Pilipaai 3

1Nya'mweihi, yɨ nabaai Naangerɨ wɨlamwaaihasa'na yɨlaaya naanga jɨla! Sarɨmɨnyɨna nɨmɨ yagaala da' pɨkarya ayɨna yɨdasa'na nɨmɨre sɨmunyavɨ “Aala!” majɨwa. Taanga manyɨvanɨ'. Sarɨmɨnyɨ gaimwanga'nesɨ.

A'mwei Kɨraazɨtɨyarɨna dɨragɨnna lɨmwagazai sai a'mwe yɨda'maraangelyɨ.

2Kavɨjɨlɨkerabɨsaraavɨna mala nayaa jɨwannyɨla! Sahwara wawɨnya kayaa'na yadɨvɨsaraavɨna mala nayaa jɨwannyɨla! Sahwara sarɨmɨre kɨlaakejɨkaavɨ gurya kayaa'na daya'neraavɨna (Juyaraavɨna) mala nayaa jɨwannyɨla! 3Sare' darevɨdaa'nyɨnyɨra. Gotɨyai nemɨnyɨna neyawɨ'delyɨ nemɨre kɨlaaka gurya madayainaavɨna “ ‘Kɨlaakejɨ' nɨmɨnyɨna gurya nebwina da'nɨkerera,’ yawɨ'manɨge.” Sareinaavɨ Gotɨyare Kuryai nemwaaihake'na Gotɨyarɨ yɨlaaya nebulya'na yadaanyɨ. Sareinaavɨna Kɨraazɨtɨyai Jizaazai yune yake'na gamɨnyɨne yaya' munyaba makidaanyɨ. Nemɨ kɨlaakejɨkɨ yɨnɨga negaimwagya'ne sanna dɨragɨnna malɨmwagivanɨgo. Yɨ nemɨre mwaalyabwina myawɨri, nemɨre kɨlaakejɨkɨna myawɨri yadaa Gotɨyai “Yɨda'maraangeihɨlyɨ,” nedadeina yune Kɨraazɨtɨyarɨna lɨmwamanɨgoinera.

4Sare kɨrɨ' “Nɨmɨ yɨma!” dɨwɨjɨ kwajɨ kɨlaakejɨkɨne saburana dɨragɨnna lɨmwadɨnya sa' nɨmɨnyɨ yɨnɨga nyɨgaimwagya'ne'na nɨmɨnne tusa' kɨnɨnnakeinyɨ. A'mwe pwara kwara kɨlaakejɨkɨne saburana dɨragɨnna lɨmwadɨvɨ' “Sanna nɨmɨnyɨ yɨnɨga nyɨgaimwaganneinyɨ,” yawɨpɨjaraavɨ, yɨ kɨlaakejɨkɨne sabwina nɨmɨ sahwaraavɨ wavɨla'manɨgeinyɨ. 5Yɨ dareinyɨ. Yɨrɨka ati ata purɨdaa'nyɨ daryaai darɨkɨ nɨmɨre kɨlaakejɨ' gurya nyɨdavesainyɨ. Nɨmɨ a'mwe Yɨzɨrelɨyainyɨ. Yɨ nɨmɨ Bejaminɨmɨre yɨsavaakɨdaasainyɨ. Nɨmɨ Yɨvɨruyainyɨ. Nabaai nɨmɨre Ne sɨnnawɨnyara yuya sara Yɨvɨruyarera. Nɨmɨ Yɨvɨruyaraavɨdaa'nyɨ avaaitawejɨ'nyɨ. Ne Mozɨzare Kɨwɨnyavɨna Perɨzɨyara nayaa maremwaaidɨvɨtabaaibɨ' Perɨzɨyainyɨ nayaa mɨdɨneinyɨ. 6“Juyainaavɨrebwi Gotɨyarebulyɨ,” yawɨ'dɨ dɨragɨnna yɨna ye. Yɨ sareinyɨ “Gotɨyai sara yawɨ'delyɨ,” dadɨ Naangere kusɨlaanyaraavɨ kayaa'na yeinyɨ. Nabaai a'mwera nɨmɨnyɨ nyawɨbwapɨjɨ kwajɨ Kɨwɨnyabwi mɨdɨnya'na, sare' nɨmɨ yɨda'maraangeinyɨra. 7Kɨrɨ' yuya sa kɨgaa' “Sa nɨmɨnne sa naangengɨra,” yawɨre yuya daza dahaa' dara yawɨ'mwa. Sa kune yaasɨwa'nanyangɨ. Yɨ nemɨnyɨna yune Kɨraazɨtɨyai yake' sa' naangaanga gavesɨra.

