Popular Bible Verses from Pilipaai 4

Share

Aane pɨmɨlɨ' kɨmɨlɨ' yawɨta kwalaalya myawɨpɨnera! Aawa. Yuya sanna Gotɨyarɨ nayaa duzɨla! Yɨ yuyangɨna yɨhɨgainɨvanɨkenna Gotɨyarɨ jɨthaanganyɨla! Sara yadɨvɨ' sahwai yɨhu'nade'na “Su! Su!” duzɨla!

Sareihɨrɨ Gotɨyai kwaamu'nanyabwi nejaavadevwi nayaa yɨhɨmaremwaaladeihɨlyɨ. Yɨ Kɨraazɨtɨyai Jizaazarɨ wɨlamwaaihasavɨ dazabwi sarɨmɨre sɨmunyangɨjɨ sarɨmɨre yawɨsangɨjɨ nayaa yɨhɨmaremwaaladevulyɨ. Kwaamu'nanya dazabwi nemɨ yune'na yawɨramaraanneburaavɨ wavɨla'nɨkebulyɨ.

Nya'mweihi, yagaala pɨnɨjɨ dɨde'nanyɨ. Sarɨmɨ sɨduta nayaa da'dare davwina jawɨralɨmwagarila! Yuya nawɨ'nya nebulyabulyɨ, kumɨnyɨne yaya nemɨ yuneba makɨlya'ne sabulyɨ dazabura. Yɨ yuya sabura nebulyaburajɨ yuya sɨmunya nawɨ'nya kɨnɨnnakeburajɨ yuya yɨda'maraangeburajɨ yuya tewaanyabura gɨrɨka maayaburajɨ yuya wɨvu'nadevurajɨ yuya “Sa tewaanaangengɨ,” dɨdɨvɨsaburajɨ

Kɨraazɨtɨyai nɨmɨnyɨ dɨragɨnya nyɨvaimwadere dɨragɨnyavɨ yuya kɨnɨ sa yɨnɨga wi'na yɨwɨneinyɨ.

Naangerɨ wɨlamwaaihasavɨ yuyagaa' yɨlaaya jɨla! Nɨmɨ ayɨna dɨvanɨge. Sarɨmɨ yɨlaaya naanga jɨla!

Nɨmɨre Gotɨyai gɨlyɨvɨta yuya tewaanyanna tewaanyannanyangɨ aaya kaavɨlyalyɨ. Sarei gɨlyɨvɨta sarɨmɨre kɨlaakejɨkɨnengɨna yɨhɨgainɨvanɨkenna yanga yuya yunebanna yɨhyadelyɨ. Sare'na a'mwera “Gotɨyai byaannakei,” dadɨvɨ' gamɨnyɨne yaya' makibɨ'delyɨ. Yɨ Kɨraazɨtɨyai Jizaazarɨ wɨlamwaaihasavɨ sara yadelyɨ.

sabura jawɨralɨmwagarila! Yuya dazabwi nɨmɨ yɨhɨzɨwakadaari yɨ sarɨmɨ mena maaresabulyɨ. Yɨ sarɨmɨ kadɨka nyu'nadɨvɨ' nɨmɨ sara yadaariyainyɨ tɨnna nyanganeta yuya sabwi dazabwi yuyagaa' sarɨmɨ jɨwila! Sarevɨdaa'nyɨ Gotɨyai kwaamu'nanyabwi nejaavadei sarɨmɨnyɨ yɨhye'mwannamwaaladelyɨ.

Naangei nebawa mɨ'. Yarai bathevɨ sarɨmɨ a'mwe yuyaraayaba bwiwangebwi yadaapiya sareihɨrɨ sahwara nayaa yɨhyawɨrangabɨ'deihɨlyɨ.

Dara yawɨrangamwa. Nɨmɨ gɨlyɨvɨta maayainyɨ yɨnɨga mwaaimuneinyɨ. Nabaai dara yawɨrangamwa. Gɨlyɨvɨta kwalaalya yɨnɨga lɨmwaga'dɨ sara yɨwɨneinyɨ. Gazazangɨjɨ yuya kɨnɨngɨjɨ yuya sanna yawɨ'nɨkeinyɨ. Yɨ munya nyɨdevɨjɨ mɨjɨka nyɨdevɨjɨ sawaarɨna “Wikɨra,” dadɨnyainyɨ. Yɨ gɨlyɨvɨta kwalaalya lɨmwagasabwinajɨ gɨlyɨvɨta wɨgainya sabwinajɨ “Wikɨra,” dadɨnyainyɨ.

Nɨmɨ gɨlyɨvɨsanna nyɨgainɨvanɨka majɨvanɨge. Aawa. Sare' darevɨdaa'nyɨnyɨ. Nɨmɨ sɨmunya dara mena maa'manɨge. Dala pɨbwina pɨbwinanyabwi kanyɨma'nojɨ yɨ wi'nanyainyɨ. Yuya dazanna nɨmɨre sɨmunya' tewaanya nyɨma'nadesɨ.