Wɨjalangasakyaꞌ 18
18
Anga naanga Bavɨlonɨ kayaaka yɨnake'nesɨ.
1Sangɨ dɨvidaa'nyɨ nɨmɨ tɨnna wanganna yadaazɨ ejelɨya pwai Sɨgunyavɨdaa'nyɨ walaabɨna. Sai dɨragɨnya naanga nebulya' kɨnɨnnakei yɨ gamɨre byaanna Kwaakevakɨ lɨvamwaja naanga yɨwa'. 2Sai maangwɨraaya naange' jaka dɨragɨnna dara dɨna
“Mena bwala'mwa'. Anga naanga Bavɨlonɨ mena bwala'mwa'.
Anga naanga Bavɨlonɨ saba kayaaka mena yɨmwa'.
Dahaa' anga saba yɨmakera mwaaidɨvɨsaba yɨma'nɨwa'.
Kulaka kayaa'nanya gazaizalyɨ saba kave mwaaidɨvɨsaba
Yuta gɨrɨkita'nanya gazaizalyɨ kayaa'nanya gazaizalyɨ mwaaidɨvɨsabane!
3Dare'nanyɨ. Ajɨmya yuyangɨyara gamɨre waainɨya' nesa'nanyɨ.
Waainɨya dɨragɨnya sa' gɨrɨkita'nanya kwalaalya nadɨvɨsasɨ.
Kingɨya Kwaakevakɨyara a'mwe dazasɨ gɨrɨkita'nanyabwi ye'mwannayadɨvɨsa'nanyɨ.
Mubɨwawɨnya Kwaakevakɨyara dazavɨ nɨgwia kwalaalya maa'dɨvɨsa'nanyɨ.
Dala pɨnɨnna pɨnɨnnanya gɨrɨkita'nanya sahɨrɨvɨre saburɨ
Nɨgwɨhɨraya kɨnɨnnakera nɨgwia naangejɨyara yɨma'nadɨvɨsa'nanyɨ.”
4Yɨ nɨmɨ kadɨka wɨ'nadaazɨ Sɨgunyavɨdaa'nyɨ maangwɨraaya pɨrɨ' yɨnyɨna. Yɨ sai dara dɨna
“Mwasɨlaanna dalyaabyi! Nɨmɨre a'mweihi dazavɨ dalyaabyi!
Gamɨre kayaa'nanyajɨ sahɨrɨsɨ ye'mwannemwaala nyɨpɨka!
Kayaa'nanyangɨre tɨvɨkɨta sahɨrɨsɨ gɨraku'nya nyɨpɨka!
5Gamɨre kayaa'nanya daza yaaye naange'bɨsangɨ.
Kuna yɨma'nɨgoda yune Sɨgunyavɨna yɨvanɨ'.
Gamɨre yɨwetawakyabwina Gotɨyai mena yawɨramaa'manɨ'.”
6“Pwaihi, daza' tɨvɨkɨ'devaaibɨ' yɨnɨgevwina nayaa dɨrɨvɨkɨri!
Gazabwizabwi yakenna tɨvɨkɨta pɨrɨwaalya nayaa dɨmaragɨra'mwagemwaalyi!
Sa' kaapɨyarɨ aalya kayaa'nanya dɨragɨnya' gɨnyɨwadesɨ.
Kaapɨyarɨne aalya gazasa' tɨvɨkɨta pɨrɨwaalya' dɨmaragɨra'mwagyi!
7Sa' yune gamɨnne yaya' munyaba makida
Kayaa'nanya dala pɨnɨnnanya kwalaalyabwi yadevaaibɨ'
Sarɨmɨ a'mwe savɨna daanga kwalaalya duzaayɨla!
Yɨnɨga wi'nanya gamɨre yade kayaa'nanya dazabwina
Kale kwalaalya wɨjaaya'na sarɨmɨ nayaa dɨrɨvɨkɨrila!
Gamɨre sɨmunyavɨna a'mwe sa' dara dadesɨ.
