Apozelɨyara 27

Anga Romɨna sɨpɨya' Polɨmɨ makwawake'nesɨ.

1Ga'maanɨya naangei nemɨnyɨna dɨna “Kwaaka Yɨtaalina sahwara wɨpɨka!” Dɨna yaka Julɨyaazarɨ Polɨmɨjɨ kalavuzaraavɨjɨ marɨmwangɨna neya'. A'mwe Julɨyaazai Ohazɨtaazare Aawɨlasaraavɨ maremwaaidelyɨra. 2Wɨjaavɨna kaneya' sɨpɨya' Anga Athɨraamitɨyaamɨdaasavɨ yɨlamwaaina yo. Yɨlamwaaina kyo Kwaaka Ezɨya maangebaarɨne sɨpɨya sa' nemakwawo'. A'mwe pwai Arɨzɨtaakazai Kwaaka Maazathonɨya Anga Tezalonaaika mwaalyai nemɨjɨyalyɨ nemakwawo'. 3Nemakwodaasɨ Anga Saaithonɨna yɨ'mavaawɨna yo. Yɨ'mavaawɨna kyo Julɨyaazai Polɨmɨna kale kwia' bwiwanna wɨdɨna ya' “Dava mwaalyara gya'mweraayawɨ angyɨrɨ'maata ja!” Kuda' Polɨ kwawa' gya'mwera wapaayajɨ pɨnɨjɨ wɨjaavɨna ye'. 4Wɨjaavɨna kye' dɨvi sabadaasɨ sɨpɨya' kaanna wɨna yaka Ahu'manna Saaipɨraazɨ pimagɨ yɨhuta naange' yake'na sɨna mwɨyɨ yaka Saaipɨraazɨ pimagɨ yɨhuta maalɨke' yakeba wavɨla'na ya'. 5Wavɨla'na yaka Kwaaka Sɨlɨzɨya Kwaaka Paabɨlɨya saalaalyavɨ ga'ma'na yaka Kwaaka Lɨzɨya Anga Maaira mannɨkebanna makuna neya'. 6Makuna kaneya' aawɨlasaraavɨ maremwaaidei dara wanganake' “Ai, sɨpɨya pɨrɨ' Anga Alekɨzaadɨrɨyadaasa' Kwaaka Yɨtaaline' daaka!” Sara daka sɨpɨya savɨ yɨlawɨmwaaihɨna neya'.

7Sawɨta pɨjaa' yɨhuta'na sɨpɨya sa' kave kave makuna neyaka sɨpɨyavɨ wawɨnya yadɨvɨsara wawɨnya naanga yɨna yɨna kye' Anga Naaithaazɨ sabanna kave makuna neya'. Kave makuna neyaka sɨmagɨ yɨhuta naanga'na mamakwɨyɨ neyaka pimagɨ Ahu'manna Kɨritɨna yɨhuta naanga maayaba makuna neyaka kwaaka maalɨka Saalɨmoni wavɨla'na ya'. 8Wavɨla'na yaka saalaalyavɨ maangebaarɨ maalɨkeba wavɨla'na kya' sɨpɨyavɨ wawɨnya yadɨvɨsara wawɨnya naanga yɨna yɨna kye' Sɨpɨya Wɨla'de Nawɨ'nyaangebanna kavena yɨ'ma'na ya'. Sɨpɨya Wɨla'de Nawɨ'nyaangeba Laazɨya aya kɨba warɨkebanyɨra.

