Wɨjalangasakyaꞌ 21

Sɨgunya mudɨkevakɨnajɨ Kwaaka mudɨkevakɨnajɨ dɨnɨke'nesɨ.

1Yɨ nɨmɨ sɨgunya mudɨkevasɨ Kwaaka mudɨkevasɨ warɨkewaai wangamwa. Sare' dare'nanyɨ. Sɨgunya aayagaasɨyavasɨ Kwaaka aayagaasɨyavasɨ yunakaanna wɨna. Nabaai saalaalya' kɨrɨsɨ mwarina. 2Nabaai nɨmɨ tɨnna wangamwa anga tewaanya dazaba Jeruzaalemɨ mudɨkeba. Anga naanga dazaba Gotɨyai yasaabɨna kyɨwa' Sɨgunyavɨdaa'nyɨ anga daza' walaabɨna. Nɨgwɨlalaa'baaka nawɨ'nyajɨya', a'mwe' kwala maarya'ne' nɨgwɨlalaaka nawɨ'nyaange tɨda kwala maa'nya'negaa' gannya a'mwerɨna yemwaaidevaaibɨ' walaabɨna. 3Sare' nɨmɨ kadɨka wɨ'nyɨna yadaazɨ kingɨnamwaalyɨsavɨdaa'nyɨ maangwɨraaya pɨrɨ' yɨnyɨna. Yɨ jaka naanga dɨragɨnna dara dɨna “Yɨthaanyi! Dahaa' Gotɨyare selɨ ange' a'mwerajɨ ye'mwannamwaalɨka! Sahwaraavɨ tɨnnyaba waradesɨ. Yɨ gamɨre byaannya' kumɨnyɨ ye'mwannarɨka! Nabaai sahwara gamɨ sahwarera mwaaibɨ'dere. Yo, Gotɨyai gamɨ kwalyɨ ye'mwannamwaaladelyɨ. 4Kumɨre kɨdalaaibɨrɨka tɨnnyaraavɨ wɨwarɨke gazasa' yaalɨka yɨmwagathere. Baryabwi ayahi waradevwi mɨ'. Yɨ a'mwera ayahi baibɨ'dera mɨ'. Sɨmunya' taanga ayahi winadera mɨ'. Jakɨnna ayahi dɨpɨ'dera mɨ'. Daangejɨ maapɨ'dera mɨ'. Sɨnnawɨnya sa mena yuya yɨwɨna yɨwake'nanyɨ.”

5Kingɨnamwaalyɨta dazavɨ yɨlamwaalɨke sai dɨna “Yɨthaanyi! Nɨmɨ yuya sa mudɨke yavɨkarivanɨgengɨra.” Sara daka pɨrɨsɨ dɨna “Yagaala daza pɨkarya jɨthaka! Yagaala daza yuyara dɨragɨnna lɨmwabɨzannajɨ naanga nebulya'nanya warɨke'najɨ sara jɨthaka!” 6Sara daka nɨmɨnyɨ ayahi wɨdɨna “Yuya sa mena yɨma'nɨwaabɨkengɨ. Nɨmɨ sahwainyɨ, nɨmɨ aaya sɨnnawɨnyainyɨ (A). Aaya dɨvineinyɨ (Z). Nabaai yuya sangɨne'na aaya kaavɨlyainyɨ. Yuya dɨragɨnya sa yunebanna yɨ'mwannadɨnyainyɨ. Nɨmɨ sahwainyɨ a'mwe aalya'na mɨjɨka baimanɨkerɨna aalya yanga naanga wɨjaavɨdelyɨ. Aalya sa' nade'na aalɨyɨmɨnyavɨ gaala mwaalya'ne'. Nɨmɨre yanga naanga dazabwi sɨhumale yanga wɨjaavɨdelyɨ. 7Nabaai a'mwei mala bwa'nyaburɨ yunebanna wavɨlavajai yɨ nɨmɨre yanga naanga daza' maaradelyɨ. Ganɨmaangei gannya kaimɨraayaraavɨna wɨjaavadevaaibɨ' dathavwi maaradelyɨ. Nɨmɨ gamɨnyɨ Gotɨyainyɨ mwaalɨdelyɨ. Nabaai sai nɨmɨnyɨ nyɨbwaalɨvaangei wɨmwaaihɨwɨjai mwaaladelyɨ. 8Kɨrɨ' a'mwera lɨka yɨna Kɨraazɨtɨyarɨna ‘Aala! Nabaimudɨka!’ dɨna ayɨna gɨnyɨra'dɨvɨsarajɨ a'mwe dɨragɨnna malɨmwagaryadɨvɨsarajɨ a'mwe gɨrɨkita'nanya dala pɨnɨnna pɨnɨnna yadɨvɨsarajɨ a'mwengɨ a'mweraavɨ tamakadɨvɨsarajɨ a'mwe ata lɨmwadɨvɨsarajɨ a'mwe gɨri'nya yadɨvɨsarajɨ a'mwe kwaasɨgotɨyaraavɨ lotuya yadɨvɨsarajɨ a'mwe yuya kwaasɨ yagaala dadɨvɨsarajɨ sara kumɨnne tɨvɨkɨta daresɨ. Dɨ'bunya naangevɨ sɨla saalɨpaayavɨ dɨ'munange'na yarɨkevɨ sahwaraavɨ marasɨ'nadere. Sa' yɨ Baryabwi Ayawɨdaasasɨ.”

