Wɨjalangasakyaꞌ 15

Ejelɨya ata purɨdaa'nyɨ daraalyara kayaa'nanya aaya lɨmwagesa'nesɨ.

1Yɨ nɨmɨ Sɨgunyavɨ yɨbwarɨdaakwia pɨrɨ' warɨkevɨ tɨnna wanganna. Yɨbwarɨdaakwia sa' naange', yɨ atɨka maru'nakulya'ne'. Yɨ dara wanganna. Ejelɨya ata purɨdaa'nyɨ daraalyara kayaa'nanya a'mweraavɨ kayaaka yɨgalya'ne lɨmwamwaasa'. Nabaai kayaa'nanya daza mena kyɨwawojɨ kwaakevɨ ayahi pɨrɨ' yɨma'naabathe' mɨ'. Kayaa'nanya ata purɨdaa'nyɨ pwaraala dazangɨ Gotɨyare sɨnna tɨka wɨdaya' sa' mena yɨwɨna yadesɨ.

2Yɨ nɨmɨ naange' saalaalya'bɨsa' tɨnna wanganna. Sa' sɨnɨmwavananya'bɨsa' dɨkesɨ ye'mwagakɨnɨkabaaibɨsa'. A'mwera malya' wavɨla'na yadɨvɨ' sɨgyaarya dazarɨ marulawakɨna yɨwaa'. Yɨ sahwarɨjɨ yɨ gamɨre a'mwa'mwerɨjɨ yɨ ata gɨlya gamɨnne yaya' dahɨlakakevɨjɨ marulawakɨna. Yɨ sahwara saburɨna “Aala!” yɨwaasara. Sahwara saalaalya aaizɨya'bɨta dazavɨ daavɨna. Sahwaraavna Gotɨyai pɨradazabɨsa mena wɨjaavake lɨmwanna. 3Sahwara Mozɨzai Gotɨyare yaasɨwa'wawɨnyare daasa', Sipɨzipɨya Dɨwɨnyarɨne daasa' dɨna. Daata daza' yɨ dare'na

“Naangeigɨ Gotɨya Dɨragɨnya Yuya Kɨnɨnnakeigɨ!

Yuya yadɨnya naangengɨ! Atɨka maru'nakuidaanyangɨ!

Kingɨyaigɨ a'mwe ajɨmya yuyangɨyaraavɨ maremwaaidɨnyaigɨ!

Gɨmɨre saburaavɨ yɨda'maraangengɨ! Nebulya'na yunewɨnnanyangɨ!

4Naangeigɨ nawɨ'nya gɨrɨ'maayaigɨ gave yune pwainanyaigɨnyɨne'na

Gɨmɨnyɨna yɨ lɨka mi yadei aaihwalaka!

Gɨmɨnyɨne yaya' munyaba mamakɨlyɨ yadei aaihwalaka!

Gɨmɨre yɨda'nanya nawɨ'nyabwi ku'maayaba mena yɨma'nɨwake'na

Ajɨmya yuyangɨyara gɨmɨnyawɨnna lotuya bahipɨ'deigɨnyɨ.”

5Dɨvidaasɨ nɨmɨ tɨnna ayɨna wanganna yadaazɨ yɨ Sɨgunyavɨ Anga nawɨ'nya' lotuanga selɨ ange' jalɨkurakya'ne' sa' baasɨnyɨna. 6Yɨ baasɨnyɨna yɨkevɨdaa'nyɨ ejelɨya ata purɨdaa'nyɨ daraala dazara a'mweraavɨ kayaaka yɨgalya'ne kɨnɨnnakera walyaabɨna. Sahwara baazɨ'ma'nya nawɨ'nyaange wana gɨrɨ'maaya yaka lɨvamwaja yadaasɨya yɨra'nevera. Yɨ sahwara munnaanya golɨya pwɨyɨnevera, kumɨre kɨhɨsavɨ yunebanna pwɨyɨnevera. 7Yɨ gaala kɨnɨnnaka daraai daraalyaraavɨdaasai pwai ejelɨya ata purɨdaa'nyɨ daraalyaraavɨna dɨzɨya golɨya ata purɨdaa'nyɨ daraalya wɨjaavɨna. Yɨ Gotɨyai yuyagaa' yuyagaa' gaala mwaaidere sɨnna tɨka wɨdaya' yɨ sa' dɨzɨya ata purɨdaa'nyɨ daraala dazangɨ yunebanna maanga yeku'narɨ'. 8Sagaa' Gotɨyare byaannyasɨ dɨragɨnyasɨ sawaarɨdaasɨ jɨsa' anga nawɨ'nya dazavɨ yunebanna wɨlarɨ'. Yɨ anga dazavɨ kusawɨ yɨnɨga wi'na wɨladei aane pwai kwai mɨ'. Aawa. Pwara nayaa yemwaaibɨ'dere. Ejelɨya ata purɨdaa'nyɨ daraalyara kayaa'nanaanga ata purɨdaa'nyɨ daraalya sangɨ kumɨre wawɨnya' mena kyɨ'mwannapi sahwara Anga nawɨ'nya dazavɨ wibɨ'dehaa'nanyɨ.

Currently Selected:

Wɨjalangasakyaꞌ 15: byr

Highlight

Copy

Compare