Kwinɨya'nyɨ mwaaihe. Nɨmɨ kingɨnamwaalyɨsavɨ yɨlamwaaihe.
A'mwei kabalojɨ yaanyɨwaake' mwaaidevaaibɨ' sasare'nyɨ mɨ'.
Kɨnna javwi, taanginyabwi nyɨma'naabathevwi mɨ'. Arɨkewɨ.
8Sarevɨdaa'nyɨ yune yɨrɨka gave pɨgaa'na wima'nadevulyɨ.
Kayaa'nanya dala pɨnɨnna pɨnɨnnanya sahɨrɨvɨ yɨma'nadengɨ.
Baryabulyɨ kɨnna kayaa'na jɨnaryabulyɨ mɨjɨkebulyɨ yɨma'nadevulyɨ.
Gotɨya Naangei maryawɨbwaradei wana dɨragɨnaangei mwaalɨke'na
Dɨke' Anga naanga Bavɨlonɨ savɨ nasɨ'na yadesɨ.”
9Kingɨya Kwaakevakɨyara sasɨ gɨrɨkita'nanyabwi ye'mwannayadɨvɨsara gamɨre kwalaalya wabahɨlaakebura ye'mwannayadɨvɨsara kɨnna, jakɨnna dɨpɨ'dere. Jɨsa' kyɨma'nojɨ dɨkevɨdaa'nyɨ yojɨ dɨke' savɨ wɨnadaawojɨ yɨ kingɨya dazara tɨnna wanganapɨjɨ yɨ nabaai sahwara kɨnna dadɨvɨ' yɨ kunnya kɨhɨsangɨ mala tannɨpɨ'dere. 10A'mwe sahɨrɨ' daanga kayaa'nanya' kamaarojɨ sahwara lɨka naanga yɨpɨ'dere. Sare'na yɨ sahwara sahɨrɨvɨ menyaba daavapɨjɨ yɨ dara dɨna
“We'! We'! Anga Bavɨlonɨgɨnyɨna kale neyɨwa'.
Gɨmɨ anga naangebagɨ, anga naanga dɨragɨnyabagɨ!
Yune aawaaya pɨrɨvɨna gɨmɨre jɨdasa' yɨma'nɨwa'.
Gɨmɨre wagɨlyavɨna tɨvɨkɨta kayaa'nanya da' gima'nɨwa'.”
11Yɨ a'mwe Kwaakevakɨyara mubya yadɨvɨsara anga naanga dazabanna sɨmunya yawɨrapɨri kɨnna dadɨvɨ' savɨna yɨ munyɨ' taanginyara mwaaibɨ'dere. Sare' dare'nanyɨ. Kumɨre gɨlyɨvɨsa ayahi mubathei aane pwai kwai mɨ'. 12Gɨlyɨvɨta daza yɨ golɨyasɨ sɨlɨvaayasɨ sɨla nawɨ'nyaangejɨ kwaalɨturyaangejɨ yɨ nawɨ'nyaanga kwaabɨyɨvɨta yaakejɨ kwaabɨyɨvɨta kingɨyarejɨ kwaabɨyɨvɨta paidapaide yɨ'de sɨlɨkaayajɨ kwaabɨyɨvɨta wana wayaakejɨ yɨ yuya yɨ'naanya dala pɨnɨnnanya wabatɨrɨnya kɨnɨnnakejɨ yɨ yuya tɨnna wangadɨvɨ' wabahɨlaaka yadɨvɨta elapaanɨyaraavɨre saanyaburaavɨ yavɨkaryadɨvɨsajɨ yɨta mubya naanga wakadɨvɨsa yavɨkaryadɨvɨsajɨ bɨraazɨya kwaari'mayagɨnyajɨ sɨla bwaihɨra'bwaihɨrata yɨnɨke kɨnɨnnake yavɨkaryadɨvɨsajɨ 13yɨ dawaryajɨ wabatɨrɨnya aamona' mɨjata purya'nesɨ kwaagɨta wabatɨrɨnya yɨravayɨhwia'nejɨ marazɨnanya dala pɨnɨnna pɨnɨnnanya tɨrɨnya kɨnɨnnakejɨ saadaaya nawɨ'nyajɨ yɨ waainɨyajɨ welivananya nya'nejɨ pɨlawaaya gɨrɨkula ya'ne nawɨ'nyasɨ witɨyasɨ yɨ bulɨmakaawoyarajɨ sipɨzipɨyarajɨ ozɨyarajɨ ozɨyara mwagi'namarya'nejɨ kɨlaakejɨsɨyara a'mwe gaala kɨnɨnnakerajɨ. Yuya daza ayahi mubɨpɨ'dera mɨ'. 14A'mwe mubya yadɨvɨsara dara dɨpɨ'dere “Tɨka munne daza maarya'na gɨmɨre sɨmunya' gɨthɨkaa'de yɨ yuya sa gɨmɨnyɨ gyahalya'mavaka kaanya mena wɨwa'. Yuya tɨka wapaaya nawɨ'nyanna nawɨ'nyannanya mubya naange kɨnɨnnakejɨ gɨmɨre yuya nɨgwɨlalaaka nawɨ'nyanna nawɨ'nyannanyajɨ yuya sa gɨmɨnyɨ mena gyahalya'ma'mwakengɨ. Nabaai gɨlyɨvɨta daza gɨmɨnyɨ ayɨna magwaryadori a'mwera tɨnna mwanganyɨ yɨpɨ'dengɨ. Aawa. Arɨkawɨ.” 15Yɨ gɨlyɨvɨta dazangɨ mubya yadɨvɨta dazara mubadɨvɨ' gamɨnyɨ nɨgwia kwalaalya maa'dɨvɨsara gamɨre daanga kayaa'nanya' maaradevɨna lɨka naanga yapɨjɨ gamɨnyɨ menyaba daapɨ'dere. Yɨ sahwara kɨnna dadɨvɨ' yɨ munyɨ' taanginya mwaaibɨ'dere. 16Yɨ sara yadɨvɨ' dara dɨna
“We'! We'! Anga Naangebagɨnyɨna kale neyɨwaka!
Kwaabɨyɨvɨta nawɨ'nyaangejɨ kingɨyaraavɨrejɨ wana wayaakejɨ
Yuya saza gɨmɨre kɨlaakevɨ paidapaide'na baazɨ'ma'nɨke'gɨ!
Yɨ sa'gɨ yune kɨlaakejɨkɨ yɨwaala yɨwannadɨ
Nɨgwɨlalaaka golɨyajɨ sɨla nawɨ'nyajɨ kwaalɨturyaangejɨ!
17Yune aawaaya pɨrɨvɨna gɨlyɨvɨkɨravɨnakebwi gihaimwake'na we'!
Nɨgwia yuya dazajɨ nɨgwɨlalaakejɨ kayaaka yɨnyɨna!”
Yɨ sɨpɨyavɨ maremwaala gazaizalyɨ yɨ a'mwe gazaizai sɨpɨya mubada pɨwɨnna kaanya wɨya'nelyɨ yɨ yuya sɨpɨyavɨ yadɨvɨsarajɨ yɨ saalaalyavɨ a'mwe yuyara mubɨwawɨnya kɨnɨnnakerajɨ a'mwe dazara Bavɨlonɨ menyaba daaveva 18dɨkevɨre jɨsavɨ sahɨrɨvɨ dɨke' wɨnadaasɨya' tɨnna wanganna yadɨvɨ' jake' dara danganna “Anga naanga dazaba avaainanyaba anga naangeba gava warɨka!” 19Yɨ sahwara kwaakevɨre tɨrya' kunnya mɨnyagɨnyangɨ lɨvama'nyɨna yeva kɨnna dɨna yeva yɨ munyɨ' taanginya yɨma'nyɨna yeva mwaalɨna yadɨvɨ' jaka dɨna
“We'! We'! Anga naangebanna kale neyɨwa'.