8Yune Juyaraavɨre gave sanne'na majɨvanɨge. Aawa. Nabaai nɨmɨ yuya pɨnɨngɨna “Sa yune yaasɨwa'nanyangɨ,” yawɨ'manɨgeinyɨ. Nɨmɨ Kɨraazɨtɨyai Jizaazai nɨmɨre Naangerɨ yawɨrangadɨ, yawɨta sa'na nɨmɨ yɨbwakɨdɨ sa yune naangesɨra. Sahwarɨna yuya sa mena yagalya'maveinyɨ. Nɨmɨ yuya sanna yawɨ'manɨge' mena yaayewɨ lɨvarannɨkebɨsangɨ. “Nɨmɨ yune Kɨraazɨtɨyarɨ maa'dɨ Nawɨ'nyɨnaangereinyɨ yɨma'nɨma!” dadɨ sara ye. 9Sahwarɨ nɨmɨ wɨlamwaalya'neinyɨ sara yeinyɨ. Yɨ nɨmɨ Mozɨzare Kɨwɨnya dɨnɨkebwi mɨdɨne'na Gotɨyai “Yɨda'maraangeigɨnyɨ,” manyɨja'. Aawa. Kɨraazɨtɨyarɨ lɨmwadɨnya'na yɨda'maraangebwi kɨnɨnnakeinyɨ. Yɨ Kɨraazɨtɨyarɨ lɨmwaga'manɨgevɨ Gotɨyai “Yɨda'maraangeigɨnyɨ,” nyɨdadelyɨ. 10“Nɨmɨ Kɨraazɨtɨyarɨ nebulya'na yawɨranganɨma!” dadɨ mwaaiheinyɨ. “Yɨ ayɨna dɨkaavake dɨragɨnyavɨ yɨbwakɨdevaaibɨ' dɨragɨnya savɨ yɨbwakɨnɨma! Gamɨ daanga maarya saburɨ gamɨjɨ avaaina ye'mwannamaarɨma! Sai sara balakabaaibɨ'na avaaizɨmunya yawɨ'dɨ nɨmɨnyɨna myawɨ'nyadɨ balɨdeinyɨ! 11Sareinyɨ mwaaimujainyɨ Gotɨyai bainɨkeraavɨ nɨmɨ kwainyɨjɨ ayɨna nyɨdɨkaavana!” jemwaaidɨ Kɨraazɨtɨyarɨ nebulya'na dɨragɨnna yawɨrangamanɨgeinyɨ.

Tɨyawɨnna yɨ'masa'na kaanyave'na gavamarasɨ'nyɨkaanya dɨragɨnna wodevwinesɨ.

12Nɨmɨ dara majɨvanɨge. Kɨraazɨtɨyarɨ nebulya'na mena yawɨrangamweinyɨ. Mena maa'mweinyɨ. Nɨmɨ mena wi'nanyɨra. Gotɨyai mena naanga yune nebulya'nanyainyɨ nyɨmwaaihɨwakeinyɨ. Sara majɨvanɨge. Sare kɨrɨ' Kɨraazɨtɨyai Jizaazai gamɨnyɨneinyɨ nyɨmaarakabaaibɨ' sara yɨma'nya'neinyɨ maa'mujainyɨ kaanyave'na dɨragɨnna wɨvanɨgeinyɨ. 13Nya'mweihi, nɨmɨ sainyɨ myawɨrivanɨge. Nɨmɨ mena maa'mweinyɨ dɨngaka! Kɨrɨ' nɨmɨ sɨmunya yune gave pɨrɨ'nanyainyɨ “Yuya sɨnnawɨ kɨgaasa sangɨna nɨmɨ mena navɨka yadɨnyangɨ. Sara yadɨ dɨvidaa'nya yuyabwi maarya'na yɨbwa'mwagayɨwɨbwata yadɨnyainyɨ. 14Wɨjaaya'ne' maarya'neinyɨ daza' lɨmwaderyawɨ tɨyawɨnna kaanyave'na dɨragɨnna wɨvanɨgeinyɨ. Wɨjaaya'ne daza' yɨ dare'na. Naangerɨ nebulya'na yawɨranganya'neinaavɨ Kɨraazɨtɨyai Jizaazarɨna nemɨ yɨlaawia'ne jaka Gotɨyai nejɨvwaramaa'manɨkesɨ.”