9Ejelɨya pwai, ejelɨya ata purɨdaa'nyɨ daraalyara dɨzɨya ata purɨdaa'nyɨ daraalyangɨ maangengɨ a'mweraavɨ kayaaka yɨgalya'ne yeku'naka aaya kɨnɨnnakerajɨya pwai, yɨ sai baka nɨmɨnyɨ dara wɨdɨna “Kaaja! Kwala maa'nya'ne sɨdɨraaya' Sipɨzipɨya Dɨwɨnyarɨne a'mwevɨna givwarɨdaakude'nanyɨ.” 10Sara wɨdɨna kanyɨwa' yɨ Kurya Tewaanyai nɨmɨnyɨ dɨragɨnya yɨvaimwanna kanyɨwa' ejelɨya sai mugunya naanga ke'mwewɨnya pɨrɨvɨna nɨmɨnyɨ makuna. Sara nyaka Anga Naange' Jeruzaalemɨ Nawɨ'nya dazaba yɨbwarɨdaakuna. Anga daza' Gotɨyai yasaabɨna kyɨwa' Sɨgunyavɨdaa'nyɨ anga daza' walaabɨna. 11Gotɨyare byaanna naange' anga naanga dazaba mwadaavɨna. Savɨre baaka wanyɨwanya' yuna nabinya pɨrɨ'bɨsa' wanyɨna, sɨla nɨgwia naanga mubadɨvɨta sangɨre baaka sa'bɨ' wanyɨna. Yɨ daza' sɨnɨmwavanahurɨka naangebɨsa', yɨ wana tɨrɨmaaya nebulya'nanya' sɨgujaaka sɨrɨmya'bɨsa' wanyɨna. 12Anga naanga dazaba sikurɨta naanga yɨnɨke' yune ke'mwewɨnanya'. Kurɨta savɨ tɨkurya atɨraai sɨvɨlyɨrɨdaa'nyɨ pwaraalya warɨna. Sare' nabaai tɨkurya pɨrɨvɨ ejelɨya pwai aya kɨba gaidaa'na. Pɨrɨvɨ pwai, pɨrɨvɨ pwai gaidaa'na. Yɨ yuyangɨ ejelɨya atɨraai sɨvɨlyɨrɨdaa'nyɨ pwaraalyara aya kɨba gaidaa'na. Nabaai tɨkuryangɨ Yɨzɨrelɨyaraavɨre yɨsavaakɨdaa'nya atɨraai sɨvɨlyɨrɨdaa'nyɨ pwaraalyavakaavɨne yaya pɨkarya yɨda'nɨkengɨra. 13Sikurɨta nyɨlyai bilyɨrɨ'dimagɨ kaadihɨta dawaai dasa' daavɨna. Nabaai sikurɨta pimagɨnyavɨ kaadihɨta dawaai dasa' daavɨna. Nabaai sikurɨta pimagɨnyavɨ kaadihɨta dawaai dasa' daavɨna. Nabaai sikurɨta nyɨlyai walakadimagɨ kaadihɨta dawaai dasa' daavɨna. 14Sihurɨta anga naanga dazabanne sa' kaavɨlyawɨ sɨla dɨragɨnya yɨvaimwagya'ne atɨraai sɨvɨlyɨrɨdaa'nyɨ pwaraalya kɨnɨnnakesɨ. Nabaai sɨla saraavɨ Sipɨzipɨya Dɨwɨnyare Wɨdaasade atɨraai sɨvɨlyɨrɨdaa'nyɨ pwaraala saraavɨne yaya kɨnɨnnakengɨra.

