Wɨjalangasakyaꞌ 16

Gotɨyare sɨnna tɨka wɨdayavɨre dɨzɨya ata purɨdaa'nyɨ daraalyangɨnesɨ.

1Yɨ anga nawɨ'nyavɨ kusawɨ maangwɨraaya naanga pɨrɨ' kyɨma'nɨwa' nɨmɨ kadɨka wɨ'nɨwa. Sa' ejelɨya ata purɨdaa'nyɨ daraala dazaraavɨ jaka dɨragɨnna dara dɨna “Sarɨmɨ kaanya wawopɨjɨ dɨzɨya ata purɨdaa'nyɨ daraala daza Gotɨyare sɨnna tɨka wɨdaya' kɨnɨnnake dɨthɨmayɨla! Nabaai Kwaakevakɨna walaawade'na!”

2Yɨ ejelɨya aaya mudɨ'nanyai gamɨre dɨzɨya' kwaakevɨna dɨmavaawɨna. Yɨ wa'waaya (sokwavaanya) dɨragɨnya wana kayaa'nanya, daanga pɨnya'ne a'mweraavɨ yɨma'nadere. Yɨ a'mwera sɨgyaaryare baave' kɨnɨnnakera, yɨ sahware a'mwa'mwerɨ lotuya yadɨvɨsara sareraavɨ yɨma'nadere.

3Yɨ ejelɨya ayawɨdaasai (2) saalaalyavɨ gamɨre dɨzɨya' dɨma'na. Yɨ saalaalya' a'mwe bainɨkerabɨta tawe' yɨma'nyɨna. Yɨ yuya saalaalyavɨ gaala mwaaihasa, sa mena balɨna.

4Yɨ ejelɨya daraai dalyai (3) aalyangɨjɨ aalɨyɨmɨnyangɨjɨ gamɨre dɨzɨya' dɨma'na. Yɨ yuya daza tawe' yɨma'nyɨna. 5Yɨ nɨmɨ kadɨka wɨ'nyɨna yadaazɨ ejelɨya aalyangɨ maremwaaidei dɨna

“Gɨmɨre kotɨyavɨ kayaa'nanya dazaburaavɨ maryawɨbwa'dɨnya'na

Nawɨ'nya nebulyaigɨ! Yɨ yɨda'maraangeigɨ mwaaihɨnyaigɨnyɨnera.

Dahaa' mwaaihɨnyaigɨ, sɨnnawɨ kɨgaakuna mwalyeigɨ!

6Kayaa'nanyara gɨmɨre tewaanyaraavɨjɨ wɨ'nawɨjɨwaakyaraavɨjɨ tamakesare.

Yɨ tamakadɨvɨ' kumɨre tawejɨ' dɨmavesare.

Sarevɨ sahwara nɨpɨ'de'na aalɨtawe' wɨjawaanyare.

Kunnya kayaa'nanya tɨvɨkɨsa' ma'mwaasa' tewaanyasɨ.”

7Sara dɨna kyɨwa' yɨ nɨmɨ kadɨka wɨ'nyɨna yadaazɨ kwaraanyaba gamɨ sa' jaka dara dɨwa'

“Yo, Naangeigɨ Gotɨyaigɨ Dɨragɨnya Yuya Kɨnɨnnakeigɨ

Sareraavɨ maryawɨbwa'mwaanyanna nebulyabwi yunewɨnna yɨda'maraangesɨ.”

8Yɨ ejelɨya daraai daraalyai (4) gamɨre dɨzɨya' nyɨlyarɨ dɨma'na kyɨwa' yɨ Gotɨyai nyɨlyarɨ wanganakɨna yadaa'nyɨ sai a'mweraavɨ dɨ'daanya wi'nɨwa'. 9Nyɨlyare dɨka naanga daza' yɨ sa' dɨ'daananga kuna yada yɨ a'mwe dazaraavɨ dɨ'daananga wi'nyɨna. Yɨ sahwara Gotɨyarɨne yayavɨ bɨraiyagaala dɨna. Yɨ Gotɨyai kayaa'nanaanga dazangɨ yɨdɨkaa'devurɨne dɨragɨnya kɨnɨnnakei. Kɨrɨ' sahwara bɨraiyagaala dɨna, sɨmunya mudɨkebwi myawɨramaaryadɨvɨ' yɨ gamɨnne yaya' byaannake' makidɨvɨtara mɨ'.

10Yɨ ejelɨya atɨlyai (5) gamɨre dɨzɨya' sɨgyaaryare kingɨnamwaalyɨsavɨ dɨma'na. Sara dɨma'na kyɨwa' jɨhɨnya' sɨgyaaryai maremwaaideraavɨ jɨnnyɨna. Sahwara daanga kayaa'nanya' kuna maarɨna yɨwaasavɨdaa'nyɨ kunnya taalɨsa tɨka da'nɨvanɨga'. 11Sahwara kunnya daangennajɨ wa'waayannajɨ yawɨ'dɨvɨ' yɨ Gotɨya Sɨgunyavɨyarɨ yagaaibɨraizɨka yɨna. Kɨrɨ' sahwara sɨmunya mudɨkebwi myawɨramaaryadɨvɨ' yɨ kumɨ yadɨvɨta saburaavɨna bule'na mujaayɨ yɨwaa'.

