha gɨthasɨvanaabɨ'. 19Gɨmɨ yɨvanɨgɨnya yuya saburana, gɨmɨ a'mweraavɨna tewaanya gɨvu'nɨvanɨkebulyɨ nɨmɨnyɨna dɨragɨnna lɨmwaga'manɨgɨnyabulyɨ yɨ a'mweraavɨ gaimwagya'ne wɨdaayɨvanɨgɨnyabulyɨ yuya taanginya gima'nɨvanɨkengɨ dɨragɨnna daa'manɨgɨnyabulyɨ nayaa gyawɨrangamanɨge. Nabaai dala pɨbwinanya sabwi gɨmɨ aayagaa' gaai nyɨlɨmwagahɨnyagaa' yagɨnya sabwi sa' tewaanyasɨ. Yɨ dahaa' dɨviya sa' yɨ sɨnnawɨnyavɨ wavɨla'mwaka wana tewaanya nawɨ'nyaangesɨ. Sare' gyawɨrangamanɨge. 20Kɨrɨ' gɨmɨnyɨna nɨmɨ yagaalya' kɨnɨnnaka dareinyɨ. Gɨmɨ a'mwe daza' Jezevelɨya' gɨmɨjɨ ye'mwannemwaaidevɨ yaasɨwa'na baihana'na yadɨnyasɨ. A'mwe daza' kwaasɨ dara dadesɨ “Nɨmɨ pɨropetɨya'nyɨ. Gotɨyarɨ wɨ'nadɨ a'mweraavɨ wɨjɨwaakadɨnya'nyɨ.” Sara dada nɨmɨre yaasɨwa'wawɨnyaraavɨ kwaasɨ wɨjɨwaakɨna. Yɨ sahwara yaasɨwa' pɨnamarya sabwi mɨdɨnya'najɨ yɨ mɨwɨta kwaasɨgotɨyaraavɨne yɨdɨka yadɨvɨsa tɨka nya'najɨ kwaasɨ wɨjɨwaakɨna. Sasare dazaburɨ sa' wana kwaasɨya' nɨmɨre pwara sara yadɨvɨsasɨ. 21“A'mwe sa' sɨmunya mudɨkebwi yawɨramaarana!” yawɨrena pɨgaa'nevɨ yaamɨjɨ yena yemwaaimanɨge. Kɨrɨ' aawa. Sa' sɨmunya mudɨkebwi yawɨramaasa'na “Aala!” dɨvanɨ'. Gannya yaasɨwa' gɨrɨkita'nanya yade sangɨna bule' wɨjaaya'na “Aala!” dɨna. 22Yɨthaa! Nɨmɨ nalabwaryavɨ a'mwe dazavɨna daangesɨ nalaaya naangesɨ wɨjaavɨdesɨ. Yɨ a'mwe dazara sahɨrɨsɨ gɨrɨkita'nanyabwi yadɨvɨsara sahwara sɨmunya mudɨkebwi yawɨramaata myapɨjɨ gamɨ yade sabwina bule'na mujaayɨ yɨpɨja' yɨ nɨmɨ daanga naangejɨ taanginyajɨ wɨjaavɨdere. 23Gamɨre kaimɨraaya kwaraavɨjɨ yɨ nɨmɨ yuna tamakɨdere. Sarevɨ yɨ Kɨraazɨtɨyainyɨre kusɨlaanyangɨya yuyavaka nayaa yawɨpɨ'de'nanyɨ. Yɨ nɨmɨ a'mwe yuyaraavɨre munyɨkaavɨjɨ sɨmunyangɨjɨ nayaa maryawɨbwa'dɨnyainyɨ. Yɨ nɨmɨ sarɨmɨnyɨ gazaigɨzaigɨnyɨ yɨnɨga wi'na yadɨvɨta sabwine' yɨhɨrɨvɨkɨrɨdeinyɨ. 24Kɨrɨ' sarɨmɨ pwaihɨrɨ yɨhɨthɨvanɨge. Sarɨmɨnyɨ kwaihi Taayataaira mwaalya pwaihi a'mwe savɨre yagaala daza' mɨdɨdɨvɨtaihi mɨ'. Yɨ sarɨmɨ sasare dazabwi dara dadɨvɨsaburɨ “Yagaala yune kusawɨ nebulya'na Saataanɨmɨre sabwi,” yawɨramaa'dɨvɨtaihi mɨ'. Yɨ sareihɨrɨ dara yɨhɨthɨvanɨge. Yɨ nɨmɨ naanga pɨrɨ' yɨhwakɨdeinyɨ mɨ'. 25Aawaawa. Sarɨmɨ lɨmwaga'dɨvɨta sabwi yɨ kɨbwi nayaa dɨragɨnna dɨlɨmwagyɨla! Kuna yɨwopɨjɨ yune nɨmɨ bi'mava'mujɨyagaa'na dɨragɨnna dɨlɨmwagarila!

26A'mwei mala daza' wavɨlavajai, a'mwe nɨmɨre wawɨnya mɨdɨnojɨ yune gamɨre aya yɨwɨya yajahaa'nei yɨ sahwarɨna nɨmɨ dɨragɨnaange' wɨjaavɨdelyɨ. Dɨragɨnya sa' daresɨ. Sai mɨnyagɨnyai ajɨmya yuyangɨyaraavɨ maremwaaladevurɨnera.

27“Sai yɨta kwaari'mayagɨnyarɨ' lɨmwagozɨ

A'mwe saraavɨ dɨragɨnna maremwaaladelyɨ.

Maa'gula kwadɨke mala tadaapi

Pwakɨ'da yaaye lɨlɨya wa'devaaibɨsasɨ.”

Nɨmɨnyɨna Nɨmwai dɨragɨnya' maremwaalya'ne' nyɨjaavakabaaibɨ' dɨragɨnya sa' wɨjaavɨdelyɨ. 28Yɨ nabaai nɨmɨ sɨlɨngaamɨnya mwanyagaa'ne kaabwe' wɨjaavɨdeinyɨ. 29A'mwei kadɨ'nakei sai yagaalya' kadɨka nayaa wɨ'nana! Yɨ yagaala daza' Kurya Tewaanyai Kɨraazɨtɨyainyɨre kusɨlaanyangɨya anga geva gevanyaraavɨ wɨjɨwaakɨvanɨkesɨ.

Currently Selected:

Wɨjalangasakyaꞌ 2: byr

Highlight

Copy

Compare