Apozelɨyara 25

Polɨ wɨdake' “A'mwe naangei Sizaarɨ kotɨya'na wɨdɨdeinyɨ.”

1Sarevɨdaa'nyɨ Kwaaka savakɨna Pezɨtaazai bi'ma'na kya' yɨrɨka dawaai dasa wavɨla'na kya' Sizaarɨyadaasɨ Jeruzaalemɨna yɨlaawɨna ya'. 2Jeruzaalemɨna yɨlaawɨna kya' Gotɨyarɨna mubɨthɨka yɨra'dɨvɨta naangerajɨ Juyara a'mwe naangerajɨ sara Polɨmɨna yagaala wɨde'. 3A'mwe sara yawɨ'na “Tusavɨ Polɨmɨ kɨwale lɨvaramaadera,” yawɨ'na yesara Pezɨtaazarɨ kwaasɨ yagaala dɨragɨnna widaangane' “Neya'mweigɨ, nemɨnyɨna kale kagyozɨ Jeruzaalemɨna Polɨmɨna duthasaadeigɨnyɨra.” 4Sarevɨdaa'nyɨ Pezɨtaazai wɨda' “Aalo. Anga Sizaarɨya kalavuzangevɨ Polɨ kamwaaimwa' maalɨkegaa' nɨmɨ sainyɨ ayɨna walaawɨdeinyɨra. 5Sarevɨdaa'nyɨ ‘A'mwe sai kayaa'na yakerɨnera,’ dɨpɨja' Sizaarɨyana nɨmɨjɨ sarɨmɨre a'mwe naangera walaawapɨjɨ kotɨyaba gamɨre kayaa'nanya'na nyɨdɨpɨ'de'nanyɨra.”

6Yɨrɨka pɨjaa' (8 dɨngako? 10 dɨngako?) Jeruzaalemɨ kumɨnyaba Pezɨtaazai mwaalɨna yaka Sizaarɨyana walaawɨna ya'. Walaawɨna yaka mwanya pɨrɨvɨ kotɨnamwaalɨsaba walamwaaina yaka wɨda' “Polɨmɨ dɨmakabyɨla!” 7Kuda' sai bi'ma'na kya' Juyara Jeruzaalemɨdaasara gamɨnyaba daavɨna yeva gamɨnyɨna wɨde' “A'mwe sai kayaa'nanya naanga kwalaalya ya'. Sana sana yɨna ya'.” Sara yesara yagaala nebulya'na Pezɨtaazarɨ mujɨwaaki ye'. 8Mujɨwaaki kye' sahwai kumɨre yagaalya'na wɨrɨvɨkɨra' “Nɨmɨ kayaa'nanyabwi myadɨnyainyɨra. Juya Ne sɨnnawɨnyaraavɨre Kɨwɨnya kayaaka migalye. Gotɨyare Angevɨ gɨrɨka myɨgalakye. Romɨ maremwaaidei a'mwe naanga Sizaarɨna kayaa'na migalye.” 9Sara kuda' Pezɨtaazai yawɨ'na “Juyara yɨlaaya yɨpɨ'de'na!” Yawɨ'na yaka Polɨmɨ yɨwaara'na ya' “Jeruzaalemɨna wawa'gɨzɨ saba nɨmɨnyaba kotɨya dɨnaadeigɨ daaka?” 10Sai wɨda' “Romɨyaihɨre kotɨyaba daa'manɨge. Kotɨya da' daana! Gɨmɨ saigɨ nayaa yawɨ'mwaana ‘Juyaraavɨna Polɨ kayaa'na migalyakelyɨra.’ 11Sarevɨdaa'nyɨ Romɨyaraavɨre kɨwɨnya kayaaka yɨgaimujɨ kwajɨ ‘Gɨnnya kayaa'nanya'na gɨramakaanneigɨ,’ nyɨdɨpɨjɨ kwajɨ yagaala mujainyɨ kabaimudɨkeinyɨra. Sa'na kɨrɨ' kumɨre yagaala nɨmɨnyɨna kwaasɨ yagaala dɨmanɨgasa'na manyɨjaavɨnnera! Kwaaka yuyangɨ maremwaaidei Sizaai nɨmɨre yagaala wɨ'nana!” 12Sara kuda' Pezɨtaazalyɨ gamɨre sɨdu'nakerajɨ dɨnyɨna kye' Pezɨtaazai wɨda' “ ‘Sizaai nɨmɨre yagaala wɨ'nana!’ nedɨwaanya'na Sizaaryawɨnna kagɨthaasa'mujɨ dɨwodeigɨnyɨra.”

Aahɨripaajɨ Benaazasɨ sawaaryaba Polɨ daavake'nesɨ.

