Kolozi 1

1-2Kolozi mwaalyaihi nya'mweihi,

Kɨraazɨtɨyarɨ wɨlamwaaihasa'ne sarɨmɨ Gotɨyare tewaanyaihi, neya'mwe Kɨraazɨtɨyarɨna lɨmwaga'manɨgasaihi. Sasareihɨrɨ nɨmɨjɨ neya'mwe Timotilyɨ sainaai yɨhɨthaka! Gotɨyai Nenɨmaangei yanga naange'na yɨhɨgaimwagana! Sarɨmɨre sɨmunyavɨ kave kwaamu'nanya' yɨhwakana! Polɨnyɨ yune gamɨre sɨmunyavɨ yawɨraka Gotɨyai kada' Kɨraazɨtɨyai Jizaazai Apozelɨyainyɨ nyɨdahɨlakakeinyɨ. Sareinyɨ pɨkarya da' yɨhyasɨvanaabɨheinyɨ.

Polɨ “Su! Su!” daka Kolozi mwaalyara nebwina yawɨramaarya'neraavɨna Naangerɨ wɨdake'nesɨ.

3Sarɨmɨnyɨna Gotɨyarɨ yɨdaangada' yuyagaa' naarɨmɨ “Su! Su!” wɨdadasainaalyɨ. Sahwai nemɨre Naangei Jizaazai Kɨraazɨtɨyarɨ Ganɨmaangelyɨ. 4Naarɨmɨ sarɨmɨnyɨna kadɨka mena dara wɨ'nɨwa'dolya'nanyɨ. Kolozi mwaalya sara Kɨraazɨtɨyai Jizaazarɨ dɨragɨnna lɨmwadɨvɨ' Gotɨyare tewaanya yuyaraavɨna tewaanya wɨvu'naderera. Sare'na suya wɨdadasainaalyɨ. 5Sasareihɨrɨna Gotɨyai mena yovɨrawakake Sɨgunyavɨya yɨhyemwaalɨkennanyɨ. Sɨnnawɨ yagaala tewaanyavɨya nebulya' sarɨmɨnyɨ kihima'na' sarɨmɨ kadɨka mena wɨ'ne'. Yɨ sagaa' nayaa yemwaalya' kadɨka mena wɨ'nesasɨ. 6Yagaala tewaanya daza' Kwaaka yuyavakɨ yuneba naanga yɨma'nadevaaibɨ' sarɨmɨnyɨ yɨma'nakesɨ. Daza' a'mwera lɨmwagaresa'na tewaanya nawɨ'nyabwi marima'naabada a'mwe kwalaalyarajɨ kwalaalya pwarajɨ daza' lɨmwaga'manɨgasa' sarɨmɨnyɨ yɨhivanɨkebaaibɨsasɨ. Sa' aayagaa'daasɨ yɨhyamaaraka sarɨmɨnyɨ aayagaa' yagaala tewaanya savɨ kadɨka wɨ'neva Gotɨyare yanga gaimwangebwi nayaa nebulya'na yawɨranganna yeva sara yɨhivanɨkesɨ. 7Yagaala tewaanya daza' Epapɨraazai yɨhɨzɨwaakakabaaibɨ' yɨ nebulya'na yawɨranganesasɨ. Sarɨna naarɨmɨnyɨ nehɨvu'nadelyɨ. Sahwai Kɨraazɨtɨyarɨ naarɨmɨjɨ ye'mwannewɨdaayadelyɨ. Sarei sarɨmɨnyɨ gaimwange'na Kɨraazɨtɨyarɨ dɨragɨnna lɨmwaga'dei kuna nayaa wɨdaayadelyɨ. 8Nabaai sai nehɨthɨwakelyɨ “Kurya Tewaanyai Kolozi mwaalyaraavɨna sara wɨjaavade'na Gotɨyareraavɨna tewaanya wɨvu'naderera.” Yuya sare'na Gotɨyarɨ “Su! Su!” wɨdadasainaalyɨ.