9Saba yemwaaina yemwaaina kyo Juyara wapaaya manyadɨvɨsagaa' mena wavɨla'na kaneya' yɨraaya wanangegaa' yɨma'nyɨna ya'. Wanangegaa' yɨma'nyɨna kya' sɨpɨya yarai kayaakegaa'na Polɨ wɨda' 10“A'mweihi, dara wangamwe' ‘O, dahaasagaa' sɨpɨya kayaaka yadehaa' mena jɨwaka! Nabaai, nemɨre sɨpɨyasɨ sɨpɨyavɨ gɨlyɨvɨsa wɨla'dɨ'nyɨyajɨ sa gave kayaaka yade mɨ'. Aawa. Nemɨ a'mweinaavɨjɨ kayaaka neyade'na daaka!’ Sara dena mwawaannera!” 11Sara kuda' kɨrɨ' aawɨlata maremwaaidei sɨpɨya' maremwaaide naangelyɨ sɨpɨyavɨ gyakwalyɨ saraai wɨdahɨlya' wɨ'nyɨna ya'. Polɨmɨre yagaalya' mu'nyɨ ya'. 12Saba burɨkevɨjɨ yɨhusavɨjɨ sagaa' sɨpɨya' warya' kayaa'nanyasɨra. Sa'ne' sɨpɨyavɨyara naangevaakɨyara yawɨ'na ye' “Kayaaka naneyɨgaladɨka! Sɨpɨya' saalaalyavɨ wawaka anga nawɨ'nya' Pinɨkɨzɨna nemakwona! Saba yɨhusagaa' mwalaadeinera.” Anga saba yɨhusanna lɨka yulyarɨkebera. Nyɨla walakadimagɨ warɨkeba.

Saalaalyavɨ yɨhuta naange' kayaa'na yake'nesɨ.

13Dɨvi saalaalyavɨdaasɨ yɨhuta maalɨke' yadaa'nyɨ a'mwera yawɨ'na “Tewaanyasɨ. Dɨmwo'na kaanyaana!” Yawɨ'na yeva wɨla yaarɨna kye' Ahu'manna Kɨritɨ maangebaarɨ sɨpɨya' makuna neya'. 14Maalɨkegaa' makuna neyadaa'nyɨ sagaa' yɨhu'maanarya' Notizɨta wo'nɨke' ahu'mannyavɨdaasɨ yarai yɨna. 15Yarai yɨna yaka sɨpɨyavɨ yɨtavamakuna kya' sɨpɨya' sɨna yɨna mwɨyɨ kya' nemɨ yawɨ'na “Yɨhuta naange'na sɨpɨya' yɨtavamakwawana!” Yawɨ'na kyo yɨhusa' yɨtavamakuna ya'. 16Yɨtavamakuna kya' Ahu'manna maalɨka Kothaa yɨhuta kɨbaweyaba a'mwera “Botɨya maalɨke' kayaaka nyadɨka!” deva botɨya maalɨke' dusɨmagɨ warake'na wawɨnya naange' yona yɨlamaarakɨna yo. 17Nemɨjɨyara botɨya maalɨke' mwagi'namaa'na yeva sɨpɨya naangevɨ yɨlamarakɨna ye'. Yɨlamarakɨna yeva “Sɨpɨya' dɨragɨnya yɨvaimwagaana!” deva wɨlyajɨ yunebanna pwɨyɨna ye'. Pwɨyɨna yeva “We', siwekeyaba Kwaaka Lɨvya (Kwaaka Apɨrika) nemɨre sɨpɨya' kayaaka nyadɨka!” deva sɨpɨzelɨya' yɨvɨta naangeva'bɨsa' marapwɨyɨna kye' yɨhuta sa' sɨpɨya' yɨtavamakuna ya'. 18Yɨtavamakuna yaka yɨrɨka pɨrɨkɨ yɨhuta naange' kuna kya' “Sɨpɨya' tewaanya warade'nanyɨ,” deva saalaalyavɨna sɨpɨyavɨ wɨla'dɨ'nyɨya gaai marasɨ'na marasɨ'na yeva 19yɨrɨka pɨrɨkɨ kunnya asajɨ sɨpɨyavɨre gɨlyɨvɨta taanga marasɨ'na ye'. 20Marasɨ'na kye' kayaa'nanyagaa' yɨrɨka pɨnɨngɨ nyɨlyalyɨ sɨlɨngaamɨnyarɨkajɨ saraavɨ tɨnna mwanganyɨ mwanganyɨ kyo yuyagaa' yɨhuta naange' kuna yɨna yɨna ya'. Kuna yɨna yɨna kya' nemɨ yawɨ'na “We', yuyaina mwalaadeina mɨka! Balaadeinera nemɨ, we'.”