12Yɨ ejelɨya ata purɨdaasɨ pwainanyai (6) gamɨre dɨzɨya' Aalya naanga Yupɨretɨzɨyavɨ dɨma'na kyɨwa' yɨ aalya sa' yaalɨka yunewɨnna yɨlɨna yaka tusa' nyɨlyai bilyɨrɨ'dimagɨdaa'nya kingɨyara kaanya bya'nevɨ yawɨbwarakɨna. 13Yɨ nɨmɨ tɨnna wanganna yadaazɨ nyaabulyabɨsa daraai dala yɨmakera bɨna. Yɨ kabaraawaryare maangevɨdaa'nyɨ yɨ sɨgyaarya sare maangevɨdaa'nyɨ yɨ wɨ'nawɨjɨwaakade kwaasɨya sare maangevɨdaa'nyɨ daraai dalyara walyaabɨna. 14Sare' dare'nanyɨ. Kulaka kayaa'nanya dazahɨnɨza yɨmakeraavɨre kulakengɨ. Nabaai yɨjɨwaala dala nabinabinya, atɨka maru'narya'ne yadɨvɨsare. Sahwara Kwaaka yuyavakɨ mwaaihasaraavɨ maremwaaidɨvɨta kingɨyaraayawɨnna kaanya wɨna yɨwaa'. Sahwaraavɨ “Mari'bwarakaana!” deva mala bwa'nya'nevɨ Gotɨya Dɨragɨnya Yuya Kɨnɨnnakere yɨrɨka naanga dazagaa'nevɨ makabɨna.

15“Yɨthaanyi! Nɨmɨ a'mwe kukei bi'ma'devaaibɨ' sarɨmɨnyawɨnna bi'mavɨdeinyɨ. Sarevɨ yɨ nabaai a'mwei se mwaryojɨ, yɨ gamɨre baazɨ'ma'nya kannyɨla gamɨnyaba nayaa maremwaaidei mwaalojɨyai yɨ sai yɨlaaya yada tewaanaanga winɨkela! Yɨ sahwai yune kɨlaakejɨ'nanyai yamaryade'na mɨ'. Yɨ a'mwera gamɨre wagɨlya' wangabɨ'de'na mɨ'.”

16Yɨ yɨmaka sahwara sɨmagɨ Yɨvɨruyagaalyavɨ “Aamaahethonɨ,” wo'nɨkebanna kingɨya dazaraavɨ marirakurakɨna yɨwaa'.

17Yɨ ejelɨya ata purɨdaasɨ pwaraalyai (7) gamɨre dɨzɨya' sɨgunyavɨya yɨhusavɨ dɨma'na. Yɨ Sɨgunyavɨ Gotɨyare Anga nawɨ'nyavɨ gamɨre kingɨnamwaalyɨsavɨdaa'nyɨ maangwɨraaya naanga pɨrɨ' jaka dɨragɨnna dada yɨ jaka daza' mwasabanna yɨnɨgwalyaabɨna. Sa' dara dɨna “Mena yɨma'nɨwaabɨ'!” 18Dɨna kyɨwa' yɨ yɨnamɨraata baake mwasa'bɨ' lɨvapɨna, yɨ purinya yɨnnyɨna, yɨ yɨ'munya pilɨna, yɨ wɨnɨnya naange' yɨma'nyɨna. Wɨnɨnya daza' yɨ sa' naangaange', yɨ yuyagaa' a'mwera Kwaakevakɨ gaai mwalyaatagaa'daasɨ wɨnɨnya pɨnɨ aawa. Sɨnnawɨ kɨgaakuna wɨnɨnya pɨrɨ' daza'bɨ' naanga sasara yaka mɨ'. 19Wɨnɨnya naanga daza' yɨma'nyɨna kyɨwa' anga naanga daza' davakaai dava' yɨma'nyɨna. Yɨ ajɨmya yuyangɨyaraavɨre anga naanga sa wala'na yada yɨ kayaaka yɨnyɨna. Yɨ Gotɨyai Anga naanga Bavɨlonɨ dazavɨna sɨmunya yawɨ'na yaka kaapɨya waainɨya' kɨnɨnnakei wɨjaavɨna kyɨwa' sa' yuneba nyɨna. Waainɨya daza' yɨ sa' Gotɨyare sɨmɨlɨka naangevɨne sɨnna tɨka wɨdaya'. 20Yɨ ahu'manna yuyara lɨkaanya mena wɨna, yɨ ayahi mugunya pɨrɨ' mwaryawɨ. Mabɨramaaryawɨ. 21Yɨ lɨvɨku'jɨzɨrɨmya naange walaabɨna. Yɨ yuyawɨ sɨrɨmya pwaina pwainanyara taanga saaigɨlyavɨrebɨ' yɨna yaka. Daza sɨgunyavɨdaa'nyɨ walaabaka yɨ a'mweraavɨ a'ba bwala'na. Yɨ sahwara wana kayaaka naanga yɨnyɨna sɨrɨmyangɨ. Sarevɨdaa'nyɨ sɨrɨmya daza sahwaraavɨ kayaaka naanga yɨgalakɨwakenna Gotɨyarɨ bɨraizɨka wɨdɨna.

Currently Selected:

Wɨjalangasakyaꞌ 16: byr

Highlight

Copy

Compare