13Dɨvi pɨgaa' Anga Sizaarɨyana Kingɨya Aahɨripaajɨ a'mwe Benaazasɨ Ga'maanɨya Pezɨtaazarɨ angyɨrɨ'maasa'na yɨ'ma'na yagi. 14Yɨ'ma'na kyagi sawɨta pɨnɨ jɨnnadaasɨ Pezɨtaazai Kingɨyarɨ Polɨmɨna wɨjɨwaakɨna ya' “Dava Ga'maanɨya Pilɨkɨzai a'mwei kalavuzarɨ ya'ma'na kya' sai mwaalɨ'. 15Jeruzaalemɨ yɨlaawegaa' Juyara Gotɨyarɨna mubɨthɨka yɨra'dɨvɨta naangerajɨ a'mwe naangerajɨ sarɨna nyɨdeva nyɨde' ‘A'mwe kayaa'nanyarɨ duthathera “Kayaa'na yɨgalagɨnya'na gɨramakaadeigɨnyɨ.” ’ 16Sara kanyɨde' kɨrɨ' wɨde, ‘Romɨyaina sara myadaanyainera. Pwara kotɨya' pwarɨna dɨnapɨjɨ a'mweryaba madaayapɨjɨ kotɨyagaala sa' mujɨ kyapɨjɨ a'mwe sarɨ yaasɨwatamya myaanneinera! Aawa, a'mwerajɨ a'mwelyɨ kotɨya' nayaa dɨnapɨjɨ tewaanyabwi yɨma'nadevulyɨra’. Sara wɨde. 17Sarevɨdaa'nyɨ davanna walaabesagaa' myemwaalyɨ yena kɨrɨ' yɨrɨka gave pɨrɨvɨ kotɨnamwaalɨsaba yarai walamwaaina yena aawɨlasaraavɨ wɨdɨwa'de, ‘A'mwerɨ dɨmakabyɨla!’ 18Sara wɨdena ‘Gamɨre kayaa'nanya naangenna kotɨya' wɨdɨpɨ'dera,’ yawɨ'muneinyɨ kamwaaimwa'de gamɨnyɨ maanga wɨdɨvanɨgasara daaveva kayaa'nanaange'na manyɨjɨwa'daava. 19Aawa, kumɨrebwina maanga wɨdɨwa'daava. Sai kumɨ sahwaraavɨre Gotɨyarɨna yɨlaaya gevwi yɨvanɨ'. A'mwe pwai baryai Jizaazai wo'nɨkerɨna maanga wɨdɨwa'daava. Sarɨna Polɨ ‘Jizaazai mwaalɨkelyɨra,’ dadelyɨra. 20Yuya dangɨna yawɨ'na ye, ‘Yagaala nebulya' garane' dɨngaka?’ Yawɨ'na yena Polɨmɨ yɨwaara'na yɨwa'de, ‘Jeruzaalemɨna kwawakwoihɨjɨ yagaala savɨna kotɨya' yɨhu'nɨdeinyɨ daaka?’ 21Sara yɨwaara'na kyɨwa'de kɨrɨ' sai nyɨdɨwa'dɨ' ‘Aalo, sawɨnna muwɨneinyɨ. Kwaaka yuyangɨ maremwaaidei Sizaai nɨmɨre kotɨya' wɨ'nana!’ Sare'na kalavuzangevɨ wothaayaraavɨ wɨdɨwa'de, ‘Kalavuzangevɨ darɨ nayaa dumwaaihyɨla! Dɨvi Sizaaryawɨnna waasɨdehaa'nanyɨra.’ ” 22Kuda' Aahɨripaa Pezɨtaazarɨ wɨda' “Nɨmɨre sɨmunya' daresɨ. Nɨmɨ sainyɨ a'mwe nyɨdɨwaanyarɨ kadɨka wɨ'nɨma!” Pezɨtaazai wɨda' “Mwanyavɨ kamakaba'mujɨ kadɨka du'nadeigɨnyɨra.”

23Sarevɨdaa'nyɨ yɨrɨka pɨrɨvɨ Aahɨripaajɨ Benaazasɨ sawaai baazɨ'ma'nya nawɨ'nya marabaazɨ'ma'nyɨna yagɨla nɨgwɨlalaaka nawɨ'nya mararɨnna yagɨla yagaala wɨ'nya'nebanna wɨna kyagi aawɨlasaraavɨ maremwaaidɨvɨta naangerajɨ angaba mwaalya naangerajɨ sawaarɨna yɨlaaya marina wieva angevɨna nayaa jɨvwaramakuna ye'. Jɨvwaramakuna kye' Pezɨtaazai sara kuda' pwara Polɨmɨ makabɨna ye'. 24Makabɨna kye' Pezɨtaazai wɨda' “Kingɨya Aahɨripaagɨ, pwaihi dava mwaaihasaihi a'mwe darɨ dangamanɨgava! Juya yuyara dava mwaalyarajɨ Jeruzaalemɨ mwaalyarajɨ sara gamɨnyɨna kotɨya' nyɨdɨwa'daa'. Jaka naanga nyɨdɨwa'daa' ‘Sai mamwaalannera!’ 25Jaka sara kanyɨdɨwa'daa' dara bɨ'mwa'de' ‘Ai, a'mwe dai tamakya'na kayaa'na migalyawalyaadɨkei daaka!’ Kadɨwa'de sahwai nyɨdɨwa'dɨ' ‘Kotɨya' Sizaai wɨ'nana!’ Sare'na mena yawɨ'mwa'de. Sizaaryawɨnna waasɨdeinyɨra. 26Sara yawɨ'mwa'de kɨrɨ' gamɨnyɨna Sizaarɨ pɨkarya gara yavɨkaridelaka? Savɨna Kingɨya Aahɨripaagɨjɨ yuyaihɨlyɨ saihɨryabanna sarɨ makabɨna yɨwana. Gamɨre yagaalyavɨ kadɨka wɨ'napɨjɨ nyɨjɨla! ‘Sana sana Sizaarɨ pɨkarya javɨkarya!’ 27Sare' dare'nesɨ. Nɨmɨ dɨwa ‘Kalavuzarɨna gamɨre kayaa'nanyabwi myavɨkari yɨde' yaasɨwa'na yaasɨde'na tewaanya' mɨka!’ sara dɨwana,” wɨda'.

Currently Selected:

Apozelɨyara 25: byr

Highlight

Compare

Copy