21Sawɨta pɨjaakuna a'mwera manyadaapɨjɨ kumɨnyɨ tɨnnyaba Polɨ daavɨna yaka wɨdɨna “Nya'mweihi, yɨhɨthɨwɨja' wɨ'napɨjɨ kwajɨ Ahu'manna Kɨritɨ mya'mayɨ kyɨpɨdɨka. Sara yɨpɨjɨ kwajɨ kayaaka kaneyadɨ' mɨ'. Sara yɨpɨjɨ kwajɨ sɨpɨyavɨya gɨlyɨvɨsa mamarasɨ'nyɨ kyaadɨka! 22Sa'na kɨrɨ' naanga yɨhɨthɨma! Lɨka mipɨnera! A'mwe yuyaina mabalyɨ yaadeinera. Sɨpɨya gave' kayaaka yɨnadesɨ. 23Sare' dare'nesɨ. Nɨmɨ Gotɨyareinyɨ Gotɨyarɨ yɨlaaya yadɨnyalyɨ. Sawɨsavɨ Gotɨyai sare ejelɨyai nɨmɨnyawɨnna baka 24nyɨjawaalɨ' ‘Polɨgɨ, lɨka minna! Kayaaka gyatheigɨ mɨ'. A'mwe naangei Sizaaryaba dɨthaa'deigɨnyɨra. Nabaai, Gotɨyai gɨmɨnyɨna yange'na yɨhɨgaimwamanɨke'na sɨpɨyavɨ wɨlamwaaihata yuyarajɨ tewaanna dɨmwaalyideihɨlyɨra.’ 25Sara nyɨjawaalɨke'na lɨka mipɨnera! Sare' dare'nesɨ. ‘Gotɨyai nyɨjawaalɨke' nebulya'na yɨma'nadesɨra,’ sara lɨmwaga'manɨge. 26Sa'na kɨrɨ' ahu'manna pɨrɨvɨ nemɨre sɨpɨya' kayaaka yɨnadesɨra,” wɨda' Polɨ.

27Yɨhu'maanarya' kuna yadaasɨ sawɨta kwalaalya (14) nevɨlavakegaa' sawɨta savɨ saalaalya Methɨtɨranɨyanɨ sabanna yɨhusa' nemɨre sɨpɨya' yɨtavamakuna ya'. Yɨtavamakuna yadaa'nyɨ sawɨta kalawawegaa' sɨpɨyavɨ wɨdaayadɨvɨsara sɨmunya dara yawɨresa' “Ai, aya kɨba kwaakeva' darɨka!” 28Sara deva aalyavɨ wɨlyabaai taanginya pwɨyɨnɨkebaai makwaasɨna yeva yaamɨjɨ wanganeva aalya damwineba saamɨnaanga mitaaya 36 tɨnna wanganna ye'. Tɨnna wanganna yeva dɨvi maalɨkegaa' wɨlyabaai ayawɨ makwaasɨna yeva aalya damwineba saamɨnya kɨbawe mitaaya 27 tɨnna wanganna ye'. 29Tɨnna wanganna yeva lɨka yɨna yeva “Sɨlaangengɨ nemɨre sɨpɨya' kayaaka nyadɨka! Dava sɨpɨya' warade'nanyɨ. Sɨpɨya' nawodɨka!” deva sɨpɨyavɨ dusɨmagɨ kwaari'mayagɨnya nadɨya dawaai dawaalyangɨ makwaasɨna ye'. Makwaasɨna yeva “We', yɨrɨke' yarai purana!” deva tɨbarɨyagaala dɨna dɨna ye'. 30Tɨbarɨyagaala dɨna dɨna yeva sɨpɨyavɨ wawɨnya yadɨvɨsara dɨnyɨna ye' “Nabalaadɨka! Davɨdaasɨ kaanyaana!” Dɨnyɨna yeva pwaraavɨ kwaasɨ wɨdɨna “Sɨpɨya sɨnnyɨmagɨ kwaari'mayagɨnya nadɨyangɨ wakaana!” Kwaasɨ wɨdɨna yeva aalyavɨ botɨyavɨ lɨka yulya'na walakɨna yadɨvɨ' yadaapɨjɨ 31Polɨ tɨnna wanganaka aawɨlasaraavɨ maremwaaidelyɨ aawɨlasarajɨ saraavɨ wɨdɨna ya' “Sɨpɨyavɨ wawɨnya yadɨvɨta dara milamwaalyɨpɨja' tewaanya myɨvainyɨ jideihɨlyɨra.” 32Sara wɨdɨna kya' aawɨlasara botɨya' pwɨyɨnɨke wɨlyangɨ yarai yesɨwɨ'na kye' aalyavɨna gamɨ sa' wɨna ya' botɨya'.