9Sarevɨ aayagaa' naarɨmɨ kwainaai yagaala sa' kadɨka wɨ'nɨwa'dola yɨrɨka dazarɨkɨdaasɨ sarɨmɨnyɨ gaimwange'na Gotɨyarɨ wɨdɨna. Naarɨmɨ yɨdaangayɨdaanganya yada' yagalya'mata myadasainaalyɨ sarɨmɨnyɨna. “Sahwara gɨmɨre sɨmunya' nebulya'na yawɨrangabɨka! Yɨ kumɨ sara yune sɨdu'nakera yɨma'nɨpɨka! Yɨ Kurya Tewaanyai yawɨta nawɨ'nya pɨnɨjɨ sɨmunya yawɨramarakya'nejɨ wɨjaavana! Dazabwi kumɨnyɨ yunebanna nebulya'na wɨlamɨlelɨmwagarana!” dola sara wɨdadasainaalyɨ. 10Naangere a'mwe nebulyara nayaa yɨnɨga wi'na yamaripɨnebaaibɨ' sarɨmɨ sara yamarya'na wɨdadasainaalyɨ. Sara yɨpɨjavɨ Naangerɨ yɨlaaya wigalade'nanyɨ. Sarevɨ sarɨmɨ tewaanya gazangɨzangɨ yadɨvɨ' yɨsɨla yɨ'nadevaaibɨ' tewaanya nawɨ'nyabwi marima'naabathe'nanyɨ. Nabaai sarɨmɨ Gotɨyarɨ nebulya'na yawɨrangadɨvɨ' yawɨta daza' naanga yɨhima'nade'nanyɨ. 11Gotɨyarɨ byaanna nawɨ'nyavɨna Gotɨyai dɨragɨnya yuya wɨjaavada dɨragɨnna yɨhivaimwagathe'nanyɨ. Sarɨmɨ yɨnɨga dɨragɨnna maredaa'dɨvɨ' taanginya yuyangɨ maredaapɨneihi sarɨmɨre sɨmunya' yɨwa'nadɨkaata yade' mɨ'. Sarevɨ sarɨmɨ yɨlaaya jide'nanyɨ. 12Nɨmwarɨ “Su! Su!” duzide'nanyɨ. Sai sarɨmɨnyɨne yɨhɨthahɨlakaka gamɨre sa sarɨmɨnyɨne kuryaraavɨne sa maarya'na yɨnɨga wi'na yɨhɨmwaaihadelyɨ. Sarevɨ Baaka naangevɨ mwaalya'nera Gotɨyare tewaanyarajɨ je'mwannamaaryideihɨlyɨ.

Kɨraazɨtɨyarɨnajɨ gamɨre wawɨnyabwinajɨnesɨ.

