Pilipaai 4

1Nɨmɨre nya'mweihi, sarɨmɨnyɨna tewaanya nyɨvu'nadeihi, sarɨmɨnyɨna nyɨma'nadeihi, sarɨmɨnyɨna yɨlaaya naanga yadɨnyaihi, nɨmɨre kingɨmwaaihɨ'nya wavɨla'nɨkei maa'de'bɨsaihi, sarevɨdaa'nyɨ nɨmɨ dɨwebaaibɨ' Naangerɨ nayaa dɨragɨnna dɨthaayɨla! Sarɨmɨnyɨna tewaanya nyɨvu'nadeihi dɨragɨnna dɨthaayɨla!

Yɨlaayabwina avaaizɨmunya'na yadɨvɨ' sɨmunya tewaanyabwi maarya'nesɨ.

2Yuwothɨyaa'gɨ nayaa dɨnyu'nana! Sɨdikɨya'gɨ nayaa dɨnyu'nana! Naangerɨ wɨlamwaaihɨlyavɨ avaaizɨmunyabwina ayɨna jawɨrila! 3Yo, nabaai Sɨzɨhaazaigɨ nebulyaigɨ, githaangamanɨge. A'mwe dazawaarɨ avaaizɨmunya'na mwaalya'newaarɨ nayaa dɨhaimwana! Sahɨrɨwaai yagaala tewaanyavɨna nɨmɨjɨ nyɨgaidaa'disawaalyɨ. Nabaai Kɨlemenɨjɨ nɨmɨre avaaiwawɨnya pwarajɨ sawaalyɨ nye'mwannayadɨvɨsangɨ. Yɨ kumɨnyɨne yaya yuya Gotɨyare bukuyavɨ mwaalɨkengɨ. Bukuya savɨ Gotɨyai yuyara yuyagaa' yuyagaa'ne gaalyabwi kɨnɨnnakeraavɨre yaya yɨda'nɨkengɨ. 4Naangerɨ wɨlamwaaihasavɨ yuyagaa' yɨlaaya jɨla! Nɨmɨ ayɨna dɨvanɨge. Sarɨmɨ yɨlaaya naanga jɨla! 5Naangei nebawa mɨ'. Yarai bathevɨ sarɨmɨ a'mwe yuyaraayaba bwiwangebwi yadaapiya sareihɨrɨ sahwara nayaa yɨhyawɨrangabɨ'deihɨlyɨ. 6Aane pɨmɨlɨ' kɨmɨlɨ' yawɨta kwalaalya myawɨpɨnera! Aawa. Yuya sanna Gotɨyarɨ nayaa duzɨla! Yɨ yuyangɨna yɨhɨgainɨvanɨkenna Gotɨyarɨ jɨthaanganyɨla! Sara yadɨvɨ' sahwai yɨhu'nade'na “Su! Su!” duzɨla! 7Sareihɨrɨ Gotɨyai kwaamu'nanyabwi nejaavadevwi nayaa yɨhɨmaremwaaladeihɨlyɨ. Yɨ Kɨraazɨtɨyai Jizaazarɨ wɨlamwaaihasavɨ dazabwi sarɨmɨre sɨmunyangɨjɨ sarɨmɨre yawɨsangɨjɨ nayaa yɨhɨmaremwaaladevulyɨ. Kwaamu'nanya dazabwi nemɨ yune'na yawɨramaraanneburaavɨ wavɨla'nɨkebulyɨ.

8Nya'mweihi, yagaala pɨnɨjɨ dɨde'nanyɨ. Sarɨmɨ sɨduta nayaa da'dare davwina jawɨralɨmwagarila! Yuya nawɨ'nya nebulyabulyɨ, kumɨnyɨne yaya nemɨ yuneba makɨlya'ne sabulyɨ dazabura. Yɨ yuya sabura nebulyaburajɨ yuya sɨmunya nawɨ'nya kɨnɨnnakeburajɨ yuya yɨda'maraangeburajɨ yuya tewaanyabura gɨrɨka maayaburajɨ yuya wɨvu'nadevurajɨ yuya “Sa tewaanaangengɨ,” dɨdɨvɨsaburajɨ 9sabura jawɨralɨmwagarila! Yuya dazabwi nɨmɨ yɨhɨzɨwakadaari yɨ sarɨmɨ mena maaresabulyɨ. Yɨ sarɨmɨ kadɨka nyu'nadɨvɨ' nɨmɨ sara yadaariyainyɨ tɨnna nyanganeta yuya sabwi dazabwi yuyagaa' sarɨmɨ jɨwila! Sarevɨdaa'nyɨ Gotɨyai kwaamu'nanyabwi nejaavadei sarɨmɨnyɨ yɨhye'mwannamwaaladelyɨ.

Pilipaai mwaalyara Polɨmɨ gaimwange'na nɨgwia yasaabesa'na yɨlaaya yakebwinesɨ.

