Wɨjalangasakyaꞌ 19

Sɨgunyavɨ “Aawi!” daata dadɨvɨ' Gotɨyarɨna yɨlaaya yesa'nesɨ.

1Sahɨnɨngɨ dɨvidaa'nyɨ jaka naangebɨsa' Sɨgunyavɨ kwala naangeraavɨre' nɨmɨ kadɨka wɨ'nyɨna. Yɨ sahwara dara dɨna

“Nemɨ Gotɨyarɨne yaya' munyaba makɨlaa! Aaleluya!

Nemɨre Gotɨyai yune gave sahwaina nevadaihasamaarya'nebulyɨyai!

Byaanna kɨnɨnnakei dɨragɨnyabwi kɨnɨnnakei yune mwaalɨkei!

2Dare'nanyɨ. Gotɨyai maryawɨbwa'denna nebulyabwi yunewɨnna yɨda'maraangesɨ.

Yaasɨwa'na maradakunamaryade naange' Kwaakevakɨyaraavɨ kayaaka yɨgalakadesɨ.

Gamɨre gɨrɨkita'nanya sabulyɨ sahwaraavɨ kayaaka yɨgaidesɨ.

Sarevɨdaa'nyɨ Gotɨyai sahɨrɨvɨ daanga kayaa'nanya' tɨvɨkɨ'mwake'nanyɨ.

A'mwe daza' Gotɨyare yaasɨwa'wawɨnya saraavɨ tamakadesɨ.

Kumɨre tawe'na gannya yɨwetawakya daza' tɨvɨkɨ'mwakesɨ.”

3Yɨ sahwara pɨgasaai jaka ayahi dara dɨna

“Nemɨ Gotɨyarɨne yaya' munyaba makɨlaa! Aaleluya!

Dɨkevɨre jɨsa' anga naangeba dɨke' nɨvanɨ'.

Yɨ jɨta daza' munyaba yuyagaa' yuyagaa' yimanaawɨ'!”

4Yɨ a'mwe naanga atɨzɨvɨlɨraai yaka pware asɨrɨ daraai daraalyarajɨ gaala kɨnɨnnaka daraai daraalyarajɨ sara kwaakewɨnna walaruta'neva Gotɨyarɨna kingɨnamwaalyɨsavɨ mwaalɨkerɨna lotuya yɨna. Lotuya yɨna yadɨvɨ' dara dɨna

“Sahɨrɨsɨ. Nebula naangesɨ.

Gotɨyarɨne yaya' munyaba makɨlaana!”

5Yɨ Gotɨyare kingɨnamwaalyɨsavɨdaa'nyɨ maangwɨraaya pɨrɨ' jaka yɨnnɨgavɨna. Dara dɨna

“Gotɨyare yaasɨwa'wawɨnya yuyaihi

Gotɨyarɨna lɨka yadɨvɨsaihi

Kwaakewɨnyaihɨlyɨ munyabanyaihɨlyɨ saihi

Nemɨre Gotɨyarɨ munyaba dɨmakɨlyɨla!”

6Yɨ kwala naangera yɨ'bwa'nemwaaidapiya jake'bɨ', saawɨla naange yɨdaa'nyɨya jake'bɨ', yɨ'munya naange pidaa'nyɨya jake'bɨ' yɨ nɨmɨ kadɨka wɨ'nyɨna. Daza' jaka dɨna

“Nemɨ Gotɨyarɨne yaya' munyaba makɨlaa! Aaleluya!

Naangei nemɨre Gotɨyai Dɨragɨnya Yuya Kɨnɨnnakei

Dahaa' sai kingɨya nebulyai yuna mwaalɨke'nanyɨ.

7Dahaa' nemɨre munyɨ' nawɨ'nya yɨna yawaajɨ

Yɨ nemɨ yɨlaaya naanga kuna yawaajɨ

Gamɨnne byaannya' munyabanna nayaa makɨlaa!

Yɨrɨkegaa' Dɨwɨnya Sipɨzipɨyai kwala maarya'negaa' yɨma'nɨwa'.

Yɨ gamɨre a'mwe' gamɨza' yavada'gainya yɨwa'.

8Gotɨyai savɨna baazɨ'ma'nya yaake' wɨjaavɨna yɨwa'.

Baazɨ'ma'nya wana nawɨ'nya' wana lɨvamwaja yadaasɨya'

Wana tɨrɨmaaya nebulya' gannya kɨlaakejɨkɨ wakɨwa'.”

