Apozelɨyara 26

Aahɨripaamyaba Polɨ gannyabwi wɨjɨwaakake'nesɨ.

1Aahɨripaa Polɨmɨ wɨda' “Gɨmɨnyɨne yagaala dɨnedana!” Kuda' sai gannya asi makina yaka gannya yagaala wɨda'

2“Kingɨya Aahɨripaagɨ, dahaa' nɨnnya yagaalya' gɨthɨde'na yɨlaaya yɨvanɨge. Juyara nɨmɨnyɨna kotɨya' wɨdadɨvɨsa'na gɨthɨde'nanyɨ. 3Juyainaavɨrebulyɨ Juyainaavɨre yawɨta ge gejɨ sangɨna sɨdu'nakeigɨnyɨ. ‘Sara yawɨ'dɨnyavɨ nɨmɨre yagaala naanga nayaa du'nana!’ dɨragɨnna githaangamanɨge.

4Maalɨkeinyɨ mwaalegaasɨ yuyagaasɨ dahaasɨ mwaaidɨnya'na Juya yuyara nyawɨ'mwaava. Anga Jeruzaalemɨ nɨmɨre anga naanga pimagɨnyaraayawɨ mwaaleinyɨ. 5Sareinyɨ yawɨ'mwaava. Nabaai ‘Wɨdaana!’ dɨpɨja' dara nedɨpɨka! ‘Sɨnnawɨdaa'nyɨ Polɨ Perɨzɨyaraavɨrebwi dɨragɨnna mɨdɨdelyɨ.’ Perɨzɨyaraavɨrebwi naangebulyɨ. Pɨbura maalɨkeburera. 6Gotɨyai Ne sɨnnawɨnyaraavɨ yune naanga nebulya'na wɨjaake'na yemwaaimanɨge'na dahaa' kotɨya' nyɨdɨvanɨgasa'na daa'manɨge. Sarevɨ Juya yuyaina yemwaaimanɨgo. 7Sawɨtagaa' yɨrɨkagaa' Ne sɨnnawɨnya sɨvɨlɨraai ata purɨdaasɨ pwaraalyaraavɨreina Gotɨyarɨ yɨlaaya yadaanyainera. Yadaanya'na Gotɨyai Ne sɨnnawɨnyaraavɨ wɨjaake nebulya'na yɨma'nya'na yemwaaimanɨgo. Nabaai, nɨmɨ sara yemwaaimanɨge'na, Kingɨyaigɨ, Juyara kotɨya be'na nyɨmarivanɨgava! Kumɨrebwina! 8Juyaihi, Gotɨyai baryara yɨdɨkaavade'na be'na yɨvanɨgava myawɨrinanyava! (Naange' daaka!)

9Kɨgaa' dara yawɨ'na ye, ‘Jizaazai Naazaretɨ mwaalyare yayavɨjɨ gamɨreraavɨjɨ kayaa'na yuyanna wima!’ Sara yawɨ'na yena Jeruzaalemɨ sara yɨna ye. 10Sara yɨna kye Gotɨyarɨna mubɨthɨka yɨra'de naangera wɨdaasɨna kanye' kalavuzangevɨ Gotɨyare tewaanya kwalaalyaraavɨ wɨmwaaihɨna ye. Pɨgaa' pwara dɨnyɨna ‘Jizaazarera baibɨzara,’ dɨnyɨna kye' nabaai nɨmɨ ‘Baibɨ'derera,’ wɨde. 11Sara wɨdena naangegaa' Juyainaavɨre Lotuanga yuyangɨ pwara saraavɨna wɨdɨna ‘Dɨramyɨla!’ Jizaazareraavɨ wɨde ‘Jizaazarɨ bɨrala wɨdapɨjɨ gamɨre lɨmwangebwi dɨmarasɨ'nyɨla!’ Dɨvi sahwaraavɨna nɨmɨre sɨnna tɨka nyɨda'daa'nyɨ Menyaraavɨre angebanna yɨwɨnama'na kyapɨjɨ sabanna kumɨnyɨna kayaa'na yɨgalya'na kaanna wɨna ye.”

Polɨ Kɨraazɨtɨyarei yɨma'nakei wɨdake'nesɨ.