15Ejelɨya dazai nɨmɨjɨ yagaala ye'mwannadɨna yɨvanɨkei yɨta golɨyagɨnyarɨ' lɨmwagɨkei. Anga naanga saba kaadihɨsangɨjɨ sikurɨsavɨjɨ yaamɨjɨyɨta ya'nerɨ' lɨmwagɨkei. 16Anga naanga dazaba yuna gɨrɨla'nya yɨvanɨka. Gamɨre saamɨnyavasɨ gamɨre naangevasɨ yuyavakaai avaainanyavakaalyɨ. Sahwai gamɨre yɨsarɨsɨ yaamɨjɨta yɨna kyɨwa' anga naanga sabanya saamɨnyava' sɨtethɨya tɨwelɨvɨ taawɨzanɨya yɨma'nyɨna (2,400 kilomitaaya). Saamɨnyavasɨ sikurɨsavɨya naangevasɨ anga naanga dazabanne yunebanya' munya ke'beva yɨlaawɨna yɨnɨkebajɨ yunebanya yuya sa avaainanya. 17Nabaai sikurɨta kɨrɨvɨjɨ yaamɨjɨta yɨna yɨwake' sikurɨsa' yune angajɨna 144 kyuvitɨya (72 mitaaya) yɨma'nyɨna. Metaaya daza' a'mwera yuyangɨ metaayɨmɨya yadɨvɨsa' avaalyasɨ. Ejelɨyai yaamɨjɨyɨta sa' sikurɨsavɨ yune metaaya sahɨrɨsɨna yɨwakesɨ. 18Anga naangebanya sikurɨsa' Gotɨyai sɨla nawɨ'nya jaazɨpaayasɨ yavɨkaryakesɨ. Nabaai anga naanga saba yune golɨyasɨna yavɨkaryakebe. Sarevɨ anga naanga saba sɨnɨmwavanahurɨke'bɨ' bwamwadɨwɨna. 19Anga naanga saba sikurɨkevɨ kaavɨlyawɨ sɨla nawɨ'nya dala nabinabinya nɨgwia naanga mubadɨvɨsajɨ Gotɨyai yɨwaala yɨwagakengɨ. Aayagaasa (1) sɨla nawɨ'nya sikurɨsavɨ kaavɨlyawɨnyai jaazɨpaayai. Nabaai ayawɨdaa'nyai (2) sɨla gwaagwaaja sapaayai. Nabaai daraai dalyai (3) sɨla ahetɨyai. Nabaai daraai daraalyai (4) sɨla yɨkɨwa'ja emeralɨyai. 20Nabaai atɨlyai (5) sɨla wayaakejɨsɨ yaakejɨsɨ warɨke saathonɨkɨzɨyai. Nabaai ata purɨdaa'nyɨ pwainanyai (6) wayaaka tawaja konyilɨyanɨyai. Nabaai ata purɨdaa'nyɨ pwaraalyai (7) sɨla awi'ja kɨrɨzolaaitɨyai. Nabaai ata purɨdaa'nyɨ daraai dalyai (8) sɨla saalaalyavɨ yɨjuza berɨlɨyai. Nabaai ata purɨdaa'nyɨ daraai daraalyai (9) sɨla nabinnanya awi'ja topaazɨyai. Nabaai atɨraalyai (10) sɨla yɨkɨwa'jajɨsɨ awi'jajɨsɨyai kɨrɨzopɨrezɨyai. Nabaai sɨvɨlyɨrɨdaa'nyɨ pwainanyai (11) sɨla nabinnanya gwaagwaaja aayazɨdɨyai. Nabaai sɨvɨlyɨrɨdaa'nyɨ pwaraalyai (12) sɨla nabinnanya wayaaka ametɨzɨyai. 21Kaadihɨta atɨraai sɨvɨlyɨrɨdaa'nyɨ pwaraala sa nabaai kwaalɨturyaanga mubya naanga yadɨvɨta sɨvɨlyɨrɨdaa'nyɨ pwaraalyangɨ. Kaadihɨta gazasa' yɨ sa' kwaalɨturyaanga naanga yune pɨrɨsɨna yavɨkarinɨkesɨ. Anga naangeba tuta yuyangɨ yune golɨya'nanyasɨ. Golɨya gɨrɨ'maaya' widɨwaayavɨre gɨlaazɨya'bɨsasɨ.