15Sarevɨdaa'nyɨ nemɨre sɨmunyabwi Gotɨyarɨnebwi a'mwe nebulyaina yɨma'nɨvanɨgoina yagaala dɨvanɨge daza'na sara yawɨraana! Nabaai pwaihi sɨmunya pɨbwi kɨnɨnnakeihi mwaaibɨzaihi yɨ Gotɨyai nayaa yɨhɨzɨwaainada sɨmunya dazabwi kɨbwi yavada'gala yɨhyathelyɨ. 16Kɨrɨ' yuyaina sɨmunya mena maa'manɨgovwi, saburɨ sasara nayaa yamaryaana!

17Nya'mweihi, sarɨmɨ nɨmɨre sɨmunya saburɨ dɨnye'mwannanyɨmɨdɨnyɨla! Nabaai nemɨre saburɨ sara yamarivanɨgasara nemɨdɨdɨvɨsaraavɨ nayaa baihana'dɨvɨ' sabaaibɨ' jɨla! 18Sare' darevɨdaa'nyɨnyɨra. Kwalaalyagaa' sara myamarivanɨgasaraavɨna mena yɨhɨtheinyɨ. Nabaai dahaakɨgaa' kale nyadaa'nyɨ kɨdalaala purata'dɨ ayɨna yɨhɨthɨvanɨge. A'mwe kwalaalyara “Nemɨ Kɨraazɨtɨyareinera,” dadɨvɨsara kayaa'na yɨvanɨgasavɨ Kɨraazɨtɨyai yɨta yovihɨrarannɨkevɨ balakevɨne yagaalya' tihɨ'manɨgasarera. Kɨraazɨtɨyarɨne yɨkamaangerera. 19Nemɨ Gotɨyarɨ yɨlaaya yadaanyabaaibɨ' kunnya kɨlaakejɨkɨne sabwi “Naangengɨra,” dadɨvɨsarera. Kumɨre gotɨyaibɨsangɨ. Sahwara yadɨvɨsangɨna kunnya yaya' makinadɨvɨsare. Kɨrɨ' sahɨnɨngɨna wagɨla wɨvwa'nɨvanɨ'. Yune Kwaakevakɨya sabwina yawɨ'dɨvɨsare. Sareraavɨ Gotɨyai kayaaka yɨgaladerera. Kayaa'nanyaba mwaaibɨ'dere. 20Nɨmɨre sɨmunya sabwi je'mwannanyɨmɨdɨnyide' darevɨdaa'nyɨnyɨ. Nemɨ Sɨgunyavɨ mwaalya'neinera. Nabaai sahɨbadaa'nyɨ yune nevadaihasamaaraderɨna yɨlaaya'na yemwaaimanɨgoinera. Sahwai Naangei Jizaazai Kɨraazɨtɨyalyɨ. 21Sahwai nemɨre kɨlaaka nagaazazɨ' barya'nejɨ' gamɨre kɨlaaka byaanna dɨragɨnya' kɨnɨnnakejɨ' neyɨmavadelyɨ. Sai yuyaraavɨjɨ yuyangɨjɨ maremwaalya'nei gamɨnyɨ kwaakewɨ yɨnɨga wi'na wakade dɨragɨnya dazavɨ sasara yadelyɨ.

Currently Selected:

Pilipaai 3: byr

Highlight

Copy

Compare