Sare' dare'nanyɨ. Baazɨ'ma'nya yaaka nawɨ'nya daza' yɨ Gotɨyare tewaanyaraavɨre wawɨnya yɨda'maraangengɨra.

9Yɨ ejelɨyai nɨmɨnyɨ wɨdɨna “Yagaala datha' pɨkarya jɨtha'! A'mwe dazara Gotɨyai jaka jɨvwaramaarakera munne naangevɨ Dɨwɨnyai kwala maarya'nevɨna bɨwaasara yɨlaaya yadɨvɨ' tewaanaanga winadere.” Yɨ sai nɨmɨnyɨ wɨdɨna “Yagaala daza yɨ sa yagaala nebulya'nanya Gotɨyarengɨ.” 10Sara wɨdɨna kanyɨwa' nɨmɨ kwaakewɨ gamɨre sɨvɨlyɨraaryaba gidɨkusaba walaruta'nyɨna. Yɨ nɨmɨ sahwarɨna “Lotuya yɨma!” dena kɨrɨ' sai nɨmɨnyɨ wɨdɨna “Gɨmɨ sasara minna! Gɨmɨjɨ gɨmɨre ja'mwera kwarajɨ yaasɨwa'wawɨnya ye'mwannawɨdaayadɨnyainyɨ. Sarɨmɨ Jizaazarɨna dɨragɨnna lɨmwadɨvɨ' yɨ wɨjalɨkurakadɨvɨsaihɨlyɨ. Sasareihɨre avaaiwawɨnyainyɨ. Yɨ Gotɨyai yune gave pwainanyarɨ lotuya nayaa dɨragɨnna jɨ! Sare' dare'nesɨ. Jizaazarɨna wɨjalɨkurakyabwi yɨ Kurya Tewaanyai wɨ'nawɨjɨwaakyaraavɨ yɨdɨka'daa'nyɨ wɨjɨwaakadɨvɨta sasare dazabulyɨ.”

A'mwei ozɨya yaakerɨ munyaba yɨlamwaalake'nesɨ.

11Yɨ nɨmɨ tɨnna wangadaazɨ Sɨgunya' kaanya basɨnadaa'na yɨnɨkevɨ, yɨthaanyi, ozɨya yaaka pwai mwaalɨna. Sarɨ a'mwei yɨlamwaaina. Gamɨnne yaya' yɨ darei. Gotɨyare yawɨta yuyangɨ nayaa lɨmwaga'dei, yɨ nebulya'ne aaya kaavɨlyai. Nabaai sai yune yɨda'maraangeburɨna pada'galamɨdɨdevɨ yɨ a'mweraavɨ kotɨyavɨ maryawɨbwa'da yɨ sai malya' bwa'delyɨ. 12Gamɨre tɨnnyai dɨtaalɨsa'. Gamɨre mɨnyagɨnyavɨ kingɨmwaaihɨ'nya kwalaalya warɨke. Gamɨnne yayavɨne pɨkarya' kɨnɨnnakei. Yaya dazavɨ aaya kaavɨlya' gamɨ gave yune sahwaina yawɨ'delyɨ. Yɨ a'mwe pwara aawa. 13Gamɨre baazɨ'ma'nya yunewɨnna yalawakya saamɨgwazaaya gamɨ wakɨka sa' tawevɨ jɨwɨnɨkesɨ. Yɨ sahwarɨne yaya' dara wo'nɨkesɨ. Gotɨyare gamɨnyɨna Yagaalyala! 14Aamiya Sɨgunyavɨyara kunnya ozɨya yaakeraavɨ yɨlamwaaina yeva sahwarɨ dɨvidaa'nyɨ mɨdɨnna. Kumɨre kɨlaakejɨkaavɨ baazɨ'ma'nya yaaka wana gɨrɨ'maaya nawɨ'nyaange yɨra'nevera. 15Yɨ ozɨya yaakerɨ yɨlamwaalɨka dazare maangevɨdaa'nyɨ kwaari'masɨramɨnya walyaabɨnɨke'. Kwaari'masɨramɨnya daza' saamɨgwazaaya' wana lɨka gurɨmaanga dɨ'bwarakɨnɨke'. Yɨ nabaai dazasɨ sai a'mwe ajɨmya yuyangɨyaraavɨ tamakade'nanyɨ. Yɨ nabaai gamɨ sai yɨta aayɨnɨyarɨ' lɨmwagarojɨ sahwaraavɨ dɨragɨnna maremwaaladelyɨ. Nabaai gamɨ sai sɨla naanga gɨraipɨya tɨma'mwanga ya'nevɨ waainɨya' gɨla'mwagathelyɨ. Waainɨya daza' yɨ Gotɨyai Dɨragɨnya Yuya Kɨnɨnnakere sɨmɨlɨka naangevɨne sɨnna tɨka wɨdaya'. 16Sai gamɨre baazɨ'ma'nyavɨ gamɨre tɨ'munyavɨ gamɨnne yaya' pɨkarya yɨda'nɨkei. Yaya daza' yɨ dare'

“Yuya kingɨyaraavɨna Kingɨyai yuya naangeraavɨna Naangela.”