22Anga naanga dazavɨ Gotɨyarɨne Anga nawɨ'nya' tɨnna mwanganyɨwa. Mamannyɨka sare' dare'nesɨ. Naangei Gotɨyai Dɨragɨnya Yuya Kɨnɨnnakei, yɨ Sipɨzipɨya Dɨwɨnyalyɨ Gotɨyarɨne Anga nawɨ'nyasɨ. Gazabazaba yɨlaaya wiadɨvɨsa'nanyɨ. 23Nabaai anga naanga dazaba wanyɨwanya ya'na nyɨlyalyɨ lawelyɨ saraarɨna wɨgainadeva mɨ'. Sare' dare'nesɨ. Wanyɨwanya yune naanga Gotɨyare'na wannadevanna anga saba. Yɨ gamɨre byaannya' wannadeva. Nabaai Dɨwɨnyai sahɨbanne wanyɨwanya dɨ'baakelyɨ. 24A'mwe ajɨmya yuyangɨyara anga naanga dazabadaa'nya wanyɨwanya baakevɨ kaanya yamaripɨ'deve. Nabaai kingɨya Kwaakevakɨyara sahɨbanne kumɨre nɨgwɨlalaakejɨ byaannyajɨ makabɨpɨ'deve. 25Yɨrɨkegaa' sikurɨta savɨya kaadihɨsangɨ kaanya tihɨpɨ'de mɨ'. Arɨkewɨ. Yuyagaa' basɨnadaa'na yade. Sare' dare'nesɨ. Anga naanga saba sawɨsa' jɨnnadeva mɨ'. 26Sahɨbanna ajɨmya yuyangɨya byaannyajɨ yaya munyaba makɨlya yuyabulyɨ makwibɨ'dengɨ. 27Gɨlyɨvɨta gɨrɨ'naka aane pɨrɨ' kɨrɨ' wɨlade' mɨ'. Gotɨyare tɨnnyarɨ wana butɨrɨnya winnɨkebwi yade aane pwai kwai aane pɨrɨ' kɨrɨ' wɨladei mɨ'. Kwaasɨ yagaala yade aane pɨrɨ' kɨrɨ' aane pwai kwai wɨladei mɨ'. Arɨkewɨ. A'mwe kumɨre yaya bukuya gaalya'nyɨrɨ Dɨwɨnyare bukuyɨrɨ yɨda'nɨkera, yune a'mwe dazahwarana wibɨ'dere anga naanga dazabanna.

Currently Selected:

Wɨjalangasakyaꞌ 21: byr

Highlight

Copy

Compare