(Apozelɨyara 9:3-19; 22:6-16)

12Polɨ kuna wɨda' “ ‘Jizaazareraavɨ kayaaka yɨgalɨma!’ dena sare'na kude Gotɨyarɨna yɨra'dɨvɨta naangera paazɨya' nyɨjaaveva Anga Damaazɨkazɨna kumɨre wawɨnya'na wɨdaasɨna nye'. 13Wɨdaasɨna kanye' Kingɨyaigɨ, sɨrɨgwajahaa' tusavɨ dara wanganage' ‘O, sɨgunyavɨdaasɨ baaka naange' nɨmɨjɨ a'mwera ye'mwannɨgwodaanyarajɨ sainaayaba damwadɨwaka!’ Nyɨlyai maalɨkelyɨ. Baaka sa' naangesɨra. 14Sara kade kwaakevɨna yuyaina wala'na kyo Yɨvɨruyagaala maanguraayavɨ wɨ'ne, ‘Solɨgɨ, Solɨgɨ, kayaa'na be'na nyɨgaimanɨgɨna? Bulɨmakaawoyai “Aala!” dɨna yaka gyakware yɨta yesa yɨnɨke' sɨvɨlyasɨ tamɨna kyɨwa' daanga wɨvɨmwakabaaibɨ' gɨmɨre Gotɨyarɨ kayaa'na kyɨwaa gɨmɨnyɨna daanga gɨvɨmanɨka.’ 15Wɨ'nena yɨwaara'na ye ‘Naangeigɨ, aaihwaigɨnaka?’

‘Kayaaka nyɨgaimanɨgɨnyainyɨ Jizaazainyɨra. 16Sahwainyɨ kɨrɨ' gɨmɨ dɨthaaka! Sare' dare'nesɨ. “Nɨmɨnyɨ nyɨdaayɨdeigɨ nyɨjalɨkurakɨdeigɨ jɨma'nana!” dena gɨthahɨlakɨde'na bɨweinyɨra. Wawa'gɨzɨ dahaa' nɨmɨnyɨne dɨragɨnya' wangamwaanya'na pwaraavɨ duzalɨkurakɨdeigɨnyɨra. Sara ya'gɨzɨ dɨvi pɨnɨnna gɨzɨwaainɨde'na duthatheigɨnyɨ. 17Yɨzɨrelɨyarajɨ ajɨmya yuyangɨyarajɨ saraayawɨnna kagɨthaasa'mujɨ gɨmɨnyɨ kayaaka kagyapi gɨvadaihasamaarɨdeigɨnyɨ. 18Wɨdaasɨna kagya'mujɨ gɨmɨ wawa'gɨzɨ pwaraavɨre sɨduta mudɨke duzaadeigɨnyɨra. Saataanɨmɨre jɨhɨnyavɨ mwaaidɨvɨsaraavɨ nɨmɨre baaka nawɨ'nyavɨna yɨbwaramakuna jɨtheigɨnyɨra. Saataanɨmɨre kwaasɨdɨragɨnya wasɨ'napɨjɨ Gotɨyare dɨragɨnaanga lɨmwabɨ'derera. Nɨmɨnyɨ kanyɨlɨmwagapɨjɨ kumɨre kayaa'nanya marasɨ'nɨderera. Kamarasɨ'na'mujɨ Gotɨyai dahɨlakakeraayabanna sahwaraavɨ wɨmwaaihadelyɨra,’ Naangei sara nyɨda'.

Polɨ gannya wawɨnya'na wɨjɨwaakake'nesɨ.