13Gotɨyai Saataanɨmɨre jɨhɨnyavɨya dɨragɨnyavɨ ayɨna nemaaraka gamɨre Gawaalɨvaangerɨne maremwaaidevɨ yɨsava'naavɨ nemwaaihakelyɨ. Gawaalɨvaanga dazai gamɨnyɨ tewaanna mena wima'nakelyɨ. 14Sahwai nemɨnyɨne'na yakevɨ Gotɨyai mena neyatavamaarakeinera. Nemɨre kayaa'nanya mena nemarasɨ'nakeinera. Yɨ sare' Gawaalɨvaangerɨnyɨ. (Gawaalɨvaangerɨna Gotɨyai ayɨna nemubya'nebwi kɨnɨnnakeinera. Gotɨyai nemɨre kayaa'nanya nemarasɨ'nya'nebwi kɨnɨnnakeinera. Yɨ sare' Gawaalɨvaangei yakevɨnyɨra.) 15Gotɨyare Gawaalɨvaangei Gotɨya nemɨ tɨnna mwanganyadaanya saibɨsai avaainanyalyɨ. Sahwarɨ tɨnna wangadaa yɨ dazagaasagaa' Gotɨyarɨ wangadaanyɨ. Yuya wakyaaka gazasavɨ sahwai munyaba mwaalɨkelyɨ. Yɨ sangɨne aaya kaavɨlyalyɨ. Sɨnnawɨ mwalɨbainyaakelyɨ. 16Sare' dare'nanyɨ. Gotɨyai sara kyawɨryaa' Gawaalɨvaangei sɨgunyavɨjɨ Kwaakevakɨjɨ yuya sa wakyaakengɨ. Nemɨ tɨnna wangadaanyajɨ tɨnna mwanganyadaanyajɨ yuya sa wakyaakengɨ. Mwanganyadaanyaraavɨdaa'nyara ejelɨyara maremwaaidɨvɨsara dɨngaka? Dɨragɨnnakera dɨngaka? Ejelɨya naangera dɨngaka? Ai yuyaraavɨ wakyaakere. Yɨ Gotɨyai sara kyawɨryaa' gamɨre yuya dazahɨnɨ wakaka gamɨnyɨ yɨlaaya yɨgalya'ne wakyaakengɨ. 17Nabaai sɨnnawɨ gamɨ salyɨ. Dɨvidaa'nyɨ yuya dazahɨnɨngɨra. Sahwarɨ yuya yɨnya'ne warɨkengɨ. Yuya sa lɨmwadaa'nyɨ kumɨ sa kumɨreba warɨkengɨ. Sarenna yuyangɨ munyaba mwaalɨkelyɨ. 18Gamɨ sai gamɨre kɨlaakejɨkɨ Mɨnyagɨnyalyɨ. Gamɨre kɨlaakejɨ' gamɨre kusɨlaanyavɨyajɨkɨra. Yɨ sahwareraavɨna aaya kaavɨlyalyɨ. Sai aaya mudɨ'nanyai bainɨkeraayawɨ ayɨna yɨdɨkaavakelyɨ. “Sahwai yuyaraavɨ yuna wavɨlavana! Yuyaraavɨne sɨnnawɨnyai yuna yɨma'nana!” daka ayɨna yɨdɨkaavakelyɨ. Sarevɨ yuyangɨ munyaba mwaalɨkelyɨ. 19Gotɨyai dara wigalake' “Nɨmɨ yuneinyɨ Nyɨbwaalɨvaanga dazarɨ kuna wɨmwaalɨma!” Daka sahwarɨ yunebanna wɨmwaalakelyɨ. Sare'na sahwai Gotɨyare kɨma'bwa'nya ke'ba'nanyalyɨ. 20Yunebanna wɨmwaalaka sahwarɨ Kwaakevakɨya sajɨ Sɨgunyavɨya kɨnɨjɨ yuya sangɨna yune avaaimunyɨ'na wie'mwannakelyɨ. Gamɨre Gawaalɨvaangere tawe' yɨsavɨri walaabakevɨ Ganɨmaangei yuya sangɨna narya wakakelyɨ. Sarevɨ Gotɨyai ayɨna nemaaraka gamɨre Gawaalɨvaangerɨne maremwaaidevɨ yɨsava'naavɨ nemwaaihakelyɨ.

21Nabaai sarɨmɨ sɨnnawɨ kɨgaakuna Gotɨyarɨ menyaba kengirɨ' mwaalesaihɨlyɨ. Sarɨmɨre sɨmunyabwi yada gɨrɨkita'nanyabwi yesavɨdaa'nyɨ sarɨmɨre sɨmunyangɨ sahwarɨ yɨkamaangeihi mwaalesaihɨlyɨ. 22Sasareihi kɨrɨ' dahaa' Gawaalɨvaangei kɨlaa'nakei yɨsavɨri mena balakevɨ avaaizɨmunyabwina yɨhɨmwaaiha'. Sai sasara yaka sa' gamɨnyawɨnna makabya yɨhya'negaa' sarɨmɨ nawɨ'nya tewaanyaihi gɨrɨkita maayaihi gamɨnyaba yɨwetawakya maayaihi saihi mwaalya'neihɨrɨ avaaizɨmunyabwina yɨhɨmwaaiha'. 23Yɨ dɨragɨnna lɨmwangebwi nayaa kuna pada'galalɨmwaga'na yɨpɨjaihi nawɨ'nya tewaanyaihi dɨmwaalyide'nanyɨ. Nabaai sɨmunya kuna dɨragɨnna yawɨ'dɨvɨ' dɨragɨnna nebwina dɨthaayɨla! Kwaasɨya pɨnɨ nayɨhɨmwagi'nadɨka! Sarevɨ sarɨmɨ yagaala tewaanya savɨne yemwaalya'nebwi nyagalya'mapɨka! Yagaala tewaanya sa' sarɨmɨ kadɨka wɨ'nesasɨ. Nabaai a'mwe yuyara Kwaakevakɨ yuneba mwaaihasaraavɨ Kɨraazɨtɨyarera wɨjɨwakamarivanɨgasasɨ. Yɨ nabaai nɨmɨ Polɨnyɨ yagaala tewaanya dazavɨna wɨdaayadɨnya tewaanyainyɨ yɨma'nageinyɨra.