33Yɨrɨkunyagaa' wapaaya tɨka nya'na Polɨ yuyaraavɨ naanga widaangana' “Yɨrɨka atɨraai sɨvɨla purɨdaasɨ dawaai dawaai nevɨla'daasɨ sɨmunya kwalaalya yawɨ'dɨvɨ' wapaaya manyadɨvɨ' mwaaimanɨgasaihɨlyɨra. 34Naange'nanyabwi yɨhɨthɨma! Wapaaya dɨnyɨla! Sare' dare'nesɨ. Napɨjɨ dɨragɨnya dɨmwaalyidera. Yuyaihi, kayaaka jɨnyideihi mɨ'. Sare' dare'nesɨ. Sarɨmɨre mɨjata aane pɨrɨ' kɨrɨ' kayaaka yade' mɨ'.” 35Wɨdɨna yaka Polɨ gɨrɨkula maarɨna yaka kumɨnyaba Gotɨyarɨ “Su! Su!” wɨdɨna yaka gɨrɨkula gunyɨna yaka nyɨna ya'. 36Nyɨna yadaasɨ yuyara pwara Polɨ yakabaaibɨ' dɨragɨnna yɨna yeva wapaaya nyɨna ye'. 37Sɨpɨyavɨ nemɨ yuyaina a'mwe 276 mwaaloinera. 38Yuyara wapaaya mena neva “Sɨpɨya taanginya' daaka!” dɨneva aalyavɨ witɨzɨla yuya marasɨ'na marasɨ'na ye'.

Sɨpɨya' kayaaka yɨgalake'nesɨ.

39Yɨrɨka mena purɨna kya' sɨpɨyavɨ wawɨnya yadɨvɨsara kwaakeva' tɨnna wanganeva dɨnyɨna “Kwaaka be kwaakavakaka?” Dɨnyɨna yeva dara wanganesa' “Keiba tewaanyaba daaka! Siweka gaveba daaka!” Deva “Maangebaarɨ nawɨ'nyabanna sɨpɨya' wɨlaawana!” dɨnyɨna ye'. 40Dɨnyɨna yeva kwaari'mayagɨnya nadɨya pwɨyɨnɨkebara yesɨwɨ'na kye' aalyavɨ wa'dɨ'nyɨ palaanɨya saamɨnyawaai sɨpɨya' gɨnyɨwannakewaai pwɨyɨnɨkebaraavɨ yaarɨna. Mena yaarɨna yeva “Yɨhusa' nemakwawana!” dɨna yeva sɨnnyɨmagɨ selɨya maalɨke' tɨmudaakuna kye' maangebaarɨna sɨpɨya' wɨna ya'. 41Wɨna yadaasɨ aalya amwinevɨ ahu'manna wekejɨkɨ tamaka pɨbanna mwɨyɨ yɨna ya'. Sɨpɨya sɨnnya' dɨragɨnna warɨna yadɨ'nyɨ dusɨmagɨnya' aalyasɨ yɨhusasɨ dɨragɨnna dɨragɨnna tamɨna yɨna kya' sɨpɨya dusɨmagɨnya' kayaaka yɨnyɨna yaka warɨna ya'.

42Aawɨlasara yawɨ'na “Maangebaarɨna kalavuzara lɨ'napɨjɨ lɨkaanya nupɨdɨka! Tamakaana!” 43Yawɨ'na kye' kɨrɨ' aawɨlasaraavɨ maremwaaidei yawɨ'na “Polɨmɨ yɨvainɨma!” Yawɨ'na yaka “Saraavɨ maramakɨpɨnera!” Wɨdaka yuyainaavɨ neda' “A'mwe pwaihi lɨ'nadɨvɨsaihi, aalyavɨ dɨkwosɨ'napɨjɨ maangebaarɨna dɨlɨ'nɨgulaawila! 44Pwaihi, palaanɨyajɨ yɨsajɨ kalɨmwagapɨjɨ maangebaarɨna yɨhusa' yɨhitawaasadera.” Sara wɨdɨna kya' sara yona maangebaarɨna yuyaina tewaanna yɨ'ma'na yo.

Currently Selected:

Apozelɨyara 27: byr

Highlight

Compare

Copy