10Dahaa' nɨmɨnyɨna ayɨna dɨhaa'bwata yadɨvɨ' mena nyawɨ'manɨgasaihɨlyɨ. Sare'na nɨmɨ Naangerɨna yɨlaaya naanga yɨvanɨgeinyɨ. Nebulyasɨ. Kɨgaa' sarɨmɨ nɨmɨnyɨna sɨmunya kuna yawɨresaihɨlyɨ. Kɨrɨ' kɨgaa' sarɨmɨ tuta maayaihi nyɨgaimwagya'neihɨlyɨ. 11Nɨmɨ gɨlyɨvɨsanna nyɨgainɨvanɨka majɨvanɨge. Aawa. Sare' darevɨdaa'nyɨnyɨ. Nɨmɨ sɨmunya dara mena maa'manɨge. Dala pɨbwina pɨbwinanyabwi kanyɨma'nojɨ yɨ wi'nanyainyɨ. Yuya dazanna nɨmɨre sɨmunya' tewaanya nyɨma'nadesɨ. 12Dara yawɨrangamwa. Nɨmɨ gɨlyɨvɨta maayainyɨ yɨnɨga mwaaimuneinyɨ. Nabaai dara yawɨrangamwa. Gɨlyɨvɨta kwalaalya yɨnɨga lɨmwaga'dɨ sara yɨwɨneinyɨ. Gazazangɨjɨ yuya kɨnɨngɨjɨ yuya sanna yawɨ'nɨkeinyɨ. Yɨ munya nyɨdevɨjɨ mɨjɨka nyɨdevɨjɨ sawaarɨna “Wikɨra,” dadɨnyainyɨ. Yɨ gɨlyɨvɨta kwalaalya lɨmwagasabwinajɨ gɨlyɨvɨta wɨgainya sabwinajɨ “Wikɨra,” dadɨnyainyɨ. 13Kɨraazɨtɨyai nɨmɨnyɨ dɨragɨnya nyɨvaimwadere dɨragɨnyavɨ yuya kɨnɨ sa yɨnɨga wi'na yɨwɨneinyɨ. 14Nyɨgainɨwakenna yawɨta kwalaalya myɨvanɨge kɨrɨ' nɨmɨre taanginyaburɨ gaimwagya'neihi nye'mwannadɨvɨ' nawɨ'nya tewaanyabwi nyɨwa'daasaihɨlyɨ.

15Pilipaai mwaalyaihi, nɨmɨnyɨna dara yawɨrangadɨvɨkɨ “Yagaala tewaanya' yɨhɨzɨwaakaka nemɨre Pɨrovijɨ Maazathonɨya yagalya'mavakegaa' yune nemɨ saina wɨjaayabwine gamɨnyɨ ye'mwagakoinera. Kɨraazɨtɨyare kusɨlaanyangɨya aane pɨba kɨbanyara sara myesare.” 16Nabaai sasareihi nɨmɨ yɨhyagalya'mavena anga Tezalonaaika mwaaideriyagaa' nɨmɨnyɨ nɨmɨre nyɨgainake'na pɨgasaai maryasaabesaihɨlyɨ. 17Yanga wɨjaaya'na nɨmɨ jaka yɨhɨthadaarina mɨ'. Aawa. Nɨmɨ yawɨ'na “Sarevɨne tɨvɨkɨta sarɨmɨre tewaanya naangebwi naanga kuna yɨma'nana! Gotɨyai tewaanya yɨhyade' tɨvɨkɨsasɨ,” dena yɨhɨthɨwa. 18Dahaa' yuya kɨnɨ maa'mwejɨyainyɨ gɨlyɨvɨta kwalaalya lɨmwaga'manɨgeinyɨ. Sare'na nɨmɨ mena yunebannanyɨ. Yɨ sarɨmɨre yange yasɨwaabaasa Epapɨrothaaitazarɨ mena maa'mwengɨ. Yanga nawɨ'nya daza Gotɨyarɨ dɨka wabatɨrɨnya kɨnɨnnake' yɨravayɨhu'dɨvɨta dazabaaibɨsangɨ. Yɨ nyɨjawa'daasa' Gotɨyarɨ wɨjawa'daa'. Gotɨyarɨ wɨjaaya'ne yɨravadɨngɨ'dɨvɨsabɨsangɨ. Yɨ dazahɨnɨnna maa'da sahwarɨ yɨlaaya naanga yɨgaidelyɨ. 19Nɨmɨre Gotɨyai gɨlyɨvɨta yuya tewaanyanna tewaanyannanyangɨ aaya kaavɨlyalyɨ. Sarei gɨlyɨvɨta sarɨmɨre kɨlaakejɨkɨnengɨna yɨhɨgainɨvanɨkenna yanga yuya yunebanna yɨhyadelyɨ. Sare'na a'mwera “Gotɨyai byaannakei,” dadɨvɨ' gamɨnyɨne yaya' makibɨ'delyɨ. Yɨ Kɨraazɨtɨyai Jizaazarɨ wɨlamwaaihasavɨ sara yadelyɨ.

20Gotɨyai sai nemɨre Nenɨmaangerɨne yaya' yuyagaa' yuyagaa' munyaba makɨlaana! Nebula sahɨrɨsɨ.

Yagaala pɨnɨnnesɨ.

21Kɨraazɨtɨyai Jizaazarɨ wɨlamwaaihasara Gotɨyare tewaanyaraavɨ “Nya'mweihi!” nɨmɨnyɨna duzɨla! Nɨmɨjɨya nya'mwera “Neya'mweihi!” yɨhɨthɨvanɨga'. 22Gotɨyare tewaanya pwara “Neya'mweihi!” yɨhɨthɨvanɨga'. Sahwarajɨyara yunebanne maremwaalɨkei Sizaare angevɨyara dɨragɨnna yɨhɨthɨvanɨga' “Neya'mweihi!” 23Naanga Jizaazai Kɨraazɨtɨyare gaimwangevɨne yange' sarɨmɨre kuryarajɨ yɨhye'mwannamwaalana!

Polɨ

Currently Selected:

Pilipaai 4: byr

Highlight

Copy

Compare