Polɨ Kɨraazɨtɨyare kusɨlaanyaraavɨ wɨdaayakebwinesɨ.

24Dahaa' nɨmɨ yɨlaaya yɨvanɨge. Sarɨmɨnyɨ wɨgaimwange'na daangebwi maa'dɨnya'na yɨlaaya yɨvanɨge. Nabaai Kɨraazɨtɨyare kusɨlaanyaraavɨ gaimwanga ya'neinyɨ. Sahwara gamɨre kɨlaakejɨkɨra. Kusɨlaanyara sahwaraavɨ gaimwagya'neinyɨna daanga pɨnɨ kuna warɨ'. “Kɨraazɨtɨyarɨ wɨdaayadɨnya'na daanga dazabwi yunebanna yɨ'mwannɨma!” dadɨ daanga yune nɨmɨre kɨlaakejɨkɨ kuna maa'manɨge. 25Nɨmɨ sahwainyɨ Naangere kusɨlaanyaraavɨ wɨdaaya'neinyɨ yɨma'neinyɨ. Sare' darevɨnanyɨ. Gotɨyai sarɨmɨnyɨne maremwaaidɨnyainyɨ nyɨdahɨlakakeinyɨ. Gotɨyarɨne yagaalya' sarɨmɨnyɨ yune'na yɨhibwarɨdaakwia'neinyɨ yuna wɨdaayadɨnyainyɨ yɨma'neinyɨ. 26Gotɨyarɨ yagaala sa' nebulya' yoimavajalɨkurakyasɨ. Yuya sɨnnawɨ kɨgaasɨ a'mwe yuyaraavɨ mwalɨbainyaasaraavɨ nebula sa' lɨka yulyarakesɨ. Kɨrɨ' dahaa' ku'maayaba Gotɨyare tewaanyaraavɨ mena wɨjɨwaaina'. 27Gotɨyai dara yawɨrakesɨ. Sahwaraavɨ nebulya' yoimavajalɨkurakya savɨne sɨdusabwi wɨjaavɨma! Nebula daza' daresɨ. Ajɨmya yuyangɨya a'mweraavɨ wana nawɨ'nyaanga yanga yɨnɨga yadesɨ. Yɨ Kɨraazɨtɨyai sarɨmɨnyɨnyɨra. Sare'na Gotɨyaryaba byaanna nawɨ'nya kɨnɨnnakeihi je'mwannamwalaawide'na sarɨmɨ dɨragɨnna yemwaaimanɨga'. 28Kɨraazɨtɨya sahwarɨna wɨjɨwakamaryadaanyaine. A'mwe yuya kwaraavɨ “Mala nayaa jɨwannyɨla!” dadaa pada'galemwaihadaanyɨ. Nabaai nemɨ yawɨta dala pɨnɨnna pɨnɨnnanyanna yawɨ'daa a'mwe yuya kwaraavɨ wɨjɨwɨryadaanyaine. “Gotɨyaryawɨnna a'mwe yuya kwaraavɨ makabya yaadehaa' sahwara Kɨraazɨtɨyarɨ wɨlamwaaihasara gamɨre a'mwe yune nebulya'nanyara yuna mwaaibɨka!” dona sara wɨjɨwakamaryadaanyaine. 29Sara yɨma'nya'neinyɨ nabaai yagɨyagɨ naanga yadɨnyainyɨ. Kɨraazɨtɨyai gamɨre dɨragɨnya naangevɨ nyɨdɨkaa'bwa'devɨ dɨragɨnya daza' kɨnɨnnakeinyɨ dɨragɨnna yawɨ'dɨ yagɨyagɨ naanga yadɨnyainyɨ.

Currently Selected:

Kolozi 1: byr

Highlight

Copy

Compare