Wɨjalangasakyaꞌ 20

Saataanɨ kalavuza' kwarame 1000 yɨ'namwaalade'nesɨ.

1Yɨ nɨmɨ tɨnna wanganna yadaazɨ Sɨgunyavɨdaa'nyɨ ejelɨya pwai walaabɨna. Gamɨre asɨrɨ yɨrorɨla daanga maayavɨre kiya' lɨmwagarɨkei. Yɨ sai kwaari'ma'magazaawanya naange' kɨrɨsɨ lɨmwagarɨkei. 2Sai kabaraawarya dazarɨ galalɨmwanna. Kabaraawarya sai kamaala wana sɨnnawɨ kɨgaakunanyai. Sai Yuyaraavɨ Kotɨya Maryadei. Yɨ sai Saataanɨ, Yɨkamaangei (Sɨwaakei). Yɨ ejelɨyai kabaraawarya dazarɨ yune kwarame 1000 waanɨ taawɨzanɨya kalavuza' yɨramwaaihya'nerɨ kwaari'ma'magazaawanyasɨ wɨla galapwɨyɨna yaka 3sahwarɨ yɨrorɨla daanga maayavɨ kewɨnɨnna maralɨvaranna kyɨwa' sarei kewɨnɨnna walaawɨna. Maralɨvaranna yaka a'badaa'nyɨ kaanya' sahwarɨ yɨlarihɨ'na yaka dɨragɨnna jɨbwekɨna, baave' wakɨna. Saataanɨ kwarame 1000 bawodehaa'na ajɨmya yuyangɨya a'mweraavɨ kwaasɨ ayɨna muja'nerɨ kaanya' jɨbwekɨna. Yɨ dɨvi sagaa' kwarame 1000 mena kabwawojɨ ejelɨyai yɨralavadelyɨ. Yɨ sai yaasɨwa' yamarina yadelyɨ yune maalɨkegaa'na.

4Yɨ nɨmɨ tɨnna wanganna yadaazɨ kingɨnamwaalyɨta pɨnɨ wa'dɨ'nyɨyangɨ yɨ pwara yɨlamwaaiha'. Sara kotɨyavɨ maryawɨbwarya'neraavɨ Gotɨyai sasare wawɨnyavɨne dɨragɨnya' wɨjaawakera. Nabaai nɨmɨ tɨnna wanganna yadaazɨ a'mwe kwalaalyaraavɨre kuryara. Sahwara Jizaazarɨna nayaa jalɨkurakevera, yɨ Gotɨyare yagaalya' dɨragɨnna lɨmwagarevera. Yune sahɨrɨvɨne'na yɨkamaangera sahwaraavɨ pwaraavɨre tɨlɨnnya woripuresara. Yɨ sahwaraavɨ pwaraavɨ tamakɨna yesare. Yɨ sahwara sɨgyaaryarɨ lotuya myadɨvɨ' yɨ gamɨre a'mwa'mwerɨjɨ lotuya mi. Yɨ sahwara gamɨre baave' kumɨre yamengɨjɨ kumɨre asangɨjɨ mamaaryevera. Yɨ sahwara balesara gaalya' ayɨna maareva yɨ kwarame yune 1,000 dazagaa' Kɨraazɨtɨyalyɨ kingɨya mwaaiha'. 5Daza' yɨ a'mwera ayɨna dɨkaapɨ'dehaa' aaya mudɨ'nanyagaakɨ. Dazagaa' a'mwe bainɨka pwara gaalya' mamariwaa'. Sahwara yemwaala yɨga' kwarame 1,000 sagaa' mena kabawojɨne'na. 6A'mwera ayɨna dɨkaapɨ'de aaya mudɨ'nanya dazagaa' sahwara yɨlaaya yadɨvɨ' tewaanaanga winadera mwaalapɨjɨ yɨ Gotɨyare tewaanyara nawɨ'nya tewaanya mwaaibɨ'dere. Yɨ nabaai baryabwi sa' pɨgasaalya' a'mwe dazaraavɨ marulawakya'ne dɨragɨnya maayasɨ. Aawa. Sahwara Gotɨyarɨna mubɨthɨka yɨra'dɨvɨsare. Yɨ Kɨraazɨtɨyarɨna yɨra'dɨvɨsare. Nabaai sahwara kwarame waanɨ taawɨzanɨya sagaa' Kɨraazɨtɨyalyɨ kingɨya ye'mwannamwaaibɨ'dere.