17Yɨ nɨmɨ tɨnna wanganna yadaazɨ nyɨlyarɨ ejelɨya pwai daavɨna yada yuta yuyara yɨraayavɨ munyaba pɨlavamaryadaapiyaraavɨ maangwɨraaya jaka naange' danganna. Yɨ sai dara dɨna “Sarɨmɨ yɨkabapi Gotɨyare munne naanga dathavɨ dɨzɨ'bwa'nyi! 18‘Yɨ a'mwe baimwaasaraavɨ tɨka naana! Yɨ kingɨyaraavɨre kɨlaakejɨkaavɨya mɨwɨsa, yɨ mɨwɨta aawɨlasaraavɨ maremwaaidɨvɨsaraavɨrejɨ, yɨ mɨwɨta a'mwe dɨragɨnaangeraavɨrejɨ yɨ mɨwɨta ozɨyaraavɨrejɨ a'mwe ozɨyaraavɨ yɨlamwaaihasaraavɨrejɨ tɨka naana!’ dapi dɨzɨ'bwa'nyi! ‘Yɨ nabaai a'mwe yuya pwara kwaraavɨre kɨlaakejɨkaavɨya, a'mwe kave mwaaihasaraavɨrejɨ a'mwe yaasɨwa'wawɨnyaraavɨrejɨ yɨ a'mwe maalɨkeraavɨrejɨ yɨ a'mwe naangeraavɨrejɨ mɨwɨta daza tɨka naana!’ dapi dɨzɨ'bwa'nyi!”

19Yɨ nɨmɨ tɨnna wanganna yadaazɨ sɨgaarya dazalyɨ yɨ kingɨya Kwaakevakɨyarajɨ kumɨre aamiya aawɨlasara kwarajɨ sahwara mena yɨ'bwa'nyɨna. Sahwara “Mala bwa'naade'nana,” deva “A'mwe ozɨyarɨ yɨlamwaalɨka dazalyɨ gamɨre aamiya aawɨlasarajɨ sahwara mala ye'mwannabwa'naade'nana,” deva mena yɨ'bwa'nyɨna. 20Yɨ'bwa'nyɨna kyɨwaa' kɨrɨ' ozɨyarɨ yɨlamwaalɨkei sɨgyaaryarɨjɨ wɨ'nawɨjɨwaakade kwaasɨ dadei sɨgyaarya dazare tɨnnyarɨ yɨjɨwaala kwalaalya yaderɨjɨ wɨla galyɨ'na yɨwa'. Yɨ kwaasɨ yɨjɨwaaide sasare dazaburɨ wɨ'nawɨjɨwaakade kwaasɨya dazai a'mweraavɨ sɨgyaaryare baave' maarevera yɨ gamɨre a'mwa'mwe savɨ lotuya yevera saraavɨ kwaasɨ wiakebulyɨyaraai. Sɨgyaarya dazarɨjɨ kwaasɨya wɨ'nawɨjɨwaakade dazarɨjɨ sara galyɨ'na yaka saraai gaala kuna mwaaihɨlyaraarɨ dɨ'bunya naangaangevɨ dɨ'daanya naange' nɨvanɨkevɨ sɨla saalɨpaaya' nɨvanɨkevɨ kewɨnɨnna maralɨvaranna yɨwa'. 21Yɨ dazai ozɨyarɨ yɨlamwaalɨka dazai a'mweraavɨ kwaari'masɨramɨnya daza' gamɨre maangevɨdaa'nyɨ walyaabɨnɨka dazasɨ tamakɨna yakere. Yɨ yuta yuya dazara a'mwe dazaraavɨre mɨwɨsa tɨka maranyɨna yeva yɨ kumɨre munyɨ' yunebanna winyɨna.

Currently Selected:

Wɨjalangasakyaꞌ 19: byr

Highlight

Copy

Compare