Wɨjalangasakyaꞌ 17

Yaasɨwa'na maradakunamaryade naange' tɨvɨkɨta kayaa'nanya' maarake'nesɨ.

1Ejelɨya pwai, ejelɨya ata purɨdaa'nyɨ pwaraalyara dɨzɨya ata purɨdaa'nyɨ daraalya kɨnɨnnakeraavɨya pwai yɨ sai baka nɨmɨnyɨ dara wɨdɨna “Kaaja! A'mwe yaasɨwa'na marapɨnamaryade naange' aalya kwalaalyangɨ yɨlamwaalɨke' gannya tɨvɨkɨta kayaa'nanya' maaradevɨna givwarɨdaakude'nanyɨ. 2A'mwe dazasɨ Kwaakevakɨya kingɨyara gɨrɨkita'nanyabwi yadɨvɨsa'. Yɨ a'mwe yuya Kwaakevakɨyara sara kwarajɨ a'mwe dazavɨre waainɨya' ye'mwannanadɨvɨsare. Yɨ waainɨya sa' gamɨre gɨrɨkita'nanyabwi. Yɨ sara yeva a'mwei biyaaya nada yɨmaka widevaaibɨ' sahwara yɨraataate lawalawe yɨma'nyɨna yesare.”

3Yɨ Kurya Tewaanyai nɨmɨnyɨ dɨragɨnna bulamwaaina kanyɨwa' ejelɨya sai kwaaka a'mwera maayabanna nɨmɨnyɨ makuna. Yɨ dazɨmagɨ a'mwe pɨrɨ' sɨgyaarya wayaaka pwarɨ munyaba yɨlamwaaidɨ'nyɨ nɨmɨ tɨnna wangamwa. Sɨgyaarya dazai yɨ sai yaya kwalaalya kɨnɨnnakei gamɨre kɨlaakejɨkɨ. Yɨ yaya yuya daza yɨ Gotɨyarɨna bɨraiyagaala dala pɨnɨnna pɨnɨnnanya. Yɨ sɨgyaaryai mɨnyagɨnya ata purɨdaa'nyɨ daraalya kɨnɨnnakei yaka mɨnyagɨzaanya atɨraalyajɨyai. 4A'mwe daza' baazɨ'ma'nya kingɨyaresɨ wayaaka nabinnanyasɨ wakɨnɨke' yɨ dala pɨnɨnna pɨnɨnnanya nɨgwɨlalaaka golɨya kɨnɨnnake', yɨ nɨgwɨlalaake sɨla nawɨ'nyaangejɨ turyaanga kwaalɨke'bɨta paidapaide yɨra'nadejɨya'. Sa' gamɨre asɨrɨ yɨ kaapɨya golɨyai lɨmwagarɨke'. Yɨ dala pɨnɨnna pɨnɨnnanya Gotɨyare tɨnnyarɨ wana butɨrɨnya winnɨkebwi yɨ a'mwe dazavɨre dala pɨnɨnna pɨnɨnnanya gɨrɨke gɨrɨkita'nanya yadevwi kaapɨya dazarɨ yunebanna yɨ'nadɨ'nyɨ. 5Yɨ gamɨnne yayavɨna gamɨre yamevɨ pɨkarya' wa'dɨ'nyɨ. Yaya daza' yulyakɨyagaalya' kɨnɨnnake', yɨ yaya yɨdasa' sa' daresɨ. Anga Naanga Bavɨlonɨ. Yaasɨwa'na marapɨnamaryadɨvɨta yuyangɨ kuvɨnaange'. Yɨ Kwaakevakɨya wana butɨrɨnya winnɨke yuyaburaavɨ aaya kaavɨlya'. Yɨ yaya saresɨ. 6A'mwe daza' Gotɨyare tewaanyaraavɨ tamakadesɨ. Yɨ a'mwera Jizaazarɨ dɨragɨnna lɨmwaga'dɨvɨ' gamɨnyɨna yune jalɨkurakadɨvɨsaraavɨ tamakɨna. Yɨ a'mwe daza' kumɨre tawe nada (tamakada) yɨmaka widaasɨ tɨnna wangamwa.

Yɨ nɨmɨ dazavɨ tɨnna wanganena yɨ lɨka yɨwaainena atɨka naanga maru'na'na. 7Atɨka naanga maru'na'na kyɨwa yɨ ejelɨyai nɨmɨnyɨ wɨdɨna “Atɨka be'na maru'na'mwaa? Yɨ sawaarɨne yoimavajalɨkurakyavɨ aaya kaavɨlya' givwarɨdaakudeinyɨ. Yɨ a'mwe dazavɨnajɨ yɨ sɨgyaarya mɨnyagɨnya ata purɨdaa'nyɨ daraalya kɨnɨnnakei yaka mɨnyagɨzaanya atɨlyajɨyai a'mwe dazavɨ kaanya makuvanɨkerɨnajɨ givwarɨdaakudeinyɨ. 8Yɨ sɨgyaarya dazarɨ tɨnna mena wangamwaanyai yɨ kɨgaakuna sai mwalyaakei, yɨ dahaa' sai mamwaalyɨ'. Kɨrɨ' dɨvi yɨ sai yɨrorɨla daanga maaya dazavɨdaa'nyɨ yidaavadelyɨ. Yɨ yɨlaabathei kayaaka yuya yɨwɨna yadelyɨ. A'mwe Kwaakevakɨyara Gotɨyai Kwaakeva' wakyaakegaa' gamɨre bukuya gaala mwaalya'nirɨ kumɨnne yaya' myavɨkaryaakera. A'mwe dazara sɨgyaarya dazarɨ wanganapɨjɨ sahwara atɨka maru'na'na. Sɨnnawɨ sai mwalyaakei, yɨ dahaa' mamwaalyɨkei, yɨ dɨvi yɨma'naabathe' atɨka maru'na'na.