Nɨgwia naanga anga naanga dazabanyangɨne ma'daanyaina
Saalaalyavɨ sɨpɨyangɨ kuvɨnɨmaangeina nɨgwɨhɨravɨnakeina yɨma'nadaanyainera.
Yune aawaaya pɨrɨvɨna kayaaka yɨnɨwake'na we'!”
20Sɨgunya'gɨjɨ Gotɨyare tewaanyaihɨlyɨ yɨ Wɨdaasadeihɨlyɨ wɨ'nawɨjɨwaakadɨvɨtaihɨlyɨ dahaa' yɨma'nɨwake'na sarɨmɨ yuyaihi yɨlaaya jɨla! Gotɨyai sahɨrɨvɨ maryawɨbwaraka kayaa'nanya' tɨvɨkɨ'mwake'nanyɨ. Sarɨmɨnyɨ yɨhyaka sasare dazabwi tɨvɨkɨsa' wiwake'nanyɨ.
21Yɨ ejelɨya dɨragɨmaraanga pwai sɨla pwai maarɨna. Arɨnga sɨla naanga witɨya gɨla'mwadeibɨsai. Ejelɨya sahwai sɨla dazai munyaba makina yaka yɨ saalaalyavɨ kewɨnɨnna maralɨvaranna yaka yɨ sai dara dɨna
“Dɨragɨnna maralɨvaramwebaaibɨ' yɨkamaangera maarɨna yapi
Anga naanga Bavɨlonɨ kewɨnɨnna dɨragɨnna lɨvarabɨ'devera.
Savɨ a'mwera tɨnna ayahi pɨrɨsɨ bɨrawangabɨ'de' mɨ'.
22Gɨmɨnyaba pɨradayavɨre jakesɨ daata dadɨvɨta yagaalyasɨ
Gwarengɨrejɨ pihulɨyarejɨ kadɨka ayahi gu'nɨpɨ'dera mɨ'.
Aawa nebulyasɨ. Arɨkewɨ. Aane pɨrɨ' kɨrɨ' mu'nyɨna.
Wawɨnya dala pɨnɨnnanyangɨ sɨdu'nakeraavɨ ayahi bɨrawangabɨ'dera mɨ'.
Gɨmɨnyɨ sasarei mwaaidoriyai aane pwai kwai mamwaalyɨna.
Sɨlyare jake' witɨya gɨla'mwadaawori ayahi gu'nɨpɨ'dera mɨ'.
Gɨmɨre mɨjɨke'na tɨka wapaaya pɨrɨ' kɨrɨ' mwarina.
23Laamɨvananyavɨre dɨ'baake' gɨmɨnyɨ ayahi pɨrɨsɨ gɨvade' mɨ'.
Maangwɨraaya kwala maarya'nere' maa'nya'nevɨre' ayahi gu'nɨpɨ'de' mɨ'.
Gɨmɨnyaba sasareyore aane pɨrɨ' kɨrɨ' mu'nyɨna.
Dare'nanyɨ. Gɨmɨre mubɨwawɨnya kɨnɨnnakera Kwaakevakɨya naangera!
Ajɨmya yuyangɨyaraavɨ gɨmɨre gɨri'nyanna kwaasɨkuna wɨjɨwaalagɨnya'gɨ!
24Gamɨnyɨ yɨwetawakyaba tawe wɨ'nawɨjɨwaakyaraavɨresɨ Gotɨyareraavɨresɨ warɨ'.
Anga naanga dazaba sahwaraavɨ yune tamakadɨvɨsaba!
A'mwe Kwaakevakɨya yuyaraavɨjɨ tamakadɨvɨsaraavɨne yɨwetawakya warɨ'.”
Currently Selected:
Wɨjalangasakyaꞌ 18: byr
Highlight
Copy
Compare
Share
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