19Sarevɨdaa'nyɨ Aahɨripaa Kingɨyaigɨ, sɨgunyavɨdaa'nyɨ sara wɨ'ne' sara mɨdɨmweinyɨra. Sabwi mamarasɨ'nyɨwa. 20Aawa. Sɨnnawɨ Anga Damaazɨkazɨjɨ Anga Jeruzaalemɨjɨ sabanna wɨjɨwaakɨna ye. Dɨvi Kwaaka Juthɨya yuyabajɨ ajɨmya yuyangɨyaraavɨrebajɨ avaaina wɨjɨwaakɨna ye. Ayabwi wasɨ'nadɨvɨ' mudɨkebwi Gotɨyarebwi jawɨramaarila! Sara yapɨjɨ ‘Mudɨkebulyɨyaina sare yaana!’ dapɨjɨ a'mwera tɨnna wanganya'na nayaa sara jɨla! 21Sareinyɨ ye'na Gotɨyare Angevɨ Juyara galalɨmwanna nyeva nyɨrame'. 22Kɨgaa' yuyagaasɨ dahaasɨ Gotɨyai nyɨvainadevɨdaa'nyɨ dava daavɨna yena a'mwe naangeihɨrɨjɨ a'mwe maalɨkeihɨrɨjɨ yuya sahwaihɨrɨ Gotɨyare yagaalya' yɨhɨzalɨkurakɨvanɨge. Yagaala sa' mudɨke' daaka! Aawa, Ne Mozɨzalyɨ Gotɨyarɨ wɨ'nawɨjɨwaakadɨvɨsarajɨ sara avaaina mena nejaasasɨra. 23Dara nejaa' ‘Gotɨyai dahɨlakakei Kɨraazɨtɨyarɨ daanga naanga kuvɨnojɨ balojɨ sɨnnawɨnyai kwaihwaainakei dɨkaavadelyɨra. Dɨvi a'mwe yuyara dɨkaapɨ'derera. Dɨkaavojɨ a'mwe sainaavɨnajɨ ajɨmya yuyangɨyaraavɨnajɨ sainaavɨna nedathe' “A'mwera Gotɨyare nawɨ'nyaba baakeba mwaaibɨ'derera.” Yɨ sahwai baaka naange' a'mweraavɨna wɨjɨwaainadelyɨ.’ ” Polɨ sara wɨda'.

24Polɨ kotɨya'na sara wɨdadaa'nyɨyagaa' Pezɨtaazai jaka wɨda' “Polɨgɨ aa'neigɨnyɨ. Bukuya naanga wanganagɨla naanga yawɨragɨla sɨdu'maayaigɨ dahayɨma'nɨvanɨgɨna?” 25Sai wɨda' “A'mwe naangeigɨ, Pezɨtaazaigɨ, aa'neinyɨ mɨka! Aawa. Yagaala yɨhɨthɨwe nebulyasɨra. Yagaala sɨdu'nakenna yɨhɨthɨwa. 26Kingɨya Aahɨripaagɨ, sare' dare'nesɨ. Sahɨnɨnna yawɨ'mwaanya'na dɨragɨnna gɨthɨwa. Yuya, yɨhɨthɨwe dara yawɨ'mwaanya' ‘O, sara sara daaka!’ Lɨka myulyaryakengɨra. Sare' dare'nesɨ. A'mwera tɨnna wanganyaba ku'maayaba yakengɨra. 27Kingɨya Aahɨripaagɨ, Gotɨyarɨ wɨ'nawɨjaasaraavɨre yagaala dɨlɨmwamanɨgɨna? Sare'na dara yawɨ'mwe' ‘Aahɨripaa kumɨre yagaalya' mena wɨ'nɨvanɨkei daaka!’ ” 28Kujaa' Aahɨripaa sahwarɨ yarai wɨda' “O, nyɨdɨwaanya'na Kɨraazɨtɨyareinyɨ yarai yɨma'nɨjɨwana!”

29Polɨ wɨda' “Gotɨyarɨ wɨdɨvanɨge. Maalɨkegaa' dɨngaka? Naangegaa' dɨngaka? Aahɨripaajɨ pwara kadɨka nyu'nɨvanɨgasarajɨ sara nɨmɨbɨsara yɨma'nɨpɨka! Sara kɨrɨ' senɨyabarajɨ nyɨvwɨyɨnɨkeinyɨra. Sahwara senɨmaayara Kɨraazɨtɨyarera yɨma'nɨpɨka!”

30Sagaa' Kingɨyalyɨ Ga'maanɨya naangelyɨ Benaazasɨ pwara yuyarajɨ daavɨna yeva 31ya'ma'na yeva dɨnyɨna ye' “Tamakya'najɨ kalavuzangevɨ mwaalya'najɨ a'mwe dai kayaa'na myadelyɨra.” 32Sara dɨnyɨna kye' Aahɨripaa Pezɨtaazarɨ wɨda' “Pezɨtaazaigɨ, a'mwe dai ‘Sizaai nɨmɨre yagaalya' wɨ'nana!’ mujazɨ kwajɨ ‘Gɨnnya angevɨna dɨwona!’ kudɨthɨka!” wɨda'.

Currently Selected:

Apozelɨyara 26: byr

Highlight

Compare

Copy