9A'mwe sɨmunya kɨnɨnnakeinyɨ daakajɨ, datha' yɨnɨga wi'na pada'galayawɨrana! Mɨnyagɨnya ata purɨdaa'nyɨ daraala daza mugunya ata purɨdaa'nyɨ daraalyangɨ. Yɨ a'mwe daza' mugunya dazangɨ yɨlamwaalɨkengɨ. 10Nabaai mɨnyagɨnya daza kingɨya ata purɨdaa'nyɨ daraalyare. Maremwaaidɨvɨsaraavɨya atɨlyara kayaaka mena yɨneva (bwalareva) yɨ pwai dahaa' mwaalɨkei, yɨ pwai kingɨya mima'naabyɨnanyɨ. Dɨvi sai mena yɨma'naabozɨ yɨ sai yune maalɨkegaa'na nayaa mwaaladelyɨ. 11Yɨ sɨgyaarya dazai sɨnnawɨ mwalyaakei, yɨ dahaa' mamwaalyɨkei yɨ gamɨ sai kingɨya ata purɨdaa'nyɨ daraai dalyalyɨ. Kɨrɨ' sai kingɨya ata purɨdaa'nyɨ daraalyaraavɨne kwai yɨ nabaai sai yɨnahu yɨwɨna yadelyɨ.

12Yɨ mɨnyagɨzaanya atɨraalyangɨ gɨmɨ tɨnna wangamwaanya, sa yɨ kingɨya atɨraalyara yɨma'nya'nerera. Sahwara kingɨya mamwaalyaraavɨ. Aawa. Sahwara sɨgyaarya dazalyɨ kingɨya dɨragɨnya' maapɨ'dere. Yɨ yune aawaaya pɨrɨvɨna (maalɨkegaa'na) kingɨya mwaaibɨ'dere. 13Dazara kumɨ sɨmunya avaala pɨbwinanyare. Yɨ sahwara kumɨre dɨragɨnyasɨ kumɨre maremwaalya'ne dɨragɨnyabulyɨ sɨgyaaryarɨna yanga wɨjaavɨpɨ'dere. 14Sahwara sɨgyaarya dazalyɨ gaidaa'na yɨpɨ'dera Sipɨzipɨya Dɨwɨnyalyɨ mala bwa'nɨpɨ'dere. Yɨ nabaai sahwaraavɨ Dɨwɨnyai malya' nebulya'na wavɨlavadelyɨ. Sai yuya naangeraavɨna Naangelyɨ. Yɨ sai yuya kingɨyaraavɨna Kingɨyalyɨ. Sare'na sahwai wavɨlavadelyɨ. Yɨ nabaai Dɨwɨnyai gannyarajɨ mala daza' wavɨlapɨ'dere. Sahwara jaka jɨvwaramaa'nɨkera, yune gannyara dahɨlakɨnɨkera, gamɨnyɨ dɨragɨnna lɨmwaga'dɨvɨsare.”

15Yɨ ejelɨya sai nɨmɨnyɨ wɨdɨna “Gɨmɨ tɨnna mena wangamwaanya aalya kwalaalya daza a'mwe yaasɨwa'na marapɨnamaryade' munyaba yɨlamwaalɨke, yɨ a'mwe kɨlaaka dala nabinyajɨ'jɨyarajɨ yɨ kwala bwa'naanyangɨyarajɨ yɨ ajɨmya yuyangɨyarajɨ yagaala ge gejɨyarajɨ sarera. 16Yɨ mɨnyagɨzaanya atɨraala dazangɨ tɨnna mena wangamwaanya yuya dazarajɨ sɨgyaarya dazalyɨ sara a'mwe yaasɨwa'na marapɨnamaryadevɨna sɨmɨlɨka wimwaaladera gamɨnyɨ yɨkamaanga yɨma'nɨpɨ'dere. Yɨ sahwara sahɨrɨvɨ wana kayaaka yɨgalakapi yɨ gamɨre nɨgwɨlalaaka baazɨ'ma'nya marasɨpɨ'de' kannyɨmaaya mwaalade'. Yɨ nabaai gamɨre kɨlaakejɨkɨya mɨwɨsa tɨka nɨpɨ'dere. Yɨ dɨkevɨ yuyajɨ' marirapɨ'dezɨkɨ. 17Sare' dare'nanyɨ. Mu'nyadɨvɨsara kwara kɨrɨ' Gotɨyai kumɨre sɨmunyangɨ gamɨre sɨmunya wɨjaavadelyɨ. Yɨ sahwara daza yɨma'nade yɨpɨ'dengɨ, sɨnnawɨ sai mena dake' sahɨrɨ'na. Yɨ sahwara sɨmunya gave pɨrɨ'na wɨwaradera, yɨ dɨragɨnya daza' sahwara kingɨya maremwaalya'ne' maaresa' yɨ yuya daza sɨgyaaryarɨna wɨjaavɨpɨ'dere. Yɨ sahwara kuna yɨwopɨjɨ Gotɨyai yuya yunebanna yajahaa'na gamɨ sai dakenna. 18Yɨ a'mwe daza' gɨmɨ tɨnna wangamwaanya', yɨ anga naanga dazaba kingɨya Kwaakevakɨyaraavɨna munyawɨ mwaaidevera.”

Currently Selected:

Wɨjalangasakyaꞌ 17: byr

Highlight

Copy

Compare