Saataanɨmɨ wavɨlavade'nesɨ

7Dɨvi kwarame 1,000 waanɨ taawɨzanɨya sagaa' mena kabwawojɨ gamɨre kalavuzɨangevɨya kaadihɨsa' kabaasojɨ Saataanɨ gamɨre kalavuzavɨ yagalya'mavadelyɨ. 8Sarei mwasɨlaa walyaabozɨ a'mwe ajɨmya yuyangɨyaraayawɨnna kwaasɨ yagaala wɨja'nei wɨna. A'mwe kwaakevɨya tɨvimagɨnya dawaai dawaalyabanyara yɨ Kwaakevakɨya yunewɨnyara yɨ Gohɨyarajɨ Maahohɨyarajɨ saraayawɨnna wɨna. Saataanɨ sahwaraavɨ mala bwa'nya'neraavɨ mari'bwarɨmwaaihadere. Kumɨre ata gɨlya saalaalyavɨ maangebaarɨya siweka sabɨsangɨ. 9Sarera kwaaka saba yuneba yidaawadɨvɨ' Gotɨyare tewaanyaraavɨre wa'mwaryaba, anga naangeba Gotɨyarɨ tewaanya wɨvu'nɨvanɨkeba yɨ saba yuneba kurɨta gɨhɨ'mavamwaimwaataraavɨnera. Kɨrɨ' dɨke' Sɨgunyavɨdaa'nyɨ walaabozɨ mala bwa'nadaapiya saraavɨ dɨka nakɨwakeraavɨnera. 10Yuyaraavɨ Kotɨya Maryadei sahwaraavɨ kwaasɨ wɨdade'na sare'na Gotɨyai dɨ'bunya naange' dɨ'munange'na yadaa'nyɨyavɨ sɨla saalɨpaayavɨ nade savɨ kewɨnɨnna maralɨvaranna. Dɨ'bunya sa' sɨgyaarya dazalyɨ kwaasɨ wɨ'nawɨjɨwaakyabwi dade dazalyɨ saraai mena mwaaidakɨlyɨ dazahɨrɨvɨ. Sarevɨ daraai dala sara daanga naange' maapɨ'dere nyɨlyavɨjɨ sawɨsavɨjɨ yuyagaa' yuyagaa'ne'.

Naangegaa' maryawɨbwata naange' yɨma'nadevwinesɨ.

11Nɨmɨ tɨnna wanganna yadaazɨ kingɨnamwaalyɨta naanga yaake' wa'dɨ'nyɨ nabaai namwaalyɨta savɨ pwai yɨlamwaalɨ'. Sahwarɨ Kwaakevasɨ sɨgunyavasɨ lɨkaanya yenadaa'na yaka yɨmaanyɨna. Kɨrɨmɨ sawaareba kuneba. 12Nabaai nɨmɨ tɨnna wangadaazɨ yɨ a'mwe bainɨkera, kwaakewɨnyarajɨ munyabanyarajɨ sara mwaaidapiyara kingɨnamwaalyɨta dazavɨre kusɨmagɨ daavɨna. Nabaai namwaalyɨsavɨ yɨlamwaalɨkei sai bukuya pɨnɨngɨ tɨlaayɨna. Sai bukuya pɨrɨsɨ maarɨna. Bukuya si gaala mwaalya'ni. Bukuya sangɨ pɨkarya yɨda'nɨkengɨ tɨnna wanganaka kumɨre yeta yuya sabwina a'mwe bainɨkeraavɨ maryawɨbwa'mwakere. 13Saalaalya' gamɨnyɨ a'mwe yuya bainɨka mwaaihasaraavɨ ayɨna wɨjaavɨna. Nabaai Baryabulyɨ Bainɨkeraavɨre Angebajɨ sawaarɨ a'mwe yuya bainɨka wɨlamwaaidapiya saraavɨ ayɨna wɨjaavɨna. Mena ayɨna wɨjaavɨna kyɨwaai bainɨka saraavɨ gazaizarɨ gamɨre yake yune sabwina maryawɨbwata yɨwakere. 14Dɨ'bunya naangevɨ dɨka nɨvanɨka savɨna Baryabulyɨ Bainɨkeraavɨre Angebajɨ sawaai marasɨ'na yɨwakelyɨ. Dɨ'bunya naanga daza' barya pɨgasaalyasɨ. Ayawɨdaa'nyɨ balyasɨ daza'. 15Nabaai Naanga maryawɨbwa'dei a'mwe pwarɨne kwarɨne yayavɨ bukuya gaala mwaalya'ne sɨrɨ mabɨranganyojɨ sarevɨ, yɨthaanyi, a'mwe sarɨ marasɨ'na yɨwa' dɨ'bunya naanga dɨka nɨvanɨkevɨna.

Currently Selected:

Wɨjalangasakyaꞌ 20: byr

Highlight

Copy

Compare